Category Archives: Paisa News

Paisa News – News about Business and Finance

Paisa News

டி.சி.எஸ். நிறுவன பங்குகளை திரும்பப்பெறும் விலை ரூ.3000, டிவிடெண்ட் 12 ரூபாய்

Leave a comment

டி.சி.எஸ். நிறுவன பங்குகளை திரும்பப்பெறும் விலை ரூ.3000, டிவிடெண்ட் 12 ரