டி.சி.எஸ். நான்காம் காலாண்டு நிகர லாபம் – ரூ.9,246 கோடி

டி.சி.எஸ். நான்காம் காலாண்டு நிகர லாபம் – ரூ.9,246 கோடி 

TCS reported a Net profit of Rs. 9,246 Crore in Q4FY21

தகவல் தொழில்நுட்ப துறையில் நாட்டின் முதன்மை நிறுவனமாக விளங்கும் டாட்டா கன்சல்டன்சி சர்வீசஸ்(TCS) 12 லட்சம் கோடி ரூபாய் சந்தை மூலதனத்தை கொண்டது. இதன் முக்கிய வாடிக்கையாளர்களாக உலகின் தலைசிறந்த நிறுவனங்களான கூகுள், அமேசான், அடோப், ஆரக்கிள், இன்டெல், ஆப்பிள், போஸ்ச், ஐ.பி.எம். போன்றவை உள்ளன.

நிறுவனத்தின் முதல் 50 வாடிக்கையாளர்கள் மூலம் மட்டுமே ஆண்டுக்கு 100 மில்லியன் அமெரிக்க டாலர்களை வருமானமாக ஈட்டுகிறது டி.சி.எஸ். டாட்டா குழுமத்தை சேர்ந்த டி.சி.எஸ். நிறுவனத்தின் பணியாளர்கள் எண்ணிக்கை சுமார் 4.7 லட்சம். இவற்றில் பெண்களின் பங்களிப்பு 37 சதவீதம் என்பது குறிப்பிடத்தக்கது.

நிறுவனத்தின் வருவாய் பெரும்பாலும் வங்கிகள், நிதி சேவை மற்றும் காப்பீட்டு துறையின்(BFSI) மூலம் பெறப்படுகிறது. டி.சி.எஸ். நேற்று(12-04-2021) தனது 2020-21ம் நிதியாண்டுக்கான காலாண்டு முடிவுகளை வெளியிட்டது. மார்ச் 2021 காலாண்டில் நிறுவனத்தின் வருவாய் 43,705 கோடி ரூபாயாகவும், செலவினம் ரூ. 30,904 கோடியாகவும் இருந்துள்ளது.

இயக்க லாபம்(Operating Profit) ரூ.12,801 கோடியாகவும், இதர வருமானம் 931 கோடி ரூபாயாகவும் சொல்லப்பட்டுள்ளது. வரிக்கு முந்தைய லாபம் 12,527 கோடி ரூபாயாக உள்ளது. சொல்லப்பட்ட காலாண்டில்(Quarterly results) நிகர லாபம் ரூ.9,246 கோடி. அதாவது பங்கு ஒன்றின் மீதான வருவாய்(EPS) 25 ரூபாயாக இருந்துள்ளது.

முந்தைய மார்ச் 2020 காலாண்டுடன் ஒப்பிடும் போது தற்போதைய வருவாய் 9.5 சதவீதமும், நிகர லாபம் 15 சதவீதமும் வளர்ச்சி பெற்றுள்ளது. 2020-21ம் நிதியாண்டில் ஒட்டுமொத்தமாக காணும் போது நிறுவனத்தின் வருவாய் ரூ.1,64,177 கோடியாகவும், நிகர லாபம் ரூ.32,430 கோடியாகவும் உள்ளது. கடந்த 2019-20ம் வருடத்துடன் ஒப்பிடுகையில் ஒட்டுமொத்த வருவாய் 4.6 சதவீத ஏற்றமடைந்துள்ளது. அதே வேளையில் நிகர லாபத்தில் பெரிதான மாற்றமில்லை.

மார்ச் 2021ம் நிதியாண்டு முடிவில் இருப்புநிலை கையிருப்பு(Balance sheet Reserves) 86,063 கோடி ரூபாய். பங்கு மூலதனத்தின் மீதான வருவாய்(ROE) கடந்த ஒரு வருடத்தில் 39 சதவீதமாக உள்ளது. வருவாய் வளர்ச்சியை காணும் போது, கடந்த பத்து வருட காலத்தில் 16 சதவீதமாக இருக்கிறது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

பங்குச்சந்தை முதலீட்டாளர்களுக்கான மூன்று முதலீட்டு உத்திகள்

பங்குச்சந்தை முதலீட்டாளர்களுக்கான மூன்று முதலீட்டு உத்திகள் 

Investing Strategies for the Equity Investors

பங்குச்சந்தையில் குறுகிய கால முதலீட்டாளர்களை விட நீண்ட கால முதலீட்டாளராக இருப்பது அப்படி ஒன்றும் கடினமான வேலையல்ல. அதனால் தான் திருவாளர் வாரன் பப்பெட் அவர்கள், ‘யாரும் மெதுவாக அல்லது பொறுமையாக பணக்காரராக விரும்புவதில்லை’ என்கிறார். நீண்ட காலத்தில் காத்திருந்து செல்வத்தை ஏற்படுத்த சந்தையில் காணப்படும் இரைச்சல்களை(Daily News noise) கண்டுகொள்ளாமல் இருப்பதும், சற்று பொறுமையும் இருந்தால் போதும். பங்குச்சந்தை அடிப்படை பகுப்பாய்வை(Fundamentals) பூர்த்தி செய்யும் நல்ல நிறுவன பங்குகள் குறுகிய காலத்தில் ஏற்றம் பெறாவிட்டாலும், நீண்டகாலத்தில் ஒரு முதலீட்டாளர் எதிர்பார்ப்பதை காட்டிலும் நல்ல வருவாயை அளித்துள்ளது வரலாற்று சான்று.

உதாரணமாக ரிலையன்ஸ் இண்டஸ்ட்ரீஸ், இந்துஸ்தான் யூனிலீவர், ஐ.டி.சி., விப்ரோ போன்ற பெரு நிறுவனங்கள் சில வருடங்கள் பக்கவாட்டு விலையில் மட்டுமே நகர்ந்ததை சொல்லலாம். அந்த சமயத்தில் மற்ற நிறுவன பங்குகள் பெரிய ஏற்ற-இறக்கத்திற்கு உட்பட்டாலும், நாம் சொன்ன பெரு நிறுவன பங்குகள் தொழிலில் வளர்ச்சி கண்டிருந்தும், பங்கு விலையில் அதிகம் ஏற்றம் பெறாமல் இருந்தன. இருப்பினும் அதற்கான சுழற்சி கால முறை வந்த சமயங்களில் அவை இன்று முதலீட்டாளர்களுக்கு அதிகப்படியான லாபத்தை அளித்துள்ளன.

முதலீட்டுக்கான உத்தி(Investing Strategy) எனும் போது நீண்டகால முதலீட்டாளர்கள் புரிந்து கொள்ள வேண்டிய விஷயங்கள் மூன்று…

  • இரைச்சல்களுக்கு செவி சாய்க்காதீர்கள் – சந்தையில் அவ்வப்போது நிகழும் சலசலப்புகளுக்கு இடம் கொடுக்காமல் நீண்டகால நோக்கில் முதலீடு செய்து வருவது நிதி இலக்கு சார்ந்த நன்மையை அளிக்கும். நிறுவனத்திற்கு ஒரு ஆர்டர் வந்துள்ளது என அவசரமாக ஒரு நிறுவன பங்கில் முதலீடு செய்து வருவது, பிரபலமான பெரு முதலீட்டாளர் ஒருவர் இந்த பங்கில் முதலீடு செய்கிறார் என நாமும் முந்தி கொள்வது, கடந்த சில வாரங்களாக ஒரு குறிப்பிட்ட பங்கின் விலை நாள்தோறும் விலையேற்றம் பெறுகிறது என முதலீடு செய்வது, அடிப்படை பகுப்பாய்வை பூர்த்தி செய்யாத சிறு மற்றும் குறு நிறுவன பங்குகளில்(Penny Stocks) விலை குறைவாக இருக்கிறதே, வாங்கிய சில நாட்களில் இரட்டிப்பு லாபம் பார்த்து விடலாம் என சூதாடுவது போன்ற வேலைகளை நாம் செய்ய வேண்டாம்.
  •  உங்களது ரிஸ்க் தன்மையை புரிந்து கொள்ளுங்கள் – நம்மால் எந்தளவு ரிஸ்க் தன்மையை எடுக்க  முடியுமோ அந்தளவு தான் நமது முதலீட்டு போர்ட்போலியோ முறையும் இருக்க வேண்டும். இந்தியாவின் வாரன் பப்பெட் என்றழைக்கப்படும் திரு. ராகேஷ் ஜூன்ஜூன்வாலா என்னென்ன பங்குகளை தனது போர்ட்போலியோவில் வைத்திருக்கிறாரோ அதனையே நாமும் வாங்கி வைத்திருக்க நினைப்பது, பெருத்த இழப்பை தான் நமக்கு தரும். அவரது முதலீட்டு முடிவையும், ஒரு நிறுவனத்தின் இயக்குனர் குழுவில் அவர் பங்கேற்கும் உத்தியையும் நாம் பின்பற்ற முடியாது. ஒரே நாளில் ரூ.5,000 கோடியை இழப்பதற்கு அவர் தயாராக இருப்பார். ஆனால், நாம் ?
  • அடிப்படை கற்றலை எப்போதும் மேற்கொள்ள வேண்டும் –  எந்த துறையை அல்லது பங்குகளை நம்மால் புரிந்து கொள்ள முடியுமோ அவற்றில் மட்டுமே முதலீடு செய்ய வேண்டும். புரிந்து கொள்ள முடியவில்லை எனில், கற்று கொள்வதற்கு தயாராக இருக்க வேண்டும். உங்களுக்கு பங்குகளை அலச நேரமில்லா விட்டால், பரஸ்பர நிதி திட்டங்களின் மூலம் பங்கு சார்ந்த முதலீடு செய்து வருவது போதுமானது. நீண்ட கால முதலீட்டில் நட்டம் அல்லது இழப்பு என்ற நிலை எப்போதும் இல்லை. (நீங்களாகவே தவறான பங்குகளை, தவறான விலையில் வாங்கி  பின்னர் விற்றால் மட்டுமே அது நட்டம் ). எனவே கற்றலுக்கு முக்கியத்துவம் தாருங்கள். உங்களுக்கு அருகில் ஏதேனும் நிதி அல்லது பங்குச்சந்தை சார்ந்த கூட்டம் நடைபெற்றால், அவற்றில் கலந்து கொண்டு அடிப்படை கல்வியை கற்று கொள்ளலாம். இணையம் வழியாக நடைபெறும் நிகழ்வுகளில் பங்கேற்று நமது பங்குச்சந்தை சார்ந்த அறிவை பெருக்கி கொள்ளலாம். (எச்சரிக்கை: அதற்காக சிறு முதலீட்டை கொண்டு லட்சங்களாகவும், கோடிகளாகவும் மாற்றி தருகிறேன் என்ற மோசடி பேர்வழிகளிடம் மாட்டி கொள்ளாதீர்கள்) 

நீண்ட கால முதலீட்டாளர் என சொல்லும் போது அது பங்குச்சந்தைக்கு மட்டுமே இல்லை. பொருளாதார மந்தநிலை காலங்களை சமாளிக்க மற்ற முதலீட்டு சாதனங்களை தேர்ந்தெடுக்கும் அஸெட் அலோகேஷன்(Asset Allocation) முறையை பின்பற்றுவதும் அவசியம். நிதி சார்ந்த பாதுகாப்பு முறையை(டேர்ம் இன்சூரன்ஸ், மருத்துவ காப்பீடு, அவசர கால நிதி, கடனில்லா தன்மை, உடல்நலம்), சந்தையில் முதலீடு செய்வதற்கு முன்பு உறுதி செய்திருந்தால் நல்லது. பங்குகள், கடன் பத்திரங்கள், வீட்டுமனை, தங்கம், ரொக்கம் மற்றும் பிற முதலீட்டு சாதனங்கள் என முதலீட்டு பரவலாக்கத்தை கொண்டிருப்பது நல்லது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் பொருளாதாரத்தில் அடுத்தகட்ட நிலை என்ன ? மத்திய ரிசர்வ் வங்கி

நாட்டின் பொருளாதாரத்தில் அடுத்தகட்ட நிலை என்ன ? மத்திய ரிசர்வ் வங்கி 

REPO Rate unchanged, the next step on Nation’s Growth – RBI Monetary Policy

 

கடந்த திங்கட்கிழமை(05-04-2021) மத்திய நிதிக்கொள்கை குழு சார்பில் நடைபெற்ற கூட்டம் இன்றுடன் முடிவடைந்தது. கூட்டத்தின் முடிவில் வங்கிகளுக்கான ரெப்போ வட்டி விகிதம் சார்ந்த தகவலும், நாட்டின் பொருளாதார வளர்ச்சி சார்ந்த அறிக்கைகளும் பாரத ரிசர்வ் வங்கி சார்பில் வெளியிடப்பட்டது.

 

தொடர்ச்சியாக ஐந்தாவது முறை வங்கிகளுக்கான ரெப்போ வட்டி விகிதத்தில் மாற்றமில்லை என மத்திய ரிசர்வ் வங்கி கூறியுள்ளது. நடப்பில் ரெப்போ வட்டி விகிதம் 4 சதவீதமாக உள்ளது. இது போல ரிவர்ஸ் ரெப்போ வட்டி விகிதத்திலும்(Reverse REPO) எந்த மாற்றமுமின்றி 3.35 சதவீதமாக தொடரும் என சொல்லப்பட்டுள்ளது.

 

நீடித்த அடிப்படையில் வளர்ச்சியை தக்கவைக்க தேவையான அளவிற்கு நிலைப்பாட்டை தொடரவும், பணவீக்கத்தை கட்டுக்குள் வைத்திருக்கவும் நடவடிக்கைகள் எடுக்கப்பட்டுள்ளதாக தெரிவிக்கப்பட்டுள்ளது. குறுகிய காலத்தில் நாட்டின் பணவீக்கம் ஏற்ற-இறக்கத்திற்கு உட்படலாம் எனவும், அதனை சார்ந்து தான் தற்போதைய வங்கி வட்டி விகித முடிவு எடுக்கப்பட்டுள்ளது என பாரத ரிசர்வ் வங்கி(RBI) கூறியுள்ளது.

 

நடப்பில் காணப்படும் கொரோனா வைரஸ் இரண்டாவது அலை அதிகமாகி வரும் நிலையில், தடுப்பூசி திட்டம் சற்று சாதகமாக உள்ளது. எனினும் வரும் காலங்களை எச்சரிக்கை தன்மையாக கொண்டு பொருளாதார வளர்ச்சி மற்றும் பணவீக்கம் சார்ந்த அறிக்கைகள் மதிப்பிடப்பட்டுள்ளது.

 

பிப்ரவரி மாத சில்லரை விலை பணவீக்கம்(CPI Retail Inflation) 5.03 சதவீதமாக சொல்லப்பட்டிருந்த நிலையில், நடப்பு நிதியாண்டின் முதல் காலாண்டில்(ஏப்ரல்-ஜூன்) 5.2 சதவீதமாக இருக்கும் எனவும், ஜூலை-செப்டம்பர் காலாண்டிலும் இதே அளவு தொடரும் எனவும் சொல்லப்பட்டிருக்கிறது.

 

2021-22ம் நிதியாண்டின் மூன்றாம் காலாண்டில் சற்று குறைந்து 4.4 சதவீதமாகவும், நான்காம் காலாண்டில் இது 5.1 சதவீதமாக அதிகரிக்கலாம் என பாரத ரிசர்வ் வங்கி தெரிவித்துள்ளது. 2025-26ம் நிதி ஆண்டின் மார்ச் மாதம் வரை பணவீக்க இலக்கு 2-6 சதவீதம் என்ற அளவில் இருக்கும் என நிதிக்கொள்கை குழு கூட்ட முடிவில் சொல்லப்பட்டுள்ளது.

 

Consumer Confidence - CI - RBI Policy April 2021

 

வேகமாக வளர்ந்து வரும் பொருளாதார நாடுகளில் பணவீக்க விகிதம், நிர்ணயிக்கப்பட்ட இலக்குகளை விட சற்று அதிகமாக உள்ளது குறிப்பிடத்தக்கது. உலகளவில் காணப்படும் சந்தை பொருட்களின் விலை அதிகரிக்க தொடங்கியதும் இதற்கு காரணமாக உள்ளது. கடந்த ஆண்டினை ஒப்பிடும் போது, நடப்பில் உலக பங்குச்சந்தைகளும், அரசு பத்திரங்களுக்கான வட்டி விகிதமும் அதிகரித்து வருவது கவனிக்கத்தக்கது. உலகளவில் காணப்படும் ஒருவித நிலையற்ற தன்மையும், சந்தை மதிப்பு ஏற்றமும் தற்போது விற்பனை அழுத்தத்தினை ஏற்படுத்தியுள்ளது. இதனால் பெரும்பாலான சந்தையில் பங்குகள் விற்பனை அதிகரித்து வருகிறது. 

 

கொரோனா பெருந்தொற்றுக்கு பிறகான பொருளாதார ஊக்குவிப்பு காரணமாக, வரக்கூடிய காலத்தில் நாட்டின் வளர்ச்சி சாதகமான தன்மையை கொண்டிருக்கும் என மத்திய வங்கி கூறியுள்ளது. இரண்டாவது அலை  காரணமாக பெரும்பாலான மாநிலங்களில் நுகர்வோர்களின் நம்பிக்கை குறைந்துள்ளது. இதனையும் கருத்தில் கொண்டு, 2021-22ம் நிதியாண்டில் நாட்டின் பொருளாதார வளர்ச்சி 10.5 சதவீதமாக இருக்கலாம் என மதிப்பிடப்பட்டுள்ளது.

 

அதாவது ஏப்ரல்-ஜூன் 2021 காலாண்டில் நாட்டின் மொத்த உள்நாட்டு உற்பத்தி வளர்ச்சி(GDP growth) 26.2 சதவீதமாகவும், இது இரண்டாம் மற்றும் மூன்றாம் காலாண்டுகள் முறையே 8.3 சதவீதம் மற்றும் 5.4 சதவீதமாக இருக்கும் என சொல்லப்பட்டுள்ளது. நடப்பு நிதியாண்டின் நான்காம் காலாண்டில்(ஜனவரி-மார்ச் 2022) 6.2 சதவீதமாக மதிப்பிடப்பட்டுள்ளது.

 

வாழ்க வளமுடன்,

 

நன்றி, வர்த்தக மதுரை 

 

www.varthagamadurai.com

 

சிறு சேமிப்பு திட்டங்களுக்கான வட்டி விகிதம் – ஏப்ரல் 2021

சிறு சேமிப்பு திட்டங்களுக்கான வட்டி விகிதம் – ஏப்ரல் 2021

Small savings scheme interest rate for the Period – April to June 2021

சிறு சேமிப்பு திட்டங்களுக்கான வட்டி விகிதம் காலாண்டுக்கு ஒரு முறை மத்திய அரசால் அறிவிக்கப்பட்டு வருகிறது. அஞ்சலகங்கள் மற்றும் வங்கிகளில் காணப்படும் சேமிப்பு திட்டங்கள் பெரும்பாலும் சிறு சேமிப்பு திட்டங்களின் கீழ் தான் வருகிறது. கடந்த சில காலங்களாக சிறு சேமிப்புக்கான வட்டி விகிதம் குறைந்து வருவது கவனிக்கத்தக்கது.

2021-22ம் நிதியாண்டின் முதல் காலாண்டுக்கான வட்டி விகிதம் நேற்று(31-03-2021) அறிவிக்கப்பட்டுள்ளது. இந்த வட்டி விகித அறிவிப்பு நடப்பு ஏப்ரல் முதல் ஜூன் வரையிலான காலத்திற்கு பொருந்தும்.

சிறு சேமிப்பு கணக்கு, வைப்பு கால நிதி(Term Deposit), மாத வருவாய் திட்டம், தேசிய சேமிப்பு பத்திரம், மாதாந்திர சேமிப்பு திட்டம்(RD), மூத்த குடிமக்களுக்கான சேமிப்பு திட்டம், பொது வருங்கால வைப்பு நிதி(PPF), கிசான் விகாஸ் பத்திரம் மற்றும் பெண் குழந்தைகளுக்கான செல்வமகள் திட்டம் ஆகியவை மத்திய நிதி அமைச்சக சிறு சேமிப்பு திட்டத்தின் கீழ் வருபவை.

கடந்த புதன் கிழமையன்று பெரும்பாலான திட்டங்களின் வட்டி விகிதங்கள் குறைக்கப்பட்ட நிலையில்(அட்டவணையில் பார்க்க), மறுநாளே அந்த அறிவிப்பை மத்திய அரசு திரும்ப பெற்று கொண்டது குறிப்பிடத்தக்கது. ஏற்கனவே இருந்த (ஜனவரி-மார்ச் 2021) வட்டி விகிதமே ஏப்ரல் முதல் ஜூன் வரையிலான காலத்திற்கு தொடரும் எனவும் அரசு சார்பில் தெரிவிக்கப்பட்டுள்ளது.

small-savings-scheme-interest-rates-apr-2021
Small Saving Scheme Interest Rates

வெளியிட்ட அறிவிப்பை மத்திய அரசு திரும்ப பெற்றுக்கொண்டது பலருக்கு அதிசயமூட்டும் நிகழ்வாக இருந்தாலும், மாநில தேர்தலை காரணம் காட்டி இந்த நிகழ்வு நடந்திருக்கலாம் என பொருளாதார வல்லுநர்கள் தெரிவிக்கின்றனர். நாட்டின் மொத்த சிறு சேமிப்பு தொகையில்(Gross Collection) தமிழகம், மேற்கு வங்கம், அசாம் மற்றும் கேரளா ஆகிய மாநிலங்கள் மட்டும் 24 சதவீத பங்களிப்பை கொண்டுள்ளது.

2019-20ம் நிதியாண்டில் சிறு சேமிப்பு திட்டத்தின் மூலம் பெறப்பட்ட தொகை 8.46 லட்சம் கோடி ரூபாய். பெறப்பட்ட தொகையை கணக்கில் கொள்ளும் போது, மேற்கு வங்கத்தில் இருந்து சுமார் 15 சதவீத தொகை பெறப்பட்டுள்ளது. இரண்டாவது இடத்தில் உத்திர பிரதேசமும் மற்றும் மூன்றாவது இடத்தில் மகாராஷ்டிரா மாநிலமும் உள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

ரிஸ்க் தன்மைக்கான மதிப்பீடு(Risk Profiling)

ரிஸ்க் தன்மைக்கான மதிப்பீடு(Risk Profiling)

எந்தவொரு முதலீட்டை துவக்கும் முன், உங்களை நீங்களே பரிசோதனை செய்து கொள்வது நல்லது. ரிஸ்க் புரொபைலிங்(Risk Profiling) என்று சொல்லக்கூடிய சுய பரிசோதனை மூன்று நிலையை கொண்டது.

  • தேவை(Risk Required)
  • திறன்(Risk Capacity)
  • சகிப்புத்தன்மை(Risk Tolerance)

உதாரணமாக நீங்கள் பங்குச்சந்தையில் முதலீடு செய்ய உள்ளீர்கள் என வைத்து கொள்வோம். பங்குச்சந்தை என்பது ரிஸ்க் தன்மை அதிகம் கொண்ட முதலீட்டு சாதனம் என்பதனை நாம் அறிவோம். சந்தையில் ஏற்ற-இறக்கம் என்பது குறுகிய காலத்தில் அதிகமாகவும், நடுத்தர காலத்தில் மிதமாகவும் மற்றும் நீண்ட காலத்தில் முதலீடு செய்யும் நிலையில் குறைவாகவும் இருக்கும். இதனை நாம் தவிர்க்க இயலாது. இதனை தான் நாம் சந்தைக்கான ரிஸ்க் தேவை என்கிறோம். இந்த தேவையை புரிந்து கொண்டு தான் பங்குச்சந்தை முதலீட்டை மேற்கொள்ள வேண்டும்.

இரண்டாவதாக சொல்லப்படுவது உங்களது ரிஸ்க் திறன். சந்தையில் முதலீடு செய்யும் போது ஏற்படும் ரிஸ்க் அல்லது ஆபத்தை கையாள உங்களிடம் போதுமான திறன் உள்ளதா என்பதனை இந்த நிலை கூறும். உங்களுடைய வருவாய் எவ்வளவு, சந்தையில் நீங்கள் எவ்வளவு தொகையை முதலீடு செய்ய உள்ளீர்கள், சந்தையில் நட்டம் ஏற்பட்டால், நீங்கள் மற்றும் உங்களது குடும்பம் பொருளாதார ரீதியாக பாதிக்கப்படுமா என்ற விஷயங்களை நாம் இங்கே கண்டறியலாம்.

ரிஸ்க் சகிப்புத்தன்மை என்பது நீங்கள் சந்தைக்கு தேவையான ரிஸ்க் தன்மையை அறிவீர்கள், உங்களிடம் போதுமான ரிஸ்க் திறனும் உள்ளது. அதே வேளையில் உங்களது ரிஸ்க் திறனுக்கு ஏற்றாற் போல முதலீடு செய்கிறீர்களா என்பதனை அறிவது. உதாரணமாக சிலருக்கு போதுமான திறன் இல்லாத போதும், அதிக ரிஸ்க் எடுத்து முதலீட்டை மேற்கொண்டு பின்னர் பணம் முழுவதையும் இழந்து விடுவதுண்டு. இன்னும் சிலர் பணமிருந்தும், போதுமான ரிஸ்க் திறன் அறிந்தும் பயத்தின் காரணமாக குறைந்த அளவிலான ரிஸ்க் தன்மையை கொண்டிருப்பர். அதன் விளைவாக ரிஸ்க் எடுக்காமல் முதலீடு செய்பவர்களும் உண்டு. மேற்சொன்ன இரண்டு நபர்களும் தங்களுக்கான ரிஸ்க் திறனை சரியாக அளவிடாமல் தவறான முதலீட்டு முடிவை எடுப்பர். இதனை தான் அவர்களது சகிப்புத்தன்மை அல்லது விருப்பம்(Risk Tolerance) என்கிறோம்.

பொதுவாக இளம்வயது உடையவர் பங்குச்சந்தையில் ரிஸ்க் அதிகம் எடுத்தாலும், நீண்ட காலத்தில் அவர் வருவாய் ஈட்டக்கூடிய வாய்ப்பு இருப்பதால், சந்தையில் பணம் பண்ணும் வாய்ப்பு அதிகம். ஓய்வுகாலத்தை நெருங்கக்கூடியவர் பங்குச்சந்தை முதலீட்டை குறைத்து பாதுகாப்பான சேமிப்பு திட்டங்களை தேர்ந்தெடுப்பது நல்லது(வங்கி டெபாசிட், அஞ்சலக சேமிப்பு, கடன் பத்திரங்கள் மற்றும் பரஸ்பர நிதிகளின் ரிஸ்க் குறைந்த திட்டங்கள்). ஆனால் நடைமுறையில் இளம்தலைமுறையினர் சிறு சேமிப்பு திட்டங்களை நோக்கி செல்வதும், ஓய்வு பெற்றவர்கள் தங்களது ஓய்வூதிய பணபலன்களை கொண்டு பங்குச்சந்தையில் அதிக ரிஸ்க் கொண்ட வர்த்தகத்தில் ஈடுபடுவதும் நாட்டின் பொருளாதாரத்திற்கு நல்லதல்ல. (அதிக பணமிருந்து, ஓய்வூதிய காலத்தை சமாளிக்கக்கூடிய செல்வவளம் உள்ளவர்கள் எந்த வயதிலும் பங்குச்சந்தை போன்ற ரிஸ்க் தன்மை கொண்ட முதலீட்டை மேற்கொள்ளலாம்).

ரிஸ்க் புரொபைலிங் சார்ந்த சில கேள்விகள் உங்களுக்காக:
  • உங்களது முதலீட்டு நோக்கம்(Primary Investment Objective):  நீங்கள் ஏன் பங்குச்சந்தையில் முதலீடு செய்ய உள்ளீர்கள் ? (பணப்பாதுகாப்பு, நீண்ட  காலத்தில் செல்வவளத்தை  ஏற்படுத்துதல், விரைவாக பணம் பண்ண வேண்டும், பணத்தை இழப்பது, பணவீக்கத்தை தாண்டிய நிதி இலக்குகளுக்கான தொகையை பெற, பகுதிநேர வருவாய்) – ஏதேனும் ஒன்றை தேர்ந்தெடுங்கள்
  • சந்தையில் நீங்கள் எதிர்பார்க்கும் வருவாய் அல்லது லாபம் (ஆண்டுக்கு சதவீதத்தில்) ?
  •   உங்களுக்கு ஒரு கோடி ரூபாய் பரிசாக கிடைத்துள்ளது. உங்களது ஒரு கோடி ரூபாய்க்கான திட்டம் என்ன ?
  • உங்களுக்கு ரூ.10 லட்சம் வங்கிக்கடனாக  உள்ளது. இப்போது உங்களுக்கு நீங்கள் வேலை பார்க்கும் நிறுவனத்திடமிருந்து இந்த வருடத்திற்கான போனஸ் தொகை ரூ.5 லட்சம் கிடைக்கிறது என கொள்வோம். நீங்கள் உங்கள் கடனை குறைக்க உள்ளீர்களா, இல்லையெனில் ஏதேனும் ஒரு முதலீட்டு திட்டத்தில் இந்த பணத்தை போட போகிறீர்களா ?
  • பங்குச்சந்தையில் நீங்கள் பணத்தை இழந்தால் அதற்கு யார் காரணம் ? (என் நண்பர், தரகர், ஊடகம், என் மனைவி அல்லது கணவர், எனது இன்டர்நெட் இணைப்பு, நான் மட்டுமே)
  • நீங்கள் வாங்கிய பங்கு ஒன்று, இப்போது 20 சதவீத வீழ்ச்சியை கண்டுள்ளது. இப்போது உங்களது முடிவு என்ன ?
  • உங்களுக்கு பிடித்த மற்றும் ஆராய்ந்த நிறுவன பங்கு ஒன்று நடப்பாண்டில் மட்டும் 40 சதவீத வீழ்ச்சி கண்டுள்ளது. நீங்கள் இதுவரை அந்த பங்கினை வாங்கியதில்லை. இப்போது உங்களது முதலீட்டு முடிவு என்ன ? (உடனே வாங்குவேன், விலை இறங்கியதால் வாங்க மாட்டேன், பங்கினை மறு ஆய்வுக்கு உட்படுத்தி முதலீட்டு முடிவை எடுப்பேன்)

ரிஸ்க் புரொபைலிங் முறையை சரியாக பரிசோதனை செய்து கொள்ள தகுந்த நிதி ஆலோசகரின் முன்னிலையில் முதலீட்டு முடிவுகளை எடுக்கலாம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மெய்நிகர் நாணயங்களின் பரிவர்த்தனைகள் – தகவல்களை கேட்கும் மத்திய அரசு

மெய்நிகர் நாணயங்களின் பரிவர்த்தனைகள் – தகவல்களை கேட்கும் மத்திய அரசு 

Disclosure of Cryptocurrency Holdings and Transactions – India’s Cryptocurrency Regulations

‘கிரிப்டோ கரன்சி’ எனப்படும் மெய்நிகர் நாணயங்களின் மீதான முதலீடு மற்றும் வர்த்தகம், நடப்பு காலத்தில் அதிகமாக பேசப்பட்டு வருகிறது. டிஜிட்டல் நாணயம் சார்ந்த சிந்தனைகள் பல வருடங்களாகவே பேசப்பட்டு வந்த நிலையில், மெய்நிகர் நாணயங்களில் முதலீடு செய்யும் ஆர்வம் உலகெங்கிலும் பரவலாக காணப்படுகிறது. இதற்கான காரணம், மெய்நிகர் நாணயங்களில் காணப்படும் ‘பிளாக் செயின்(Blockchain)’ தொழில்நுட்பத்தின் பாதுகாக்கப்பட்ட பரிவர்த்தனைகளும், எந்தவொரு நாட்டின் மத்திய வங்கிகளின் தலையீடும் இல்லாமல் நடைபெறும் வர்த்தகம் தான்.

மெய்நிகர் நாணய சந்தையில் முதன்மை நாணயமாக கருதப்படும் ‘பிட்காயின்(Bitcoin)’, கடந்த 2014ம் ஆண்டு வாக்கில் ஒரு பிட்காயினுடைய மதிப்பு 500 அமெரிக்க டாலர்கள் என்ற அளவில் இருந்தது. இது அதிகபட்சமாக நடப்பு 2021ம் ஆண்டில் 61,500 அமெரிக்க டாலர்கள் வரை சென்றது குறிப்பிடத்தக்கது. தற்போது வர்த்தகமாகும் ஒரு பிட்காயினின் விலை இந்திய ரூபாய் மதிப்பில் 38 லட்சம் ரூபாய் (52,190 அமெரிக்க டாலர்கள்). கடந்த மூன்று மாதங்களில் மட்டும் சுமார் 80 சதவீத விலை ஏற்றத்தை பெற்றுள்ளன.

பிட்காயின் 2014ம் ஆண்டிலிருந்து ஏற்றத்தில் மட்டுமே சென்றதா என கேட்டால், அது தான் இல்லை. 2017ம் ஆண்டில் அதிகபட்சமாக 18,000 டாலர்கள் வரை சென்றிருந்த இந்த மெய்நிகர் நாணயம், 2018ம் ஆண்டில் 3,000 டாலருக்கு குறைவாக இறங்கியது கவனிக்கத்தக்கது. பொதுவாக மெய்நிகர் நாணயங்கள் அதிக ஏற்ற-இறக்கத்திற்கு உட்பட்டது. இதற்கான காரணம் மெய்நிகர் நாணயங்களின் எண்ணிக்கை குறைவான நிலையில் இருப்பதும், அதனை சார்ந்த வர்த்தகமும் தான்.

இருப்பினும் தனிநபர் ஒருவர் ஒரு முழு மெய்நிகர் நாணயத்தை வாங்க வேண்டுமென்ற அவசியமில்லை. உதாரணமாக ஒரு பிட்காயின் நாணயத்தின் சிறு துண்டுகளையும்(Pieces) வாங்கி கொள்ளலாம். மெய்நிகர் நாணயத்தை பல நாடுகள் வரவேற்றாலும், இன்னும் அதனை ஒழுங்குமுறைப்படுத்த பல நாடுகள் திணறி வருகின்றன. உலகெங்கிலும் நடைபெறும் கடத்தல், பயங்கரவாதம் மற்றும் பிற குற்றங்களுக்கு ஒரு சதவீதத்திற்கும் குறைவாக அமெரிக்க டாலர்கள் பயன்படுத்தப்பட்டு வரும் நிலையில், மெய்நிகர் நாணயங்கள் வழியாக சுமார் 5 சதவீதம் என்ற அளவில் நடைபெற்று வருவது கவனத்தில் கொள்ள வேண்டியது.

இதன் காரணமாகவே சில நாடுகள் அதன் பரிவர்த்தனைகளை கண்காணிக்க முடியாமல், தனியார் சந்தை நிறுவனங்களிடமே விட்டு விட்டன. ஆனால் முன்னேறிய மற்றும் வளரும் நாடுகள் இதனை ஒழுங்குமுறைப்படுத்தி சட்டமாக்க முயற்சி செய்து வருகின்றன. அவற்றில் நம் நாடும் ஒன்று. நடப்பு வருடத்தின் பட்ஜெட் தாக்கலின் போது, மெய்நிகர் நாணயங்களுக்கான ஒழுங்குமுறை மற்றும் அதனை சார்ந்த சட்டங்கள் ஏற்படுத்தப்படும் என மத்திய அரசு சார்பில் தெரிவிக்கப்பட்டிருந்தது. 2018ம் ஆண்டு மெய்நிகர் நாணயம் இந்தியாவில் தடை செய்யப்பட்டுள்ளது என பாரத ரிசர்வ் வங்கியால் அறிவிக்கப்பட்ட நிலையில், 2020ம் வருடம் உச்ச நீதிமன்றத்தால் இதற்கு விலக்கு அளிக்கப்பட்டிருந்தது. இருப்பினும், இதற்கான சட்டம் மற்றும் வரி சிக்கல்கள் இன்னும் நீடித்து வருகிறது.

சமீபத்திய அரசு அறிவிப்பின் படி, கம்பெனி சட்டம் 2013ன் கீழ் நாட்டில் உள்ள நிறுவனங்கள், மெய்நிகர் நாணயங்களில் பரிவர்த்தனை மேற்கொண்டிருந்தால் அதற்கான லாப-நட்ட அறிக்கை, முதலீட்டு தொகை மற்றும் கையிருப்பு ஆகிய விவரங்களை அரசுக்கு சமர்ப்பிக்க வேண்டும். இந்த நடைமுறை வரக்கூடிய ஏப்ரல் 1, 2021 முதல் அமலுக்கு வருகிறது. மெய்நிகர் நாணயங்களில் ஏற்பட்டுள்ள தனிநபர் சார்ந்த பரிவர்த்தனைகளையும் நிறுவனங்கள் தெரிவிக்க வேண்டுமென மத்திய அரசு கூறியுள்ளது.

இதன் மூலம் மெய்நிகர் நாணய வர்த்தகத்தில் வெளிப்படைத்தன்மை ஏற்படும் என அரசு எண்ணுகிறது. இதுவரை மெய்நிகர் நாணயத்தில் இந்தியா சார்பாக(தனிநபர் மற்றும் நிறுவனங்கள் சேர்த்து) சுமார் ஒரு கோடி முதலீட்டாளர்களும், 15,000 கோடி அமெரிக்க டாலர்கள் முதலீடும் ஈர்க்கப்பட்டுள்ளது. மெய்நிகர் நாணயத்தில் தனிநபர் மற்றும் நிறுவனங்கள் மேற்கொள்ளும் வர்த்தகம், ஊக வணிகம் அல்லது முதலீடு எதுவாக இருப்பினும் அதற்கான தெளிவான பரிவர்த்தனை விவரங்களை தற்போது அரசு கேட்டுள்ளது.

இதன் மூலம் அவற்றை மூலதன ஆதாயம் அல்லது இழப்பாக எடுத்து கொள்ளலாமா, இல்லையெனில் வணிக வருவாயாக கணக்கிடுவதா என்பதனை அரசு முடிவெடுக்கும். இதன் பின்பு அதற்கான வருமான வரி வரம்புகளும் ஏற்படுத்தப்படும். தற்போதைய நிலையில், மெய்நிகர் நாணயம் மூலம் கிடைக்கப்பெறும் லாபம் அல்லது நட்டம், கடன் பத்திரங்களின் மூலதன ஆதாய வரியை மேற்கோள் காட்டி செலுத்தப்படுகிறது(சில நிறுவனங்களால்). மெய்நிகர் நாணய பரிவர்த்தனைகளுக்கு அதன் சந்தை நிறுவனங்கள் பரிவர்த்தனை கட்டணங்களை வசூலிக்கின்றன. மெய்நிகர் நாணயம் மூலம் ஈட்டப்படும் லாபம் அல்லது நட்டத்தை தெரிவிக்க வேண்டும் என மத்திய நேரடி வரிகள் வாரியம்(CBDT) ஏற்கனவே கூறியுள்ளது.

அமெரிக்க டாலர் மற்றும் தங்கத்திற்கு மாற்றாக சொல்லப்படும் மெய்நிகர் நாணயம்(Cryptocurrency), வருங்காலத்தில் ஒரு முதலீட்டு சொத்தாக கருதப்படுமா, இல்லையெனில் வெறும் டிஜிட்டல் பரிவர்த்தனையாக மட்டுமே மேற்கொள்ளப்படுமா என்பது தெரிய வரும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மறவாதீர்கள்: ஆதார் – பான் எண் இணைப்புக்கான காலக்கெடு – மார்ச் 31, 2021

மறவாதீர்கள்: ஆதார் – பான் எண் இணைப்புக்கான காலக்கெடு – மார்ச் 31, 2021

Deadline for Aadhaar – PAN Linking – 31st March, 2021

ஆதார்-பான் இணைப்புக்கான காலக்கெடு, கடந்த இரண்டு வருடங்களாக நீட்டிக்கப்பட்டு வந்தது. இந்நிலையில் ஆதார்-பான் எண் இணைப்புக்கான கடைசி தேதி வரும் மார்ச் 31,2021 தேதியுடன் முடிவடைகிறது. இந்த இரண்டையும் இணைக்காத நிலையில் வருமான வரி தாக்கல் செய்ய முடியாது என வருமான வரி அலுவலகம் ஏற்கனவே சொல்லியிருந்தது.

தனிநபர் ஒருவர் வருமான வரி தாக்கல் செய்யாத நிலையிலும், ஆதார்-பான் எண் இணைப்பு கட்டாயமாகும். எனவே, உங்கள் வீட்டில் உள்ள நபர் ஒருவர் பான் மற்றும் ஆதார் எண்ணை வைத்திருக்கும் நிலையில், அதனை இணைத்து விடுவது வரும் நாட்களில் ஏற்படும் சிரமத்தை தவிர்க்க உதவும்.

மார்ச் 31, 2021 காலக்கெடுவுக்கு பிறகான பான் எண் செயல்படாது எனவும் ஏற்கனவே எச்சரிக்கை விடப்பட்டுள்ளது. இன்றைய சமயத்தில் புதிய வங்கிக்கணக்கு துவக்கம்(பெரும்பாலான வங்கிகளில்), ரூ.50,000க்கும் மேலான ரொக்க பரிவர்த்தனை மற்றும் பிற நிதி சார்ந்த கணக்கு, பரிமாற்றங்களுக்கு பான் எண் அவசியமாகிறது.

பான் மற்றும் ஆதார் எண்களை காலக்கெடு தேதிக்கு முன்பு இணைக்காமல், பின்னொரு நாளில் இணைக்க முற்பட்டு வருமான வரி தாக்கல் செய்யும் நிலை ஏற்பட்டால், வருமான வரிச்சட்டத்தின் கீழ் அதிகபட்சமாக ரூ.10,000 வரை அபராதம் விதிக்கப்படலாம்.

பங்குகள், பரஸ்பர நிதிகள் மற்றும் கடன் பத்திரங்களில் முதலீடு செய்வதற்கு, காப்பீடு பெறுவதற்கு மற்றும் வங்கியில் கடனுக்கான விண்ணப்பத்திற்கு பான் எண்ணை சமர்ப்பிப்பது கட்டாயம். சில திட்டங்களில் மட்டும் ரூ.50,000க்கு குறைவான முதலீட்டிற்கு பான் எண்ணிலிருந்து விலக்கு அளிக்கப்படுகிறது. எனினும் கே.ஒய்.சி.(KYC) முறையில் பெரும்பாலான பரிவர்த்தனைகளுக்கு பான் எண் கட்டாயமாகும்.

ஆதார – பான் எண் இணைப்பது எளிமையான நடைமுறையில் தான் உள்ளது. அதற்கான இணைப்பு இங்கே,

PAN – Aadhaar Linking – Income Tax Website

உங்களுடைய  பான் மற்றும் ஆதார் அட்டையில் உள்ள தகவல்(பெயர், பிறந்த காலம், முகவரி, கைபேசி எண்)  சரியான பொருந்துகிறதா என பார்த்து கொள்ளுங்கள். சரியான தகவல் இல்லையெனில் சில சமயம் பான் – ஆதார் எண் இணைப்பு சாத்தியமாகாது. ஆதார் அட்டையில் உள்ள தகவல் சரிவர இல்லையென்றால், உங்களுக்கு அருகில் உள்ள இ – சேவை மையத்தை தொடர்பு கொண்டு அதனை திருத்தம் செய்யலாம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

அன்னிய செலாவணி கையிருப்பில் நான்காவது மிகப்பெரிய நாடு – இந்தியா

அன்னிய செலாவணி கையிருப்பில் நான்காவது மிகப்பெரிய நாடு – இந்தியா 

India’s Foreign Exchange Reserves – Billion Dollar Currency Holding

வளரும் நாடு மற்றும் ஏற்றுமதியை ஊக்குவிக்கும் நாடொன்றுக்கு அன்னிய செலாவணி கையிருப்பு என்பது மிகவும் அவசியமான ஒன்று. இதனை அந்த நாட்டின் மத்திய வங்கி கவனித்து கொள்ளும். பொதுவாக அன்னிய செலாவணி கையிருப்பு(Foreign Exchange Reserves) என்பது மற்றொரு நாட்டின் பணத்தை அல்லது பண மதிப்பை வாங்கி கையிருப்பாக வைப்பது. சொல்லப்பட்ட பணம், உலகளாவிய நாணயமாக ஏற்றுக்கொள்ளப்பட்ட, ‘அமெரிக்க டாலர்’ தான் தற்போதைய பொது நாணயமாக சொல்லப்பட்டுள்ளது.

அமெரிக்க டாலரை தான் பாரத ரிசர்வ் வங்கி என சொல்லப்படும் மத்திய வங்கி(Reserve Bank of India) தனது கையிருப்பாக வைத்து கொள்ளும். இதற்கான காரணங்கள் பல – ஒரு நாட்டினுடைய ஏற்றுமதி மற்றும் இறக்குமதியில் காணப்படும் இரு நாடுகளின் வேறுபட்ட பண மதிப்பை கட்டுப்படுத்த, அன்னிய செலாவணி கையிருப்பு உதவும். உதாரணமாக நம் நாட்டிலிருந்து ஒரு பொருள் அல்லது சேவை பிரிட்டனுக்கு அனுப்பி வைக்கப்படுவதாக வைத்து கொள்வோம். இப்போது இந்த இரு நாடுகளிடையே ஏற்பட்ட வர்த்தகம், பொது நாணயமான டாலர் மதிப்பில் தான் நடந்திருக்கும். சில சமயங்களில் அவை யூரோ அல்லது வேறொரு அங்கீகரிக்கப்பட்ட பொது நாணயமாக இருந்திருக்கலாம்.

வர்த்தகத்தை ஏற்றுமதி செய்த நாடு, தனது வருவாயினை டாலர் மதிப்பில் தான் பெறக்கூடும். வர்த்தகத்தை ஏற்படுத்தியவர்(தனிநபர் அல்லது நிறுவனம்) இதற்கான டாலர் வருவாயை அவரது வங்கி கணக்கில் தான் பெறுவார். டாலர் பணத்தை உள்ளூர் ரூபாய் மதிப்பிற்கு மாற்றுவதற்கு வங்கிகள் சில கட்டணங்களை எடுத்து கொள்ளும். அதே வேளையில் டாலர் பணத்தை அந்நாட்டின் மத்திய வங்கியிடம், வங்கிகள் பரிமாற்றம் செய்து கொள்ளும். பொதுவாக வங்கிகள், மத்திய வங்கியிடமிருந்து அரசு கடன் பத்திரங்களை வாங்குவதற்கு இது போன்ற ஏற்றுமதி வர்த்தகத்தின் மூலம் பெறப்பட்ட டாலர் பணத்தை செலவழிக்கும்.

வங்கிகளை பொறுத்தவரை அரசு கடன் பத்திரங்களை வாங்குவதன் மூலம் வட்டி வருவாயை பெறும். ஆனால் மத்திய வங்கி இதனை(டாலர்) அன்னிய செலாவணி கையிருப்பாக கொண்டு, பல பொருளாதார நிகழ்வுகளுக்கு பயன்படுத்தும். டாலருக்கு நிகரான இந்திய ரூபாயின் மதிப்பை, அதிக ஏற்ற-இறக்கத்திற்கு உட்படாமல் இருக்க ரிசர்வ் வங்கி தனது கையிருப்பை எச்சரிக்கையாக கையாளும். பொருளாதார வீழ்ச்சி, போர் பதற்றம், வெளிநாட்டு கடன், அதிக இறக்குமதியின் மூலம் ஏற்படும் நிதி பற்றாக்குறை போன்ற காலங்களை சமாளிக்க அன்னிய செலாவணி கையிருப்பை அதிகரிப்பது ஒரு நாட்டிற்கு சாதகமான தன்மையாகும்.

அன்னிய செலாவணி கையிருப்பு எனும் போது, ‘டாலர் பண ரொக்கமாக’ மட்டுமே இருந்து விடாது. அவை ரொக்கம், பொருட்கள் மற்றும் சேவையின் மதிப்பு, தங்கம், கடன் பத்திரங்கள், சர்வேதச நாணய நிதியம்(IMF) அனுமதிக்கும் வைப்பு தொகை என பல்வேறு சாதனங்களில் வைக்கப்படும்.

1991ம் ஆண்டு வாக்கில் ஏற்பட்ட பொருளாதார நெருக்கடியின் போது, நாட்டின் இறக்குமதி அதிக சிக்கலை சந்தித்தது. இந்தியாவின் அன்னிய செலாவணி கையிருப்பு அடுத்த மூன்று வாரங்களுக்கு தேவையான இறக்குமதி அளவை மட்டுமே பெற்றிருக்கும் என்ற நிலைமைக்கு தள்ளப்பட்டது. உலக தர குறியீட்டு நிறுவனங்கள், நாட்டின் கடன் பத்திரங்களின் தன்மையை குறைந்து மதிப்பிட்டிருந்தன. குறைவான அன்னிய செலாவணி கையிருப்பு காரணமாக, உலக வர்த்தகத்தில் இந்தியா திவால் நிலைக்கு செல்லும் நிலை உருவானது.

அன்றைய தேதியில், வளைகுடா போரும்(Gulf War) சேர்ந்து கொண்டது. வெளிநாடுகளுக்கு செலுத்த வேண்டிய கடனுக்கு போதிய தொகை இல்லாமல், அரசு சார்பில் இருந்த தங்க கையிருப்பு அடகு வைக்கப்பட்டன. பின்னர் நிதி பற்றாக்குறையிலிருந்து மீண்ட நாடு, பொருளாதார தாராளமயமாக்கல் கொள்கைக்கு வித்திட அந்த நிகழ்வே காரணமாக அமைந்தது.

இவற்றிலிருந்து நாம் தெரிந்து கொள்ளலாம், அன்னிய செலாவணி கையிருப்பு வளரும் நாடொன்றுக்கு எவ்வளவு முக்கியமென்று. 1991ம் ஆண்டு ஜனவரி மாத முடிவில் நாட்டின் அன்னிய செலாவணி கையிருப்பு சுமார் 1.2 பில்லியன் அமெரிக்க டாலர்கள். இது அதே வருடத்தின் ஜூன் மாத முடிவில் 0.6 பில்லியனுக்கு குறைவாக சென்றது குறிப்பிடத்தக்கது. பொருளாதாரத்தை மீட்க, சர்வேதச நாணய நிதியத்திடம் 67 டன் தங்கத்தை அடமானம் வைத்தது இந்தியா. இதன் வாயிலாக சுமார் 2.2 பில்லியன் அமெரிக்க டாலர்களை அடமான கடனாக பெற்றது இந்தியா. அவை இங்கிலாந்து மற்றும் ஸ்விட்ஸர்லாந்து நாடுகளின் மத்திய வங்கிகள் மூலம் பெறப்பட்டன.

அந்தவொரு நிகழ்வுக்கு பிறகு, தனது அன்னிய செலாவணி கையிருப்பை நமது நாடு கவனமாக கையாண்டு வருகிறது. 2009ம் ஆண்டு வாக்கில் சர்வேதச நாணய நிதியத்திடமிருந்து 200 டன் மதிப்பிலான தங்கத்தை வாங்க பாரத ரிசர்வ் வங்கி முடிவு செய்ததும் அன்னிய செலாவணி கையிருப்பின் ஒரு பகுதியே. இன்று (12, மார்ச் 2021) நம் நாட்டின் அன்னிய செலாவணி கையிருப்பு 580.3 பில்லியன் அமெரிக்க டாலர்கள். (1991ம் ஆண்டு ஜனவரி – 1.2 பில்லியன் டாலர்கள் !)   

சில வாரங்களுக்கு முன்பு, ரஷ்யாவை பின்னுக்கு தள்ளி, உலகளவில் அன்னிய செலாவணி கையிருப்பில் நான்காம் இடத்திற்கு நகர்ந்தது இந்தியா. முதலிடத்தில் சீனா(3,336 பில்லியன் டாலர்கள்), இரண்டாம் இடத்தில் ஜப்பான்(1,379 பில்லியன் டாலர்கள்) மற்றும் மூன்றாமிடத்தில் சுவிட்ஸர்லாந்து(1,080 பில்லியன் டாலர்கள்) உள்ளன. உலக அன்னிய செலாவணி கையிருப்பில் அமெரிக்க டாலர், யூரோ, ஜப்பான் யென், பிரிட்டன் பவுண்ட் மற்றும் சீன பண மதிப்புகள் முன்னிலையில் உள்ளன.

கடந்த 30 வருட காலத்தில் இந்தியாவின் அன்னிய செலாவணி கையிருப்பு 10,000 சதவீதத்திற்கு மேல் ஏற்றம் பெற்றுள்ளது. இது போல நாட்டின் மொத்த உள்நாட்டு உற்பத்தி – GDP மதிப்பு 266 பில்லியன் டாலர்(1991ம் ஆண்டு) மதிப்பிலிருந்து 3 டிரில்லியன் டாலர்(2019) மதிப்பளவில் வளர்ந்துள்ளது. இது 1100 சதவீத வளர்ச்சியாகும். 

வாழ்க வளமுடன்,

நன்றி, வர்த்தக மதுரை 

www.varthagamadurai.com

மீண்டும் அதிகரித்த நாட்டின் சில்லரை விலை பணவீக்கம் – பிப்ரவரி 2021

மீண்டும் அதிகரித்த நாட்டின் சில்லரை விலை பணவீக்கம் – பிப்ரவரி 2021

India’s Retail Inflation to 5.03 Percent in February 2021 – CPI

நாட்டின் சில்லரை விலை பணவீக்கம் கடந்த ஜனவரி மாதத்தில் 4.06 சதவீதமாக இருந்த நிலையில், தற்போது பிப்ரவரி மாதத்திற்கான பணவீக்க தகவல் வெளியிடப்பட்டுள்ளது. பிப்ரவரி 2021 மாதத்தில் நுகர்வோர் விலை பணவீக்கம்(Consumer price index) 5.03 சதவீதமாக சொல்லப்பட்டுள்ளது. இது சந்தை எதிர்பார்த்த 4.83 சதவீதம் என்ற அளவை காட்டிலும் அதிகரித்துள்ளது குறிப்பிடத்தக்கது.

உணவு பொருட்களில் காணப்பட்ட விலை உயர்வால் கடந்த மாத பணவீக்கம் அதிகரித்துள்ளது. கடந்த 2019ம் ஆண்டின் மே மாதத்தில் 1.89 சதவீதம் என்ற அளவை கொண்டிருந்த உணவுப்பொருட்களின் பணவீக்க விகிதம், தற்போது 3.87 சதவீதமாக உள்ளது.

இது போல பருப்பு வகைகளின் பணவீக்க விகிதம் 12.54 சதவீதமாக அதிகரித்துள்ளது கவனிக்கத்தக்கது. அதே வேளையில் காய்கறிகளின் விலை சற்று குறைந்து 6.24 சதவீதமாக பிப்ரவரி மாதத்தில் நிறைவு பெற்றுள்ளது. துணிமணிகள் மற்றும் காலணிகள் 3.82 சதவீதத்திலிருந்து 4.21 சதவீதமாக அதிகரித்துள்ளது.

புகையிலை பொருட்கள் மற்றும் வீட்டுமனை பணவீக்க விகிதங்களில் பெரிதான ஏற்ற-இறக்கம் இல்லை எனலாம். ஒளி மற்றும் எரிபொருட்களின் விலைவாசி 3.87 சதவீதத்திலிருந்து 3.53 சதவீதமாக குறைந்துள்ளது. கடந்த ஒரு வருட காலத்தில் பணவீக்க விகிதம் பெரும்பாலும் ஆறு சதவீதத்திற்கு மேலாக தான் இருந்துள்ளது. பாரத ரிசர்வ் வங்கியின் குறுகிய கால பணவீக்க விகித இலக்கு 2-6 சதவீதம் என்ற அளவிற்குள் சொல்லப்பட்டுள்ளது.

நாட்டின் பணவீக்க விகித அளவீட்டில் உணவு பொருட்கள் மற்றும் குளிர்பானங்கள் 45.86 சதவீத பங்களிப்பை கொண்டிருக்கின்றன. பால் பொருட்கள் 6.6 சதவீதமும், காய்கறிகள் 6.04 சதவீதமும், மாமிசம் மற்றும் மீன் வகைகள் 3.6 சதவீதத்தையும் கொண்டுள்ளது.

வீட்டுமனை 10 சதவீதத்தையும், கல்வி 4.46 சதவீதம் மற்றும் சுகாதாரம் 5.9 சதவீதத்தையும் பங்களிப்பாக பெற்றுள்ளது. எரிசக்தியில் பெரும்பாலும் இறக்குமதியை சார்ந்திருத்தல், பருவமழையின் நிச்சயமற்ற தன்மை, மோசமான சாலைகள் மற்றும் உட்கட்டமைப்பில் மேம்பாடு இல்லாதது, அதிக நிதி பற்றாக்குறை மற்றும் அத்தியாவசிய பொருட்களை கொண்டு செல்வதில் உள்ள சிக்கல் ஆகியவை சில்லரை விலை பணவீக்க ஏற்ற-இறக்கத்திற்கு பெரும்பாலும் காரணமாக உள்ளன.

வாழ்க வளமுடன்,

நன்றி, வர்த்தக மதுரை 

www.varthagamadurai.com

அவந்தி பீட்ஸ் – பங்குச்சந்தை அலசல்

அவந்தி பீட்ஸ் – பங்குச்சந்தை அலசல் 

Avanti Feeds – Fundamental Analysis – Stocks

1994ம் ஆண்டு துவங்கப்பட்ட நிறுவனம் அவந்தி பீட்ஸ். ஆந்திர மாநிலத்தை சேர்ந்த திரு. அல்லூரி வெங்கடேசுவர ராவ் அவர்களால் துவங்கப்பட்ட இந்நிறுவனம், இன்று இறால், மீன் ஊட்டங்கள், இறால் செயலி உற்பத்தி மற்றும் ஏற்றுமதி நிறுவனமாக வலம் வருகிறது. ஆரம்ப காலத்தில் எஃகு, கரைப்பான்கள், உரம், பூச்சிக்கொல்லிகள் மற்றும் புகையிலை ஆகிய தொழில்களில் ஈடுபட்டு வந்த நிறுவனர் பின்னர் இறால் மீன் சார்ந்த தயாரிப்புகளில் களம் கண்டார்.

முக்கியமாக தாய் யூனியன்(Thai Union Group) நிறுவனத்துடன் கூட்டு முயற்சியில் இறால் தயாரிப்புகளில் ஈடுபட்டு வருவது அவந்தி பீட்ஸ் நிறுவனத்தின் வெற்றிக்கு சாதகமாக இருந்துள்ளது. 1977ம் ஆண்டு துவங்கப்பட்ட தாய் யூனியன் குழுமம் தாய்லாந்து நாட்டை சேர்ந்த இறால், மீன் ஊட்டங்கள் மற்றும் பதப்படுத்துதலில் முன்னணி நிறுவனமாக உள்ளது.

இறால் மற்றும் மீன் தீவனங்களில் தொழில் செய்து வரும் தாய் யூனியன் குழுமம், கடல் சார்ந்த உணவு துறையில் உலகின் மிகப்பெரிய நிறுவனமாகவும் இருப்பது குறிப்பிடத்தக்கது. இறால் தீவனம் மற்றும் உறைந்த இறால் தயாரிப்புகளில்(Frozen Shrimp Producer) நாட்டின் மிகப்பெரிய நிறுவனமாகவும், முன்னணி ஏற்றுமதியாளராகவும் அவந்தி நிறுவனம் உள்ளது.

ஆண்டுக்கு சுமார் 6 லட்சம் மெட்ரிக் டன் கொள்ளளவு கொண்ட தயாரிப்பு நிலையங்களை இந்நிறுவனம் கொண்டுள்ளது. உள்நாட்டு தீவன வணிகத்தில் சுமார் 45 சதவீத பங்களிப்பை அவந்தி பீட்ஸ் நிறுவனம் தன்னகத்தே வைத்துள்ளது. மீன் குஞ்சு பொரித்தல் மற்றும் இறால் பதப்படுத்துதலுக்காக முக்கிய நிலையங்களையும் இந்நிறுவனம் நிர்வகித்து வருகிறது.

இதன் தயாரிப்புகள் அமெரிக்கா, ஐரோப்பா, ஜப்பான், ஆஸ்திரேலியா மற்றும் மத்திய கிழக்கு நாடுகளுக்கு ஏற்றுமதி செய்யப்படுகின்றன. தீவனங்களுக்காக தனித்துவமான பிராண்டுகளையும் அவந்தி நிறுவனம் கொண்டுள்ளது.

கடல் சார்ந்த உணவுகளை அதிகம் இறக்குமதி செய்யும் நாடாக அமெரிக்கா உள்ளது. இது சுமார் 18 பில்லியன் அமெரிக்க டாலர்கள் மதிப்பில் இறக்குமதி அளவை கொண்டிருப்பது கவனிக்கத்தக்கது. மீன் பிடித்தல் துறையில் நம் நாடு 2019-20ம் ஆண்டு முடிவில் சுமார் 141 லட்சம் டன் என்ற அளவில் தனது உற்பத்தியை கொண்டுள்ளது.

மொத்த உள்நாட்டு உற்பத்தி(GDP) மதிப்பில் 1.2 சதவீத பங்களிப்பை மீன் பிடிப்பு துறை பெற்றுள்ளது. நீண்ட பரப்பளவு, புதிய உணவு வகைகள், பெருகி வரும் உணவு தேவைகள் ஆகியவை மீன் உணவுக்கான சந்தையை நிர்ணயிக்கிறது. மீன் உற்பத்தியில் முதல் ஐந்து இடங்களில் உள்ள மாநிலங்கள் – ஆந்திரா, மேற்கு வங்காளம், குஜராத், கேரளா மற்றும் தமிழகம். கடந்த 2019ம் ஆண்டு முதல் மீன் பிடிப்பு துறை உற்பத்தியில் தமிழகம் முதலிடத்தில் உள்ளது குறிப்பிடத்தக்கது. 1961ம் ஆண்டு வாக்கில் தனிநபர் ஒருவருக்கு, ஆண்டுக்கு 9 கிலோ என்ற அளவில் இருந்த நுகர்வு, 2018ம் ஆண்டில் 20.5 கிலோ என வளர்ச்சியடைந்துள்ளது. குறிப்பாக இறால் பண்ணைகள் சார்ந்த உணவுக்கான தேவை இன்று அதிகரித்து வருகிறது.

உலகளாவிய காலநிலை மாற்றம், கடல் சார்ந்த எல்லை பிரச்சனைகள், புதிய உணவு தேவைகள் ஆகியவை பண்ணைகள் மற்றும்  கடற் பண்ணைகளில் உற்பத்தி செய்யப்படும் உணவுகளுக்கு சாதகமாக அமைந்துள்ளது. இதன் காரணமாக இந்த துறையில் ஈடுபட்டு வரும் நிறுவனங்களுக்கு வர்த்தகம் சார்ந்த வாய்ப்புகளை ஏற்படுத்தியுள்ளது.

அவந்தி பீட்ஸ்(Avanti Feeds) நிறுவனத்தின் சந்தை மதிப்பு ரூ.6,600 கோடி. இதன் புத்தக மதிப்பு ரூ.119 ஆகவும், வட்டி பாதுகாப்பு விகிதம் 334 மடங்குகளாகவும் உள்ளது. நிறுவனத்திற்கு கடன்(Debt Free) எதுவும் பெரிதாக இல்லை. நிறுவனர்களின் பங்களிப்பு 44 சதவீதமாகவும், அன்னிய முதலீட்டாளர்களின் பங்களிப்பு 17 சதவீதமாகவும் உள்ளது. நிறுவனர்கள் சார்பில் பங்குகள் அடமானம் எதுவும் வைக்கப்படவில்லை. அன்னிய முதலீட்டாளர்களில் தாய் யூனியன் குழும நிறுவனம் 9 சதவீத பங்குகளை வைத்திருக்கிறது.

பொது பங்களிப்பில்(Public Holding) சுமார் 15 சதவீத பங்குகளையும் இந்நிறுவனம் தன்னகத்தே கொண்டுள்ளது. அரசு சார்பில், ஆந்திர அரசு சுமார் 3 சதவீத பங்குகளை(Andhra Pradesh Industrial Development Corporation) கொண்டுள்ளது கவனிக்கத்தக்கது. 2019-20ம் நிதியாண்டில் அவந்தி பீட்ஸ் நிறுவனம் ரூ.4,115 கோடியை வருவாயாகவும், 377 கோடி ரூபாயை நிகர லாபமாகவும் ஈட்டியுள்ளது. விற்பனை வளர்ச்சி கடந்த ஐந்து வருடங்களில் 19 சதவீதம் வளர்ச்சி பெற்றுள்ளது.

லாப வளர்ச்சியும் கடந்த ஐந்து வருட கால அளவில் 24 சதவீதமாக உள்ளது. பங்கு மூலதனத்தின் மீதான வருவாய்(ROE) கடந்த ஐந்து வருடங்களில் 34 சதவீதமாகவும், 10 வருட கால அளவில் 35 சதவீதமாகவும் உள்ளது. இருப்புநிலை கையிருப்பு ரூ.1,603 கோடியாக சொல்லப்பட்டுள்ளது. நிறுவனத்தின் பணவரத்து(Cash flow Positive) நன்றாக உள்ளது.

இறால் இறக்குமதியில் அமெரிக்கா 26 சதவீதமும், ஐரோப்பிய யூனியன் 23 சதவீதமும், வியட்நாம் 12 சதவீதமும், ஜப்பான் 10 சதவீதம் மற்றும் சீனா 8 சதவீத பங்களிப்பை கொண்டுள்ளது. இறால் உற்பத்தியில் இந்தியா இரண்டாம் இடத்திலும், அதன் ஏற்றுமதியில் முதலிடத்திலும் உள்ளது. கொரோனா காலம் தவிர்த்து காணும் போது, இந்த துறைக்கான தேவையும், வாய்ப்புகளும் அதிகம்.

கவனிக்க: முதலீட்டாளர்கள், பங்குகளை வாங்கும் முன் தகுந்த நிதி ஆலோசகர் அல்லது பங்கு ஆலோசகரின் முன்னிலையில் தங்களது முதலீட்டு முடிவை எடுக்குமாறு அறிவுறுத்தப்படுகிறது. மேலே சொன்ன தகவல்கள் பங்குச்சந்தை அடிப்படை பகுப்பாய்வுக்கான கற்றல் மட்டுமே.

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் கடந்த 50 வருட பொருளாதார வளர்ச்சி – இந்தியா 2021

நாட்டின் கடந்த 50 வருட பொருளாதார வளர்ச்சி – இந்தியா 2021

India’s 50 years of Economic Growth – GDP India 2021

2020-21ம் நிதியாண்டின் மூன்றாம் காலாண்டில் நாட்டின் மொத்த உள்நாட்டு உற்பத்தி(GDP growth) வளர்ச்சி 0.4 சதவீதமாக சொல்லப்பட்டிருந்தது. கொரோனா ஊரடங்குக்கு பின்னர் நேர்மறையான வளர்ச்சி சொல்லப்பட்டது இந்த முறை தான். நடப்பு நிதியாண்டின் முதல் காலாண்டில் (-24.4) சதவீதமும், இரண்டாம் காலாண்டில் (-7.3) சதவீதமும் பொருளாதாரம் வீழ்ச்சி கண்டது.

2013ம் ஆண்டுக்கு பிறகான மிகப்பெரிய தொய்வு நிலை மற்றும் வீழ்ச்சியாகவும் இது கூறப்பட்டது. பொருளாதார ஊக்குவிப்பு மற்றும் தற்காலிகமாக ஏற்பட்ட பெரும் நுகர்வு தன்மையால் அக்டோபர் – டிசம்பர் காலத்தில் பொருளாதார வளர்ச்சி 0.4 சதவீதமாக நிறைவு பெற்றுள்ளது. எனினும், நடப்பு நிதியாண்டில் ஒட்டு மொத்தமாக நாட்டின் மொத்த உள்நாட்டு உற்பத்தி எதிர்மறை மதிப்பில் முடிவடையும்.

கொரோனா ஊரடங்கு தளர்வுக்கு பிறகான காலத்தில் விலைவாசி அதிகரித்து கொண்டிருந்தாலும், ஜனவரி மாத பணவீக்கம் 4.06 சதவீதம் என்ற குறைந்த அளவில் இருந்தது. இது கடந்த 16 மாதங்களில் காணப்படாத குறைவான அளவாக உள்ளது. நாட்டின் சில்லரை விலை பணவீக்கம் சராசரியாக 6-8 சதவீதம் என்ற அளவில் உள்ளது. மத்திய ரிசர்வ் வங்கியின் குறுகிய கால இலக்காக சில்லரை விலை பணவீக்கம்(Retail Inflation – CPI) 2-6 சதவீதம் என்ற அளவில் நிர்ணயிக்கப்பட்டுள்ளது கவனிக்கத்தக்கது.

பொதுவாக பொருளாதார வீழ்ச்சி(Economic Recession) என்பது ஒரு நாட்டின் மொத்த உள்நாட்டு உற்பத்தி, தொடர்ச்சியாக இரு காலாண்டுகள் எதிர்மறை வளர்ச்சியை(Negative growth) கொண்டிருந்தால் அது பொருளாதார வீழ்ச்சியாக உறுதி செய்யப்படும். அப்படி காணும் போது 2020-21ம் நிதியாண்டின் ஏப்ரல் முதல் ஜூன் வரையிலான காலாண்டும், ஜூலை முதல் செப்டம்பர் வரையிலான காலாண்டும் எதிர்மறை பொருளாதார சதவீதத்தை அடைந்தது. இதன் காரணமாக இந்திய பொருளாதாரம் வீழ்ச்சியடைந்ததாக சொல்லப்பட்டிருந்தது.

எனினும் கடந்த சில நாட்களுக்கு முன்பு அறிவிக்கப்பட்ட தகவலில் அக்டோபர் முதல் டிசம்பர் 2020 வரையிலான காலாண்டில் நாட்டின் பொருளாதாரம் நேர்மறை வளர்ச்சியை பெற்றுள்ளது குறிப்பிடத்தக்கது. அதே வேளையில் சந்தை எதிர்பார்த்த அளவை இது எட்டவில்லை. கடந்த 50 வருட காலத்தில் மிகப்பெரிய பொருளாதார வீழ்ச்சியாக கொரோனா கால ஊரடங்கு பொருளாதாரம் சொல்லப்படுகிறது. 1951-2020 வரையிலான காலத்தை கணக்கில் கொள்ளும் போது, இந்திய பொருளாதாரம் அதிகபட்சமாக 11.40 சதவீத பொருளாதார உயர்வும்(மார்ச் 2010 காலாண்டு), மிகப்பெரிய வீழ்ச்சியாக (-24.40 ஜூன் 2020) சதவீதமும் இருந்துள்ளது.

கடந்த வியாழக்கிழமை அன்று(04-03-2021) அரசு கடன் பத்திரங்களின் வருவாய்(10 Years Govt Bond yield) 6.21 சதவீதமாக உள்ளது. 2024-25ம் ஆண்டில் ஐந்து டிரில்லியன் டாலர் பொருளாதாரம் என்ற இலக்கை அடைய மத்திய அரசு ஏற்கனவே நிர்ணயித்துள்ளது. இதனை அடையக்கூடிய நிலையில், உலகின் மிகப்பெரிய மூன்றாவது பொருளாதார நாடாக இந்தியா திகழும்.

உலக பொருளாதாரத்தில் முதல் இடத்தில் அமெரிக்காவும், இரண்டாம் இடத்தில் சீனாவும் உள்ளது. மொத்த உள்நாட்டு உற்பத்தியில் இந்த இரு நாடுகளையும் அடுத்த 25 வருடங்களில் முந்த முடியவில்லை என்றாலும், நுகர்வு தன்மை அடிப்படையில் இந்தியா அடுத்த 10-20 வருடங்களில் மிகப்பெரிய அளவில் வளர்ச்சி பெற்றிருக்கும்.

நடப்பில் நமது நாடு, பெரும்பாலும் சேவை துறை சார்ந்த நாடாகவே உள்ளது. கொரோனாவுக்கு பிறகான காலத்தில், உற்பத்தியை பெருக்க அரசு திட்டம் கொண்டுள்ளது. மொத்த உள்நாட்டு உற்பத்தியில் சேவை துறை 54.77 சதவீதமும், தொழிற்துறை  27.47 சதவீதமும் மற்றும் விவசாய துறை 17.76 சதவீத பங்களிப்பையும் கொண்டுள்ளது.

சேவைத்துறையில் அரசு நிர்வாகம், ராணுவம் மற்றும் பிற துறைகள் 15.74 சதவீத பங்களிப்பை கொண்டுள்ளது. நிதி, வீட்டுமனை மற்றும் தொழில்முறை 20.95 சதவீத பங்களிப்பையும், வர்த்தகம், உணவக விடுதிகள், போக்குவரத்து, தொலைத்தொடர்பு மற்றும் ஒளிபரப்பு ஆகியவை 18.08 சதவீத பங்களிப்பையும் சேவை துறையின் கீழ் பெற்றுள்ளது.

விவசாய துறையில் விவசாயம், வனவியல் மற்றும் மீன் பிடித்தல் 17.76 சதவீத பங்களிப்பை அளித்து வருகின்றன. தொழிற்துறையில் உற்பத்தி 15.13 சதவீதமும், சுரங்கம் மற்றும் குவாரி 2.14 சதவீதமும், மின்சாரம், எரிவாயு, குடிநீர் மற்றும் இதர பயன்பாடு 2.65 சதவீதமும், கட்டுமானம் 7.55 சதவீத பங்களிப்பையும் கொண்டுள்ளது.

கடந்த 1950-51ம் ஆண்டில் இந்தியா 52 சதவீதம் விவசாயத்தை சார்ந்தும், சேவையில் 33 சதவீதத்தையும் மற்றும் தொழில்துறையில் 15 சதவீதத்தையும் கொண்டிருந்தது குறிப்பிடத்தக்கது. சுருக்கமாக சொன்னால், இந்தியா நடுத்தர வருமானத்தை அதிகமாக கொண்ட வேகமாக வளரும் சந்தை பொருளாதார நாடாகும்(Middle income Developing market economy).

வாழ்க வளமுடன்,

நன்றி, வர்த்தக மதுரை 

www.varthagamadurai.com

தேசிய பங்குச்சந்தை முடக்கம், அதிர்ச்சியளித்த அன்னிய முதலீடு, மத்திய அரசின் புதிய முடிவு

தேசிய பங்குச்சந்தை முடக்கம், அதிர்ச்சியளித்த அன்னிய முதலீடு, மத்திய அரசின் புதிய முடிவு 

NSE Shut down – Suspected FII Trading activity – No Business for the Govt

நேற்றைய இந்திய பங்குச்சந்தையில் பரபரப்புக்கு பஞ்சமில்லை எனலாம். எப்போதும் போல காலை ஒன்பது மணிக்கு துவங்கிய இந்திய பங்குச்சந்தை வர்த்தகத்தில் காலை 11:40 மணி வேளை தேசிய பங்குச்சந்தை அமைப்பிடம் இருந்து ஒரு அறிவிப்பு வெளியாகிறது. தொலைத்தொடர்பு இணைப்பில் ஏற்பட்ட தொழில்நுட்ப கோளாறால் காலை 10:08 மணி முதல் சந்தை குறியீடுகள் மற்றும் நிறுவனங்களின் விலை மதிப்புகள் சரியான நேரத்திற்கு புதுப்பிக்கப்படவில்லை(Update) எனவும், இதன் காரணமாக 11:40 மணி முதல் தேசிய பங்குச்சந்தை குறியீடுகள் தற்காலிகமாக நிறுத்தி வைக்கப்படுவதாக சொல்லப்பட்டது.

பின்னர் மதியம் ஒரு மணிக்கு செயல்படலாம் என எதிர்பார்க்கப்பட்ட நிலையில், முடக்கம் மீண்டும் மூன்று மணி வரை நீட்டிக்கப்பட்டது. பொதுவாக சந்தை மாலை 03:30 மணிக்கு முடியும். ஆனால் நேற்றைய தற்காலிக முடக்கத்தால் தேசிய பங்குச்சந்தை மாலை 03:45 மணிக்கு மீண்டும் துவங்கியது. மாலை ஐந்து மணி வரை வர்த்தகமான தேசிய பங்குச்சந்தை குறியீடு நிப்டி(Nifty50) 274 புள்ளிகள் உயர்ந்து, 14982 புள்ளிகள் என்ற அளவில் முடிவடைந்தது. மும்பை பங்குச்சந்தை குறியீடு சென்செக்ஸ் சுமார் 1030 புள்ளிகள் உயர்ந்து, 50781 புள்ளிகள் என்ற அளவில் தனது வர்த்தகத்தை முடித்து கொண்டது.

தொழில்நுட்ப கோளாறு என சொல்லப்பட்டிருந்தாலும், ஒழுங்குமுறை அமைப்பான செபி(SEBI) இது சார்ந்த அறிக்கைகளை சமர்ப்பிக்குமாறு தேசிய பங்குச்சந்தையிடம் கேட்டு கொண்டுள்ளது. வரக்கூடிய காலங்களில் பங்குச்சந்தை வர்த்தக நேரம் அதிகரிக்கப்படலாம், அதனை ஒட்டியே இது போன்ற நிகழ்வுகள் அமைக்கப்பட்டுள்ளது என்ற சலசலப்பும் சந்தை வர்த்தகர்களிடையே பேசப்பட்டது. ஆனால் இது சார்ந்த விவரங்கள் பங்குச்சந்தை அமைப்பிடம் தற்போது சொல்லப்படவில்லை.

நேற்றைய பங்குச்சந்தை நேரத்தில், மற்றொரு கூடுதல் தகவலாக அன்னிய முதலீட்டாளர்கள் ஒரே நாளில் 28,739 கோடி ரூபாயை இந்திய பங்குச்சந்தையில் முதலீடு செய்துள்ளனர். இதுவரை இல்லாத அளவாக அன்னிய முதலீட்டாளர்களின் வர்த்தக மதிப்பு சொல்லப்பட்டுள்ளது. தொழில்நுட்ப கோளாறின் காரணமாக, ஊக(Futures & Options trading) வணிகத்தில் பங்கு விற்பனையை மேற்கொண்டிருந்த பலர் தங்கள் பணத்தை நேற்று இழந்திருக்கலாம்.

நேற்றைய தேசிய பங்குச்சந்தையின் வர்த்தக மதிப்பு(Cash Turnover) ரூ.45,837 கோடி. கடந்த ஆறு மாதங்களின் சராசரி வர்த்தக மதிப்பு ரூ.64,796 கோடியாக இருப்பது கவனிக்கத்தக்கது. ஊக வணிகத்தின் ஆறு மாத சராசரி வர்த்தக மதிப்பு ரூ.30 லட்சம் கோடியாக இருந்த நிலையில், நேற்றைய ஊக வணிகத்தின் வர்த்தக மதிப்பு மட்டும் 30.6 லட்சம் கோடி ரூபாயாக நடந்துள்ளது குறிப்பிடத்தக்கது.

அமெரிக்காவில் பணவீக்கம் அதிகரிப்பதற்கான வாய்ப்பு, உலகளாவிய மத்திய வங்கிகளின் அடுத்தகட்ட வட்டி விகித அணுகுமுறை, வளரும் மற்றும் வளர்ந்த நாடுகளில் மீண்டும் ஒரு பொருளாதார ஊக்குவிப்பு, அதனை சார்ந்த கடன் தன்மை அதிகரிப்பு ஆகியவை உலக பங்குச்சந்தை குறியீடுகளில் வரும் நாட்களில் தெரிய வரும்.

உலக சந்தையில் டாலர் மதிப்பு கடந்த மூன்று வருடங்களில் காணப்படாத குறைந்த அளவில் வர்த்தகமாகி கொண்டிருக்கிறது. அதே வேளையில் அமெரிக்க பங்குச்சந்தை குறியீடுகள் உச்சத்தில் வர்த்தகமாகி வருகிறது. ரிஸ்க் தன்மை அதிகம் கொண்ட மற்றும் புரிந்து கொள்ள முடியாத பரிவர்த்தனைகளிலும்  நடப்பு கால முதலீடுகள் சென்று கொண்டிருப்பதாக அமெரிக்க மத்திய வங்கி கூறியுள்ளது. வரும் நாட்களில் பணவீக்கத்தை கட்டுப்படுத்தும் நடவடிக்கைகள் மேற்கொள்ளப்படலாம்.

நாட்டில் உள்ள தனியார் வங்கிகள், அரசின் அனைத்து விதமான தொழில்களிலும் பங்கேற்கலாம். மத்திய அரசு நிறுவனங்களையும், தொழில்களையும் நடத்த தேவையில்லை எனவும், இனி தனியார் நிறுவனங்கள், நாட்டில் உள்ள தொழில்களையும், அது சார்ந்த நிறுவனங்களையும் நடத்தலாம் என அரசு சார்பில் தெரிவிக்கப்பட்டுள்ளது.

மேலும் கூறுகையில், அரசு நிறுவனங்களில் அரசு மட்டுமே உரிமையாளராக இருக்க வேண்டுமென்ற அவசியம் இனி இல்லை எனவும், அரசின் கவனம் மக்களின் நலத்திட்டங்கள் மற்றும் மேம்பாட்டு திட்டங்களில் மட்டுமே இனி இருக்கும் எனவும் சொல்லப்பட்டுள்ளது. நேற்றைய பங்குச்சந்தை ஏற்றத்திற்கு இந்த செய்தியும் சாதகமாக அமைந்திருந்தது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மத்திய வங்கியின் சமீபத்திய வட்டி விகிதம் – சிறு பார்வை

மத்திய வங்கியின் சமீபத்திய வட்டி விகிதம் – சிறு பார்வை 

Recent Bank Interest rates – RBI Policy review

நாட்டின் ஜனவரி மாத சில்லரை விலை பணவீக்கம் 4.06 சதவீதமாக இருந்துள்ளது. கடந்த 2020ம் ஆண்டின் அக்டோபர் மாதத்தில் அதிகபட்சமாக 7.61 சதவீதமாக பணவீக்க விகிதம் இருந்தது. பாரத ரிசர்வ் வங்கியின் குறுகிய கால இலக்காக 2-6 சதவீதம் என்ற அளவில் சில்லரை விலை பணவீக்கம் சொல்லப்பட்டுள்ளது.

பணவீக்கத்தை அடிப்படையாக கொண்டு தான் பாரத ரிசர்வ் வங்கியின் வட்டி விகித மாற்றமும் அறிவிக்கப்படுகிறது. சமீபத்திய மத்திய நிதிக்கொள்கை குழு கூட்டம்(RBI Monetary Policy) இரு வாரங்களுக்கு முன்பு நடைபெற்றிருந்தது. வட்டி விகிதங்களில் எந்த மாற்றமுமில்லை எனவும், அதற்கு முந்தைய காலத்தில்  சொல்லப்பட்ட வட்டி விகிதங்கள் தொடரும் எனவும் ரிசர்வ் வங்கி சார்பில் சொல்லப்பட்டிருந்தது.

வங்கிகளுக்கான ரெப்போ(REPO) வட்டி விகிதம் தற்போது 4 சதவீதமாக உள்ளது. பாரத ரிசர்வ் வங்கியிடமிருந்து, நாட்டில் உள்ள வணிக வங்கிகள் கடன் பெறும் விகிதம் தான் ரெப்போ வட்டி விகிதமாக சொல்லப்படுகிறது. பொதுவாக நாட்டில் நிலவும் பணவீக்கத்தை(விலைவாசி) கட்டுப்படுத்த, ரெப்போ வட்டி விகிதத்தை மத்திய வங்கி ஒரு கருவியாக பயன்படுத்தும்.

ரிவர்ஸ் ரெப்போ(Reverse REPO) வட்டி விகிதம் 3.35 சதவீதமாக உள்ளது. நாட்டில் உள்ள வங்கிகளிடம்  இருந்து மத்திய வங்கி கடன் வாங்கும் விகிதத்தை, ரிவர்ஸ் ரெப்போ வட்டி விகிதம் என்கிறோம். விளிம்பு நிலை விகிதம்(Marginal Standing Facility Rate) 4.25 சதவீதமாகவும், வங்கி விகிதம் 4.25 சதவீதமாகவும் உள்ளது.

வங்கிகள், மத்திய ரிசர்வ் வங்கியிடம் வைத்திருக்க வேண்டிய ரொக்க கையிருப்பு விகிதம்(Cash Reserve Ratio – CRR) 3 சதவீதமாகவும், எஸ்.எல்.ஆர்.(SLR) விகிதம் 18 சதவீதமாகவும் உள்ளது. ரொக்கம், தங்கம், பத்திரங்கள் மற்றும் பிற அங்கீகரிக்கப்பட்ட வடிவில் வங்கிகள் பராமரிக்க வேண்டிய குறைந்தபட்ச வைப்புத்தொகை விகிதம் தான் எஸ்.எல்.ஆர். விகிதம்.

இது வங்கிகளின் செயல்பாட்டை மட்டுமில்லாமல், நாட்டின் கடன் வளர்ச்சியை ஒழுங்குபடுத்த உதவும். வங்கிகளின் அடிப்படை வட்டி விகிதம்(Base Rate – Lending / Deposit) 7.30% – 8.80% என்ற அளவில் சொல்லப்பட்டுள்ளது. வங்கி சேமிப்பு கணக்குக்கான வட்டி விகிதம் 2.70% – 3.00% என்ற அளவில் உள்ளது. ஒரு வருடத்திற்கு மேலான வைப்பு நிதி திட்டத்திற்கான வட்டி விகிதம் 4.90 சதவீதத்திலிருந்து 5.50 சதவீதம் வரை சொல்லப்பட்டிருக்கிறது.

2030ம் ஆண்டுடன் முடிவடையும் அரசு கடன் பத்திரங்களின் வருவாய்(5.85% GS 2030) ஆறு சதவீதத்திற்கு அருகாமையில் வர்த்தகமாகி வருகிறது. பணவீக்கம் மற்றும் பாரத ரிசர்வ் வங்கியின் கொள்கை குழு முடிவின் அடிப்படையில் தான் சிறு சேமிப்பு திட்டங்களுக்கான வட்டி விகிதமும், வங்கிகளின் வட்டி விகிதமும் மாறுபடும். பணவீக்கம் உயர்ந்தால் வங்கிகளின் வட்டி விகிதமும் உயர்த்தப்படும். எனவே, மத்திய வங்கி இதனை எச்சரிக்கையாக கையாளும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

2020ம் ஆண்டில் நாட்டின் பொருளாதார குறியீடுகள் எவ்வாறு இருந்தது ?

2020ம் ஆண்டில் நாட்டின் பொருளாதார குறியீடுகள் எவ்வாறு இருந்தது ?

Economic Indicators in India – 2020 Review

கடந்த 2020ம் ஆண்டில் கொரோனா பெருந்தொற்று காரணமாக ஏற்பட்ட ஊரடங்கால் உலக பொருளாதாரம்  வெகுவாக பாதிக்கப்பட்டது. குறிப்பாக அத்தியாவசிய உணவு பொருட்களின் தேவை தவிர்த்து மற்ற துறைகள் அனைத்தும் பெரும்பாலும் எதிர்மறை நிலையை தான் சந்தித்தன. மார்ச் மாத(2020) ஊரடங்கு துவக்கத்தில் வீழ்ச்சியடைந்த பங்குச்சந்தை குறியீடுகள் மட்டும், வருடத்தின் முடிவில் எதிர்பாராத அளவில் ஏற்றத்தில் முடிவடைந்தன.

சமீபத்திய பங்குச்சந்தை குறியீடுகள் உயர்வு, எதிர்வரும் காலத்தில் பொருளாதாரம் மீட்டெடுக்கப்படும் என்ற நம்பிக்கையில் அதிகமாகவே உயர்ந்தது குறிப்பிடத்தக்கது. அதே வேளை உண்மையில் பொருளாதாரம் மீண்டெழுந்ததா ? இல்லையெனில் அதற்கான வாய்ப்பு எவ்வாறு உள்ளது என்பதனை அறிய கடந்த வருடத்தின் முழுமையான பொருளாதார குறியீடுகளை பார்த்தாக வேண்டும்.

நாட்டின் ஏற்றுமதி(Exports) கடந்த வருடத்தின் மார்ச் முதல் ஆகஸ்ட் வரையிலான காலத்தில் வீழ்ச்சியை மட்டுமே சந்தித்துள்ளன. ஏற்றுமதியில் அதிகபட்சமாக செப்டம்பர் மாதத்தில் 6 சதவீதமாக இருந்துள்ளது. வீழ்ச்சியின் பக்கம் காணும் பொழுது, ஏப்ரல் மாதத்தில் (-61) சதவீதமும், மே மாதத்தில் (-35.7) சதவீதமும் மற்றும் ஜூன் மாதத்தில் (-12.2) சதவீதமாகவும் உள்ளது. இது போல இறக்குமதி(Imports) அளவு 12 மாத காலத்தில் இரண்டு மாதங்கள் மட்டுமே நேர்மறையாக இருந்துள்ளது. பிப்ரவரி மற்றும் டிசம்பர் 2020 காலத்தில் மட்டுமே இறக்குமதி அளவு வீழ்ச்சியை சந்திக்கவில்லை.

வாகனத்துறை:

உள்நாட்டு டிராக்டர் விற்பனை பிரிவில் மார்ச் மற்றும் ஏப்ரல் மாதங்களில் 50 சதவீதத்திற்கு மேல் வீழ்ச்சி ஏற்பட்டுள்ளது. இருப்பினும், ஜூன் மாதத்திற்கு பிறகான தேவையின் காரணமாக இதன் விற்பனை அளவு கணிசமாக உயர்ந்துள்ளது. அதிகபட்சமாக ஆகஸ்ட் மாதம் 74 சதவீதமாக காணப்பட்டுள்ளது.

வாகனத்துறை பிரிவில் அதிகம் பாதிக்கப்பட்ட துறை என்றால், அது உள்ளூர் விமான போக்குவரத்தும், மூன்று சக்கர வாகன விற்பனையும் தான். மூன்று சக்கர வாகன விற்பனை அளவு ஜனவரி மாதம் தவிர்த்து, மற்ற அனைத்து மாதங்களிலும் எதிர்மறையாக தான் இருந்துள்ளது. விமான போக்குவரத்து ஏப்ரல் மாதத்தில் முழுமையாக இயங்கவில்லை.

Economic indicators India 2020

இரு சக்கர மற்றும் நான்கு சக்கர வாகனங்களின் விற்பனை கடந்த 2020ம் ஆண்டின் ஜனவரி மாதம் முதலே சரிந்துள்ளது குறிப்பிடத்தக்கது. 2019ம் ஆண்டில் காணப்பட்ட வாகனத்துறை மந்தநிலை தான் காரணமாக அமைந்துள்ளது. இருப்பினும், ஆகஸ்ட் 2020 பிறகான காலத்தில், பொது போக்குவரத்து செயல்படாத நிலையில் இரு சக்கர மற்றும் நான்கு சக்கர வாகனங்களின் தேவை அதிகரித்தது. நான்கு சக்கர வாகனம் அதிகபட்சமாக செப்டம்பர் மாதத்தில் 29 சதவீதமும், இரு சக்கர வாகன விற்பனை அதிகபட்சமாக அக்டோபர் மாதத்தில் 17 சதவீதமாகவும் காணப்பட்டுள்ளது.

ரயில் சரக்கு(Freight Traffic) போக்குவரத்து மார்ச் முதல் ஜூலை வரையிலான காலத்தில் வீழ்ச்சி அடைந்திருந்தாலும், பின்னர் அத்தியாவசிய தேவையின் காரணமாக உயர்ந்து வந்தது கவனிக்கத்தக்கது.

வரி வருவாய்:

ஜி.எஸ்.டி.(GST) வருவாய் மார்ச் முதல் ஆகஸ்ட் வரையிலான காலத்தில் எதிர்மறை அளவாக இருந்துள்ளது. ஏப்ரல் மாதத்தில் அதிகபட்சமாக 72 சதவீதம் இழப்பு ஏற்பட்டுள்ளது. செப்டம்பர் 2020க்கு பின்னர் இதன் வருவாய் ஓரளவு அதிகரித்து வந்துள்ளது. அக்டோபர் மற்றும் டிசம்பர் மாதங்களில் வருவாய் அளவு 10 சதவீதத்திற்கு மேல் இருந்துள்ளது.

தொழிற்துறை உற்பத்தி குறியீடு(IIP):

தொழில் துறையில் உள்ள நுகர்வோர் சாதனங்களின் விற்பனை கொரோனா ஊரடங்கு காலத்தில் வெகுவாக பாதிக்கப்பட்டுள்ளது. ஏப்ரல் மற்றும் மே மாதங்களில் 50 சதவீதத்திற்கு மேல் வீழ்ச்சியடைந்துள்ளது. அதே வேளையில் நுகர்வோர் அல்லாத சாதனங்கள் பிரிவில் பெரிய அளவில் சரிவு ஏற்படவில்லை. ஏப்ரல் மாதத்தில் மட்டுமே அதிகபட்சமாக 36 சதவீதம் குறைந்துள்ளது.

ஏப்ரல் மாதத்தில் ஸ்டீல்(எஃகு) உற்பத்தி 83 சதவீதமும், சிமெண்ட் உற்பத்தி 85 சதவீதமும் இழப்பாக சந்தித்துள்ளது. ஸ்டீல் மற்றும் சிமெண்ட் துறைகள் பெரும்பாலும் மந்தநிலையில் தான் 2020ம் ஆண்டு முழுவதும் இருந்துள்ளது.

நிலக்கரி மற்றும் உரங்கள் ஓரளவு ஏற்ற-இறக்கத்தில் தான் வர்த்தகமாகியுள்ளது. ஜூன் காலாண்டு தவிர்த்து நிலக்கரி தேவை ஓரளவு அதிகரித்து வந்துள்ளது. அதே நேரத்தில் உரங்கள் மார்ச் மற்றும் ஏப்ரல் மாதத்தில் மட்டுமே வீழ்ச்சியடைந்துள்ளது.

சொல்லப்பட்ட வருடம் முழுவதும் இயற்கை எரிவாயு துறை இறக்கத்தில் மட்டுமே இருந்துள்ளது. ஏப்ரல் மாதத்தில் அதிகபட்சமாக எரிவாயு 20 சதவீதம் இழப்பு ஏற்பட்டுள்ளது.

பணவீக்க விகிதம்:

2020ம் ஆண்டின் ஜனவரி முதல் டிசம்பர் வரையிலான காலத்தில் நாட்டின் சில்லரை விலை பணவீக்க(Retail Inflation) விகிதம் சராசரியாக 6-8 சதவீதம் என்ற அளவில் இருந்துள்ளது. அதிகபட்சமாக ஜனவரி மற்றும் அக்டோபர் மாதங்களில் 7.6 சதவீதமும், குறைந்த அளவாக டிசம்பர் மாதத்தில் 4.6 சதவீதமும் உள்ளது. உணவுப்பொருட்கள் மற்றும் குளிர்பானங்களின் விலைவாசி கணிசமாக உயர்ந்து காணப்பட்டுள்ளது. ஊரடங்கு காலத்தில் ஏற்பட்ட எதிர்பாராத தேவையால் உணவு பொருட்களின் விலை அதிகரித்துள்ளது. இதன் அளவு சராசரியாக 8 சதவீதத்திற்கு மேல் இருந்தது குறிப்பிடத்தக்கது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மயூர் யூனிகோட்டர்ஸ் மூன்றாம் காலாண்டு நிகர லாபம் ரூ.35 கோடி

மயூர் யூனிகோட்டர்ஸ் மூன்றாம் காலாண்டு நிகர லாபம் ரூ.35 கோடி  

Mayur Uniquoters reported a net profit of Rs.35 Crore – Q3FY21

கடந்த 1992ம் ஆண்டு துவங்கப்பட்ட நிறுவனம் மயூர் யூனிகோட்டர்ஸ். செயற்கை தோல்(Artificial Leather) மற்றும் பி.வி.சி. வினைல்(PVC Vinyl) உற்பத்தியில் ஈடுபட்டு வரும் இந்நிறுவனம் ஏற்றுமதியிலும் முக்கிய பங்கு வகிக்கிறது. பல்வேறு தோல் சார்ந்த பொருட்களை தயாரிக்கும் இந்த நிறுவனம் குறிப்பாக காலணி, அலங்கார பொருட்கள், வாகனத்துறைக்கு தேவையான பொருட்களையும் உற்பத்தி செய்து விற்பனையை கொண்டிருக்கிறது.

நிறுவனத்தின் முக்கிய வாடிக்கையாளர்களாக டாட்டா, போர்டு(Ford), மாருதி சுசூகி, ஹோண்டா, பாட்டா(BATA), வி.கே.சி.(VKC), ரிலாக்சோ, பாராகான், ஸ்வராஜ்(Swaraj), இந்திய ரயில்வே, லான்சர் ஆகிய நிறுவனங்கள் உள்ளன. இந்திய செயற்கை தோல் உற்பத்தியில் முக்கிய பங்களிப்பை மயூர் யூனிகோட்டர்ஸ் கொண்டுள்ளது.

மயூர் யூனிகோட்டர்ஸ் நிறுவனத்தின் சந்தை மதிப்பு ரூ.1700 கோடி. புத்தக மதிப்பு 134 ரூபாயாகவும், கடன்-பங்கு விகிதம் 0.09 ஆகவும் உள்ளது. வட்டி பாதுகாப்பு விகிதம் 45 மடங்குகளிலும், நிறுவனர்களின் பங்களிப்பு 62 சதவீதமாகவும் உள்ளது. நிறுவனர்கள் சார்பில் பங்குகள் அடமானம் எதுவும் வைக்கப்படவில்லை.

நேற்று(12-02-2021) நிறுவனத்தின் மூன்றாம் காலாண்டு முடிவுகள் வெளியிடப்பட்டது. சொல்லப்பட்ட காலத்தில் நிறுவனத்தின் வருவாய் 170 கோடி ரூபாயாகவும், செலவினம் 124 கோடி ரூபாயாகவும் இருந்துள்ளது. இதர வருமானமாக ரூ.6 கோடி சொல்லப்பட்டுள்ளது. 2020-21ம் நிதியாண்டின் மூன்றாம் காலாண்டில் நிறுவனத்தின் நிகர லாபம் ரூ.35 கோடியாக உள்ளது. இதற்கு முந்தைய 10 காலாண்டுகளில் இல்லாத வருவாயும், நிகர லாபமும் தற்போது வந்துள்ளது குறிப்பிடத்தக்கது.

2019-20ம் நிதியாண்டில் நிறுவனத்தின் வருவாய் 528 கோடி ரூபாயாகவும், நிகர லாபம் 80 கோடி ரூபாயாகவும் சொல்லப்பட்டிருந்தது. கடந்த சில மாதங்களுக்கு முன்பு இந்நிறுவனத்தில் பங்குகளை திரும்ப பெறும் முறை(Buyback of Shares) அறிவிக்கப்பட்டிருந்தது. பங்கு ஒன்றுக்கு ரூ.400 என்ற விலையில் பங்குதாரர்களிடம் இருந்து, நிறுவனம் பங்குகளை வாங்கியிருந்தது. அப்போது அறிவிக்கப்பட்ட நிலையில், சந்தை விலை பங்கு ஒன்றுக்கு ரூ.275 க்கு கீழ் வர்த்தகமாகி கொண்டிருந்தது கவனிக்கத்தக்கது.

நிறுவனத்தின் இருப்புநிலை கையிருப்பு ரூ.571 கோடி(செப்டம்பர் 2020). நிறுவனத்தின் கடந்த மூன்று வருட பணவரத்து(Free Cash Flow) சராசரியாக 37 கோடி ரூபாயாக உள்ளது. தற்போதைய சந்தை விலை, விற்பனை மதிப்பில்(Price to sales) 4 மடங்குகளில் உள்ளது.

முதலீட்டாளர்கள், பங்குகளை வாங்கும் முன் தகுந்த நிதி ஆலோசகர் அல்லது பங்கு ஆலோசகரின் முன்னிலையில் தங்களது முதலீட்டு முடிவை எடுக்குமாறு அறிவுறுத்தப்படுகிறது. மேலே சொன்ன தகவல்கள் பங்குச்சந்தை அடிப்படை பகுப்பாய்வுக்கான கற்றல் மட்டுமே.

வாழ்க வளமுடன்,

நன்றி, வர்த்தக மதுரை 

www.varthagamadurai.com

இனி வாரத்திற்கு நான்கு வேலை நாட்கள் சாத்தியமா, தொழில்முனைவு இனி அவசியமா ?

இனி வாரத்திற்கு நான்கு வேலை நாட்கள் சாத்தியமா, தொழில்முனைவு இனி அவசியமா ?

4 Day work Week – Necessity of Entrepreneurship in the New Normal

கடந்த 2020ம் வருட ஏப்ரல் மாதத்தின் 18ம் தேதியன்று எனது வாடிக்கையாளர்கள் மற்றும் வாசகர்களுக்கான இணைய வழி சந்திப்பு(Webinar) ஒன்றை ஏற்படுத்தியிருந்தேன். சரியாக அது கொரோனா பெருந்தொற்று காரணமாக ஏற்பட்ட ஊரடங்கு காலமாகும்.

அதற்கு சில வாரங்களுக்கு முன்பு, நானும் சில தொழிலதிபர்கள் மற்றும் பொருளாதார வல்லுனர்களின் உரையாடல் மூலம் சில சிந்தனைகளை பெற்றிருந்தேன். இதன் பின்பு, எனது வாடிக்கையாளர்களிடம் கொரோனா பெருந்தொற்றுக்கு பிறகான காலம் மனித வாழ்வில் புதிய நகர்வாக இருக்கக்கூடும் என சொல்லியிருந்தேன்.

நான் சந்திப்பை ஏற்படுத்திய நிகழ்விலும் அதனை தான் கூறியிருந்தேன். வாசகர்கள் சிலர், ‘அப்படியெல்லாம் நடந்து விடாது சார், கொரோனாவுக்கு பின்னர், நாம் முன்னர் இருந்த சாதாரண வாழ்க்கை திரும்ப வந்து விடும்’ என கூறினார்கள். ஆனால் நான் குறிப்பிடத்தக்க தொழிலதிபர்களிடம்(வல்லரசு நாடு உட்பட அயல்நாட்டில் தொழில்புரிந்தவர்களும்)  அவர்களின் சிந்தனையில் அறிந்த போது, கொரோனா பெருந்தொற்றுக்கு பிறகான காலம் உறுதியாக புதிய மாற்றத்தை ஏற்படுத்தும் என நம்பினேன். பலருடைய வாழ்வில் மிகப்பெரிய ஏற்ற-இறக்கத்தை இனிவரும் காலங்கள் ஏற்படுத்தும் என்ற புரிதலுக்குள் முனைந்தேன். முக்கியமாக, அமெரிக்காவில் வாரத்திற்கு 40 மணிநேரம் மட்டுமே(5 நாட்கள் X 8 மணிநேரம்) இருந்த பணியாளர் வேலை நேரம் இனி வாரத்திற்கு 30 மணிநேரத்திற்கு குறைவாகவோ அல்லது வாரத்தில் நான்கு நாட்கள் மட்டுமே வேலை இருக்கலாம் என அமெரிக்க தொழிலதிபர் ஒருவர் கூறியிருந்தார். இந்த நிலை இந்தியாவிலும் வரக்கூடும், ஆனால் அதற்கான காலம் தாமதமாகலாம் என கூறினார். இதற்கான காரணமாக தொழில்நுட்பங்களும், அதனை சார்ந்த செயற்கை நுண்ணறிவின் அடுத்தகட்ட வளர்ச்சியும் தான் சொல்லப்பட்டன.

இதன் வாயிலாக நானும் சில விவரங்களை தொகுத்த ஆரம்பித்தேன். அதனை  வாடிக்கையாளர் சந்திப்பின் தொகுப்பாகவும் இணைத்தேன். அவற்றின் சுருக்கம்…

2020ம் ஆண்டுக்கு பிறகான சவால்கள்:
  • சமூக இடைவெளி என்பது இனி புதிய வாழ்வியல் நிலையாக இருக்கும்.
  • பல துறைகளில் இடையூறு மற்றும் வெற்றிடம் – புதுமை புகுதல்
  • ஆட்டோமேஷன் – செயற்கை நுண்ணறிவு
  • வரி விதிப்புகள்
  • சுகாதாரம் மற்றும் மருத்துவத்திற்கான தேவை
  • சுற்றுச்சூழல் பிரச்சனைகள்
வாய்ப்புகள்: 
  • மினிமலிசம் – குறைவாக செலவழித்தல் மற்றும் நிறைவான வாழ்வு
  • பல்வேறு வேலைவாய்ப்புகள் (தற்சார்பு வாழ்வு, தொழில்முனைவு)
  • புதிய மற்றும் பல முதலீட்டு சாதனங்களும், வாய்ப்புகளும்
  • உணவுக்கான புரட்சி (விவசாயத்தின் தேவை)
  • நிலைத்தன்மை வாழ்க்கை(Sustainability Living)
புதிய உதயம்:
  • பெரும்பாலும் தொழில்நுட்பம் சார்ந்த வாழ்க்கை நகர்வு
  • போதுமான நேரம் இருத்தல் (உங்களுக்கு பிடித்த வேலைகளை செய்தல், குடும்பத்துடன் நேரம் செலவழித்தல்)
  • சிந்தனைக்கு உணவு
  • தொழில்முனைவோர் வாழ்க்கை – இனி வழக்கமான வேலை இல்லை.

மேலே சொன்னவற்றை கண்டு நாம் பயப்படவோ, நகைப்புக்குரியதாகவோ எடுத்து கொள்ள வேண்டாம். இவை கணிப்புகள் அல்ல… பெரும்பாலான உலக பொருளாதாரத்தின் நகர்வுகள் !

அடுத்தகட்ட நகர்வுக்கு செல்லும் முன்னர் பொருளாதாரம் சார்ந்த பாதுகாப்பை பெற போதுமான டேர்ம் காப்பீடு, குடும்பத்திற்கான மருத்துவ காப்பீடு, அவசரகால நிதி, ஓய்வு காலத்திற்கான கார்பஸ் தொகை மற்றும் ஏற்கனவே உள்ள கடன்களை பெரும்பாலும் குறைத்தல் அல்லது கடனில்லா நிலை – இவ்வைந்தையும் உங்கள் வாழ்வில் உறுதி செய்து கொள்ளுங்கள்.

வரும் நாட்களில் தொழில்முனைவுக்கான தேவை அதிகமாக இருக்கும். நீங்கள் காப்பீடு ஏஜெண்டாக இருந்தாலும் பரவாயில்லை, இணைய வழி பொருட்களை விற்கும் தொழிலை கொண்டிருந்தாலும் பரவாயில்லை. வரும் நாட்கள், புதிய மாற்றத்தை கொண்டிருக்கும்.

குறிப்பு:

வாரத்திற்கு 48 மணிநேரமாக இருந்த தொழிலாளர்களுக்கான வேலை நேர வரம்பு, இனி வாரத்திற்கு நான்கு நாட்கள் மட்டுமே வேலை செய்தால் போதும். அதாவது வாரத்தில் ஊதியத்துடன் கூடிய மூன்று நாட்கள் கட்டாய விடுப்பு. நாளொன்றுக்கு 12 மணிநேர வேலை என்பது இனி ஊழியர்களின் விருப்பமாக இருக்கும். ஆனால் அனைத்து நாட்களிலும் இனி வேலை செய்ய முடியாது – மத்திய தொழிலாளர் அமைச்சகம் விரைவில் சட்டமாக்க உள்ள தகவல்

வாழ்க வளமுடன்,

நன்றி, வர்த்தக மதுரை 

www.varthagamadurai.com

சன் டி.வி. மூன்றாம் காலாண்டு நிகர லாபம் – ரூ.446 கோடி

சன் டி.வி. மூன்றாம் காலாண்டு நிகர லாபம் – ரூ.446 கோடி 

Sun TV reported a net profit of Rs.446 Crore in Q3FY21 results

22,000 கோடி ரூபாயை சந்தை மூலதனமாக கொண்டிருக்கும் சன் டி.வி. நிறுவனம் ஆசியாவின் மிகப்பெரிய செயற்கைக்கோள் தொலைக்காட்சி மற்றும் ஊடக நிறுவனமாக உள்ளது. நாளிதழ் வெளியீடு, ஒளிபரப்பு, படம், கேபிள் தொலைக்காட்சி, விளையாட்டு உரிமம் ஆகிய துறைகளில் தொழில் புரிந்து வருகிறது.

தென்னிந்திய மொழிகளில் முப்பதுக்கும் மேற்பட்ட சேனல்களையும், பல துணை நிறுவனங்களையும் உள்ளடக்கியுள்ளது சன் டி.வி. குழுமம். கடனில்லா நிறுவனமாக வலம் வரும் இந்நிறுவனத்தின் நிறுவனர்களின் பங்களிப்பு 75 சதவீதமாக உள்ளது. நிறுவனர்கள் சார்பில் பங்குகள் எதுவும் அடமானம் வைக்கப்படவில்லை.

வட்டி பாதுகாப்பு விகிதம்(Interest Coverage Ratio) 150 மடங்குகளில் உள்ளது கவனிக்கத்தக்கது. 2020-21ம் நிதியாண்டின் மூன்றாம் காலாண்டில் நிறுவனத்தின் வருவாய் 994 கோடி ரூபாயாகவும், செலவினம் 387 கோடி ரூபாயாகவும் உள்ளது. இயக்க லாபம் 608 கோடி ரூபாயாகவும், இயக்க லாப விகிதம் 61 சதவீதமாகவும் சொல்லப்பட்டுள்ளது.

இதர வருமானமாக மூன்றாம் காலாண்டில் 65 கோடி ரூபாய் உள்ளது. சொல்லப்பட்ட காலாண்டில் நிறுவனத்தின் நிகர லாபம் ரூ.446 கோடியாக உள்ளது. இது கடந்த டிசம்பர் 2019-20 காலாண்டை காட்டிலும் 16 சதவீதம் வளர்ச்சி பெற்றுள்ளது.

பங்கு ஒன்றுக்கு டிவிடெண்ட் தொகையாக ரூ.5 அறிவிக்கப்பட்டுள்ளது. சந்தாதாரர்களின் மூலமான வருவாய் டிசம்பர் காலாண்டில் மூன்று சதவீதம் அதிகரித்துள்ளது. இதன் மதிப்பு 424 கோடி ரூபாய்.

2019-20ம் நிதியாண்டில் நிறுவனத்தின் வருவாய் 3,520 கோடி ரூபாயாகவும், நிகர லாபம் ரூ.1,385 கோடியாகவும் சொல்லப்பட்டுள்ளது. செப்டம்பர் 2020 காலாண்டின் படி, இருப்புநிலை கையிருப்பு(Reserves) 6,120 கோடி ரூபாயாக உள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

போர்ட்ஃபோலியோ இன்சூரன்ஸ் – ஏன், எதற்கு ?

போர்ட்ஃபோலியோ இன்சூரன்ஸ் – ஏன், எதற்கு ?

Portfolio Insurance – why is it necessary ?

இன்றைய நாளில் ரிஸ்க் இல்லாத முதலீடு என்று எதுவுமில்லை. பொதுவாக முதலீட்டில் ரிஸ்க் இருக்கிறது என்று அதனை தவிர்ப்பதை காட்டிலும், ரிஸ்க்கை சரியாக கையாள தெரிந்திருக்க வேண்டும். முதலீட்டில் காணப்படும் ரிஸ்க் தன்மையை பரவலாக்குதல்(Asset allocation) மற்றும் துறை சார்ந்த பல்வகைப்படுத்துதல்(Diversification) மூலம் குறைக்கலாம். பரவலாக்குதல் என்பது உங்களிடம் ஒரு லட்சம் ரூபாய் முதலீடு செய்யும் நிலையில் உள்ளதென்றால், வெறுமென வங்கியிலோ அல்லது பங்குச்சந்தையிலோ முழுவதுமாக முதலீடு செய்யாமல், வங்கியில் கொஞ்சம், பங்குகளில் கொஞ்சம், தங்கம் மற்றும் கடன் பத்திரங்கள் என இன்னும் சில முதலீட்டு சாதனங்களை சேர்த்து கலவையாக செய்வது.

இதன் மூலம் பங்குச்சந்தை முதலீடு இறங்கினாலும், உங்களது மற்ற முதலீட்டு சாதனங்கள் அதற்குரிய வருவாய் மற்றும் முதலீட்டு பாதுகாப்பை அளிக்கும். அதே சமயத்தில் மற்ற முதலீடுகள் பணவீக்கத்தை தாண்டிய வருவாயை எட்ட முடியாத நிலையில், பங்குச்சந்தை ஏற்றம் உங்களது முதலீட்டு பெருக்கத்தை அதிகப்படுத்தும். பொதுவாக வங்கியில் வட்டி விகிதம் குறைவாக இருக்கும் போது கடன் பத்திரங்களில்(Bonds) வட்டி விகிதம் சற்று அதிகமாக காணப்படும். இது போல பங்குச்சந்தை இறக்கத்தில் தங்கத்தின்(Gold) மீதான வருவாய் அதிகரிக்கும்.

பங்குச்சந்தையில் முதலீடு செய்பவர்கள் ஒரே துறையில் மட்டுமே முதலீடு செய்யாமல் பல துறைகள் சார்ந்த பங்குகளில் முதலீடு செய்யும் போது, துறை சார்ந்த ரிஸ்க் தன்மையை குறைக்கலாம். சேமிப்புக்கும், முதலீட்டுக்குமான வேறுபாட்டை நாம் தெரிந்து கொண்டால், நீண்டகாலத்தில் செல்வவளத்தை ஏற்படுத்தலாம். சேமிப்பு என கூறும் போது பாதுகாப்பு இருந்தாலும், பணவீக்கம் தான் பாதகமாக அமையும். ஆனால் முதலீடு எனும் போது பலவித ரிஸ்க் தன்மைகளை நாம் கையாள வேண்டும். எதிர்பாராமல் வரக்கூடிய இழப்பீடுகளை தவிர்க்க நாம் முதலீட்டு காப்பு செய்வது அவசியமாகும்.

முதலீட்டு காப்பு என்பது உங்கள் முதலீட்டின் மீதான விளைவுகளிலிருந்து உங்கள் அன்றாட (நிதி) வாழ்க்கையை பாதுகாக்க உதவுவது; நீங்கள் செய்யும் முதலீடு உங்களுக்கு வருமானம் ஏதும் தராமலோ அல்லது நஷ்டத்தையோ ஏற்படுத்தலாம்; அந்த சமயத்தில் உங்களது தினசரி பொருளாதாரம் சார்ந்த வாழ்க்கையை பாதிக்காத வண்ணம் காப்பது அவசியம். இதை தான் நாம் முதலீட்டு காப்பு(Investment insurance or insulation) என்கிறோம்.

தனிநபர் ஒருவர் சிறு முதலீட்டாளராக வலம் வரும் போது போதுமான தொகைக்கு டேர்ம் பாலிசி, மருத்துவ மற்றும் விபத்து காப்பீடு பெறுவது அவசியம். ஆறு மாதம் முதல் ஒரு வருடத்திற்கு தேவையான அவசரகால நிதி, கடன் இருந்தால் அதனை முழுவதுமாக அடைத்து விடுதல், எதிர்கால இலக்கிற்கு தேவையான தொடர் முதலீடு ஆகியவற்றை சரியாக கையாள்வது நல்லது. நிதி சொத்துக்கள்(Stocks, Bonds, Deposits, Mutual Funds, Cash) மற்றும் அசையா சொத்துக்கள்(Real Estate, Commodity, Machinery) என முதலீட்டை கலவையாக கொண்டிருக்கும் நிலையை போர்ட்ஃபோலியோ முதலீடு எனலாம்.

குடும்பத்தில் வருவாய் ஈட்டும் ஒருவர், தனது குடும்பத்திற்கு தேவையான நிதி பாதுகாப்பை உறுதி செய்ய டேர்ம் பாலிசி மற்றும் மருத்துவ காப்பீடு எடுப்பது அவசியமென சொல்லியிருந்தோம். அது போல நமது வாகனம், வீடு, கைபேசி, வீட்டு உபயோக பொருட்கள் மற்றும் தொழில் சார்ந்த உபகரணங்களுக்கும் காப்பீடு எடுத்து வைக்கலாம். ஆனால் நீங்கள் செய்த முதலீட்டிற்கு ?

முதலீட்டிற்கு காப்பீடு செய்வது அவசியமா என்ன ?

ஆம், அவசியம் தான். உங்களது முதலீடு சிறிய அளவில் செய்யப்பட்டிருந்தால், சந்தை இறக்கத்தில் ஏற்படும் இழப்பை தவிர்க்க நாம் முதலீட்டை பரவலாக்கலாம். இல்லையெனில் தங்கத்தை ஒரு இழப்பு காப்பு சாதனமாக(Hedging) பயன்படுத்தலாம். பங்குச்சந்தை இறக்கத்தில் தங்கத்தின் செயல்பாடு இதுவரை வரலாற்றில் சாதகமாக தான் இருந்துள்ளது.

உங்களது முதலீட்டு போர்ட்ஃபோலியோ மதிப்பு அதிகமாக இருக்கும் நிலையில், அதனை பொருளாதார மந்தநிலை காலங்களில் ஏற்படும் இழப்பிலிருந்து பாதுகாக்க முறையான காப்பு செய்ய வேண்டியது அவசியம். உதாரணமாக ஒருவரது போர்ட்ஃபோலியோ மதிப்பு ரூ.50 லட்சம் என கொள்வோம். பங்குகளில் அவரது முதலீடு 20 சதவீதமாக உள்ளது. அதாவது 50 லட்சம் ரூபாயில் 10 லட்ச ரூபாய் பங்குகளில்.

ஏதோ ஒரு காரணத்தால் சந்தை பெரும் வீழ்ச்சியை காணும் போது, இவரது பங்குகளின் மதிப்பு 10 சதவீத இழப்பை சந்திக்கிறது. 10 லட்சம் ரூபாய் மதிப்பில், ஒரு லட்ச ரூபாய் மதிப்பு இழப்பு(அவர் உண்மையில் பங்குகளை விற்கவில்லை, இழப்பு மதிப்பில் மட்டுமே). இதனை தவிர்க்கும் வகையில், அவர் முன்னரே இழப்பு ஏற்படுவதற்கான காப்பு முறையை செய்திருந்தால், அவரது இழப்பு மதிப்பு குறையும். இதற்கு இழப்புகளை கட்டுப்படுத்த பயன்படும் ஹெட்ஜிங் உத்தி(Hedging Strategy) துணைபுரியும். அவரது போர்ட்ஃபோலியோ மதிப்புக்கு ஈடாக, ஊக வணிகத்தில்(Derivatives) ரூ.5000 க்கு காப்பீடு செய்திருந்தால், அவருக்கு ஏற்படும் இழப்பு ரூ.10,000 மட்டுமே. காப்பீட்டு பிரீமியத்தொகை  மற்றும் ஏற்படக்கூடிய இழப்பும் சேர்த்து ரூ.15,000 மட்டுமே செலவாகும். இதனை அவர் செய்யாமல் விட்டால், அவருக்கு போர்ட்ஃபோலியோ மதிப்பில் ரூ. 1 லட்சம் இழப்பாக காணப்படும். (காப்பீடு செய்ய வேண்டிய தொகையான ரூ.5,000 ஒரு உதாரணமாகவே சொல்லப்பட்டுள்ளது. சந்தையில் இந்த தொகை வேறுபடலாம். எனவே, தகுந்த நிதி ஆலோசகர் அல்லது தரகரிடம் கேட்டு தெரிந்து கொள்ளவும்)

காப்பீடு செய்ய வேண்டிய தொகை, பொதுவாக உங்களது மொத்த முதலீட்டு மதிப்பில் 5 சதவீதத்திற்கு மிகாமல் இருக்குமாறு பார்த்து கொள்வது நல்லது. உதாரணமாக உங்களது பங்கு முதலீட்டு மதிப்பு ரூ.10 லட்சம் என்றால், நீங்கள் அதற்குரிய இழப்பு காப்பு தொகையாக அதிகபட்சம் 50,000 ரூபாய் வரை செலவழிக்கலாம். அதற்கு மேல் செலவு செய்வது உங்களது முதலீட்டிற்கே விரயத்தை ஏற்படுத்தி விடும். சந்தையில் ஏற்படும் சிறிய அளவிலான ஏற்ற-இறக்கத்திற்கு தேவைப்பட்டால் மட்டுமே காப்பு செய்ய வேண்டும். பெரும்பாலும் உலக பொருளாதார மந்தநிலை, போர் பதற்றம், கொரோனா பெருந்தொற்று காரணமாக ஏற்படும் ஊரடங்கு சமயங்களில் மட்டுமே பங்குச்சந்தை அதிக வீழ்ச்சியை காண்பதற்கான வாய்ப்புகள் அதிகம். எனவே அதனை கருத்தில் கொண்டு நாம் முடிவு செய்யலாம்.

பங்குகளில் மட்டுமில்லாமல், நாம் மற்ற முதலீடுகளின் மீது ஏற்படும் ரிஸ்க் தன்மையையும் அதற்கேற்ற உத்திகளை பயன்படுத்தி குறைக்கலாம். வெறுமெனே போர்ட்ஃபோலியோ காப்பு(Portfolio Insurance) மட்டும் செய்யாமல், பங்குச்சந்தை வீழ்ச்சியில் தங்கத்தின் மூலம் கிடைத்த பெருத்த லாபத்தை, மீண்டும் பங்குகளில் விலை குறைவாக இருக்கும் வாய்ப்பை பயன்படுத்தி முதலீடு செய்வதும் சிறந்த உத்தி தான்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

சுமாராக இருந்த பட்ஜெட், சூப்பராக மாறுமா ? – பட்ஜெட் தாக்கல் அறிக்கை 2021

சுமாராக இருந்த பட்ஜெட், சூப்பராக மாறுமா ? – பட்ஜெட் தாக்கல் அறிக்கை 2021

Budget India 2021 – Highlights & Insights

 

2021-22ம் நிதியாண்டுக்கான நாட்டின் பட்ஜெட் திங்கட்கிழமை அன்று(01-02-2021) நிதி அமைச்சர் திருமதி. நிர்மலா சீதாராமன் அவர்களால் தாக்கல் செய்யப்பட்டது. நாட்டின் முதல் காகிதமில்லா மின்னணு பட்ஜெட்டாக இது சொல்லப்பட்டது. ஒரு ரூபாய் பட்ஜெட்டாக இதனை கணக்கில் கொள்ளும் போது, மத்திய அரசின் வரவு-செலவினை எளிமையாக புரிந்து கொள்ளலாம்.

 

அரசின் வருவாய் பெரும்பாலும் வரி சார்ந்த வருவாயாக தான் இருக்கும். ஒரு ரூபாய் பட்ஜெட்(One Rupee Budget) வருவாயில் 15 பைசா சரக்கு மற்றும் சேவை வரியாகவும்(GST), வருமான வரி மூலம் 14 பைசாவும், நிறுவனங்களுக்கான வரி மூலம் 13 பைசாவும் வருமானமாக ஈட்டப்படுகிறது. கடன்கள் மற்றும் பிற பொறுப்புகள் மூலம் 36 பைசா மற்றும் தொழில் சார்ந்த கலால் வரி மூலம் 8 பைசாவும் பெறப்படுகிறது. சுங்க வரி மூலமான வருவாய் 3 பைசாவும், வரி அல்லாத வருவாய் 6 பைசாவாகவும், கடன் அல்லாத மூலதன ரசீதுகள் மூலம் கிடைக்கப்பெற்ற வருவாய் 5 பைசாவாகவும் உள்ளது.

 

செலவுகள் பிரிவில் காணும் போது அரசின் பெரும்பாலான செலவு வட்டி செலுத்துவதிலும், வரிகளை பகிர்ந்தளித்தல் மற்றும் மத்திய துறை சார்ந்த திட்டங்களுக்கு தான். வட்டி செலவுகள் 20 பைசாவாகவும், மாநிலங்களுக்கு வரிகளை பகிர்ந்தளிப்பதில் 16 பைசாவும் மற்றும் மத்திய அரசின் துறை சார்ந்த திட்டங்களுக்கு 14 பைசாவும் செலவிடப்படுகிறது. நிதி ஆணையம் மற்றும் பிற பரிமாற்றங்களுக்கு 10 பைசாவும், மானியங்களுக்கு 8 பைசாவும் சொல்லப்பட்டுள்ளது. ஓய்வூதியத்திற்கு 5 பைசாவும், பாதுகாப்பு துறைக்கு 8 பைசாவும் மற்றும் இதர செலவுகளுக்கு 10 பைசாவாக உள்ளது.

 

கடந்த ஆண்டு பட்ஜெட்டில் பாதுகாப்பு துறைக்கு 4.72 லட்சம் கோடி ரூபாய் சொல்லப்பட்ட நிலையில் இம்முறை கூடுதலாக 1.5 சதவீதம் என்ற அளவில் குறிப்பிடப்பட்டுள்ளது. 2021-22ம் நிதியாண்டுக்கான மூலதன செலவு 19 சதவீதம் அதிகரிக்கப்பட்டுள்ளது. அதே வேளையில் விவசாய நலனுக்காக சுமார் 6 சதவீதம் அதிகமாக ஒதுக்கப்பட்டுள்ளது. 

 

சாலை மற்றும் ரயில் போக்குவரத்துக்காக முறையே ரூ. 1.18 லட்சம் கோடி மற்றும் ரூ.1.10 லட்சம் கோடி ஒதுக்கீடு செய்யப்பட்டுள்ளது. பாதுகாப்பு துறைக்கு 4.78 லட்சம் கோடி ரூபாயும், உள்நாட்டு விவகாரங்களுக்கு ரூ. 1.66 லட்சம் கோடி மற்றும் கிராமப்புற வளர்ச்சிக்காக ரூ.1.33 லட்சம் கோடி என சொல்லப்பட்டுள்ளது. கல்வி வளர்ச்சிக்கு 93,224 கோடி ரூபாயும், சுகாதார துறைக்கு 73,932 கோடி ரூபாயும் ஒதுக்கப்பட்டுள்ளது.

 

வீட்டு வசதி மற்றும் நகர்ப்புற மேம்பாட்டுக்காக 54,580 கோடி ரூபாய் மற்றும் நுகர்வோர், உணவு மற்றும் பொது விநியோக தேவைகளுக்கு 2.56 லட்சம் கோடி ரூபாயும் பட்ஜெட் தாக்கலில் அறிவிக்கப்பட்டுள்ளது. சுகாதாரம் மற்றும் மருத்துவம் சார்ந்த திட்டங்களுக்கு கணிசமான தொகை சொல்லப்பட்டிருந்தாலும், வளர்ந்த மற்றும் வேகமாக வளரும் நாடுகளில் நம் நாட்டின் பங்கு மிகவும் குறைவான அளவில் தான் உள்ளது. நாட்டின் மொத்த உள்நாட்டு உற்பத்தியில் இதன் பங்களிப்பு வெறும் ஒரு சதவீதம் மட்டுமே.

 

நடப்பு நிதியாண்டில் நிதி பற்றாக்குறையாக மொத்த உள்நாட்டு உற்பத்தியில் 9.5 சதவீதமாக இருக்கும் என தெரிவிக்கப்பட்டுள்ளது. 2020-21ம் நிதியாண்டின் அடுத்த இரு மாதங்களுக்கான செலவுகளுக்காக அரசு சுமார் 80,000 கோடி ரூபாய் கடன் வாங்க உள்ளது. அடுத்த நிதியாண்டில் ரூ.12 லட்சம் கோடியை கடனாக பெற உள்ளதாக நிதியமைச்சர் கூறியுள்ளார். 2021-22ம் நிதியாண்டின் மொத்த செலவுகள் 34.83 லட்சம் கோடி ரூபாயாக இருக்கலாம் என நிர்ணயிக்கப்பட்டுள்ளது.

 

அன்னிய முதலீட்டை காப்பீடு துறையில் அதிகரிப்பது, சாலை மற்றும் ரயில் போக்குவரத்துக்கான ஒதுக்கீடு, வங்கிகளில் மறு மூலதனமாக்கல், வங்கிகளில் காணப்படும் வாராக்கடனுக்கான தீர்வு, பொதுத்துறை நிறுவனங்களின் மூலம் பங்கு விலக்கல் நடவடிக்கை ஆகியவை அரசுக்கான நிதி சுமையை குறைக்கலாம். 

 

நேரடி வரி(Direct Tax) சார்ந்த நடவடிக்கைகளில் பெரிதான மாற்றம் எதுவும் சொல்லப்படவில்லை. 75 வயதுக்கு மேற்பட்ட மூத்த குடிமக்களுக்கான வருமான வரி தாக்கலில் சலுகை அளிக்கப்பட்டுள்ளது. சொல்லப்பட்ட வயதுக்கு மேற்பட்டவர்கள் வரி தாக்கல் செய்ய தேவையில்லை. அதே வேளையில் வருமான வரி சட்டத்தின் 194பி என்ற பிரிவின் படி ஓய்வூதியதாரர்களுக்கான வரி பிடித்தம் மற்றும் வட்டி வருவாய்க்கான டி.டி.எஸ். பிடித்ததை வங்கிகள் மேற்கொள்ளுமாறு சொல்லப்பட்டுள்ளது.  

 

வெளிநாட்டு வாழ் இந்தியர்கள் உள்நாட்டிற்கு திரும்பும் போது, அவர்களின் வெளிநாட்டு ஓய்வூதிய கணக்குகளில் அவர்கள் சம்பாதித்த வருமானம் தொடர்பான சிக்கல்கள் உள்ளன. இதன் காரணமாக அவர்கள் இரட்டை வரி விதிப்பு முறைக்கு ஆளாக நேரிடுவதுண்டு. இந்த சிக்கல்களை நீக்குவதற்கான திட்டம் உள்ளதாக நிதி அமைச்சர் கூறியுள்ளார். 

 

இனி மேல் வருமான வரி தாக்கல் செய்யும் போது, வங்கிகளின் டி.டி.எஸ். பிடித்தம் மற்றும் படிவம் 16ன் கீழ் உள்ள விவரங்கள் தானியங்கியாக சொல்லப்படுவது போல, பட்டியலிடப்பட்ட பங்குகள் மற்றும் டிவிடெண்ட் வருவாய் போன்ற மூலதன ஆதாயம் சார்ந்த விவரங்கள் முன்னரே நிரப்பப்பட்டிருக்கும். இதனை பற்றி நாம் ஏற்கனவே(பட்ஜெட் தாக்கலுக்கு முன்பாக) மற்றொரு பதிவில் சொல்லியிருந்தோம்.  

 

2020-21ம் நிதியாண்டில் மத்திய அரசு நிர்ணயித்த பங்கு விலக்கல் நடவடிக்கை மூலமான இலக்கு ரூ.2.1 லட்சம் கோடியாக இருந்த நிலையில், கொரோனா பெருந்தொற்று காரணமாக சுமார் 15,000 கோடி ரூபாய் அளவில் மட்டுமே ஈர்க்கப்பட்டுள்ளது. இதனை தொடர்ந்து 2021-22ம் நிதியாண்டில் பங்கு விலக்கல் இலக்கு தொகை ரூ.1.75 லட்சம் கோடியாக சொல்லப்பட்டுள்ளது. 

 

விவசாய உட்கட்டமைப்பு மற்றும் மேம்பாட்டு செஸ்(AIDC) என்ற வரி விதிப்பு எரிபொருட்களுக்கு(Petrol & Diesel) சொல்லப்பட்டுள்ளது. காப்பர் கழிவுகளுக்கான(Copper Scrap) வரி குறைக்கப்பட்டிருந்தாலும், சோலார் இன்வெர்ட்டர்கள் மற்றும் சூரிய விளக்குகளுக்கான வரி மூன்று முதல் நான்கு மடங்கு உயர்த்தப்பட்டுள்ளது. பெரும்பாலான பொருட்கள் மற்றும் சேவைகளுக்கான வரி விதிப்பு இன்று(02-02-2021) முதல் அமலுக்கு வருகிறது.

 

மகளிர் மற்றும் குழந்தை வளர்ச்சிக்கான ஒதுக்கீட்டில் பெரிதான தொகை எதுவும் சொல்லப்படவில்லை. அவை பெரும்பாலும் ஒரு குழுவின் கீழ் இணைக்கப்பட்டுள்ளது எனலாம். பொதுவாக ஒவ்வொரு துறையின் கீழ் சொல்லப்படும் பட்ஜெட் ஒதுக்கீட்டு தொகை அந்தந்த நிதியாண்டில் பெறப்படுகிறதா என்று கேள்வி எழுப்பினால் அது சந்தேகமே. 

 

அரசுக்கான வருவாய் சரியான நிலையில் வந்தடைந்து, செலவுகள் சொல்லப்பட்ட அளவில் கட்டுப்படுத்தப்பட்டால் மட்டுமே அனைத்து துறைக்கான ஊக்கமும் சாத்தியமாகும். நாம் வீட்டில் போடும் பட்ஜெட் போலத்தான் நாட்டின் பட்ஜெட் தாக்கலும். பட்ஜெட்டில் துண்டு விழாமல் இருக்க போவதில்லை. அதே நேரத்தில், கடன் தன்மை அதிகரிப்பதை எச்சரிக்கையாக கையாள வேண்டும்.

 

அரசு மீண்டும் அதிகப்படியான கடனை பெற போவது, உட்கட்டமைப்புக்கான நிலங்களை கையகப்படுத்துவது, அரசு பொதுத்துறை நிறுவனங்களில் பங்கு விலக்கல், வங்கிகளின் வாராக்கடனுக்கான புதிய திட்டம், தனியார் மயம் மற்றும் தனியார் முதலீடு ஆகியவை வரக்கூடிய காலங்களில் சவாலான விஷயமாக அமையக்கூடும். 

 

பட்ஜெட் தாக்கலின் போது இந்திய பங்குச்சந்தையில் காணப்பட்ட ஏற்றத்திற்கு அன்றைய உலக சந்தை குறியீடுகளும் முக்கிய காரணமாக அமைந்திருந்தன. ஹாங்காங், தைவான், தென் கொரியா மற்றும் இந்தோனேஷியா நாடுகளின் பங்குச்சந்தை குறியீடுகள் இரண்டு சதவீதத்திற்கும் மேல் ஏற்றம் பெற்றிருந்தது குறிப்பிடத்தக்கது. மதிய வேளையில் வர்த்தகமாகிய புட்சீ(FTSE) குறியீடும் ஏற்றத்தில் தான் துவங்கின. சுமாரான பட்ஜெட், வரும் நாட்களில் சூப்பரான பட்ஜெட்டாக மாறுமா ? இல்லையெனில், நடுத்தர மக்களிடையே பணவீக்கத்தை அதிகரித்து மீண்டும் ஒரு மந்தநிலையை ஏற்படுத்துமா என்பதனை பொறுத்திருந்து பார்ப்போம். 

 

வாழ்க வளமுடன்,

 

நன்றி, வர்த்தக மதுரை 

 

www.varthagamadurai.com



பொருளாதார ஆய்வறிக்கை 2021 – என்ன சொல்கிறது ?

பொருளாதார ஆய்வறிக்கை 2021 – என்ன சொல்கிறது ?

Budget India 2021 – Economic Survey

மத்திய அரசின் பட்ஜெட் காலத்திற்கான நாடாளுமன்ற கூட்டம் நேற்று(29-01-2021) துவங்கியது. வரும் திங்கட்கிழமை(01-02-2021) மத்திய அரசு சார்பில் பட்ஜெட் தாக்கல் செய்யப்பட உள்ளது. ஒவ்வொரு ஆண்டின் பட்ஜெட் தாக்கலுக்கு முன்பு, நாட்டின் பொருளாதார ஆய்வறிக்கை வெளியிடப்படும். இது அரசின் அடுத்தகட்ட பொருளாதார நடவடிக்கைக்கு உதவும்.

மூன்றாவது முறையாக நாட்டின் பட்ஜெட் தாக்கலை நிதி அமைச்சர் திருமதி. நிர்மலா சீதாராமன் அறிவிக்க உள்ளார். நடப்பு நிதியாண்டில் காணப்பட்ட நடப்பு கணக்கு உபரித்தொகை(Current Account Surplus) கடந்த 17 வருடங்களில் இல்லாத அளவாகும். வரக்கூடிய 2021-22ம் நிதியாண்டில் நாட்டின் பொருளாதார வளர்ச்சி 11 சதவீதமாக இருக்கும் எனவும் மதிப்பிடப்பட்டுள்ளது. இந்த மதிப்பீடு நாடு சுதந்திரம் பெற்ற பிறகு சொல்லப்பட்ட அதிகபட்ச அளவாகும்.

கொரோனா நிவாரண நடவடிக்கைக்கு பின்னர், நாட்டில் உள்ள வங்கிகள் பழைய தவறுகளை மீண்டும் செய்யாமல் வங்கி நிதி நிலைமையை கவனத்துடன் வைத்திருக்க வேண்டும் என தலைமை பொருளாதார ஆலோசகர் திரு. கிருஷ்ணமூர்த்தி சுப்ரமணியன் கூறியுள்ளார்.

நாட்டின் பொருளாதாரம் உயரும் போது, கடன் தன்மையிலும் எச்சரிக்கையாக செயல்படுவது அவசியம். நடப்பு நிதியாண்டில் நாட்டின் பொருளாதாரம் (-7.7%) என்ற அளவில் முடிவடையலாம்.

உலகளாவிய கொரோனா பெருந்தொற்றால் ஏற்பட்ட பொருளாதார வீழ்ச்சி(GDP Growth) அதிகமாக இருந்த போதிலும், சாதகமான நடப்பு கணக்கு, நிலையான நாணயம், அந்நிய செலவாணி கையிருப்பு அதிகரித்து வருவது, உற்பத்தி துறையில் ஊக்குவிப்பு ஆகியவை வரக்கூடிய காலங்களில் நிலையான பொருளாதார வளர்ச்சியை ஏற்படுத்தும் என சொல்லப்பட்டுள்ளது.

நடப்பு நிதியாண்டின் ஏப்ரல் மாதம் முதல் நவம்பர் வரையிலான காலத்தில் அரசு ஈட்டிய வரி வருவாய் 12.6 சதவீதம் என்ற அளவில் குறைந்துள்ளது. இதன் மதிப்பு 10.26 லட்சம் கோடி ரூபாயாக உள்ளது கவனிக்கத்தக்கது.

அரசு நிறுவனங்களின் பங்கு விலக்கல்(Disinvestment) மூலமான இலக்கு 2.1 லட்சம் கோடி ரூபாயாக நிர்ணயிக்கப்பட்ட நிலையில், கொரோனா பெருந்தொற்று காரணமாக சுமார் 15,000 கோடி ரூபாய் மதிப்பில் மட்டுமே அடையப்பட்டுள்ளது. வரக்கூடிய பட்ஜெட் தாக்கலில் அரசுக்கான வருவாயை அதிகரிப்பதற்கான திட்டங்கள் விவாதிக்கப்படலாம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

கொரோனா பெருந்தொற்றிலும் அதிகரித்த சமத்துவமின்மை விகிதம்

கொரோனா பெருந்தொற்றிலும் அதிகரித்த சமத்துவமின்மை விகிதம் 

The Covid-19 Inequality Rate – Rich gets Richer

ஆக்ஸ்பேம்(Oxfam) நிறுவனம் சார்பில் கடந்த 2020ம் ஆண்டின் ஜனவரி மாதத்தில் வெளியிடப்பட்ட ஒரு அறிக்கையில் பணக்காரர்கள் மற்றும் ஏழைகளுக்கு இடையிலான தரவுகள் சிலவற்றை கூறியிருந்தது. ‘உலகின் 60 சதவீத மக்கள் சம்பாதிக்கும் பணத்தை காட்டிலும், அதிக சொத்து மதிப்பு கொண்டிருப்பவர்களின் எண்ணிக்கை வெறும் 2,153 பில்லினியர்கள். ஆப்பிரிக்காவில் உள்ள அனைத்து பெண்கள் சம்பாதிக்கும் வளத்தை விட அதிக சொத்து, உலகின் 22 பணக்காரர்களிடம் உள்ளது. நம் நாட்டில் 95.3 கோடி மக்களின் வளத்தை காட்டிலும் நான்கு மடங்கில் ஒரு சதவீத இந்தியர்களிடம் உள்ளது ‘ என சொல்லப்பட்டிருந்தது.

நாட்டில் உள்ள ஒரு ஐ.டி. நிறுவனத்தின் தலைமை அதிகாரி சம்பாதிக்கும் ஒரு வருட வருவாயை பெற, பெண் ஊழியர் ஒருவர் 22,277 வருடங்கள் வேலை பார்த்தாக வேண்டும். அவர் பத்து நிமிடங்களில் சேர்க்கும் பணத்தை, தொழிலாளர் ஒருவர் ஒரு வருடம் முழுவதும் உழைத்தால் மட்டுமே கிடைக்கும்.

சமத்துவம் சார்ந்த கொள்கைகள் வழிவகுக்கப்பட்டால் ஒழிய பணக்காரர்கள் – ஏழைகளுக்கு இடையிலான இடைவெளியை குறைக்க இயலாது என இந்த கூட்டமைப்பு சொல்கிறது. நிறுவனங்கள் மற்றும் செல்வந்தர்கள் தங்கள் வரியை நியாயமாக செலுத்துவதை அரசு உறுதி செய்ய வேண்டுமெனவும், கிடைக்கும் வரி பணத்தை அரசு முறையாக பொது சேவைகள் மற்றும் உட்கட்டமைப்புக்கு பயன்படுத்துவதை கண்காணிக்கும் முறைகள் கையாளப்பட வேண்டும் எனவும் ஆக்ஸ்பேம் மேற்கோள் காட்டுகிறது.

தற்போது கொரோனா பெருந்தொற்று காலத்தில் ஏற்பட்ட ஊரடங்கு மற்றும் அதனை சார்ந்த சமத்துவமின்மை விகித புள்ளிவிவரங்களை இந்த நிறுவனம் வெளியிட்டுள்ளது. மார்ச் 2020க்கு பிறகு, இந்தியாவில் 100 பில்லியனர்களின் சொத்து மதிப்பு 12.97 லட்சம் கோடி ரூபாயாக உயர்ந்துள்ளது. அதாவது நாட்டில் காணப்படும் சுமார் 14 கோடி ஏழைகளுக்கு, நபர் ஒன்றுக்கு 94,045 ரூபாயாக பிரித்து கொடுக்கலாம் என சொல்கிறது.

கொரோனா பெருந்தொற்று காலத்தில் ரிலையன்ஸ் இண்டஸ்ட்ரீஸ் நிறுவனத்தின் தலைவர் திரு. முகேஷ் அம்பானி ஒவ்வொரு மணி வேளையில்(an Hour) சம்பாதித்த வருவாயை, அமைப்பு சாரா தொழிலாளி ஒருவர் சம்பாதிக்க 10,000 வருடங்கள் தேவைப்படும் என இந்த அறிக்கை குறிப்பிடுகிறது. ஊரடங்கு காலத்தில் சுமார் 40 கோடி பேர் வறுமை நிலைக்கு தள்ளப்பட்டுள்ளதாகவும், இவர்களில் பெரும்பாலானோர் அமைப்பு சாரா துறையில் உள்ளவர்கள் எனவும் சொல்லப்பட்டுள்ளது.

கிராமப்புறங்களில் கணினி பயன்பாடு நான்கு சதவீதம் மட்டுமே உள்ளது. இணைய சேவையும் 15 சதவீதத்திற்கு குறைவாகவே கிராமப்புறங்களில் காணப்படுகிறது. கொரோனா காலத்தில் அடிப்படை ஆரம்ப கல்வி(பள்ளிக்கல்வி) தடைப்பட்டுள்ளது. அதே நேரம் சொல்லப்பட்ட காலத்தில் பைஜூ(Byju’s) போன்ற இணைய வழி கல்வி சார்ந்த நிறுவனங்களின் மதிப்பு அதிகரித்துள்ளது.

இந்திய மக்கள் தொகையில் 60 சதவீத மக்கள் ஒரு வீடு அல்லது அதற்கு குறைவான இருப்பிடத்தில் வசித்து வருகின்றனர். சுகாதாரம் மற்றும் மருத்துவ அடிப்படையிலும் பெரும்பாலான மக்களுக்கு போதுமான வசதி கிடைக்கப்பெறவில்லை. ஏப்ரல் 2020 தரவுகளின் படி, நாட்டில் சுமார் 1.7 கோடி பெண்கள் தங்கள் வேலைகளை இழந்துள்ளனர். இந்த வேலையிழப்பு விகிதம் நாட்டின் அடுத்தகட்ட வளர்ச்சிக்கு பாதகமாக அமையும் என ஆக்ஸ்பேம் குறிப்பிட்டுள்ளது.

கோடிக்கணக்கான மக்கள் தங்கள் வாழ்வாதாரங்களை இழந்து வரும் நிலையில், கோடீஸ்வரர்களின் சொத்து மதிப்பு உயர்ந்து வருவது கொரோனா பெருந்தொற்று காலத்திலும் மாறவில்லை. கொரோனா பெருந்தொற்றால் ஏற்பட்ட பயத்தை காட்டிலும், சமத்துவமின்மை விகிதம் அதிகரித்து வருவது தான் உண்மையில் பொருளாதாரம் சார்ந்த பயத்தை ஏற்படுத்துகிறது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

ஆர்.பி.ஜி. லைப் சயின்சஸ் – மூன்றாம் காலாண்டு வருவாய் ரூ.108 கோடி

ஆர்.பி.ஜி. லைப் சயின்சஸ் – மூன்றாம் காலாண்டு வருவாய் ரூ.108 கோடி 

Q3FY21 Revenue of Rs.103 Crore – RPG Life Sciences

 

இருநூறு வருடங்களுக்கு முன்பு ஆரம்பிக்கப்பட்ட ஆர்.பி.ஜி. குழுமம் டயர், உட்கட்டமைப்பு, தகவல் தொழில்நுட்பம் மற்றும் மருந்து துறையில் தொழில் புரிந்து வருகிறது. இந்த குழுமத்தின் துணை நிறுவனம் தான் சியட் டயர்ஸ்(CEAT). பில்லியன் டாலர் வருவாயை கொண்டிருக்கும் ஆர்.பி.ஜி. குழுமத்தின், மருந்து துறையில் உள்ள நிறுவனம் ஆர்.பி.ஜி. லைப் சயின்சஸ் நிறுவனம். 

 

மும்பையை தலைமையிடமாக கொண்டிருக்கும் ஆர்.பி.ஜி. லைப் சயின்சஸ் நிறுவனம் கடந்த 1993ம் ஆண்டு துவங்கப்பட்டது. உயிர் தொழில்நுட்பம்(Bio-technology), உடல்நலம், மொத்த மருந்துகள் உற்பத்தி மற்றும் பொதுவான மருந்து வணிகங்களில் ஈடுபட்டு வருகிறது. 

 

இந்நிறுவனத்தின் உற்பத்தி பிரேசில், மெக்சிகோ, தென் கொரியா, சீனா, சிலி, உக்ரைன், பால்டிக் நாடுகள் மற்றும் அர்ஜென்டினா போன்ற நாடுகளுக்கு ஏற்றுமதி செய்யப்பட்டு வருகிறது. ஆர்.பி.ஜி. லைப் சயின்சஸ் நிறுவனத்தின் சந்தை மதிப்பு ரூ.700 கோடி. கடன்-பங்கு விகிதம் 0.01 ஆகவும், வட்டி பாதுகாப்பு விகிதம் 54 மடங்கிலும் உள்ளது.

 

நிறுவனர்களின் பங்களிப்பு 72 சதவீதமாகவும், நிறுவனர்கள் சார்பில் பங்கு அடமானம் எதுவும் வைக்கப்படவில்லை. கடந்த பத்து வருட காலத்தில், நிறுவனத்தின் வருவாய் 9 சதவீதமும், லாபம் 12 சதவீதமும் வளர்ச்சி பெற்றுள்ளது. பங்கு மூலதனத்தின் மீதான வருவாய்(ROE) ஒரு வருட காலத்தில் 20 சதவீதமாகவும், ஐந்து வருட காலத்தில் 11 சதவீதமாகவும் உள்ளது.

 

2020-21ம் நிதியாண்டின் மூன்றாம் காலாண்டில்(Quarterly results) நிறுவனத்தின் வருவாய் ரூ.108 கோடியாகவும், செலவினம் 86 கோடி ரூபாயாகவும் உள்ளது. இயக்க லாப விகிதம்(Operating profit Margin) 20 சதவீதமாக இருப்பது கவனிக்கத்தக்கது. சொல்லப்பட்ட காலாண்டில் நிறுவனத்தின் நிகர லாபம் ரூ.13 கோடியாக உள்ளது. கடந்த 10 காலாண்டுகளில் காணப்படாத வருவாய் வளர்ச்சியும், லாப விகிதமும் தற்போது ஏற்பட்டுள்ளது.

 

நிறுவனத்தின் இருப்புநிலை கையிருப்பு 183 கோடி ரூபாயாக  சொல்லப்பட்டுள்ளது. கொரோனா காலத்தில் மருந்து துறையின் தேவை காரணமாக இந்த பங்கின் விலை, மார்ச் 2020 வீழ்ச்சிக்கு பின்பு நூறு சதவீதம் ஏற்றம் பெற்றுள்ளது.

 

வாழ்க வளமுடன்,

 

நன்றி, வர்த்தக மதுரை 

 

www.varthagamadurai.com

    



வேளாண்மை – கோழி – மீன் வளர்ப்பு நிறுவன பங்குகளில் முதலீடு செய்ய விருப்பமா ? பங்குச்சந்தை அலசல்

வேளாண்மை – கோழி – மீன் வளர்ப்பு நிறுவன பங்குகளில் முதலீடு செய்ய விருப்பமா ? பங்குச்சந்தை அலசல் 

Agriculture – Poultry – Aquaculture – It’s Stock Insights

பங்குச்சந்தையில் முதலீடு செய்பவர்கள் பொதுவாக பிரபல நிறுவனங்களிலும், அதிகம் அறியப்பட்ட துறைகளிலும் முதலீடு செய்வது வழக்கம். தேசிய பங்குச்சந்தையான நிப்டி(Nifty50) குறியீட்டில் அதிக பங்களிப்பை கொண்டிருக்கும் துறை வங்கிகள் மற்றும் நிதி நிறுவனங்கள். இதன் பங்களிப்பு 26.17 சதவீதமாக உள்ளது. தகவல் தொழில்நுட்பம் 21.50 சதவீதமும், எண்ணெய் மற்றும் எரிவாயு 14.83 சதவீத பங்களிப்பையும் கொண்டுள்ளது.

வாகன துறை 6.19 சதவீதமாகவும், நீடித்தது அல்லாத நுகர்வோர் துறை(Consumer Non-durables) 5 சதவீதமும் மற்றும் மருந்து துறை 3.37 சதவீதமாகவும் உள்ளது. தொலைத்தொடர்பு துறை(Telecom) 2.78 சதவீதத்தையும், பொறியியல் துறை 2.65 சதவீதத்தையும் கொண்டுள்ளது. இது போல உலோகங்கள் மற்றும் சுரங்க தொழில், ரசாயனம் ஆகிய துறைகள் முறையே 2.65 % மற்றும் 2.59 % பங்களிப்பை உள்ளடக்கியுள்ளது.

இதர பங்களிப்பில் புகையிலை(2.3 %), உணவு மற்றும் குளிர்பானங்கள்(2.27%), சிமெண்ட் மற்றும் கட்டுமானம்(2.17%), மற்ற பயன்பாடுகள்(Utilities) உள்ளன. பங்குச்சந்தை குறியீட்டில் அதிக பங்களிப்பை கொண்டிருக்கும் வங்கித்துறை மற்றும் தகவல் தொழில்நுட்பம் அனைத்து முதலீட்டாளர்களையும் ஈர்க்கும் துறைகளாக காணப்படுகிறது.

ஆனால் உண்மையில் அவை முதலீட்டாளர்களுக்கு, மற்ற துறைகளை காட்டிலும் நீண்டகாலத்தில் முதலீட்டு வருவாயை அளித்துள்ளதா ?

சுழற்சி முறை(Cyclical) மற்றும் பருவ கால தொழிலை செய்யும் துறைகள் ஏன் பெரும்பாலும் கண்டுகொள்ளப்படுவதில்லை ?

விவசாயம், விவசாயி, உணவு தேவை ஆகியவற்றை சொல்லும் பொது உலகம் வேளாண்மை, கால்நடை மற்றும் மீன் வளர்ப்பு தொழிலுக்கு போதுமான முதலீட்டை கொடுத்துள்ளதா ?

வேளாண்மை, கோழி வளர்ப்பு, மீன் வளர்ப்பு தொழில் செய்யும் நிறுவனங்களில் நீங்கள் முதலீடு செய்ததுண்டா, இவற்றில் நீண்டகாலத்தில் லாபம் பார்ப்பது எப்படி ?

வாருங்கள், வரும் சனிக்கிழமை(13-02-2021) மாலை 05:15 மணிக்கு இணையம் வழியாக பேசுவோம்…

பதிவுக்கு,

Stock Insights(Premium Investing) – Registration

மூன்று துறைகள், ஐந்து வாரங்கள்(சனிக்கிழமைகளில்), பத்து நிறுவன பங்குகள் – அடிப்படை அலசல்.

இங்கே எந்த பங்குகளுக்கான பரிந்துரையும் சொல்லப்படாது. (Disclaimer பிரிவை வாசிக்கவும்). இது பங்கு தொழில் சார்ந்த ஒரு அடிப்படை அலசல் மட்டுமே.

கட்டணம்: ரூ. 499 மட்டும் 

பதிவுக்கு பின், இணைப்பு(Webinar) சார்ந்த விவரங்கள் உங்கள் மின்னஞ்சல் மற்றும் வாட்சாப் செயலிக்கு குறுஞ்செய்தியாக அனுப்பப்படும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

இந்திய பங்குச்சந்தையில் வர்த்தகமாகும் அரசு பொதுத்துறை நிறுவனங்கள் என்னென்ன ?

இந்திய பங்குச்சந்தையில் வர்த்தகமாகும் அரசு பொதுத்துறை நிறுவனங்கள் என்னென்ன ?

PSU(Public Sector) Companies in the Indian Stock Market

பங்குச்சந்தை முதலீடு என சொன்னவுடன் பலருக்கு பணப்பாதுகாப்பை பற்றிய கேள்வி இருக்கும். நாம் நித்தமும் நாளிதழ்களில்(வணிக பக்கத்தில்) காணும் செய்தி மூன்று – பங்குச்சந்தை நிலவரம், டாலருக்கு நிகரான ரூபாய் மதிப்பு மற்றும் தங்கத்தின் விலை ஏற்ற-இறக்கம். அனைத்து செய்தி ஊடகங்களிலும் இந்த மூன்றை பற்றிய தகவல் வராத நாட்கள் இல்லை எனலாம்.

இந்திய பங்குச்சந்தையின் வரலாறு சுமார் 150 வருடங்களுக்கு மேல். அப்படியிருந்தும், பங்குச்சந்தையின் மீதான பயத்தின் காரணம் என்ன ? சரியான விழிப்புணர்வும், தேவையான தகவலும் பகிரப்படாதது தான். நாம் இன்று நாள்தோறும் காணும் எந்தவொரு பொருளோ அல்லது சேவையோ, பங்குச்சந்தையில் உள்ள நிறுவனத்தை சார்ந்ததாக தான் இருந்திருக்கும். காலை பல் துவக்குவது முதல் இரவு தூக்கம் வரை, உங்கள் வாழ்வில் நுகரும் அத்தனை சேவையும் சந்தையை கடந்து தான் போக வேண்டும்.

உண்மையில் பங்குச்சந்தையில் பணப்பாதுகாப்பு இல்லையா ?

உங்களிடம் அப்படி யார் சொன்னது ? அரசாங்கம் சொன்னதா அல்லது நீங்கள் வேலை பார்க்கும் நிறுவனம் சொல்லியதா ?

பங்குச்சந்தை என்பது தொழில் சார்ந்த களம். தொழில் செய்யும் நிறுவனங்கள் பல  தங்கள் தொழிலுக்கு தேவையான முதலீட்டை ஈர்க்க பங்குச்சந்தைக்கு வரும். அங்கே யார் வேண்டுமானாலும், அவர்களுக்கு பிடித்த நிறுவன பங்குகளை வாங்கலாம். எவ்வளவு தொகையை வேண்டுமானாலும் முதலீடு செய்யலாம். ஆனால் பணத்திற்கான பாதுகாப்பு ?

ஆம், பாதுகாப்பு இல்லையென்றால் நீங்கள் வேலை பார்க்கும் நிறுவனம் அங்கே இருக்க கூடாது அல்லவா ! உங்கள் அரசாங்கமும், உங்களது சம்பளத்தில் பிடித்தம் செய்த தொகையை பங்குச்சந்தையில் முதலீடு செய்து வருகிறதே !

பங்குச்சந்தை என்பது ஒரு முதலீட்டு சாதனம். முதலீடு என்றாலே ரிஸ்க் தன்மை கொண்டது தான். ரியல் எஸ்டேட், தங்கம் மற்றும் தொழில் புரிவது போல. தங்கத்தின் ஏற்ற-இறக்கத்தை பற்றி நீங்கள் நித்தமும் கவலை கொள்வீர்களா ? அப்புறம் ஏன், பங்குச்சந்தையில் மட்டும் உங்களிடம் ஒரு வினோத போக்கு காணப்படுகிறது. தக்காளி விலை இறங்கினால் உங்களுக்கு மகிழ்ச்சி தானே, விவசாயிக்கு தான் சற்று பொருளாதார இழப்பு இருக்கும். உங்களுக்கு விலை குறைவாக கிடைத்தால் லாபம் தானே, நல்ல தக்காளியை வாங்க பழக வேண்டும். அவ்வளவு தான் பங்குச்சந்தையில்.

நாட்டில் உள்ள அனைத்து வங்கிகளும் பாதுகாப்பானது தானா ? உண்மையில் பொதுத்துறை வங்கிகள் அனைத்தும் பங்குச்சந்தையில் பட்டியலிடப்பட்டவை தான். தீர்வு என்னவென்றால், ரிஸ்க் தன்மை கொண்டது தான் முதலீடு, அதனால் மட்டுமே உங்களால் நீண்டகாலத்தில் செல்வவளத்தை பெருக்க முடிகிறது – தங்கத்தில், வீட்டுமனையில், தொழிலில் மற்றும் பங்குச்சந்தையிலும். ஆனால் நாம் பங்குச்சந்தையில் என்ன செய்து கொண்டிருக்கிறோம் என்றால் ஒரு ரியல் எஸ்டேட் அதிபரை போல, நகைக்கடை உரிமையாளரை போல, ரம்மி விளையாடுவது போல. அது உங்கள் வேலையல்ல… நீங்கள் ஏற்கனவே பார்க்கும் வேலையை பார்த்து கொண்டு அல்லது தொழிலை செய்து கொண்டு, உங்களிடம் உள்ள உபரி தொகையை(Surplus cash to wealth) சிறுக சிறுக முதலீடு செய்து நீண்டகாலத்தில் முதலீட்டு பெருக்கத்தை ஏற்படுத்துவதே. ஆனால் நாம் பங்குச்சந்தையில் நுழைந்தவுடன் ஒரு அனுபவம் கொண்ட மருத்துவரை போல செயல்பட்டு கொண்டிருக்கிறோம். அடிப்படை கற்றலை நாம் மேற்கொள்வதில்லை.

அம்பானி, அதானியை போல மாற வேண்டுமென்று வெறும் ஆறு மாதங்களில் அல்லது சில வாரங்களில் அடைய முயற்சிக்கிறோம். அவர்கள் பங்குச்சந்தையில் கிடைக்கப்பெறும் முதலீட்டை கொண்டு தொழில் தான் செய்து வருகின்றனர். நீங்கள் உங்களது கடினமான உழைப்பால் கிடைத்த ஊதியத்தை கொண்டு, சூதாட்டத்தில் ஈடுபட்டு கொண்டிருப்பது நல்லதல்ல. இன்னும் சிலரோ பங்குச்சந்தையை பகுதி நேர வேலையாகவும்(Day Trading), அதன் மூலம் வருவாய் நிறைய கிடைக்கப்பெறும் எனவும் எண்ணிக் கொண்டிருக்கின்றனர்.

பொதுவாக பங்குச்சந்தையில் பொதுத்துறை நிறுவனங்களின் பங்களிப்பை விட, தனியார் நிறுவனங்களின் பங்களிப்பும், அதன் செயல்பாடுகளும் அதிகம். பொதுத்துறை நிறுவனங்கள் அரசாங்கத்திற்கு தேவையான டிவிடெண்ட் தொகையை அளித்து வரும் நிலையில், ஈவுத்தொகையை(Dividend) மட்டுமே கருத்தில் கொள்வோர், தங்களது போர்ட்போலியோ பிரிவில் சிறிய அளவில் இது போன்ற பங்குகளை வைத்து கொள்ளலாம். ஆனால் அவை பெரும்பாலான சமயங்களில் முதலீட்டு பெருக்கத்தை ஏற்படுத்தாது என்பதனையும் கவனத்தில் கொள்ள வேண்டும். நீங்கள் பொதுத்துறை நிறுவனங்களில் தான் முதலீடு செய்ய வேண்டுமென எண்ணினால், 50க்கும் மேற்பட்ட நிறுவனங்கள் பங்குச்சந்தையில் உள்ளன. பொதுத்துறை நிறுவனங்கள் மகாரத்னா, நவரத்னா, மினிரத்னா என பிரிக்கப்பட்டுள்ளன.

பங்குச்சந்தையில் பட்டியலிடப்பட்ட பொதுத்துறை நிறுவனங்களில் 45 மத்திய பொதுத்துறை நிறுவனங்களும், 12 பொதுத்துறை வங்கிகளும், மாநில அளவில் ஒரு நிறுவனமும் மற்றும் பிற பிரிவின் கீழ் ஒரு நிறுவனமும் உள்ளது. வங்கிகள் பிரிவில் எஸ்.பி.ஐ., கனரா வங்கி, இந்தியன் வங்கி, பஞ்சாப் நேஷனல், யூனியன் வங்கி, சென்ட்ரல் பேங்க் உள்ளிட்ட அனைத்து பொதுத்துறை வங்கிகளிலும் பங்குச்சந்தையில் உள்ளன.

இந்திய ரயில்வே சார்பில் ரைட்ஸ் லிமிடெட், ரயில் விகாஸ் நிகாம் லிமிடெட்(RVNL), இர்கான்(IRCON), ஐ.ஆர்.சி.டி.சி., கன்கார்(Concor), ஐ.ஆர்.எப்.சி. போன்ற நிறுவனங்கள் உள்ளன. நடப்பு வருடத்தில் ரயில்வேயின் ரயில் டெல் நிறுவனமும் இணைய உள்ளது.

எண்ணெய் நிறுவனத்தில் பாரத் பெட்ரோலியம், இந்தியன் ஆயில், இந்துஸ்தான் பெட்ரோலியம்(HPCL), சென்னை பெட்ரோலியம், மங்களூரு பெட்ரோ கெமிக்கல், ஆயில் இந்தியா, ஓ.என்.ஜி.சி., கெயில், பால்மர் லாரி(Balmer Lawrie), என்ஜினீயர்ஸ் இந்தியா போன்ற நிறுவனங்கள் பொதுத்துறை பிரிவில் உள்ளன.

எரிசக்தி துறையில் எஸ்.ஜே.வி.என்.(SJVN), பவர் கிரிட், தேசிய வெப்ப மின் நிறுவனம்(NTPC), என்.எல்.சி.(NLC), என்.எச்.பி.சி.(NHPC), ரூரல் எலக்ட்ரிக்(REC) ஆகிய நிறுவனங்கள் இடம் பெற்றுள்ளன.

உலோகம் மற்றும் சுரங்க தொழிலில் கோல் இந்தியா, இந்துஸ்தான் காப்பர், எம்.எம்.டி.சி., மாயில்(MOIL), என்.எம்.டி.சி.(NMDC), செயில்(Steel Authority of India), குஜராத் மினரல், மிதானி, தேசிய அலுமினிய நிறுவனம் போன்ற நிறுவனங்களும், கனரக பொறியியல் துறையில் பெம்மல்(BEML), பாரத் டைனமிக்ஸ், பாரத் எலக்ட்ரானிக்ஸ், பெல்(BHEL), இந்துஸ்தான் ஏரோநாட்டிக்ஸ் மற்றும் தொலைத்தொடர்பு துறையில் ஐ.டி.ஐ. நிறுவனமும் உள்ளது.

கப்பல் போக்குவரத்து துறையில் சில பொதுத்துறை நிறுவனங்களும் சந்தையில் பட்டியலிடப்பட்டுள்ளது. நாட்டில் சுமார் 250க்கும் மேற்பட்ட மத்திய பொதுத்துறை நிறுவனங்கள் இருக்கும் நிலையில், பங்குச்சந்தையில் பட்டியலிடப்பட்ட பொதுத்துறை நிறுவனங்களின் பங்களிப்பு 25 சதவீதமாக உள்ளது குறிப்பிடத்தக்கது. கடந்த சில வருடங்களாக அரசு துறையில் உள்ள நிறுவனங்களில் பங்கு விலக்கல் நடவடிக்கையும் மத்திய அரசு சார்பில் ஏற்படுத்தப்பட்டுள்ளது. நட்டத்தில் இயங்கும் நிறுவன பங்குகளை அரசு குறைத்து வருவது கவனத்தில் கொள்ள வேண்டியவை.

வாழ்க வளமுடன்,

நன்றி, வர்த்தக மதுரை 

www.varthagamadurai.com

ஐ.பி.ஓ. வெளியீட்டுக்கு தயாராகும் ஸ்டார் ஹெல்த் இன்சூரன்ஸ்

ஐ.பி.ஓ. வெளியீட்டுக்கு தயாராகும் ஸ்டார் ஹெல்த் இன்சூரன்ஸ் 

Getting ready for the IPO this year – Star Health Insurance

நாட்டின் முதல் முழுமையான மருத்துவ காப்பீட்டு சேவையை அளித்த நிறுவனம், ஸ்டார் ஹெல்த் & அலைடு இன்சூரன்ஸ்(Star Health & Allied Insurance). 2006ம் ஆண்டு தனது தொழிலை துவங்கிய இந்நிறுவனம் மருத்துவம், தனிநபர் விபத்து காப்பீடு மற்றும் வெளிநாட்டு பயண காப்பீடு ஆகிய சேவைகளை வழங்கி வருகிறது. நாடு முழுவதும் 600 க்கும் மேற்பட்ட கிளைகளையும், 13,000 பணியாளர்களையும் கொண்டு ஸ்டார் ஹெல்த் இன்சூரன்ஸ் நிறுவனம் இயங்கி வருகிறது.

மருத்துவ காப்பீட்டு துறையில்(Standalone Health insurance) முன்னணியில் உள்ள இந்நிறுவனத்தின் 2019-20ம் நிதியாண்டுக்கான மொத்த எழுதப்பட்ட பிரீமியத்தின் மதிப்பு ரூ.6,865 கோடி. மார்ச் 2020 முடிவின் படி, நிறுவனத்தின் நிகர மதிப்பு 1,889 கோடி ரூபாய். நாடு முழுவதும் சுமார் 10,000 க்கும் மேற்பட்ட பணமில்லா சிகிச்சைக்கான மருத்துமனைகளை உள்ளடக்கியுள்ளது.

தமிழகத்தை தலைமையிடமாக கொண்டிருக்கும் இந்நிறுவனத்தின் தலைவர் மற்றும் நிர்வாக அதிகாரியாக திரு. ஜெகந்நாதன் உள்ளார். காப்பீட்டு துறையில் 50 வருடங்களுக்கு மேலான அனுபவமும், பொதுத்துறை காப்பீட்டு நிறுவனங்களில் முக்கிய பதவிகளை வகித்த அனுபவமும் இவருக்கு உண்டு. நிறுவனத்தின் முதன்மை முதலீட்டாளர்களாக பிரபல பங்குச்சந்தை முதலீட்டாளர் மற்றும் இந்தியாவின் வாரன் பப்பெட் என்றழைக்கப்படும் திரு. ராகேஷ் ஜூன்ஜூன்வாலா, மேடிசன் கேப்பிடல் மற்றும் வெஸ்ட்பிரிட்ஜ் கேப்பிடல் நிறுவனங்கள் உள்ளன.

இயக்குனர் குழுவில் ராகேஷ் ஜூன்ஜூன்வாலா, அனிசா மோத்வானி, பத்மஸ்ரீ கார்த்திகேயன், அருண் துக்கல் மற்றும் வெஸ்ட்பிரிட்ஜ், மேடிசன் கேப்பிடல் நிறுவனங்களின் முக்கிய அதிகாரிகள் உள்ளனர். கொரோனா பெருந்தொற்று காலத்தில் மருத்துவ காப்பீட்டின் தேவை அதிகரித்து வந்தது குறிப்பிடத்தக்கது. அப்போதைய துவக்க நிலையில், ஸ்டார் ஹெல்த் நிறுவனமும் தனது பாலிசிதாரர்களுக்கான இன்சூரன்ஸ் தொகையை மருத்துவமனைகளில் அதிகமாக வழங்கியிருந்தது.

ஸ்டார் ஹெல்த் நிறுவனத்தின் மதிப்பு சுமார் மூன்று பில்லியன் டாலர்களுக்கும் அதிகமாக மதிப்பிடப்பட்டுள்ளது. இந்திய பங்குச்சந்தையில், இந்த நிறுவனம் 3000 கோடி ரூபாய்க்கு அளவுக்கு முதலீட்டை திரட்ட உள்ளதாக தெரிகிறது. நிறுவனத்தின் சில்லறை சந்தை(Retail Segment) 92 சதவீத பங்களிப்பை கொண்டுள்ளது. நாட்டின் மொத்த மருத்துவ காப்பீட்டு சேவையில் 50 சதவீத பங்குகளை ஸ்டார் ஹெல்த் கொண்டுள்ளது.

ஐ.பி.ஓ.(IPO) வெளியீட்டை நிறைவு செய்தால், இந்திய பங்குச்சந்தைக்கு வரும் முதல் மருத்துவ காப்பீட்டு சேவை நிறுவனம் என்ற நிலையை ஸ்டார் ஹெல்த் இன்சூரன்ஸ் பெறும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

இன்போசிஸ் மூன்றாம் காலாண்டு நிகர லாபம் – ரூ.5,197 கோடி

இன்போசிஸ் மூன்றாம் காலாண்டு நிகர லாபம் – ரூ.5,197 கோடி 

Infosys net profit of Rs.5,197 Crore – Q3FY21

இந்திய பன்னாட்டு தொழில்நுட்ப நிறுவனமான இன்போசிஸ், 2020-21ம் நிதியாண்டின் மூன்றாம் காலாண்டு முடிவுகளை(Quarterly results) வெளியிட்டுள்ளது. மூன்றாம் காலண்டான டிசம்பர் 2020 காலத்தில் நிறுவனத்தின் வருவாய் 25,927 கோடி ரூபாயாகவும், செலவினம் 18,512 கோடி ரூபாயாகவும் இருந்துள்ளது.

சொல்லப்பட்ட காலாண்டில் இயக்க லாப விகிதம் 29 சதவீதமாக உள்ளது. இந்நிறுவனத்தின் சராசரி காலாண்டு இயக்க லாப விகிதம்(Operating Profit Margin) 25 சதவீதத்திற்கு மேலாக இருப்பது குறிப்பிடத்தக்கது. இதர வருமானமாக 610 கோடி ரூபாய் சொல்லப்பட்டுள்ளது. மூன்றாம் காலாண்டில் நிறுவனத்தின் நிகர லாபம் ரூ.5,197 கோடியாக உள்ளது.

நடப்பு நிதியாண்டின் ஒன்பது மாத முடிவில் நிறுவனத்தின் வருவாய் ரூ.63,415 கோடியாகவும், நிகர லாபம் 13,588 கோடி ரூபாயாகவும் இருந்துள்ளது. இதுவரை பங்கு ஒன்றுக்கு 12 ரூபாய் ஈவுத்தொகையாக அளிக்கப்பட்டுள்ளது. மூன்றாம் காலாண்டில் ஈவுத்தொகை(Dividend) எதுவும் அறிவிக்கப்படவில்லை.

இன்போசிஸ்(Infosys) நிறுவனத்தின் சந்தை மதிப்பு ரூ.5.84 லட்சம் கோடி. 1981ம் ஆண்டு 250 டாலர்களை கொண்டு, ஏழு பொறியியலார்களால் துவங்கப்பட்ட இந்நிறுவனம் இன்று பில்லியன் டாலர் பன்னாட்டு நிறுவனமாக மாறியுள்ளது. இதன் கிளைகள் பல நாடுகளிலும், நூறுக்கு மேற்பட்ட துணை நிறுவனங்களும், சுமார் 2.43 லட்சம் பணியாளர்களும் இன்போசிஸ் நிறுவனத்தின் வெற்றிக்கு அடையாளமாக உள்ளது.

நிறுவனத்தின் கடன்-பங்கு விகிதம்(Debt to Equity) 0.07 ஆகவும், வட்டி பாதுகாப்பு விகிதம் 134 மடங்கிலும் உள்ளது. கடந்த பத்து வருடங்களில் விற்பனை  வருவாய் 15 சதவீதமாகவும், லாபம் 10 சதவீதமாகவும் வளர்ச்சி பெற்றுள்ளது. கடந்த ஒரு வருட காலத்தில் இந்த பங்கின் விலை 80 சதவீதம் ஏற்றம் பெற்றுள்ளது.

நிறுவனத்தின் இருப்புநிலை கையிருப்பு 69,492 கோடி ரூபாயாகவும், பணவரத்து(Cash flow) ஒவ்வொரு நிதியாண்டிலும் நிறுவனத்திற்கு சாதகமாக உள்ளது. நிறுவனர்கள் சார்பில் பங்குகள் அடமானம் எதுவும் வைக்கப்படவில்லை.

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் டிசம்பர் மாத சில்லரை விலை பணவீக்கம் – 4.59 சதவீதம்

நாட்டின் டிசம்பர் மாத சில்லரை விலை பணவீக்கம் – 4.59 சதவீதம் 

India’s Retail Inflation to 4.59 Percent – December 2020

நாட்டின் நுகர்வோர் விலை பணவீக்கம்(Consumer price index) என சொல்லப்படும் சில்லரை விலை பணவீக்கம், கடந்த ஆண்டின் டிசம்பர் மாதத்தில் சந்தை எதிர்பார்த்ததை விட குறைவான அளவில் முடிந்துள்ளது. பாரத ரிசர்வ் வங்கியின் குறுகிய கால இலக்காக 2-6 சதவீதம் என்ற நிலையை கொண்டுள்ளது.

கடந்த பல மாதங்களாக சில்லரை பணவீக்கம் கட்டுக்குள் இல்லாமல், மத்திய வங்கியின் இலக்கினை தாண்டி தான் வந்துள்ளது. வங்கி வட்டி குறைந்து வரும் நிலையில், நுகர்வோர் விலை பணவீக்க விகிதம் சற்று அச்சத்தை ஏற்படுத்தியிருந்தது. ஆனால் டிசம்பர் மாதத்தில் எதிர்பாராமல், 4.59 சதவீதம் என்ற அளவில் முடிந்துள்ளது. 2020ம் ஆண்டின் நவம்பர் மாதத்தில் இது 6.93 சதவீதமாக இருந்தது குறிப்பிடத்தக்கது.

டிசம்பர் 2020 மாத பணவீக்கம் கடந்த 15 மாதங்களில் காணப்படாத குறைவான விகிதமாக சொல்லப்படுகிறது. இதற்கு காரணமாக சொல்லப்படுவது உணவுப்பொருட்களில் காணப்பட்ட விலை குறைவு தான். முன்னர் 9.50 சதவீதமாக இருந்த உணவுப்பொருட்களின் பணவீக்க விகிதம் தற்போது 3.41 சதவீதமாக(டிசம்பர் 2020) இருந்துள்ளது.

புகையிலை பொருட்களின் பணவீக்கம் மட்டும் சற்று உயர்ந்து 10.74 சதவீதத்தில் நிறைவு பெற்றுள்ளது. நவம்பர் மாதத்தில் 3.19 சதவீதமாக இருந்த வீட்டுமனை துறை, டிசம்பர் மாதத்தில் 3.21 சதவீதமாக இருந்துள்ளது. இது போல ஒளி மற்றும் எரிபொருட்களின்(Light & Fuel) பணவீக்கம் 1.90 சதவீதத்திலிருந்து 3 சதவீதமாக அதிகரித்துள்ளது.

விழா காலங்களில் காணப்பட்ட தேவையால், துணிமணிகள் மற்றும் காலணிகளின் விலைவாசியும் சற்று உயர்ந்துள்ளது. நடப்பு நிதியாண்டில் முதன்முறையாக தற்போது தான் மத்திய வங்கியின் பணவீக்க இலக்கிற்குள் சில்லரை விலை பணவீக்க விகிதம் வந்துள்ளது. டிசம்பர் மாதத்திற்கு சந்தை எதிர்பார்த்த 5.28 சதவீதத்தை விட குறைவாகவும் பணவீக்க விகிதம்(CPI Retail Inflation) இருந்துள்ளது. அடுத்து வரும் காலக்கட்டங்களில் விலைவாசி குறையும் நிலையில், பாரத ரிசர்வ் வங்கியின் வட்டி விகித மாற்றத்தை எதிர்பார்க்கலாம்.

பொதுவாக பணவீக்கம் குறைவாக இருக்கும் போது, வங்கி வட்டி விகிதமும் குறைவாக தான் காணப்படும். இது பங்குச்சந்தைக்கு சாதகமான நிலையாக மாறும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

கடந்த 20 ஆண்டுகளில் இல்லாத வாராக்கடன் சிக்கல் – ரிசர்வ் வங்கி எச்சரிக்கை

கடந்த 20 ஆண்டுகளில் இல்லாத வாராக்கடன் சிக்கல் – ரிசர்வ் வங்கி எச்சரிக்கை  

Bad loans issue not seen in last 20 years – RBI Financial Stability Report 2021

கடந்த வெள்ளிக்கிழமை(08-01-2021) அன்று பாரத ரிசர்வ் வங்கி சார்பில் வெளியிடப்பட்ட ஒரு அறிக்கையில், கொரோனா பெருந்தொற்று ஊரடங்கின் போது நிதி சந்தையில் அனுமதிக்கப்பட்ட பணப்புழக்கத்தை திரும்ப பெற போவதாக பாரத ரிசர்வ் வங்கி அறிவித்திருந்தது. பணப்புழக்க மேலாண்மை கட்டமைப்பின்(Revised Liquidity Management Framework) கீழ் ஜனவரி 29,2021 அன்று வங்கிகளிடம் இருந்து ரூ.2,00,000 கோடியை ரிவர்ஸ் ரெப்போ விகிதத்தில் மத்திய வங்கி வாங்க உள்ளது.

இதன் காரணமாக சந்தையில் உள்ள பணப்புழக்கம் சற்று குறையும். மேலும் கொரோனாவுக்கு முன்னர் இருந்த சாதாரண பணப்புழக்கத்தை ஏற்படுத்த உள்ளதாக ரிசர்வ் வங்கி கூறியுள்ளது. ரிவர்ஸ் ரெப்போ(Reverse REPO) விகிதம் என்பது நாட்டில் உள்ள வங்கிகளிடம் இருந்து ரிசர்வ் வங்கி பணம் பெறுவது அல்லது கடன் பெறும் நடவடிக்கையாகும்.

சொல்லப்பட்ட நிகழ்வின் தொடர்ச்சியாக நேற்று(11-01-2021) வெளியிடப்பட்ட நிதி நிலைத்தன்மை அறிக்கையில்(Financial Stability Report) சில பொருளாதார விஷயங்கள் அலசப்பட்டன. பெருந்தொற்று காலத்தில், மத்திய வங்கியின் கொள்கை செயல்பாடுகள் பொருளாதார சரிவை குறைத்ததாகவும், தொழில் மற்றும் தனிநபர் வருவாயில் ஏற்பட்ட சிக்கலை மீட்டெடுப்பதற்கும் உதவியதாக ரிசர்வ் வங்கி சொல்லியுள்ளது.

தடுப்பூசி வளர்ச்சி நேர்மறையான செய்தியாக இருந்தாலும், இரண்டாம் அலை அதிகப்படும் நிலையில் அது பொருளாதாரத்தை மேலும் பாதிக்கலாம். வங்கிகளின் கடன் வளர்ச்சி அடக்கமாக உள்ளதாகவும், ஒழுங்குமுறை விநியோகங்களின் உதவியுடன் வங்கிகளின் செயல்திறன் மேம்பட்டுள்ளதாகவும் கூறியுள்ளது.

அதே வேளையில் செப்டம்பர் 2020 முடிவின் படி, நாட்டில் உள்ள வணிக வங்கிகளின் ஒட்டுமொத்த வாராக்கடன் விகிதம்(GNPA) 7.5 சதவீதமாக இருந்துள்ளது. இது வரும் செப்டம்பர் 2021க்குள் 13.5 சதவீதமாக உயரக்கூடும் எனவும் பாரத ரிசர்வ் வங்கி தெரிவித்துள்ளது. வரக்கூடிய காலங்களில் உலக பொருளாதாரம் கடும் மந்தநிலையை அடையும் நிலையில், இந்த வாராக்கடன் விகிதம் 14.8 சதவீதம் வரை செல்லக்கூடும் எனவும் மத்திய வங்கி எச்சரித்துள்ளது.

கடந்தாண்டின் செப்டம்பர் காலத்தின் படி, பொதுத்துறை வங்கிகளின் மொத்த வாராக்கடன் விகிதம் 9.7 சதவீதமாக உள்ளது. அடிப்படை நிலையில்(Base Scenario) இந்த விகிதம் 2021ம் ஆண்டின் செப்டம்பர் மாதத்தில் 16.2 சதவீதம் வரை செல்லலாம் என சொல்லப்பட்டுள்ளது. இது தனியார் வங்கிகளில் 4.6 சதவீதத்திலிருந்து 7.9 சதவீதமாகவும், அன்னிய வங்கிகளில் 2.5 சதவீதத்திலிருந்து 5.4 சதவீதமாக செல்லும் என கூறப்பட்டுள்ளது.

கடுமையான பொருளாதார மந்தநிலையில் பொதுத்துறை வங்கிகளின் மொத்த வாராக்கடன் விகிதம் 17.6 சதவீதம், தனியார் வங்கிகளில் 8.8 சதவீதம் மற்றும் அன்னிய வங்கிகளில் 6.5 சதவீதமாக இருக்கலாம் என பாரத ரிசர்வ் தெரிவித்துள்ளது.

இது போன்ற நிலை கடந்த 20 வருடங்களில் காணப்படாத வாராக்கடன்  விகிதமாக இருக்கலாம். கடந்த சில வருடங்களாக மத்திய வங்கி சார்பில், நாட்டில் உள்ள பொதுத்துறை வங்கிகளிலும், வங்கிகள் அல்லாத நிதி நிறுவனங்களிலும் பணப்புழக்கத்தை ஏற்படுத்துவதற்காக மூலதன உட்செலுத்தல்(Capital Infusion) நடவடிக்கை மேற்கொள்ளப்பட்டது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

20 வருடங்களுக்கு வட்டியில்லா வங்கிக்கடன் – எங்கே ?

20 வருடங்களுக்கு வட்டியில்லா வங்கிக்கடன் – எங்கே ?

Zero Percent Fixed Interest rate loan for 20 Years – Homeowners

வங்கிகளில் கடனுக்கான வட்டி விகிதங்கள் கடந்த சில வருடங்களாக குறைவாகவே காணப்படுகிறது. இதன் காரணமாக வங்கியில் டெபாசிட் செய்பவர்களுக்கான வட்டி விகிதமும் மிக குறைவாக தான் உள்ளது. ஒரு வருட டெபாசிட் தொகைக்கான வட்டி விகிதம் 6 சதவீதத்திற்கு கீழாக உள்ளது குறிப்பிடத்தக்கது.

பொதுவாக வங்கி வட்டி விகிதங்கள்(Bank rates) குறையும் போது, கடன் பத்திரங்களுக்கான(Bonds) தேவை அதிகரிக்கும். இதன் மூலம் பத்திரங்களுக்கான வட்டி விகிதம், வங்கிகளை காட்டிலும் அதிகரிக்க செய்யும். இது முதலீட்டாளர்களுக்கு சாதகமாக இருக்கும். தற்போதைய நிலையில், வங்கி வட்டி விகிதங்கள் குறைவாக இருப்பதால், பரஸ்பர நிதிகளில் காணப்படும் கடன் பத்திரங்களின்(Debt Mutual Funds) வட்டி விகிதம் ஆண்டுக்கு சராசரியாக 8-9 சதவீதம் என்ற நிலையில் உள்ளது.

வங்கி வட்டி விகிதங்கள் குறையும் போது, முதலீட்டாளர்களுக்கு வங்கியில் வாய்ப்பு இல்லையென்றாலும், வங்கிக்கடன் பெறுவோருக்கு இது அரிய வாய்ப்பாக தான் அமையும். நடப்பில் வீட்டுக்கடனுக்கான(Home loans) வட்டி விகிதம் சராசரியாக 7.5 சதவீதத்திற்கு கீழ் தான் உள்ளது. விலைவாசியை தவிர்த்து பார்க்கும் போது, இது மேலும் நீடிக்கும் நிலை தான் தற்போது உள்ளது.

உலகளவில் காணப்படும் வட்டி விகிதங்களில் பெரும்பாலும் ஆசிய, ஆப்பிரிக்க  நாடுகளில் தான் சற்று அதிகமாக காணப்படுகிறது. வளர்ந்த நாடுகளின் வட்டி விகிதங்கள் ஒரு சதவீதத்திற்கு கீழ் தான் உள்ளது. அமெரிக்கா, ஆத்திரேலியா, பிரிட்டன், கனடா போன்ற நாடுகளில் உள்ள வட்டி விகிதம் 0.5 சதவீதத்திற்கு குறைவே.

ஜப்பானில் சொல்லவே வேண்டாம். வங்கியில் உங்கள் பணத்தை வைத்திருக்க நீங்கள் தான் வங்கிக்கு பணம் கட்ட வேண்டும். அந்த அளவுக்கு அந்நாட்டின் விலைவாசியும்(பணவாட்டம்), வட்டி விகிதமும் உள்ளது. ஜப்பானின் 10 வருட அரசு பத்திரங்களின் வருவாய்(Bond yield) 0% ஆக உள்ளது.

இது போல டென்மார்க்கிலும் அதன் பணவீக்கம் ஒரு சதவீதத்திற்கு கீழ் தான் காணப்படுகிறது. இதன் காரணமாக கடந்த எட்டு வருடங்களாக அந்நாட்டின் வட்டி விகிதம் 0% க்கு குறைவாகவே உள்ளது கவனிக்கத்தக்கது. 2013-2017 காலகட்டங்களில் டென்மார்க் நாட்டின் மத்திய வங்கியினுடைய வட்டி விகிதத்தை, அதன் சராசரி பணவீக்கத்தில் கழிக்கும் போது, கிடைக்கப்பெறும் நிகர விகிதம் (-1.40) சதவீதமாக உள்ளது.

சில வருடங்களுக்கு முன்பு, 20 வருட கடன் பத்திரங்களின் வருவாய், டென்மார்க்கில் 0% ஆக சொல்லப்பட்டிருந்தது. இதனை ஒட்டி தற்போது டென்மார்க்கின் டோட்டல் கிரெடிட்(Totalkredit) என்ற வங்கி, வீட்டுக்கடனுக்கான வட்டி விகிதத்தை 0% ஆக கூறியுள்ளது. அதாவது 20 வருட வீட்டுக்கடனுக்கு, வட்டியில்லா அசலை மட்டும் செலுத்துவதை அந்த வங்கி அறிவித்துள்ளது. ஏற்கனவே இதனை போல சில நிறுவனங்கள் கடந்த காலங்களில் மிக குறைந்த வட்டி விகிதத்தை டென்மார்க் நாட்டில் வெளியிட்டுள்ளது.

வரக்கூடிய நாட்களில் மேலும் சில வங்கிகள் இது போன்ற செயல்பாடுகளை கடைபிடிக்கும் என சொல்லப்படுகிறது. பொதுவாக வங்கி வட்டி விகிதங்கள் எதிர்மறை நிலையில்(Negative Rates) செல்லும் போது, நீங்கள் வங்கியில் வைத்திருக்கும் பணத்திற்கு வட்டி வருவாய் அளிக்கப்படாமல், அபராத கட்டணம் செலுத்த நேரிடும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

சிறு சேமிப்பு திட்டங்களுக்கான வட்டி விகிதம் – ஜனவரி 2021

சிறு சேமிப்பு திட்டங்களுக்கான வட்டி விகிதம் – ஜனவரி 2021

Small savings scheme interest rate for the Period – January to March 2021

நாட்டில் உள்ள சிறு சேமிப்பு திட்டங்களுக்கான வட்டி விகித மாற்றம், காலாண்டுக்கு ஒரு முறை அறிவிக்கப்பட்டு வருகிறது. பொதுவாக அஞ்சலகங்கள் மற்றும் வங்கிகளில் காணப்படும் திட்டங்கள், சிறு சேமிப்பு திட்டத்தின் கீழ் தான் வருகிறது. கடந்த சில வருடங்களாக வங்கி டெபாசிட்டுக்கான வட்டி விகிதத்தை மத்திய ரிசர்வ் வங்கி குறைத்து வருவது குறிப்பிடத்தக்கது.

நடப்பு 2020-21ம் நிதியாண்டின் நான்காம் காலாண்டுக்கான (ஜனவரி-மார்ச்) சிறு சேமிப்பு திட்டங்களின் வட்டி விகிதங்கள் அறிவிக்கப்பட்டுள்ளது. கடந்த அக்டோபர் முதல் டிசம்பர் 2020 வரையிலான வட்டி விகிதமே இம்முறையும் தொடரும் என சொல்லப்பட்டுள்ளது.

அடிப்படை சேமிப்பு கணக்குக்கான(Savings account) வட்டி விகிதம், ஜனவரி-மார்ச் 2021 காலத்திற்கு 4 சதவீதம் என்ற அளவில் கூறப்பட்டுள்ளது. அதே வேளையில் வங்கிகளில் காணப்படும் சேமிப்பு கணக்கிற்கான வட்டி விகிதங்கள், ஒவ்வொரு வங்கிகளுக்கும் மாறுபடும். ஒரு வருட டெபாசிட் தொகைக்கான வட்டி விகிதம் 5.50 சதவீதமாக சொல்லப்பட்டுள்ளது.

இரண்டு மற்றும் மூன்று வருட டெபாசிட் தொகைக்கான வட்டி விகிதம், சிறு சேமிப்பு திட்டத்தின் கீழ் 5.50 சதவீதமாக உள்ளது. ஐந்து வருட காலத்திற்கான டெபாசிட் தொகைக்கு(Term Deposit) மட்டும் இது 6.70 சதவீதமாக உள்ளது. 5 வருட தொடர் சேமிப்பு திட்டத்திற்கு(Recurring Deposit – RD) 5.80 சதவீதமாக இருக்கிறது.

Small savings scheme interest jan 2021

மூத்த குடிமக்களுக்கான(Senior Citizen savings scheme) ஐந்து வருட திட்டத்திற்கு வட்டி விகிதம் 7.4 சதவீதமாகவும், பெண் குழந்தைகளுக்கான செல்வமகள்(Sukanya Samriddhi) திட்டத்தில் வட்டி விகிதம் 7.60 சதவீதமாக சொல்லப்பட்டுள்ளது. சிறு சேமிப்பு திட்டத்தின் கீழ் அதிக வட்டி விகிதத்தை செல்வமகள் திட்டம் மட்டுமே பெறுகிறது.

5 வருட தேசிய சேமிப்பு பத்திர திட்டத்திற்கு 6.80 சதவீத வட்டி விகிதமும், கிசான் விகாஸ் பத்திரத்திற்கு 6.90 சதவீதமும் அறிவிக்கப்பட்டுள்ளது. மாதாந்திர வருவாய் பெறுவோருக்கான(5 Years Monthly Income Scheme) திட்டத்தின் வட்டி விகிதம் 6.60 சதவீதமாக உள்ளது.

பொது வருங்கால வைப்பு(PPF) நிதி திட்டத்தில் 7.10 சதவீத வட்டி விகிதம் சொல்லப்பட்டிருக்கிறது. செல்வமகள் மற்றும் பொது வருங்கால வைப்பு நிதி திட்டங்கள் முழுமையான வரி சேமிப்பு(Tax Exempted – EEE) திட்டங்களாகும். இந்த இரண்டும் நீண்டகால சேமிப்பு திட்டமாக அமைந்துள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மீண்டும் ஒரு ‘கிரேட் டிப்ரஷன்’ – என்ன சொல்கிறது மாற்றத்திற்கான நிதி ஆயோக்

மீண்டும் ஒரு ‘கிரேட் டிப்ரஷன்’ – என்ன சொல்கிறது மாற்றத்திற்கான நிதி ஆயோக்  

Like a Great Depression – National Institution for Transforming India(NITI) Aayog

கடந்த 2020ம் ஆண்டு கொரோனா பெருந்தொற்றின் துவக்கத்தை யாரும் மறந்திருக்க முடியாது. சீனாவில் தானே, அமெரிக்காவில் தான் கொரோனா வந்துள்ளது என்ற நிலை மாறி, உள்நாட்டிலும் கொரோனா பெருந்தொற்று எண்ணிக்கை அதிகரிப்பதற்கு முன்பே ஊரடங்கு உத்தரவு அமலானது. நோய் தொற்றினால் பாதிக்கப்பட்டவர்களை விட வேலையிழந்து பொருளாதாரம் சார்ந்து பாதிக்கப்பட்டவர்கள் தான் அதிகம்.

பெருந்தொற்றுக்கு பிறகான காலத்தில் உலகம் முழுவதும் சுமார் 10 கோடி மக்கள் மிகுந்த வறுமை நிலைக்கு தள்ளப்படுவர் என சர்வேதச அமைப்புகள் சொல்லியிருந்தது. ஊரடங்கு காலத்தில் இந்திய வரலாற்றிலேயே காணப்படாத வேலைவாய்ப்பின்மை விகிதம் நிலவியது. அமைப்பு சாரா வேலைகளில் ஏற்பட்ட பாதிப்புகளை இங்கே கணக்கில் எடுத்து கொள்ளவில்லை.

2020ம் ஆண்டின் மார்ச் மாதத்தில் பங்குச்சந்தை குறியீடுகள் வீழ்ச்சி அடைந்திருந்தாலும், பின்னர் விரைவாக மீண்ட உலக சந்தைகள்  அந்த வருடத்தை தனக்கு சாதகமாக முடித்து கொண்டது. அமெரிக்க சந்தை குறியீடு மட்டும் கடந்த ஆண்டில் சுமார் 45 சதவீதம் ஏற்றம் பெற்றுள்ளது. இந்திய பங்குச்சந்தை குறியீடுகள் ஆண்டின் முடிவில் 15 சதவீத ஏற்றத்துடன் முடிவு பெற்றது.

இதுவே 2019ம் ஆண்டு அமெரிக்க சந்தை 30 சதவீதமும், இந்திய பங்குச்சந்தை 13 சதவீத ஏற்றமும் பெற்றிருந்தது குறிப்பிடத்தக்கது. பொருளாதார மந்த நிலை என்ற பாதகத்தை தாண்டி, அதிக முதலீடுகளை பெற்றதால் சந்தை குறியீடுகள் வரலாற்று உச்சத்தில் வர்த்தகமாகி கொண்டிருக்கிறன. இது ஒரு ‘குமிழி (Bubble)’ நிலை போல ஒப்பிடப்படுகிறது. பெரும்பாலான வல்லுநர்கள் பங்கு சந்தையில் அடைந்த லாபத்தை மற்ற முதலீட்டு சாதனங்களில் பரவலாக்குமாறு அறிவுறுத்துகின்றனர். 

பொதுவாக முதலீட்டை பிரித்து முதலீடு செய்வதும்(Asset Allocation), பல்வகைப்படுத்துதலும்(Diversification) அவசியம். ஒரே முதலீட்டு சாதனத்தை காலம் முழுவதும் கொண்டிருப்பது சிறந்த போர்ட்ஃபோலியோ(Portfolio) சாதனமாக அமையாது. நாட்டின் டிசம்பர் 2020 மாத வேலைவாய்ப்பின்மை விகிதம் எதிர்பாராத நிலையில் மீண்டும் அதிகரித்து வருகிறது. வரக்கூடிய நாட்களில் நடப்பு நிதியாண்டின் மூன்றாம் காலாண்டு முடிவுகளும்(Quarterly results), மத்திய பட்ஜெட் தாக்கலும்(Budget India 2021) வெளிவர உள்ளது.

இந்நிலையில் நிதி ஆயோக் என சொல்லப்படும் கொள்கை ஆணையம், கொரோனா பெருந்தொற்றுக்கு பிறகான காலத்தை கூறியுள்ளது. நிதி ஆயோக், நாட்டின் திட்டமிடல் அமைச்சகத்தின்(Ministry of Planning) கீழ் செயல்படுகிறது. இதன் தலைவராக பிரதமர் திரு. நரேந்திர மோடி உள்ளார். தலைமை நிர்வாக அதிகாரியாக ஒரு ஐ.ஏ.எஸ். அதிகாரியும்,  துணை தலைவராக ஒரு பொருளாதார வல்லுனரும் உள்ளனர்.

கொரோனாவுக்கு பிந்தைய காலத்தில், உலக பொருளாதாரம் இரண்டு தீவிர நிலைகளில் சுழலக்கூடும் எனவும், பெரும் மந்தநிலையை(Great Depression) ஒத்திருக்கும் சூழ்நிலை ஒன்றாகவும், முதலாம் உலகப்போருக்கு பிறகான காலமாக மற்றொன்றும் இருக்கும் எனவும் நிதி ஆயோக் கூறியுள்ளது. அதாவது 1920-30 காலங்களில் காணப்பட்ட நிலையை ஒப்பிட்டு சொல்லியுள்ளது.

உலகம் முழுவதும் காணப்படும் எதிர்ப்பு வாதம், வர்த்தகம் மீதான அதிக உணர்திறன், வேலைவாய்ப்பின்மை விகிதம் அதிகரித்து வருவது, உலக நாடுகளின் அதிகப்படியான கடன் தன்மை, வறுமை நிலை, உணவுப்பொருட்களில் காணப்படும் ஏற்ற-தாழ்வு, நிதி சந்தைகளில் காணக்கூடிய அதிக ஏற்ற-இறக்கங்கள் ஆகியவை வரக்கூடிய காலங்களில் பொருளாதார பாதிப்பை ஏற்படுத்தலாம் என இந்த ஆணையம் தனது உலக பார்வையை முன் வைத்துள்ளது.

கொரோனா பெருந்தொற்றால் ஊரடங்கு காலத்தில் ஏற்பட்ட நிதி இழப்பு, ஊரடங்கின் போது ஏற்பட்ட வேலைவாய்ப்பின்மை மற்றும் பொருளாதார நிலையை சரிசெய்ய அதிக பொருளாதார ஊக்குவிப்பு செலவு, நடப்பு கணக்கு பற்றாக்குறை அதிகமாக காணப்படும் நிலையில், கொரோனா தடுப்பூசிக்கான பெருமளவிலான செலவுகளை அரசு ஏற்கும் நிலை உள்ளது. இதன் காரணமாக வரக்கூடிய நாட்களில் தனிநபர் சேமிப்பும், பொறுப்பும் மிகவும் அவசியமான ஒன்று.

வாழ்க வளமுடன்,

நன்றி, வர்த்தக மதுரை 

www.varthagamadurai.com

உங்கள் சேமிப்புக்கும், முதலீட்டிற்குமான வரி எவ்வளவு ?

உங்கள் சேமிப்புக்கும், முதலீட்டிற்குமான வரி எவ்வளவு ?

Tax… Taxi… Taxman – Know about your Tax !

நவீன காலத்தில் சம்பாதிப்பது மட்டுமே ஒரு வேலையாக இருக்க முடியாது. சம்பாதித்த வருவாயில் சரியான சேமிப்பை ஏற்படுத்தவில்லை எனில், பின்னாளில் பொருளாதாரம் சார்ந்த சிக்கலை சந்திக்க நேரிடும். ‘கந்தை ஆனாலும் கசக்கிக் கட்டு’, ‘கூழ் ஆனாலும் குளித்துக் குடி’ என நம் மூதாதையர்கள் சொன்னது சுகாதாரத்தையும், சிக்கனத்தையும் பேணி காப்பதை தான்.

சேமிப்பும், முதலீடும் நம் பண்பாட்டு வாழ்க்கையில் கலந்த ஒன்று. அவசர காலத்திற்கு தேவையான உணவுப்பொருட்களை(கோயில் கலசத்திலும்)  அப்போதைய காலத்தில் நாம் சேமிக்க பழகி விட்டோம். வெள்ளமும், பஞ்சமும் வந்த போது, அது நமக்கு உதவியது.  இன்று நீங்கள் சேமித்தால், உங்கள் சேமிப்பு முதுமை காலத்தில் உங்களை பாதுகாக்கும். ஆனால் புறவுலகில் இன்று காணப்படும் பொருட்களின் மீது நம் ஈடுபாடு அதிகமாக காணப்பட்டு, நமக்கு தேவையில்லாத பொருட்களையும் வீட்டில் வாங்கி குவித்து வருகிறோம். இதன் காரணமாக செலவுகள் மட்டுமில்லாமல் வரியாக விரயம் செய்வதும் அதிகமாக உள்ளது.

ஆம், தனிநபர் வருவாய் பெறுவோர் நம் நாட்டில் ஆண்டுக்கு சராசரியாக தனது ஒட்டுமொத்த வருவாயில் 60 சதவீதத்தை வரியாக மட்டுமே செலுத்தி வருகிறார்கள். இதுவே குடும்பத்தில் உள்ள அனைவரும் வேலைக்கு செல்லும் நிலையில் அதனை எண்ணி பாருங்கள். இது நேரடி வரி மற்றும் முறைமுக வரியாக (Inclusive of GST) அமைந்துள்ளது. வருவாய் அதிகமாக பெறுபவர்களை காட்டிலும் வரி ஏய்ப்பு செய்பவர்களையும், வருமான வரி தாக்கல் செய்யாதவர்களையும் தான் அரசு கவனித்து வருகிறது.

வரியை நாம் முழுவதுமாக தவிர்க்க முடியாது. அதே வேளையில் வருமான வரி சட்டத்தின் கீழ் வழங்கப்படும் வரிச்சலுகைகளை திறமையாக பயன்படுத்தி, நேர்மையான முறையில் வரி சேமிப்பு செய்வது மட்டுமில்லாமல் சரியான நேரத்தில் வருமான வரி தாக்கல் செய்வதும் தனிநபர் ஒருவரின் கடமையாகும். அதற்காக வரி சேமிக்கிறேன் என தேவைப்படாத நிலையில் வீட்டுக்கடனை(Housing loan) வாங்கி விட்டு நிதி சிக்கலில் மாட்டிக்கொள்ள கூடாது. உங்களுக்கான தேவை இருத்தல் வேண்டும்.அதனை வாய்ப்பாக கொண்டு வரி சேமிப்பும் இருக்க வேண்டும்.

  • சேமிப்பு, முதலீடு – இரண்டும் ஒன்றா ?
  • வரி பிடித்தம் இல்லையென்றாலும், வருமான வரி தாக்கல் செய்ய வேண்டுமா ?
  • பங்குச்சந்தையில் நீங்கள் முதலீடு செய்கிறீர்களா – அது தொழில் வருவாயாக கணக்கிடப்படுவது உங்களுக்கு தெரியுமா ?
  • அஞ்சலக சேமிப்பு மற்றும் வங்கி டெபாசிட் – வரி எவ்வளவு ?
  • நீங்கள் பங்கு வர்த்தகம் செய்யக்கூடாது – யார், யாருக்கு ?
  • பங்கு முதலீட்டில் அரசு பணியாளர்களுக்கான எச்சரிக்கை
  • சிறு சேமிப்புத்திட்டம்(Postal and Bank Savings) உங்களுக்கு நீண்டகாலத்திற்கு உதவாது – ஏன் ?
  • 2020-21ம் நிதியாண்டுக்கான வருமான வரி எப்படி ?
  •  வருமான வரியை எப்படி கணக்கிட வேண்டும் ?

வாருங்கள், வரும் சனிக்கிழமை(09-01-2021) மாலை 05:30 மணிக்கு இணையம் வழியாக பேசுவோம்…

பதிவுக்கு:

Taxman Webinar – Registration

கட்டணம்: ரூ. 100 மட்டும்

நாள் மற்றும் நேரம்: 09-01-2021 & மாலை 05:30 – 06:30

பதிவுக்கு பின்னர் உங்களுக்கான இணைப்பு (Webinar Link) மின்னஞ்சல் மற்றும்  குறுஞ்செய்தியாக அனுப்பி வைக்கப்படும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

எஸ்.பி.ஐ. லைப் இன்சூரன்ஸ் – பங்குச்சந்தை அலசல்

எஸ்.பி.ஐ. லைப் இன்சூரன்ஸ் – பங்குச்சந்தை அலசல் 

SBI Life Insurance – Fundamental Analysis – Stock Market

நாட்டின் மிகப்பெரிய பொதுத்துறை வங்கியான எஸ்.பி.ஐ.(State Bank of India) நிறுவனமும், பிரெஞ்சு நாட்டு வங்கி குழுமமான பி.என்.பி. பரிபாஸ்(BNP Paribas) நிறுவனமும் கூட்டாக சேர்ந்து துவக்கிய தனியார் நிறுவனம் தான் எஸ்.பி.ஐ. லைப் இன்சூரன்ஸ். உலகின் 43வது மிகப்பெரிய வங்கியாக நம் நாட்டின் எஸ்.பி.ஐ. உள்ளது. பி.என்.பி. பரிபாஸ் நிறுவனம் சொத்துக்கள் அடிப்படையில் உலகின் எட்டாவது மிகப்பெரிய வங்கியாக இருப்பது குறிப்பிடத்தக்கது.

கடந்த 2001ம் ஆண்டு துவங்கப்பட்ட எஸ்.பி.ஐ. லைப் இன்சூரன்ஸ் நிறுவனத்தில் பாரத ஸ்டேட் வங்கி 55 சதவீத பங்குகளையும், பி.என்.பி. நிறுவனம் 5 சதவீத பங்குகளையும் கொண்டுள்ளது. பி.என்.பி. நிறுவனம் முன்னர் 22 சதவீத பங்குகளை கொண்டிருந்தது கவனிக்கத்தக்கது. அன்னிய முதலீட்டாளர்களிடம் சுமார் 26 சதவீத எஸ்.பி.ஐ. லைப் இன்சூரன்ஸ் நிறுவனத்தின் பங்குகள் உள்ளது.

காப்பீட்டு துறையில்(Insurance Sector) இயங்கும் இந்நிறுவனத்திற்கு நாடு முழுவதும் 947 நேரடி அலுவலகங்களும், 28,000 பங்களிப்பு கிளைகளும் உள்ளன. நிறுவனத்தில் சுமார் 17,000 பணியாளர்களும், 1,50,000 காப்பீட்டு ஏஜெண்டுகளும் சேவை செய்து வருகின்றனர். பல கார்ப்பரேட் நிறுவனங்களிலும், வங்கிகளிலும் இதன் காப்பீடு சேவை வழங்கப்பட்டு வருகிறது.

2017-18ம் ஆண்டு அறிக்கையின் படி, இந்த நிறுவனம் ரூ.1 லட்சம் கோடிக்கு  மேற்பட்ட சொத்துக்களை நிர்வகித்து வருகிறது. கடந்த 2019-20ம் நிதியாண்டின் முடிவில் நிறுவனத்தின் மொத்த எழுதப்பட்ட பிரீமியத்தின்(Gross written Premium) மதிப்பு 30,000 கோடி ரூபாய். தனியார் காப்பீட்டு துறையில் கடந்த ஆண்டின் சிறந்த நிறுவனமாகவும் எஸ்.பி.ஐ. லைப் இன்சூரன்ஸ் சொல்லப்பட்டுள்ளது.

எஸ்.பி.ஐ. லைப் இன்சூரன்ஸ் நிறுவனத்தின் சந்தை மதிப்பு ரூ.90,000 கோடி. காப்பீட்டு துறையில் சேவை புரிந்து வருவதால், நிறுவனத்திற்கான கடன் எதுவுமில்லை. நிறுவனர்களின் பங்களிப்பு 60 சதவீதமாகவும், நிறுவனர்கள் சார்பில் பங்குகள் எதுவும் அடமானம் வைக்கப்படவில்லை.

கடந்த ஐந்து வருடங்களில் நிறுவனத்தின் விற்பனை 13 சதவீதமாகவும், லாபம் 12 சதவீதமாகவும் வளர்ச்சி பெற்றுள்ளது. பங்கு மூலதனத்தின் மீதான வருவாய்(Return on Equity) ஐந்து வருட காலத்தில் 18 சதவீதமாக இருப்பது குறிப்பிடத்தக்கது. 2019-20ம் நிதியாண்டு முடிவில் நிறுவனத்தின் வருவாய் 43,798 கோடி ரூபாயாகவும், செலவினம் 42,438 கோடி ரூபாயாகவும் இருந்துள்ளது. சொல்லப்பட்ட காலத்தில் நிறுவனத்தின் நிகர லாபம் ரூ.1,422 கோடியாக உள்ளது.

நிறுவனத்தின் இருப்புநிலை கையிருப்பு ரூ.8,663 கோடியாக சொல்லப்பட்டுள்ளது. மொத்த மூலதனத்தின் மீதான வருவாயும் இந்த நிறுவனத்திற்கு நன்றாக உள்ளது. பொதுவாக காப்பீட்டு துறையில் பொதுத்துறை நிறுவனங்களை விட, தனியார் நிறுவனங்களின் செயல்பாடு பங்கு முதலீட்டாளர்களுக்கு சாதகமான அம்சமாக உள்ளது. துரிதமான சேவை, காப்பீட்டுக்கான தேவை அதிகரித்து வருவது மற்றும் தொடர் வளர்ச்சி ஆகியவை எஸ்.பி.ஐ. லைப் நிறுவனத்திற்கு உள்ளது. பங்குச்சந்தை அடிப்படை பகுப்பாய்வை பூர்த்தி செய்யும் இந்நிறுவனத்தின் தற்போதைய சந்தை விலை பங்கு ஒன்றுக்கு 900 ரூபாய் என்ற விலையில் வர்த்தகமாகி வருகிறது. பணப்பாய்வு முறைப்படி(DCF Valuation) இந்த பங்கு ஒன்றின் விலை ரூ.1000 என்ற மதிப்பை பெறுகிறது. பங்கு முதலீட்டை பரவலாக்கம்(Sector Diversification) செய்ய விரும்புவோர் இது போன்ற காப்பீட்டு துறையில் உள்ள நிறுவனங்களில் முதலீடு செய்வதை ஒரு உத்தியாக கையாளலாம். எதிர்காலத்தில் இந்த துறைக்கான தேவையும் அதிகமாக உள்ளது.

கவனிக்க: முதலீட்டாளர்கள், பங்குகளை வாங்கும் முன் தகுந்த நிதி ஆலோசகர் அல்லது பங்கு ஆலோசகரின் முன்னிலையில் தங்களது முதலீட்டு முடிவை எடுக்குமாறு அறிவுறுத்தப்படுகிறது. மேலே சொன்ன தகவல்கள் பங்குச்சந்தை அடிப்படை பகுப்பாய்வுக்கான கற்றல் மட்டுமே.

வாழ்க வளமுடன்,

நன்றி, வர்த்தக மதுரை

www.varthagamadurai.com

தனிநபர் வருமான வரி தாக்கலுக்கான காலக்கெடு நீட்டிப்பு – 10, ஜனவரி, 2021

தனிநபர் வருமான வரி தாக்கலுக்கான காலக்கெடு நீட்டிப்பு – 10, ஜனவரி, 2021

Income Tax Returns Filing for Individuals extended to 10, January 2021

2019-20ம் நிதியாண்டுக்கான வருமானத்திற்கு நடப்பு மதிப்பீட்டு (AY 2020-21) வருடத்தில் வருமான வரி தாக்கல் செய்ய வேண்டும். கொரோனா பெருந்தொற்று காரணமாக ஏற்பட்ட சிரமத்தால் வரி தாக்கல் செய்ய வேண்டிய காலக்கெடு சில மாதங்களுக்கு முன்பு நீட்டிக்கப்பட்டிருந்தது. இதன் படி தனிநபர் வருமான வரி தாக்கல் செய்பவர்களுக்கான காலக்கெடு இன்றுடன் (31-12-2020) முடிவடையும் நிலையில், மீண்டும் ஒரு முறை இதனை நீட்டித்துள்ளது நிதி அமைச்சகம்.

தனிநபர் வருமான வரி தாக்கலில் ஆண்டு வருவாய் (ஒட்டுமொத்த வருவாய்) ஒரு நிதியாண்டில் ரூ.2.5 லட்சத்தை கடந்தால், ஒருவருக்கு வரிப்பிடித்தம் இல்லையென்றாலும், வருமான வரி தாக்கல் செய்வது அவசியம்.

நேற்று (30-12-2020) மத்திய நிதி அமைச்சகத்தால் வெளியிடப்பட்ட ஒரு அறிக்கையில் மதிப்பீட்டு ஆண்டு 2020-21க்கு வருமான வரி தாக்கல் செய்பவர்களில் தணிக்கை செய்யப்பட்ட கணக்குதாரர்களுக்கு(Accounts audited) முன்னர் இருந்த 31, ஜனவரி 2021 என்ற காலக்கெடு தற்போது 15, பிப்ரவரி 2021 என சொல்லப்பட்டுள்ளது.

இது போல சர்வேதச மற்றும் குறிப்பிட்ட உள்நாட்டு பரிவர்த்தனைகளை மேற்கொண்டவர்களுக்கு முன்னர் இருந்த 31,ஜனவரி 2021 என்ற கடைசி தேதி, இப்போது 2021ம் ஆண்டின் பிப்ரவரி 15ம் தேதியாக அறிவிக்கப்பட்டுள்ளது.

மற்ற வரிதாரர்களுக்கு (தனிநபர் உட்பட) ஏற்கனவே சொல்லப்பட்ட டிசம்பர் 31, 2020 என்ற காலக்கெடு, தற்போது 2021 ஜனவரி மாதம் 10ம் தேதியாக நீட்டிக்கப்பட்டுள்ளது.

விவாத்(Vivad Se Vishwas Scheme) திட்டத்திற்கு 31, ஜனவரி 2021 மற்றும் நேரடி வரி மற்றும் பினாமி சட்டத்தின் கீழ் செல்லும் அறிவிப்பிற்கு 31, மார்ச் 2021 எனவும் காலக்கெடு மாற்றப்பட்டுள்ளது குறிப்பிடத்தக்கது. மத்திய பொருட்கள் மற்றும் சேவை வரி(CGST) 2017 சட்டம், பிரிவு 44ன் கீழ் ஆண்டு வருவாயை சமர்பிப்பதற்கான தேதி 28, பிப்ரவரி 2021 ஆக சொல்லப்பட்டுள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

உங்களுக்கான பாதுகாப்பு விளிம்பு(Margin of Safety) என்ன ?

உங்களுக்கான பாதுகாப்பு விளிம்பு(Margin of Safety) என்ன ?

What is your Margin of Safety ?

Margin of Safety’ என சொல்லப்படும் பாதுகாப்பு விளிம்பு, பங்குச்சந்தையில் வர்த்தகமாகும் பங்குகளுக்கு மட்டுமல்ல. நாம் நித்தமும் சந்திக்கும் நிகழ்வுகளிலும் பாதுகாப்பு மற்றும் முன்னெச்சரிக்கை சார்ந்த விஷயங்கள் நமக்கு தேவைப்படுகின்றன. உடல்நலம் மற்றும் பொருளாதாரம் சார்ந்த சிக்கல்களை நாம் அணுகும் போது, இந்த விஷயத்தை நாம் முன்னரே செய்திருக்கலாமோ என்ற கேள்வியும் எழுவதுண்டு.

‘சிறு துளி பெரு வெள்ளம்’, ‘வரும் முன் காப்போம்’ போன்ற வரிகளை நாம் பல காலங்களாக கேட்டு கொண்டு தான் இருக்கிறோம். ஆனால் நடைமுறையில் அதனை செயல்படுத்த தவறி விட்டு, பின்பு சிக்கலில் மாட்டி கொள்கிறோம். பின்வரும் விஷயங்களில் உங்களது நடப்பு நிலை என்ன என்பதனை நீங்களே பரிசோதித்து கொள்ளுங்கள்.

  • உங்களுக்கோ அல்லது உங்களது குடும்பத்தில் உள்ள ஒருவருக்கோ எதிர்பாராத விதமாக உடல்நலம் அல்லது நிதி சார்ந்த சிக்கல்கள் ஏற்பட்டால், அதனை களைய உங்களிடம் உள்ள உடனடி தீர்வு என்ன ?
  • நீங்கள் பார்த்து கொண்டிருக்கும் வேலை அல்லது உங்களது தொழில் உங்களை விட்டு போய் விட்டால், நீங்கள் வைத்திருக்கும் அடுத்த திட்டம் என்ன ? 
  • வேலையிழப்பு நாட்களை பற்றி யோசித்தது உண்டா, அப்படியெனில் உங்களிடம் அவசர தேவைக்கு போதுமான நிதி ஆதாரம் உள்ளதா ?
  • உங்களது அனைத்து காலத்திற்கான(All time prevention mode), ‘வரும் முன் காப்போம்’ உத்தி என்ன ?
  • பாதுகாப்பான முதலீடு என நாம் பல காலமாக ஒரே இடத்தில் சேமித்து வைத்துள்ளோம். பணவீக்கம் அதிகரித்து வருகிறது. நீங்கள் எதிர்பார்த்த மற்றும் உங்கள் இலக்குகளை அடைவதற்கான தொகை கிடைக்காமல் போகலாம். மாற்று திட்டம் எதுவும் வைத்துள்ளீர்களா ?

பொதுவாக நமக்கு முன் உள்ள பாதுகாப்பு கவசமாக காப்பீட்டு திட்டங்கள் (Insurance – ஆயுள், மருத்துவம் மற்றும் விபத்து) உள்ளன. நமது அசையா சொத்துக்களுக்கும் காப்பீட்டை எடுத்து கொள்ளலாம். நிதி இலக்குகளுக்கும், நமது வயதுக்கு தகுந்தாற் போல் ஏற்படும் கட்டாய தேவைகளுக்கும் நாம் சேமித்து வைக்கலாம். பணவீக்கத்தை தாண்டிய வருவாயை பெற முதலீட்டை மேற்கொள்ளலாம்.

நமக்கு முன் உள்ள முதலீட்டு வாய்ப்பாக நிலம், தொழில், பங்குகள், கடன் பத்திரங்கள், வங்கி மற்றும் அஞ்சலகங்களில் கிடைக்கப்பெறும் சிறு சேமிப்பு திட்டங்கள், பணப்பயிர்கள், ரொக்கம் ஆகியவை. (கவனிக்க: நாள் வணிகம் மற்றும் மெய்நிகர் நாணயம் போன்ற ஊக செயல்பாடுகள் முதலீடு அல்ல. அவற்றில் எச்சரிக்கை தேவை)

பணவீக்கத்தையும், முதலீட்டில் உள்ள ரிஸ்க் தன்மையையும் குறைத்து (தவிர்க்க இயலாது) நீண்டகாலத்தில் அதனை நல்ல வருவாயாக மாற்ற, அஸெட் அலோகேஷன்(Asset Allocation) மற்றும் பல்வகைப்படுத்துதல்(Diversification) அவசியம்.

இப்போது சொல்லுங்கள், உங்களுக்கான பாதுகாப்பு விளிம்பு என்ன ?

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் முதல் ஓட்டுநர் இல்லா மெட்ரோ ரயில் சேவை – இன்று தொடக்கம்

நாட்டின் முதல் ஓட்டுநர் இல்லா மெட்ரோ ரயில் சேவை – இன்று தொடக்கம்

India’s First Driverless Metro Rail Service – Starts Today

தானியங்கி ரயில் சேவையில், உலகின் முதல் இயக்கம் கடந்த 1967ம் ஆண்டு லண்டனில் துவங்கப்பட்டது. தொழில்நுட்ப புரட்சி குறைவாக எண்ணப்பட்ட அக்காலத்தில் முதல் தானியங்கி ரயில் சேவை இருந்திருந்தாலும், அவசர தேவைக்காக ஒரு ஓட்டுநர் ரயில் கேபினில் அமர்ந்திருந்தார். முழுமையான ஓட்டுநர் இல்லா ரயில் சேவை முதன்முதலில் 1981ம் ஆண்டு ஜப்பானில் தான் நடைபெற்றது.

ஓட்டுநர் இல்லாத ரயில் சேவையில் பல தொழில்நுட்ப அமைப்புகள் இருப்பது குறிப்பிடத்தக்கது. சாதாரண பயணிகள் ரயில் சேவையிலிருந்து, மெட்ரோ பயணிகள் ரயில் சேவை தனித்துவம் மிக்கது. உலகின் ஒட்டுமொத்த மெட்ரோ ரயில் சேவையில் 7 சதவீதம் ஓட்டுநர் இல்லாத ரயில்(Driverless Metro Rail) சேவையை தான் கொண்டுள்ளது.

மெட்ரோ ரயில் சேவையில் நீண்ட தூரம் கொண்ட ரயிலை துபாய் இயக்கி வருகிறது. இதன் தூரம் 75 கி.மீ. உலகின் அதிவேக மெட்ரோ ரயில் சீனாவின் ஷாங்காய் மக்லேவ் சேவையாகும். இதன் வழித்தடம் மணிக்கு 600 கிலோமீட்டர் வேகத்தை ,கொண்டிருந்தாலும், தற்போது மணிக்கு 430 கிலோமீட்டர் வேகத்தில் இயங்கி கொண்டிருக்கிறது.

இந்த பங்களிப்பில் தற்போது இந்தியாவும் இணைந்துள்ளது. நாட்டின் முதல் ஓட்டுநர் இல்லாத மெட்ரோ ரயில் சேவையை இன்று(28-12-2020) பிரதமர் அவர்கள் துவக்கி வைக்க உள்ளார். இந்த சேவை டெல்லி மெட்ரோ ரயில் சேவையின் 37 கி.மீ. தூரம் கொண்ட மெஜந்தா தடத்தில் நடைபெற உள்ளது.

டெல்லி மெட்ரோ தற்போது 390 கிலோமீட்டர் தூர சேவையையும், 285 ரயில் நிலையங்களையும் நிர்வகித்து வருகிறது. நாட்டின் முதல் ஓட்டுநர் இல்லாத மெட்ரோ ரயில் சேவை இன்று துவங்கப்பட்டாலும், நடப்பில் உள்ள மெட்ரோ ரயில் சேவை பெரும்பாலும் ஓட்டுநர்களை சாராத கட்டுப்பாட்டு அமைப்புகளால் தான் இயக்கப்படுவது குறிப்பிடத்தக்கது. புதிய தொழில்நுட்பத்தை கொண்டிருக்கும் இச்சேவை பயணிகளுக்கு மிகவும் பாதுகாப்பான ரயில் சேவையை அளிக்கும் எனவும் சொல்லப்படுகிறது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

32 லட்சம் கணக்குகள், 19 லட்சம் முதலீட்டாளர்கள், 8 மாநிலங்கள், 6,380 கோடி ரூபாய் மோசடி – எச்சரிக்கை !

32 லட்சம் கணக்குகள், 19 லட்சம் முதலீட்டாளர்கள், 8 மாநிலங்கள், 6,380 கோடி ரூபாய் மோசடி – எச்சரிக்கை !

Rs.6380 Crore Fraud in 8 States – Ponzi Scam

ஆந்திராவை சேர்ந்த அக்ரி கோல்டு குழும(Agri Gold Group) நிறுவனம், கடந்த சில வருடங்களுக்கு முன்பு, ‘பொன்சி’ என சொல்லப்படும் முதலீட்டு  மோசடியில் சிக்கி கொண்டது. 1995ம் ஆண்டு துவங்கப்பட்ட இந்நிறுவனம் கூட்டு முதலீட்டு திட்டத்தின் மூலம் பல முதலீட்டாளர்களை சேர்த்து கொண்டு, முதலீட்டிற்கு அதிக லாபம் தருவதாக சொல்லி நாட்டில் உள்ள பல மாநிலங்களில் மோசடியை ஏற்படுத்தியது.

பணமோசடி தடுப்பு சட்டம்(PMLA), 2002ன் கீழ் இந்நிறுவனத்தின் சொத்துக்கள் முடக்கப்பட்டுள்ளன. அக்ரி கோல்டு குழும நிறுவனங்கள், பூங்கா, வீட்டுமனைகள், பொழுதுபோக்கு வளாகம், இயந்திரங்கள் உள்ளிட்ட 48 ஏக்கர் பரப்பளவில் உள்ள சொத்துக்களின் மதிப்பு அமலாக்க இயக்குநரகத்தால் முடக்கப்பட்டுள்ளது. இதன் நிறுவனர் மற்றும் இயக்குனர்கள் கைது செய்யப்பட்டுள்ளனர். சில வருடங்களுக்கு முன்பு இதே போன்ற நிகழ்வு இந்த நிறுவனத்தில் ஏற்பட்டுள்ளது குறிப்பிடத்தக்கது.

ஒழுங்குமுறை ஆணையத்தின் எந்த அனுமதி மற்றும் விதிமுறைகளை பின்பற்றாமல், கூட்டு முதலீட்டு திட்டத்தின்(Collective investment schemes) அடிப்படையில் முதலீட்டாளர்களிடம் பணத்தை வாங்கி விட்டு அதிக லாபம் மற்றும் வீட்டுமனைகள் வழங்க உள்ளதாக சொல்லியிருந்த இந்நிறுவனம் பின்னர் முதலீட்டளார்களுக்கு அதனை தரவில்லை எனவும், செய்த முதலீட்டை திரும்ப பெறவும் முடியாமல் இருந்ததாக புகார் எழுந்துள்ளது.

தமிழகம் உள்பட எட்டு மாநிலங்களில்(Andhra Pradesh, Karnataka, Tamilnadu, Telangana, Maharashtra, Odisha, Chattisgarh, Andaman & Nicobar) சுமார் 19 லட்சம் முதலீட்டாளர்களிடையே 32 லட்சம் கணக்குகள் துவக்கி மோசடி நடைபெற்றுள்ளது. மோசடி நடந்த மதிப்பு ரூ. 6,380 கோடி என சொல்லப்பட்டுள்ளது.

தமிழகத்தில் மட்டும் 28,600 முதலீட்டாளர்களிடையே 38,000 கணக்குகளை துவக்கி பணம் வசூலிக்கப்பட்டுள்ளது. இவர்களுக்கு திரும்பி தராமல் நிலுவையில் உள்ள தொகை மட்டும் நூறு கோடி ரூபாய். பொன்சி மோசடி உத்தியில் இது போன்ற ஏராளமான நிறுவனங்கள், மக்களிடையே பேராசையை காட்டி அதிக லாபம் தருவதாக ஏமாற்றி வருகின்றன.

அரசாங்கத்தால் அனுமதி பெற்ற நிறுவனங்களிலும், அரசு பட்டியலிடும் திட்டத்தில் மட்டுமே முதலீடு செய்யுங்கள். அதிக லாபத்திற்கு எந்த உத்தரவாதமும் கிடையாது. உலகளவில் அங்கீகரிக்கப்பட்ட பங்குச்சந்தை முதலீட்டிலும் உத்தரவாதமான வருவாய் என்று எதுவும் இல்லாத சூழ்நிலையில், இது போன்ற புரிந்து கொள்ள முடியாத விஷயங்களில் முதலீடு செய்ய வேண்டாம். நடப்பில் மாதாமாதம் வருவாய், வீட்டுமனை, பண்ணை தோட்டம் என பல மோசடி திட்டங்கள் வந்து கொண்டிருக்கின்றன.

வாழ்க வளமுடன்,

நன்றி, வர்த்தக மதுரை 

www.varthagamadurai.com

டி.டி.எச். சேவையில் நூறு சதவீத அன்னிய முதலீடு – அமைச்சகம் ஒப்புதல்

டி.டி.எச். சேவையில் நூறு சதவீத அன்னிய முதலீடு – அமைச்சகம் ஒப்புதல் 

100 Percent Foreign Direct Investment in DTH Service – Union Cabinet

டி.டி.எச்.(Direct to Home) என்பது செயற்கைக்கோள்களிலிருந்து பெறப்படும் சிக்னல்கள் மூலம் செயற்கைக்கோள் தொலைக்காட்சியைப் பெறும் ஒரு முறையாகும். இந்த நேரடி ஒளிபரப்பு முறை கடந்த 2000ம் ஆண்டு மத்திய அரசால் அனுமதிக்கப்பட்டது. நாட்டின் முதல் டி.டி.எச். தொலைக்காட்சி சேவை, ஜீ குழுமத்தை(Zee Group) சேர்ந்த டிஷ் டி.வி. நிறுவனத்தால் 2003ம் வருடம் அக்டோபர் மாதத்தில் கொண்டு வரப்பட்டது.

டி.டி.எச். சேவையில் உலகின் மிகப்பெரிய சந்தையாகவும் நம் நாடு விளங்குகிறது. கடந்த 2019ம் ஆண்டு முடிவின் படி, நாட்டில் 7 கோடி டி.டி.எச்.(DTH) சந்தாதாரர்கள் உள்ளனர். மார்ச் 2020 காலத்தின் அடிப்படையில் நான்கு கட்டண சேவையை அளிக்கும் நிறுவனங்களும், ஒரு இலவச சேவை வழங்குநரும் உள்ளதாக அரசு தெரிவித்துள்ளது.

7 கோடி சந்தாதாரர்களில், இலவச சந்தாதாரர்கள் சம்மந்தமாக குறிப்பிடப்படவில்லை. இலவச சேவையை மத்திய அரசின் பிரசார் பாரதி நிறுவனமும், கட்டண சேவையில் டாட்டா(Tata Sky), டிஷ் டி.வி., ஏர்டெல் மற்றும் சன் டைரக்ட் உள்ளன.

நாட்டின் மொத்த டி.டி.எச். சேவையில் டாட்டா நிறுவனம் 32 சதவீத பங்களிப்பையும், டிஷ் டி.வி.(Dish TV) 30 சதவீத பங்களிப்பையும், ஏர்டெல்  மற்றும் சன் டைரக்ட்(Sun Direct) முறையே 23 சதவீதம் மற்றும் 14 சதவீத பங்களிப்பை கொண்டுள்ளன. உள்நாட்டில் சுமார் 18 கோடி தொலைக்காட்சி பெட்டிகள் உள்ளது கவனிக்கத்தக்கது.

டி.டி.எச். சேவையில் துரிதமான வளர்ச்சிக்கும், கூடுதல் பாதுகாப்புக்கும் முதலீடு துணைபுரியும் என்பதால், இந்த துறையில் 100 சதவீத அன்னிய முதலீட்டை ஈர்க்க மத்திய அமைச்சகம் அனுமதி அளித்துள்ளது. இதன் மூலம் அரசுக்கும் கூடுதலாக வருவாய் கிடைக்கப்பெறுவது மட்டுமில்லாமல், மேம்பட்ட சேவையை பொது மக்களுக்கு அளிக்க முடியும் என அரசு எண்ணுகிறது.

உரிமையை புதுப்பித்தலுக்கான காலத்திலும்(License renewal) 10 வருடத்திலிருந்து 20 வருடமாக நீட்டித்துள்ளது. மேலும் சேவையை வழங்கும் நிறுவனங்களுக்கான உரிமக்கட்டணத்திலும் சலுகை வழங்க போவதாக தெரிவிக்கப்பட்டுள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

ஐக்கிய ராச்சியத்தின் பொருளாதார வளர்ச்சி – 16 சதவீதம்

ஐக்கிய ராச்சியத்தின் பொருளாதார வளர்ச்சி – 16 சதவீதம் 

GDP growth to 16 Percent in the 3rd Quarter – United Kingdom

கொரோனா பெருந்தொற்றின் உருமாற்றம் பெற்ற வைரஸ் காரணமாக மீண்டும் ஒரு முறை ஊரடங்கு நிலைக்கு பிரிட்டன் தள்ளப்பட்டுள்ளது. ஐக்கிய ராச்சியத்தின் மொத்த உள்நாட்டு உற்பத்தியில்(GDP) சேவை துறை 79 சதவீத பங்களிப்பை கொண்டிருக்கிறது. உற்பத்தி துறை 10 சதவீத பங்களிப்பை நாட்டின் பொருளாதார வளர்ச்சியில் கொண்டுள்ளது.

சேவை துறையில் அரசின் பங்களிப்பு, கல்வி மற்றும் சுகாதாரம் ஆகியவை 19 சதவீதம் என்ற அளவினை கொண்டுள்ளது. ஐக்கிய ராச்சியத்தின் மொத்த பொருளாதார மதிப்பில் விவசாயம் ஒரு சதவீத பங்களிப்பை மட்டுமே பெற்றிருக்கிறது.

பொருட்கள் மற்றும் சேவையில் ஏற்றுமதி 28 சதவீதத்தையும், இறக்குமதி 30 சதவீதத்தையும் கொண்டிருக்கிறது. நடப்பாண்டின் செப்டம்பர் காலாண்டிற்கான பொருளாதார வளர்ச்சியை தற்போது வெளியிட்டுள்ளது இந்த அரசு. ஜூலை முதல் செப்டம்பர் 2020 வரையிலான காலாண்டில் ஐக்கிய ராச்சியம் 16 சதவீத வளர்ச்சியை பெற்றுள்ளது.

இது கடந்த 65 வருடங்களில் காணப்படாத மிக வேகமான பொருளாதார வளர்ச்சி என்பது குறிப்பிடத்தக்கது. கொரோனா காலத்தின் ஊரடங்கில் மொத்த உள்நாட்டு உற்பத்தி வளர்ச்சி மதிப்பீடும் மாற்றியமைக்கப்பட்டிருந்தது. சொல்லப்பட்ட பொருளாதார வளர்ச்சி கொரோனா காலத்திற்கு முந்தைய காலத்துடன் ஒப்பிடும் போது இன்னும் பொருளாதாரம் மீட்டெடுக்கப்படவில்லை என்பதனை காட்டுகிறது.

நடப்பாண்டின் முதல் இரு காலாண்டுகள் முறையே (-3) மற்றும் (-18.8) என்ற பொருளாதார வீழ்ச்சியை சந்தித்துள்ளது. மூன்றாம் காலாண்டின் மொத்த உள்நாட்டு உற்பத்தி வளர்ச்சி அடைந்ததற்கு காரணமாக தனியார் மற்றும் அரசு நுகர்வு இருந்துள்ளது. முதல் ஊரடங்குக்கு பிறகான காலத்தில் தொழிற்துறை சிறிய அளவில் மட்டுமே வளர்ச்சிக்கு துணைபுரிந்துள்ளது.

வாழ்க வளமுடன்,

 நன்றி, வர்த்தக மதுரை 

www.varthagamadurai.com

2021ம் ஆண்டு வரவிருக்கும் புதிய ஐ.பி.ஓ. முதலீடு – என்ன செய்யலாம் ?

2021ம் ஆண்டு வரவிருக்கும் புதிய ஐ.பி.ஓ. முதலீடு – என்ன செய்யலாம் ?

Are you ready to invest in the upcoming IPO ? (IPO Mania 2021)

நடப்பு வருடத்தில் பங்குச்சந்தை பெரும் வீழ்ச்சியையும், அதற்கடுத்தாற் போல் வரலாற்றில் இல்லாத வெகு குறைவான காலத்தில் மீண்டு வந்ததையும் பார்த்திருப்போம். உலக பொருளாதார மந்தநிலை இன்னும் சரிசெய்யப்படாத நிலையில், வளர்ந்த நாடுகளின் கடன் தன்மை(Debt) அதிகரித்து வரும் நிலையில் பங்குச்சந்தைகள் மட்டும் எப்படி வெற்றி நடைபோடுகின்றன ?

2020ம் வருடத்தின் துவக்கத்தில் மந்தநிலையை சந்தித்து வந்த பங்குச்சந்தை, மார்ச் மாத வீழ்ச்சியில் பல பங்கு முதலீட்டாளர்களை பீதி அடைய வைத்த (வாய்ப்பை அளித்த) சந்தை பின்பு ஐ.பி.ஓ. எனும் முதன்மை சந்தையில் வந்த நிறுவனங்களை வரவேற்று லாபங்களை அள்ளிக்கொடுத்தது எப்படி ?

  • ஐ.பி.ஓ.(IPO) வின் வரலாறு தான் என்ன ?
  • உண்மையில் ஐ.பி.ஓ. மூலம் சிறு முதலீட்டாளர்கள் லாபம் பெற்றுள்ளார்களா ?
  • முதன்மை சந்தையில் லாபம் பார்க்க மற்றும் கவனிக்க வேண்டிய விஷயங்கள் என்னென்ன ?
  • வாய்ப்புகளும், விரயமும் – சொல்லப்படாத ஐ.பி.ஓ. நிகழ்வு
  • 2021ம் ஆண்டு வரவிருக்கும் ஐ.பி.ஓ. நிறுவனங்கள்
  • இதற்கு முந்தைய ஐ.பி.ஓ. முதலீட்டு வாய்ப்புகளை தவற விட்டீர்களா ?

வாருங்கள், வரும் சனிக்கிழமை மாலை 05:15 மணிக்கு இணையம் வழியாக பேசுவோம்…

பதிவுக்கு:

IPO Mania Webinar – Registration

கட்டணம்: ரூ. 199 மட்டும்

நாள் மற்றும் நேரம்: 26-12-2020 & மாலை 05:15 – 06:30

பதிவுக்கு பின்னர் உங்களுக்கான இணைப்பு (Webinar Link) மின்னஞ்சல் மற்றும்  குறுஞ்செய்தியாக அனுப்பி வைக்கப்படும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

மீண்டும் அதிகரித்து வரும் நாட்டின் வேலைவாய்ப்பின்மை விகிதம்

மீண்டும் அதிகரித்து வரும் நாட்டின் வேலைவாய்ப்பின்மை விகிதம் 

Unemployment rate is rising again – CMIE Data

நடப்பாண்டில் ஏப்ரல் மாத ஊரடங்கின் போது, நாட்டின் பெரும்பாலான தொழிலாளர்கள் தங்களது வேலைகளை இழந்தனர். குறிப்பாக அமைப்பு சாரா வேலைகளில் தான் இதன் பாதிப்பு அதிகமாக இருந்தது. அடுத்தடுத்த மாதங்களில் கொரோனா பெருந்தொற்று எண்ணிக்கை அதிகரித்த நிலையில் ஊரடங்கும் நீட்டிக்கப்பட்டிருந்தது.

எதிர்பாராமல் ஏற்பட்ட தேவையின் காரணமாக உணவுப்பொருட்கள் சார்ந்த துறையில் பெரிதான பாதிப்பு எதுவுமில்லை. மார்ச் மாதத்தில் காணப்பட்ட நாட்டின் 8.75 சதவீத வேலைவாய்ப்பின்மை விகிதம், ஏப்ரல் மாத ஊரடங்கில் 23.52 சதவீதமாக அதிகரித்தது. இது வரலாற்றில் இல்லாத அளவாக சொல்லப்பட்டது.

2020ம் ஆண்டின் ஏப்ரல் மாதத்தில் நகர்ப்புறங்களில் 24.95 சதவீதமும், கிராமப்புறங்களில் 22.89 சதவீதமும் வேலைவாய்ப்பின்மை காணப்பட்டது. பின்னர் மே மாதத்தில் நாட்டின் வேலைவாய்ப்பின்மை விகிதம் 21.73 சதவீதமாகவும், இதுவே ஜூன் மாதத்தின் முடிவில் 10.18 சதவீதமாகவும் இருந்தது.

பின்னர் படிப்படியாக குறைந்த இந்த விகிதம் ஜூலை முதல் நவம்பர் வரையிலான காலத்தில் 6-8 சதவீதம் என்ற அளவிற்குள் இருந்தது கவனிக்கத்தக்கது. பெரும்பாலான உற்பத்தி நிறுவனங்களில் தற்போது 50 சதவீதத்திற்கு மேற்பட்ட பணியாளர்கள் வர தொடங்கியது அடுத்தகட்ட வளர்ச்சிக்கு துணைபுரியும்.

அதே வேளையில், பொருளாதார மந்தநிலை இன்னும் ஓய்ந்தபாடில்லை. கொரோனா பெருந்தொற்றுக்கு பிறகான காலத்தில் உலகம் முழுவதும் சுமார் 15 கோடி பேர் ஏழ்மைக்கு தள்ளப்படுவர் என சுகாதார புள்ளிவிவரங்கள் தெரிவிக்கின்றன. இவற்றில் குறிப்பாக குறைந்த அளவிலான வருவாய் கொண்டிருப்போர் மற்றும் நீண்டகாலமாக குறைவான வருவாயை மட்டுமே கொண்டிருக்கும் நாடுகள் பாதிக்கப்படும் எனவும் சொல்லப்பட்டுள்ளது.

உள்நாட்டில் இளைஞர்களின் வேலைவாய்ப்பின்மை விகிதம் அதிகரித்து வருவது குறிப்பிடத்தக்கது. ஊரடங்கில் பெரும் பணக்காரர்களின் சொத்து மதிப்புகள் ஒருபுறம் உயர்ந்த நிலையிலும், வேலை இழந்தவர்களில் பெரும்பாலான நபர்கள், இன்னும் கொரோனாவுக்கு முந்தைய ஊதிய விகிதத்தை பெறவில்லை என கொள்கை ஆராய்ச்சிக்கான மையம்(CPR) கூறுகிறது.

நடப்பு மாதத்தில் டிசம்பர் 18ம் தேதி முடிவின் படி, நாட்டின் வேலைவாய்ப்பின்மை விகிதம் 8.3 சதவீதமாகவும், நகர்ப்புறங்களில் 8.6 சதவீதம் மற்றும் கிராமப்புறங்களில் 8.2 சதவீதமாகவும் உள்ளது. டிசம்பர் 1ம் தேதி 6.60 சதவீதமாக இருந்த விகிதம், 18ம் தேதி முடிவில் 8.34 சதவீதமாக அதிகரித்தது குறிப்பிடத்தக்கது.

வேளாண்மை சட்டத்திற்கு எதிராக நடந்து வரும் போராட்டத்தின் காரணமாக, நாளொன்றுக்கு 3500 கோடி ரூபாய் வரை பொருளாதார இழப்பு ஏற்பட உள்ளதாக அசோசம் வர்த்தக அமைப்பு(Assocham) தெரிவித்துள்ளது. வரும் நாட்களில் வேலைவாய்ப்பின்மை விகிதம் அதிகரிக்கும் நிலையில், பொருளாதார வளர்ச்சியில் மீண்டும் ஒரு பாதகத்தை ஏற்படுத்தலாம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் முதல் சர்வதேச ரியல் எஸ்டேட் முதலீட்டு நிதி திட்டம்

நாட்டின் முதல் சர்வதேச ரியல் எஸ்டேட் முதலீட்டு நிதி திட்டம் 

India’s First International REIT Fund – Kotak Mutual Fund

பொதுவாக பங்குச்சந்தைக்கும், ரியல் எஸ்டேட் என சொல்லப்படும் வீட்டுமனை துறைக்கும் உள்ள முக்கிய வேறுபாடு நீர்மை நிறை(Liquidity) தான். பங்குச்சந்தையை பொறுத்தவரை பணப்புழக்கம் எப்போதும் அதிகம். அதே வேளையில் நாம் செய்த முதலீட்டு தொகையிலிருந்து சிறிய அளவில் கூட பங்குகளை விற்று எளிதாக பணமாக்கலாம். ஆனால் ரியல் எஸ்டேட் துறையில் உள்ள ஒரே குறை, இந்த நீர்மை நிறை தான்.

மேலும் ரியல் எஸ்டேட் துறையில் நாம் பங்குகளை போல வாங்கிய நாளன்றோ அல்லது நமக்கு எப்போது பணம் தேவைப்படுகிறதோ அப்போது பங்குகளை விற்பது போல இங்கே செய்ய முடியாது. அதற்கான கட்டணங்களும் வீட்டுமனை துறையில் சற்று அதிகம். இந்த குறையை களைய ரியல் எஸ்டேட் இன்வெஸ்ட்மென்ட் டிரஸ்ட்(Real Estate Investment Trust) என்னும்  அமைப்பு கடந்த 2007ம் ஆண்டு செபியால் துவங்கப்பட்டது.

இதுவே அமெரிக்காவில் ஆரம்பிக்கப்பட்ட காலம் 1960ம் ஆண்டு. ரியல் எஸ்டேட் துறையில் உள்ள பெரு நிறுவனங்கள் பங்கேற்பதற்கும், சிறு முதலீட்டாளர்களும் தாங்கள் செய்த முதலீட்டை எளிதாக விற்பதற்கும், தொடர் வருமானத்தை ஏற்படுத்துவதற்கும் இந்த அமைப்பு உதவியது. இந்த துறையில் நுழையும் நிறுவனங்களுக்கும் சில வரம்புகள் நிர்ணயிக்கப்பட்டது.

குறைந்தபட்ச முதலீடாக 500 கோடி ரூபாயும், 80 சதவீத முதலீடு முழுவதுமாக முடிவடைந்த கட்டிடங்களிலும், 10 சதவீத தொகை மட்டுமே கட்டிட வேலை நடந்து கொண்டிருக்கும் மனையிலும்(Under construction) இருக்க வேண்டுமென்ற வரைமுறைகள் உண்டு. ஈட்டப்படும் வருவாய், முதலீட்டாளர்களுக்கு 90 சதவீதம் என்ற அளவில் ஈவுத்தொகையாக (Dividends) மட்டுமே அளிக்கப்பட வேண்டுமெனவும் அறிவுறுத்தப்பட்டுள்ளது.

இதன் காரணமாக பெரிய அளவிலான தொகையை முதலீடு செய்யாமல், ஒரு பெரு மனை சொத்தில் குறிப்பிட்ட தொகையை மட்டுமே முதலீடு செய்து விட்டு, கணிசமான வருவாயை எதிர்பார்க்கலாம். ஆறு மாதத்திற்கு ஒரு முறை மதிப்பீடுகள் செய்யப்படும் என்பதும் இதன் சிறப்பு.

ரியல் எஸ்டேட் முதலீட்டு நிதிக்கும்(REIT Funds), ரியல் எஸ்டேட் பரஸ்பர நிதி திட்டத்திற்கும்(Real Estate Funds) இடையே உள்ள வேறுபாடு, REIT முதலீட்டில் அதிகப்படியான ஈவுத்தொகை வருவாயை பெறலாம் என்பதே.

ரியல் எஸ்டேட் முதலீட்டு டிரஸ்டில் பங்கு பெறும் நிறுவனங்கள் அலுவலகங்கள், வணிக வளாகங்கள், மருத்துவமனைகள், ஹோட்டல்கள், சேமிக்கும் கிடங்குகள் போன்ற தொடர் வருவாய் அளிக்கும் சொத்துக்களை சொந்தமாக கொண்டிருக்கும் அல்லது நிதியளிக்கும் நிறுவனங்களாக இருக்கும். இது பங்குச்சந்தையில்  பட்டியலிடப்படுவது போன்று வெளிப்படைத்தன்மையுடன் பட்டியலிடப்படும். சிறு முதலீட்டாளர்கள் முதல் பெரு நிறுவனங்கள் வரை யாரும் முதலீடு செய்து தொடர் வருவாய் மற்றும் முதலீட்டு பெருக்கத்தை ஏற்படுத்தலாம். நடப்பில் வீட்டுமனை துறையில் காணப்படும் குறைகளை களைந்து, நேர்மையான முறையில் சிறிய முதலீடும் செய்வதற்கு இந்த முதலீட்டு டிரஸ்ட் உதவும்.

கடந்த ஆண்டு நாட்டின் முதல் REIT ஐ.பி.ஓ. வெளிவந்தது. முதன்மை சந்தையில் வெளிவந்த எம்பஸி ஆபிஸ் பார்க்ஸ் (Embassy Office Parks) நிறுவனம் வாடகை மற்றும் தொடர் வருவாய் அளிக்கும் வீட்டுமனை துறையில் முதலீடு செய்து வருகிறது. மேலும் தனக்கென பல ரியல் ஸ்டேட் சொத்துக்களை கையகப்படுத்தியுள்ளது.

சொல்லப்பட்ட நிறுவனம் உள்நாட்டு சந்தையில் இருந்து வரும் நிலையில், தற்போது கோடக்(Kotak) பரஸ்பர நிதி நிறுவனம் நாட்டின் முதல் சர்வதேச ரியல் எஸ்டேட் முதலீட்டு நிதித்திட்டத்தை அறிமுகப்படுத்தியுள்ளது. புதிய திட்டமாக வந்திருக்கும் சர்வதேச ரியல் எஸ்டேட் முதலீட்டு நிதி, திறந்த முடிவு திட்டமாக வந்துள்ளது(Open Ended fund – Fof).

நடப்பு டிசம்பர் 7 முதல் 21 வரை ஆரம்ப நிலை பதிவாக வரும் இத்திட்டம் பின்னர் பொதுவெளியில் பரஸ்பர நிதியின் கீழ் செயல்படும். இதன் முதலீட்டு சொத்து பங்களிப்பு சிங்கப்பூரில் 48.8 சதவீதமும், ஆஸ்திரேலியாவில் 33.7 சதவீதமும், ஹாங்காங் நாட்டில் 9 சதவீதமாகவும் உள்ளது. நியூஸிலாந்து மற்றும் தாய்லாந்து ஆகிய இரு நாடுகளிலும் ஒரு சதவீதத்திற்கு மேலாக முதலீடு செய்யப்படும். உள்நாட்டில் 0.9 சதவீதம் என்ற அளவில் மட்டுமே முதலீடு அமையும்.

SMAM(Sumitomo Mitsui DS Asset Management Company) ஆசிய ரியல் எஸ்டேட் முதலீட்டு திட்டத்தின் படி செயல்படும் இந்த திட்டம், ஆசிய-பசிபிக் பகுதியில் முதலீட்டு வாய்ப்பை ஏற்படுத்தி கொடுக்கிறது. ஆண்டுக்கு சராசரியாக 8 சதவீத வருவாயை அளிக்கும் இத்திட்டத்தின் முதலீடு டாலர்களில் கையாளப்படுவதால் வெளிநாடுகளில் காணப்படும் ரியல் எஸ்டேட் மூலம் கிடைக்கப்பெறும் வருவாய், உள்நாட்டு முதலீட்டாளருக்கு சாதகமாக அமையும்.

எனினும் இது போன்ற திட்டத்தை பற்றிய விழிப்புணர்வு தற்போது குறைவு என்பதால், இந்த துறை சிறப்பாக செயல்பட இன்னும் சில காலமாகும். வரி விதிப்புகளும் முதலீட்டாளர்களுக்கு சாதகமாக அமையவில்லை.

வாழ்க வளமுடன்,

நன்றி, வர்த்தக மதுரை 

www.varthagamadurai.com

நாட்டின் நவம்பர் மாத சில்லரை விலை பணவீக்கம் – 6.93 சதவீதம்

நாட்டின் நவம்பர் மாத சில்லரை விலை பணவீக்கம் – 6.93 சதவீதம் 

India’s Retail Inflation to 6.93 Percent in November 2020 – CPI

நடப்பு 2020-21ம் நிதியாண்டில் நாட்டின் பணவீக்க விகிதம் அதிகரித்து வந்துள்ளது. கடந்த மார்ச் மாதத்தில் 5.84 சதவீதமாக இருந்த நுகர்வோர் விலை பணவீக்கம் (CPI – Retail Inflation), அக்டோபர் மாதத்தில் அதிகபட்சமாக 7.61 சதவீதம் வரை சென்றது. சொல்லப்பட்ட அக்டோபர் மாத பணவீக்க விகிதம், கடந்த ஆறு ஆண்டுகளில் காணப்படாத அதிகபட்ச அளவாக சொல்லப்பட்டிருந்தது.

மத்திய ரிசர்வ் வங்கியின் பணவீக்க கொள்கையின் படி, சில்லரை விலை பணவீக்க இலக்கு 2-6 சதவீதமாக நிர்ணயிக்கப்பட்டுள்ளது. நவம்பர் மாத பணவீக்கம் வெளியிடப்பட்ட நிலையில், இது 6.93 சதவீதமாக சொல்லப்பட்டுள்ளது. தொடர்ச்சியாக எட்டு மாதங்களாக நாட்டின் பணவீக்கம், மத்திய வங்கியின் இலக்கினை விட அதிகரித்து வருவது குறிப்பிடத்தக்கது.

உணவுப்பொருட்கள், வீட்டுமனை, புகையிலை, காலணி மற்றும் துணிமணிகளின் விலை கணிசமாக அதிகரித்து வந்ததன் காரணமாக சில்லரை விலை பணவீக்கம் அதிகமாக உள்ளது. சில்லரை விலை பணவீக்கத்தில் 46 சதவீதம் உணவு மற்றும் குளிர்பானங்களின் பங்களிப்பும், பால் பொருட்கள் 6.61 சதவீதமும், தானிய வகைகள் 9.67 சதவீதமும், காய்கறிகள் 6 சதவீதமும் பங்களிப்பை கொண்டுள்ளது.

எண்ணெய் வகைகள் 3.56 சதவீதம், மாமிசம் மற்றும் மீன் 3.61 சதவீதம், போக்குவரத்து மற்றும் தொலைத்தொடர்பு பங்களிப்பு 8.6 சதவீதம், சுகாதாரம் 6 சதவீதமாகவும் உள்ளது. வீட்டுமனை 10 சதவீத பங்களிப்பை சில்லரை பணவீக்கத்தில் கொண்டுள்ளது.

ஒளி மற்றும் எரிபொருட்களின் பங்களிப்பு(Fuel and Light) 6.84 சதவீதமும், துணிமணி மற்றும் காலணிகள் 6.53 சதவீதத்தையும் உள்ளடக்கியுள்ளது. நாட்டின் மொத்த விலை பணவீக்கம்(WPI) நவம்பர் மாதத்தில் 1.55 சதவீதமாக உள்ளது. இது கடந்த ஒன்பது மாத உயர்வாக சொல்லப்பட்டுள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

இளமையில் ஓய்வு – நிச்சயமாக்கும் ஸ்மார்ட் பிளான்

இளமையில் ஓய்வு – நிச்சயமாக்கும் ஸ்மார்ட் பிளான்

Early Retirement – Smart Plan for Success

நவீன யுகத்தில், “Workaholic” என்ற வார்த்தை அடிக்கடி உச்சரிக்கப்பட்டாலும் வேலைப்பளு, வேலை திருப்தியின்மை என்பது ஒரு பக்கம் பரவலாக பார்க்கப்படுகிறது.

அது என்ன ‘ Workaholic ‘ ?

Workaholic என்பது வேலை செய்ய வேண்டிய கட்டாயம் (அ) எப்போதும் வேலை, வேலை என்றிருப்பது.

நம்மில் பெரும்பாலோர் விருப்பமில்லாமல் பணிச்சுமையை ஏற்பதற்கு காரணம் பொருளாதார தேவை தான். இது இன்றைய காலத்தின் அதிக சம்பளம் மற்றும் ஆடம்பரத்துக்கும் பொருந்தும்.  உணவு, உடை, இருப்பிடம் என்ற மூன்று அத்தியாவசிய தேவைகள் மறைந்து, இன்று விருப்பங்களை நிறைவேற்றும் நிலை மட்டும் தான் தலை தூக்கி உள்ளது. எனக்கு எது தேவை என்பதை விட, எனக்கு இது வேண்டும் என்ற கொள்கை இன்று வளர்கிறது. நாகரீக மாற்றத்தில் இதுவும் அடங்கும் தானே.

“ கால் காசுனாலும் கவர்ன்மென்ட் வேலை “ என்பதெல்லாம் இன்று பொய்யாகி விட்டது.இன்றையளவில் எல்லா வேலைகளிலும் பணி நிரந்தரம், பணி பாதுகாப்பு என்ற விஷயம் இல்லாமையால், சம்பள அதிகரிப்பை மட்டுமே பெரும்பாலோர் எதிர்பார்க்கின்றனர். ஒரு புறம் நிறுவனங்களுக்கு வேலைக்கு  ஆட்கள் கிடைக்கவில்லை, மறுபுறம் படித்தவர்களுக்கு வேலை கிடைக்கவில்லை என்ற போதும், தாங்கள் பணிபுரியும் துறையில் நாட்டமின்மை, பணிச்சுமையாக கருதுதல் என்பது வாடிக்கையாகி விட்டது. முன்னொரு காலத்தில் ஒரே துறை அல்லது ஒரே  நிறுவனத்தில் 30 அல்லது 40 வருடங்கள் பணிபுரிந்த அனுபவங்கள் இன்று பார்க்க முடிவதில்லை. இன்னும் சொல்ல போனால், இன்றைய தலைமை அதிகாரிகளும் நீண்ட காலம் ஒரு நிறுவனத்தில் நீடிப்பதில்லை. இதற்கு பொதுவான காரணமாக சொல்லப்படுவது, நாம் நமக்கு பிடித்த  துறையை அல்லது கல்வியை தேர்ந்தெடுக்காதது  தான்; பணியில்  சுமை என்று  நாம் பொத்தாம் பொதுவாக சொல்லி விட முடியாது. தினக்கூலியிலிருந்து, டாட்டா (Tata) வரை எல்லாருக்கும் பணிச்சுமை உள்ளது. அந்த பணிச்சுமை தான் சிலரை மாபெரும் மனிதர்களாக மாற்றியுள்ளது. ஆனால் நவீன யுகம் மீண்டும் தன் நிலைக்கு திரும்புகிறது. இன்றைய தலைமுறையில் பணிச்சுமை என்பதை விட, வேறு ஒரு வார்த்தை புதுமையாக்கப்பட்டுள்ளது – “ இளமையில் ஓய்வு(Early Retirement) ”

இளமையில் ஓய்வு:

“ அப்போதெல்லாம் நாங்க 60 வயது வரை உழைத்து ஓய்வு பெற்றோம் “ என்ற வாசகத்தை இனி நாம் கேட்க போவதில்லை. இன்று இளமையில் ஓய்வு என்ற வார்த்தை தான் போக்காக (Trending) உள்ளது.  இளமையில் ஓய்வு பெறுவதை இருவகையாக பிரித்து பார்க்கலாம்,

  • இருக்கும் பணியிலிருந்து இளமையில் ஓய்வு பெற்று புதிதாக தொழில் தொடங்குவது / தொழில்முனைவோராக விரும்புவது. (Become an Entrepreneur )
  • இனி எந்த வேலையிலும், தொழிலிலும் ஈடுபட போவதில்லை; வாழ்க்கையை விருப்பம் போல கழிக்க வேண்டும் என விரும்புவது. (Live as Life, Live as like ).
Become an Entrepreneur:

இருக்கும் பணியிலிருந்து  இளமையில் ஓய்வு பெற்று அல்லது தன்னை விடுவித்து கொண்டு தொழில் முனைவோராக களமிறங்குவது இன்று நம்மில் பெரும்பாலோருக்கு உண்டு. உண்மையில் இது ஒரு நல்ல விஷயம் தான். “ நல்ல தொழில் செய்ய வேண்டும், நாலு பேருக்கு வேலை தர வேண்டும் “ என்பது ஒரு லட்சிய நோக்கமே. பணம் சம்பாதிக்க தான் தொழில் தொடங்கினாலும், மறைமுகமாக நாம் வேலைவாய்ப்புகளை உருவாக்கலாம். ஆனால் தொழில்முனைவோராக சிறக்க சரியான திட்டமிடல் மற்றும் செயலாற்றல் அவசியம். வெறும் புதுமையான யோசனைகளை மட்டும் வைத்து கொண்டு வெற்றி பெற்று விட முடியாது.

Live as Life, Live as like:

“ இனி மேல் நான் எந்த வேலைக்கும் செல்வதை விரும்பவில்லை; தொழில் செய்யவும் இல்லை. எனக்கு பிடித்த வாழ்க்கையை வாழ போகிறேன். வாழ்க்கை அர்த்தமுள்ளதாக வேண்டும், இயற்கையை ரசிக்க வேண்டும்” – இதுவும் இங்கு நடக்கும். சில சமயங்களில் பலருக்கு இந்த நிலை பயன்படாமல் போனாலும், சிலருக்கு அர்த்தமுள்ளதாகி விடும். இருக்கும் வாழ்க்கையை பிடித்தவாறு உணர வேண்டும், பிறரை நேசிக்க வேண்டும் என்பதில் தவறேதும் இல்லை. அப்படியே வாழலாம். இன்று நாம் பார்க்கும் புதுமையான தொண்டுகளும், புவி சார்ந்த நிகழ்வுகளும் அப்படி தான் அமைந்தன.

‘ அப்புறம் என்ன பிரச்சனை என்கிறீர்களா  ? ‘

இனிமேல் தானே விஷயம் இருக்கு. இருக்கும் வேலையை விட்டு விட்டு நீங்கள் தொழில்முனைவோரானாலும் சரி, வாழ்க்கையை அர்த்தமுள்ளதாக உருவாக்கினாலும் சரி – வேலையை கடந்தவுடன் தான் நமது வாழ்க்கை ஆரம்பமாகிறது என்பதை மறக்க வேண்டாம். இளமையில் ஓய்வு பெறுவதற்கு ஒரு மன தைரியம் வேண்டும். இளமை கால ஓய்வு என்பது நாம் இனி வாழ போகும் காலம் நன்மை செய்வதாக இருக்க வேண்டும். அக்கரைக்கு இக்கரை பச்சையாகி விட கூடாது. அதனால் நமது இளமை கால ஓய்வுக்கான நிதித்திட்டமிடல்(Financial Planning) அவசியம்.

உதாரணத்திற்கு, நாம் 40 வயதில் ஓய்வு பெற விரும்பினால் நாம் அடுத்து எத்தனை வயது அல்லது காலம் வரை இருக்க போகிறோம் என்பது முக்கியம். 70 வயது வரை நம்மால் வாழ முடியும் என்ற எண்ணம் (கணிப்பு தான்) இருந்தால், ( 70-40 = 30 ) 30 வருடத்திற்கான  செலவுகளை (அடிப்படை தேவை, மருத்துவம், போக்குவரத்து ) எவ்வாறு  கையாள போகிறோம் என்பது நிபந்தனை. வேலையை துறந்து பின் செயலாற்றல் மிகவும் கடினம். நம்மால் தொழிலில் சிறந்து விளங்க எவ்வளவு காலமாகும், நமது குடும்பத்திற்கான அத்தியாவசிய செலவுகள் என்பவை எல்லாம் கணக்கிடப்பட வேண்டும். இதற்கான தகவல்கள்  நிதி சார்ந்த, காப்பீடு  சம்மந்தமான இணையதளத்தில் Retirement Planning, Retirement Calculator என்ற வசதி உள்ளது. அவற்றை பயன்படுத்தி நமக்கு தேவையான கார்பஸ் தொகையை தயார் செய்து கொள்ளலாம் அல்லது  சொத்துக்களை கையாள வேண்டும். பணவீக்கத்தையும் கவனத்தில் கொள்வது அவசியம்.

பொதுவாக, இந்த Retirement Calculator சரியாக சொன்னாலும், நாம் சற்று கூடுதலான பாதுகாப்பை ஏற்படுத்துவது நலம். ஏனென்றால் நாம் இளமையில் சம்பாதிப்பதை விட, வயதான காலத்தில் சம்பாதிக்கும் வாய்ப்பு குறைவு. அதாவது நாம் பேருந்தில் பயணம் செய்யும் போது, பயணக்கட்டணத்தை விட சற்று கூடுதலான தொகையை வைத்திருப்போமே, அது போன்று கூடுதலாக கார்பஸ் தொகையை ஏற்படுத்த வேண்டும்.

General Retirement Planning:

இந்த முறையில், நமக்கு தேவைப்படும் காரணிகள் – நமது தற்போதைய வயது, ஓய்வு பெறப்போகும் வயது, தற்போதைய ஆண்டு வருமானம், மாத செலவுகள், தற்போதைய  முதலீடு மற்றும் சேமிப்பு இருப்பு, எதிர்காலத்தில் அதற்கு எதிர்பார்க்கும் வருமானம், பணவீக்கம் ஆகியவற்றை நாம் குறித்து வைத்து கொண்டு, நமது இளமை கால நிதித்திட்டமிடலை துவக்கலாம்.

( Current Age, Retirement Age, Annual Income, Monthly Expenses, Current Savings and Investing, Expected Return on Investment(ROI), Inflation )

Early Retirement Formula (ERF):

டக் மஸ்ஸி (Doug Massey) என்ற ஆசிரியர் ஓய்வு கால திட்டத்திற்கான விதியை உருவாக்கியுள்ளார். இவர் தனது 41வது வயதில் மற்றவர்களுக்காக வேலை செய்வதிலிருந்தும், தொழில் மற்றும் முதலீட்டில் இருந்தும் தன்னை முழுமையாக விடுவித்து (ஓய்வு) கொண்டார்.

ERF =  Your Age X  Networth / Yearly Expenses

Maintain the ERF value is > 1000

உதாரணத்திற்கு, உங்களுடைய வயது 30 மற்றும் உங்களிடம் இருக்கும் சொத்து (மனை, வீடு, முதலீடு, சேமிப்பு, பணம் கையிருப்பு) ரூ. 2,00,00,000 /- (2 கோடி) மற்றும் ஆண்டு செலவு- ரூ. 6,00,000 /- எனில்,

[ 30 X 2 Crores / 6 lakhs ] = 1000

– ஓய்வு எண் 1000 க்கு குறையாமல் இருப்பது நல்லது.

இதை போல, நீங்களும் உங்களுடைய இளமை கால ஓய்வு எண்ணை கணக்கிடலாம். அவர் இந்த விதியில் பரிந்துரைப்பது கூடுதலான தொகையை சேர்க்க வேண்டும் என்பது தான்.

இளமையில் ஓய்வு பெறுவதும் ஒரு சாமர்த்தியமான இலக்கு தான்; இலக்கை சரியாக திட்டமிடுங்கள், அதிகப்படியான தொகையை எதிர்காலத்திற்காக இன்றே முதலீடு செய்யுங்கள்.

இளமையில் வெல்லுங்கள் !

வாழ்க வளமுடன், 

நன்றி, வர்த்தக மதுரை 

www.varthagamadurai.com

ஒரு கோடி ரூபாய்க்கு தனிநபர் விபத்து காப்பீடு – வரைவு விதிமுறை வெளியீடு

ஒரு கோடி ரூபாய்க்கு தனிநபர் விபத்து காப்பீடு – வரைவு விதிமுறை வெளியீடு 

Rs.1 Crore Personal Accident Policy – Draft Norms – IRDAI

மத்திய அரசால் கடந்த 2015ம் ஆண்டு பட்ஜெட் தாக்கலில் அறிவிக்கப்பட்ட திட்டம் தான் பிரதம மந்திரி பாதுகாப்பு காப்பீட்டு திட்டமாகும்(Pradhan Mantri Suraksha Bima Yojana). இது ஒரு விபத்து காப்பீட்டு திட்டம், அனைவரும் பயன்பெறும் வகையில் 2 லட்ச ரூபாய் என்ற பாதுகாப்பு தொகையை குறைந்த பிரீமியத்தில் பெறலாம்.

அனைத்து வங்கிகளிலும் கிடைக்கப்பெறும் இத்திட்டத்தில் 18 வயது முதல் 70 வயது வரை உள்ள தனிநபர் ஒருவர், ஆண்டுக்கு 12 ரூபாய் மட்டுமே செலுத்தி ரூ. 2 லட்சம் காப்பீட்டை பெறலாம். வாகன காப்பீட்டுடன் தனிநபர் விபத்து காப்பீடு சேர்ந்து வந்தாலும், முழுமையான தனிநபர் விபத்து காப்பீடு(Standalone Policy) என்பது அதனை தனி பிரிவாக எடுத்து கொண்டால் நமக்கு முழு பலனை அளிக்கும்.

விபத்து காப்பீட்டை பொறுத்தவரை மருத்துவ காப்பீட்டை அளிக்கும் நிறுவனங்களும் அதற்கான தனிநபர் பாலிசிகளை அளித்து வருகிறது. வெறுமென விபத்தினால் ஏற்படும் இறப்பு மட்டுமில்லாமல், நிரந்தர மற்றும் பகுதி சார்ந்த இயலாமை(Permanent and Partial Disability) இருக்கும் நிலையில் அதற்கான மருத்துவ செலவு மற்றும் முழு காப்பீடு தொகையும் வழங்கப்படுகிறது.

காப்பீட்டு ஒழுங்குமுறை ஆணையமான ஐ.ஆர்.டி.ஏ.(IRDAI) தற்போது விபத்து காப்பீடு சார்ந்த புதிய வரைவு விதிமுறைகளை வெளியிட்டுள்ளது. தனிநபர் விபத்து காப்பீட்டுக்கான தொகையில் குறைந்தபட்சமாக ரூ.2.5 லட்சம் முதல் அதிகபட்சமாக ஒரு கோடி ரூபாய் வரை வரைவை அறிவித்துள்ளது.

இந்த வரைவுமுறை வரும் ஏப்ரல் 1, 2021 முதல் புதிய விபத்து காப்பீட்டு திட்டமாக வெளிவர உள்ளது. திட்டத்தில் 18 வயது முதல் 70 வயது வரை உள்ள தனிநபர் இணையலாம் எனவும், விபத்தினால் மருத்துவமனையில் அனுமதிக்கப்பட்டவர் காப்பீட்டு தொகையில் குறிப்பிட்ட தொகையை ரொக்கமாக பெறலாம் என்ற கூடுதல் அம்சங்களையும் கூறியுள்ளது.

எனினும் குறைந்தபட்ச பிரீமிய தொகை எவ்வளவு என்பதனை ஐ.ஆர்.டி.ஏ. சொல்லவில்லை. இதன் காரணமாக காப்பீட்டு நிறுவனங்களே பிரீமிய தொகையை நிர்ணயிக்கலாம் என தெரிகிறது. காப்பீட்டுக்கான பிரீமிய தொகையை  மாதாமாதம் அல்லது காலாண்டுக்கு ஒரு முறை, அரையாண்டு, இல்லையெனில் ஆண்டுக்கு ஒரு முறை செலுத்தலாம் என கூறப்பட்டுள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

கல்யாணி குழுமம் – பங்குச்சந்தை அலசல்

கல்யாணி குழுமம் – பங்குச்சந்தை அலசல் 

Kalyani Group – Conglomerate – Fundamental Analysis

கல்யாணி குழுமம் கடந்த 1960ம் ஆண்டு துவங்கப்பட்டது. தொழிலதிபர் திரு. நீல்காந்த் ராவ் கல்யாணி அவர்களின் புதல்வன் பாபா கல்யாணி(Babasaheb Kalyani) இந்த குழுமத்தின் தலைவராக உள்ளார். இந்திய பன்னாட்டு நிறுவனமாக விளங்கும் கல்யாணி குழுமம் தனது தொழிலை பொறியியல், எஃகு, புதுப்பிக்கத்தக்க எரிசக்தி, நகர்ப்புற உள்கட்டமைப்பு, மேம்பட்ட தொழில்நுட்பம் மற்றும் சிறப்பு ரசாயனம் என பரவலாக்கியுள்ளது. வாகனத்துறை மற்றும் ராணுவத்திற்கு தேவையான கூறுகளை உற்பத்தி செய்யும் பிரபல நிறுவனமான பாரத் போர்ஜ்(Bharat Forge), கல்யாணி குழுமத்தின் ஒரு அங்கம் தான்.

பில்லியன் டாலர்களில் வருவாயினை கொண்டிருக்கும் இந்த குழுமம் 10,000க்கும் மேற்பட்ட பணியாளர்களையும், பல வளர்ந்த நாடுகளில் தனது கிளைகளையும் அமைத்துள்ளது. உலக தொழில் சந்தையில் தலைமை வகிக்கும் பல நிறுவனங்களுடன் கூட்டு ஒப்பந்தத்தின் அடிப்படையிலும் கல்யாணி குழும நிறுவனங்கள் செயல்பட்டு வருகிறது.

உலகின் மிகப்பெரிய போர்ஜிங்(Forging) நிறுவனம், போர்ஜிங் துறையில் நாட்டின் மிகப்பெரிய ஏற்றுமதி நிறுவனமாகவும், முன்னணி பொறியியல் எஃகு உற்பத்தியாளராகவும் இதன் குழும நிறுவனங்கள் உள்ளன. குழுமத்தின் முக்கிய நிறுவனங்களாக பாரத் போர்ஜ், கல்யாணி டெக்னோ போர்ஜ், கல்யாணி ஸ்டீல், கல்யாணி தெர்மல், கல்யாணி டெக்னாலஜிஸ், சி.டி.பி.(CDP) பாரத் போர்ஜ், கல்யாணி பிரேக்ஸ், கல்யாணி ஷார்ப் என இதன் பட்டியல் நீண்டு கொண்டே செல்கிறது.

பிரபல ஐ-லீக்(I-League) கால்பந்தாட்டத்தின் பாரத் எப்.சி.(Bharat FC) அணி, கல்யாணி குழுமத்தின் ஒரு அங்கமாகும். இந்திய பங்குச்சந்தையில் கல்யாணி குழுமத்தின் நிறுவனங்கள் பட்டியலிடப்பட்டுள்ளது கவனிக்கத்தக்கது. பாரத் போர்ஜ் நிறுவனத்தின் சந்தை மதிப்பு 25,000 கோடி ரூபாய். 50 வருடங்களுக்கு மேலான தொழில் அனுபவத்தை கொண்டிருக்கும் பாரத் போர்ஜ் வார்ப்புகள் மற்றும் போர்ஜிங்(Castings & Forging) பிரிவில் உள்ளது.

உயர்தர கார்பன் மற்றும் அலாய் ஸ்டீல் போர்ஜ், இயந்திர கூறுகளை உற்பத்தி செய்யும் பிரிவில் கல்யாணி டெக்னோபோர்ஜ் நிறுவனம் உள்ளது. ஆயிரம் கோடி ரூபாய் சந்தை மதிப்பை கொண்ட கல்யாணி ஸ்டீல்(Kalyani Steels) நிறுவனம் இரும்பு மற்றும் எஃகு தயாரிப்புகளின் உற்பத்தி மற்றும் விற்பனை வணிகத்தில் ஈடுபட்டு வருகிறது. கடனில்லா நிறுவனமாக காணப்படும் இந்த நிறுவனத்தில் பாரத் போர்ஜ் முதலீட்டு நிறுவனம் 39 சதவீத பங்குகளை வைத்துள்ளது. பொதுவாக ஸ்டீல் துறை உலகளாவிய காரணிகளால் பெரிதும் பாதிக்கப்படும் துறையாக காணப்படுகிறது.

கல்யாணி ஸ்டீல் நிறுவனத்தின் முக்கிய வாடிக்கையாளர்களாக டாட்டா, மஹிந்திரா, வால்வோ, மாருதி சுசூகி, நிசான், பெல்(BHEL), போர்ஸ் மோட்டார்ஸ், போர்டு, ஹூண்டாய், மெரிட்டார், ஐஷர் போன்ற நிறுவனங்கள் உள்ளன.

இருப்பினும், துறை சார்ந்த போட்டிகளை தன்னகத்தே கொண்டு கல்யாணி ஸ்டீல் நிறுவனம் இயங்கி வருகிறது. நிறுவனத்தின் கையிருப்பு 996 கோடி ரூபாயாக உள்ளது குறிப்பிடத்தக்கது. 605 கோடி ரூபாய் சந்தை மதிப்புடைய கல்யாணி இன்வெஸ்ட்மென்ட்(Kalyani Investment) நிறுவனம், குழும நிறுவனங்களுக்கு தேவையான முதலீட்டை அளிக்க தொழில் செய்து வருகிறது. கடனில்லா நிறுவனமாக உள்ள இந்த நிறுவனத்தின் விற்பனை மற்றும் லாப வளர்ச்சி கடந்த ஐந்து வருட காலத்தில் 20 சதவீதமாக உள்ளது. கல்யாணி  குழுமத்தில் உள்ள நிறுவனங்களை பின்னொரு பதிவில் ஆழமாக அலசலாம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

இந்தியாவின் பணக்கார பெண்களில் முதலிடம் – ரோஷ்ணி – எச்.சி.எல்

இந்தியாவின் பணக்கார பெண்களில் முதலிடம் – ரோஷ்ணி – எச்.சி.எல்.

Top Rich woman in India – Roshni Nadar of HCL Technologies

தொழில்முனைவோர்களில் பெண்களின் பங்களிப்பு முக்கியத்துவமானது. வளரும் மற்றும் வளர்ந்த நாடுகளில் நாகரீக மாற்றங்கள் ஏற்பட்டு விட்டாலும், தொழில்முனைவில் பெண்கள் ஈடுபடுவது என்பது இன்றும் சவாலான விஷயமாக தான் இருந்து வருகிறது. அப்படியிருக்கும் நிலையில் பெண் தொழில்முனைவோர் ஒருவர் உயர்மட்ட அளவில் நிர்வகிப்பதும், போட்டி சூழலில் சாதிப்பதும் அந்த சமூகத்திற்கு சாதகமான அம்சமாக அமையும்.

இன்று நம் நாட்டில் தொழில்முனைவோர்களாக சாதிப்பதில் பெரும்பாலும் திருமணமான பெண்களே உள்ளனர். படித்து முடித்தவுடன் தொழில்முனைவில் ஈடுபடும் பெண்மணிகளின் விகிதம் அதிகமாகும் போது, அது தனிநபர் வளர்ச்சி மட்டுமில்லாமல் வரக்கூடிய சந்ததிகளின் வளர்ச்சியை பிரதிபலிக்க கூடும்.

நம்மூரில் சேமிப்பு மற்றும் பண நிர்வாகத்தில் இன்றும் வீட்டு பெண்களின் பங்களிப்பு அளப்பரியது. சிட் பண்டு, அஞ்சலக சிறு சேமிப்பு முதல் வீட்டிலிருந்தே தொழில்முனைவை ஏற்படுத்துவது வரை அவர்களது நிதி சார்ந்த பண்பு மேம்பட்டு காணப்படுகிறது.

கோடக் வெல்த்(Kotak Wealth) மற்றும் கரூன் இந்தியா(Hurun India) நிறுவனம் இணைந்து நடத்தும் நாட்டின் பணக்கார பெண்மணிகளின் பட்டியல் நேற்று(03-12-2020) வெளியிடப்பட்டது. இந்த பட்டியல் தனிநபர் ஒருவரின் நிகர சொத்து மதிப்பு அடிப்படையில் கணக்கிடப்பட்டுள்ளது. இதற்காக சில நெறிமுறைகளையும் இந்த நிகழ்வு கொண்டுள்ளது. அதாவது இந்த பட்டியலில் இடம் பெறுவோர் ஒரு நிறுவனத்தின் முழுநேர இயக்குனர் அல்லது நிர்வாக இயக்குனராக இருக்க வேண்டும், அவர் ஊதியம் பெறும் நபராக இருக்க வேண்டும், நிர்வாகத்தின் முக்கிய பதவிகளை வகிப்பவராக இருத்தல் வேண்டும் என சில கட்டுப்பாடுகளை கொண்டுள்ளது.

பட்டியலில் அடையாளம் காணப்பட்ட பெண்கள் கல்வி மற்றும் சுகாதார பராமரிப்புக்காக தங்களது பங்களிப்பை எவ்வாறு அளிக்கின்றனர் என்பதனையும் இந்த தரவு தெரிவிக்கிறது. சொல்லப்பட்ட பணக்கார பெண்மணிகளின் பட்டியலில் முதலிடம் பிடித்தவர் எச்.சி.எல். தொழில்நுட்ப நிறுவனத்தை(HCL Technologies) சேர்ந்த ரோஷ்ணி ஆவார். இவர் தற்போது நிறுவனத்தின் தலைவராக உள்ளார். எச்.சி.எல். நிறுவனத்தை துவங்கிய சிவ நாடாரின்(Shiv Nadar) புதல்வி தான் ரோஷ்ணி.

10 பில்லியன் டாலர் வருவாயை கொண்டிருக்கும் எச்.சி.எல். நிறுவனம் நாட்டின் மிகப்பெரிய தொழில்நுட்ப நிறுவனமாகவும், இதன் கிளைகள் 40க்கும் மேற்பட்ட நாடுகளில் தனது சேவையை கொண்டிருக்கிறது. ரோஷ்ணி அவர்களின் செல்வ மதிப்பு ரூ.54,850 கோடி. இரண்டாம் இடத்தில் பயோகான்(Biocon) நிறுவனத்தின் தலைவரான பிரபல கிரண் மசும்தார் உள்ளார். இவரது செல்வ மதிப்பு 36,600 கோடி ரூபாயாக சொல்லப்பட்டுள்ளது.

மூன்றாவதாக மருந்து துறையில் உள்ள யு.எஸ்.வி.(USV) நிறுவனத்தின் தலைமை பதவியில் உள்ள லீனா காந்தி உள்ளார். இவரது செல்வ மதிப்பு ரூ.21,340 கோடி. நான்காம் இடத்தில் டிவிஸ் லேப் நிறுவனத்தின் நீலிமா அவர்களும், ஐந்தாம் இடத்தில் மீண்டும் தமிழகத்தை சேர்ந்த பெண்மணி, ராதா வேம்பு (Zoho) அவர்களும் உள்ளனர். சொல்லப்பட்ட செல்வத்தின் மதிப்பு செப்டம்பர் 2020 காலாண்டுடன் முடிவடையும் நிலையில் கணக்கிடப்பட்டுள்ளது.

நூறு பேர் கொண்ட பணக்கார பெண்மணிகளின் பட்டியலில் 19 பெண்கள் நாற்பது வயதுக்கு குறைவானவர்கள், நகரங்கள் அடிப்படையில் மும்பை 32 பெண் பணக்காரர்களையும், டெல்லி 20 நபர்களையும், ஹைதராபாத் 10 நபர்களையும் உள்ளடக்கியுள்ளது. 15 சதவீத பெண்மணிகள் மெட்ரோ அல்லாத நகரங்களிலிருந்து வந்தவர்கள்.

39 வயதாகும் திருமதி. ரோஷ்ணி, சந்தையில் பட்டியலிடப்பட்ட தொழில்நுட்ப நிறுவனத்தின் முதல் பெண் தலைவர் என்ற சாதனையையும் கொண்டுள்ளார். உலகின் மிகவும் சக்தி வாய்ந்த 100 பெண்களில் 54வது இடத்தை பிடித்துள்ளார் ரோஷ்ணி (போர்ப்ஸ் பட்டியல்). இவரது கணவர் ஷிகர் மல்ஹோத்ரா, எச்.சி.எல். சுகாதார பிரிவில் துணை தலைவராக உள்ளார். ரோஷ்ணிக்கு இரு புதல்வர்கள் உள்ளனர்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

ஜூன் மாத பரஸ்பர நிதி(Mutual Funds) முதலீடு வரத்து குறைவு – AMFI

ஜூன் மாத பரஸ்பர நிதி(Mutual Funds) முதலீடு வரத்து குறைவு – AMFI

Mutual Funds Investment declined in the month of June 2020

மார்ச் மாத வீழ்ச்சிக்கு பின்பு, இந்திய பங்குச்சந்தை விறு விறுவென ஏற்றம் பெற்று வருகிறது. பெரும்பாலான பங்குகள் மார்ச் கடைசி வாரம் அதலபாதாளத்திற்கு சென்ற நிலையில், தற்போது விலையேற்றத்தில் சுமார் 30-80 சதவீதத்திற்கு மேல் சென்றுள்ளன.

பொருளாதாரம் மந்தமாக உள்ள நிலையில், பங்குச்சந்தை குறியீடுகள் எதிர்பாராத விதமாக ஏற்றமடைந்துள்ளன. பொதுவாக இது போன்ற நிகழ்வு பங்குச்சந்தையில் இயல்பான ஒன்று தான். பின்னொரு நாளில் வேறொரு காரணத்திற்காக இறங்குவதும் நடக்கும். அதே வேளையில் நீண்டகாலத்தில் முதலீடு செய்து பொறுமையாக இருக்கும் முதலீட்டாளர்களுக்கு பங்குச்சந்தை பெரும் செல்வத்தை அளிக்கும் வாய்ப்பாக அமையும்.

இந்திய பரஸ்பர நிதி துறையில் 45க்கும் மேற்பட்ட நிறுவனங்கள்(Asset Management Companies) முதலீட்டு சேவையை செய்து வருகின்றன. செபி கட்டுப்பாட்டின் கீழ் இயங்கும் பரஸ்பர நிதி துறையை ஆம்பய்(AMFI) அமைப்பு ஒருங்கிணைத்து வருகிறது. பரஸ்பர நிதி முதலீடுகள் சார்ந்த தகவல்களை ஆம்பய் அமைப்பு ஒவ்வொரு மாதமும் வெளியிட்டு வருகிறது.

கடந்த ஜூன் மாத முடிவின் படி, இந்திய பரஸ்பர நிதி துறையின் சொத்து மதிப்பு(AUM) 25.5 லட்சம் கோடி ரூபாயாகும். ஜூன் மாதத்தில் பரஸ்பர முதலீடுகள் 95 சதவீதம் குறைந்துள்ளதாக இந்த அமைப்பு கூறியுள்ளது. கடந்த மாதம் மூன்று புதிய திட்டங்கள் அறிமுகப்படுத்தப்பட்டுள்ளது. புதிய திட்டத்தின் மூலம் பெறப்பட்ட முதலீடு ரூ.195 கோடி. பங்கு சார்ந்த பரஸ்பர நிதி திட்டங்களில் பெறப்பட்ட முதலீடு ரூ. 240 கோடி என சொல்லப்பட்டுள்ளது. இது கடந்த மே மாதத்துடன் ஒப்பிடும் போது 95 சதவீத குறைவாகும்.

ரிஸ்க் குறைந்த லிக்விட் பண்டுகளில்(Liquid Funds) இருந்து பெரும்பாலான முதலீடுகள் கடந்த மாதத்தில் வெளியேறியுள்ளது. இதன் மதிப்பு சுமார் 44,220 கோடி ரூபாய். கடன் பத்திரம் மற்றும் வருவாய் சார்ந்த பண்டுகளில் ஈர்க்கப்பட்ட ஜூன் மாத முதலீடு ரூ. 2,862 கோடி. கலவை திட்டம் என அழைக்கப்படும் ஹைபிரிட்(Hybrid) திட்டத்தில் 356 கோடி ரூபாய் முதலீடாக பெறப்பட்டுள்ளது.

ஓய்வு கால நிதி மற்றும் குழுந்தைகளுக்கான திட்டங்களில் பெறப்பட்ட தொகை ரூ. 108 கோடி ஆகும். வரி சலுகை சார்ந்த திட்டங்கள் வாயிலாக கடந்த மாதத்தில் முதலீடுகள்  ஈர்க்கப்படவில்லை. இந்த திட்டத்திலிருந்து 15 கோடி ரூபாய் வெளியேறியுள்ளது. தங்கம் சார்ந்த ஈ.டி.எப்.(Gold ETF) திட்டத்தின் மூலம் 494 கோடி ரூபாய் பெறப்பட்டுள்ளது.

ஜூன் மாதத்தை பொறுத்தவரை கடன் பத்திரங்கள் மற்றும் பங்குகள் இரண்டிலும் முதலீட்டு வரத்து குறைந்துள்ளது. இதற்கு காரணமாக சொல்லப்படுவது வேலையிழப்பு, குறைவான நாட்களுக்கு மட்டுமே பெறப்பட்ட ஊதியம், மந்தநிலையை காரணம் காட்டி முதலீடு செய்யாமல் இருந்ததாகும். மேலும் பங்குச்சந்தை மார்ச் மாதத்தை ஒப்பிடுகையில் உச்சத்தில் இருப்பதால், பெரும்பாலான முதலீட்டாளர்கள் லாபத்தை வெளியே எடுத்துள்ளனர்.

சந்தை இறக்கத்தில் அதிகமாக பெறப்பட்ட முதலீடு, தற்போது எச்சரிக்கை உணர்வாக பெருமளவில் முதலீடு செய்யப்படவில்லை எனலாம். நிதி இலக்குகளை கொண்டிருப்பவர்கள் தொடர்ச்சியாக முதலீடு செய்யும் பட்சத்தில், நீண்டகால வருவாய் வளர்ச்சியை பெறலாம். சந்தை ஏற்ற-இறக்கத்தை கணிப்பதை விட, நிதி இலக்குகளுக்கு தேவையான தொகையை திரட்டுவது அவசியமாகும்.

வாழ்க  வளமுடன்,

நன்றி, வர்த்தக மதுரை 

www.varthagamadurai.com

குறைந்தபட்ச முதலீடு ரூ. 100 மற்றும் இலவச காப்பீடு – பரவலாகும் பரஸ்பர நிதித்திட்டங்கள்

குறைந்தபட்ச முதலீடு ரூ. 100 மற்றும் இலவச காப்பீடு – பரவலாகும் பரஸ்பர நிதித்திட்டங்கள்

Minimum Investment amount of 100 rupees and Free Term Insurance – Mutual Funds Schemes

இந்தியாவில் மியூச்சுவல் பண்ட் என்று சொல்லப்படும் பரஸ்பர நிதி துறை(Mutual Fund Industry) 1963ம் ஆண்டு தொடங்கப்பட்டது. பரஸ்பர நிதி திட்டங்களுக்கான சட்டம் நாடாளுமன்றத்தில் உருவாக்கப்பட்டு பாரத ரிசர்வ் வங்கியின் ஒழுங்குமுறை மற்றும் நிர்வாக கட்டுப்பாட்டின் கீழ் செயல்பட்டு வந்தது.

1987-1993 ம் வருட காலங்களில் அரசு சார்ந்த நிறுவனங்கள் மட்டுமே மியூச்சுவல் பண்ட் திட்டங்களை வழங்கி வந்த நிலையில், பின்னர் தனியார் துறை நிறுவனங்களும் பரஸ்பர நிதி துறையில் நுழைந்தன. அரசு சார்பில் துவங்கப்பட்ட பரஸ்பர நிதிகளில் முதன்முறையாக பொதுத்துறை வங்கிகளும், எல்.ஐ.சி. நிறுவனமும்(LIC India) திட்டங்களை கொண்டு வந்து செயல்படுத்தின. 1992ம் ஆண்டு பரஸ்பர நிதிக்கான ஒழுங்குமுறை செபியிடம்(SEBI) வந்த பிறகு, முதல் தனியார் மியூச்சுவல் பண்ட் நிறுவனமாக கோத்தாரி பயோனியர்(Kothari Pioneer) நிறுவனம் ஆரம்பிக்கப்பட்டது. பின்னர் இந்நிறுவனம் பிராங்கிளின் டெம்பிள்டன்(Franklin Templeton) நிறுவனத்துடன் இணைக்கப்பட்டது கவனிக்கத்தக்கது.

ஆரம்ப காலத்தில் மியூச்சுவல் பண்ட் சார்ந்த விழிப்புணர்வு குறைவாக இருப்பினும், தற்போது பரஸ்பர நிதி திட்டங்கள் வங்கி மற்றும் அஞ்சலக சேமிப்புக்கு மாற்றாக செயல்பட்டு வருகிறது. இன்றும் சிலருக்கு பரஸ்பர நிதி திட்டங்கள் என்றாலே பங்குச்சந்தை தான் என்ற ஐயம் உள்ளது. சமீப காலங்களில் மியூச்சுவல் பண்ட் சார்ந்த விழிப்புணர்வும், திட்டங்களில் உள்ள வடிவமைப்பும் எளிமையாக்கப்பட்டுள்ளன. அரசு சார்பிலும் இது குறித்த விழிப்புணர்வு நிகழ்ச்சிகள் மற்றும் பொது கருத்தரங்குகள் நடைபெற்று கொண்டு தான் இருக்கிறது.

பரஸ்பர நிதி சார்ந்த விழிப்புணர்வை நமது ஊரில் பரவலாக விகடன் குழுமம் (நாணயம் விகடன் – Nanayam Vikatan) சேர்த்து வருவது நல்ல விஷயம். சேமிப்பு மற்றும் முதலீடு சார்ந்த அடிப்படை கல்வி நமக்கு பள்ளி, கல்லூரி காலங்களில் கிடைப்பதில்லை என்றாலும், இன்று அதற்கான தளங்கள் அமைய பெற்றிருப்பது மக்களுக்கு நலன் பயக்கும்.

பரஸ்பர நிதி திட்டங்களில் லிக்விட் பண்டுகள்(Liquid Funds) என்று சொல்லப்படும் பாதுகாப்பான சேமிப்பு திட்டங்கள் முதல் பங்குச்சந்தை சார்ந்த திட்டங்கள்(Equity oriented Funds) வரை பல்வேறு வகையான திட்டங்கள் உள்ளன. ஒவ்வொரு முதலீட்டாளரின் நிதி இலக்குகள், கால அளவுகளை கொண்டு மற்றும் ரிஸ்க் தன்மையை பொறுத்து பரஸ்பர நிதி திட்டங்கள் வேறுபடும். நீண்டகாலத்தில் பரஸ்பர நிதித்திட்டங்கள் பணவீக்கத்தை காட்டிலும் நல்ல வருமானத்தை கொடுத்து வருகிறது. அதே வேளையில் வங்கி மற்றும் அஞ்சலக சேமிப்பை காட்டிலும் பெறக்கூடிய நீண்டகால வருமானம் பல மடங்கு லாபத்தை தரக்கூடியவையாக உள்ளது.

இன்றைய நிலையில், வரி சலுகையை பெற மிகவும் குறைந்த லாக் இன் காலம்(Lock in Period) கொண்ட மற்றும் அதிக வருமானத்தை தரும் திட்டமாக மியூச்சுவல் பண்ட் டாக்ஸ் சேவர் திட்டங்கள்(Tax Saving Mutual Funds) உள்ளன. முன்னர் பரஸ்பர நிதி திட்டங்களில் முதலீடு செய்ய ஒரு குறிப்பிட்ட தொகையை (ரூ.500-5000) முதலீடு செய்ய வேண்டும் என்ற நிலையிலிருந்து, தற்போது குறைந்தபட்ச முதலீடாக 100 ரூபாய் என சொல்லப்பட்டுள்ளது குறிப்பிடத்தக்கது. இதன் மூலம் குறைந்த வருமானம் உள்ளவர்களும் அஞ்சலக சேமிப்பை போல, மியூச்சுவல் பண்டு திட்டங்களில் முதலீடு செய்யலாம்.

பரஸ்பர நிதி திட்டங்களில் செய்யப்பட்ட முதலீட்டு தொகையை, நாம் விரும்பும் எந்த நேரத்திலும் பெற்று கொள்ளலாம் என்பது மற்றுமொரு சிறப்பம்சம். சில மியூச்சுவல் பண்ட் நிறுவனங்கள் நாம் மாதாமாதம் முதலீடு செய்யும் எஸ்.ஐ.பி.(Systematic Investment Plan -SIP) தொகைக்கு இலவச டேர்ம் பாலிசியையும் வழங்குவது ஆதாயமான விஷயம். நாம் செய்யும் முதலீடு தொகைக்கு ஏற்றாற் போல் மற்றும் கால அளவுகளை பொறுத்து, நமக்கான டேர்ம் காப்பீடு தொகையும்(Term Policy Insurance) அதிகரிக்கும். இதற்காக அந்த நிறுவனங்கள் நம்மிடம் இருந்து எந்தவித கட்டணத்தையும் வசூலிப்பதில்லை.

இருப்பினும், இலவசமாக காப்பீடு கிடைக்கிறது என்பதற்காக மட்டுமே முதலீடு செய்ய வேண்டாம். குறிப்பிட்ட காலத்துக்கு முன்பு, நீங்கள் உங்கள் முதலீட்டை வெளியே எடுக்கும் நிலையில் உங்களது காப்பீடு ரத்து செய்யப்படலாம். சில பரஸ்பர நிதி நிறுவனங்கள் குறைந்தபட்சம் 25 வருடங்கள் முதலீடு செய்தால் மட்டுமே, உங்களுக்கு காப்பீட்டை வழங்கும். எனவே காப்பீடு இலவசமாக கிடைக்கப்பெற்றாலும், தனியாக டேர்ம் இன்சூரன்ஸ் எடுத்து வைத்து கொள்வது நல்லது.

வரும் காலங்களில் வங்கி வைப்பு தொகை மற்றும் அஞ்சலக திட்டங்களுக்கு மாற்றாக மியூச்சுவல் பண்ட் திட்டங்களில் முதலீடு முழுமையாக இருக்கலாம் என்பது தான் உண்மை. அதனால் தான் என்னவோ, சில வங்கிகள் தாமாக முன்வந்து வாடிக்கையாளர்களுக்கு பரஸ்பர நிதி திட்டங்களை பரிந்துரைக்கின்றன.

வாழ்க வளமுடன்,

நன்றி, வர்த்தக மதுரை

www.varthagamadurai.com

Financial Blog in Tamil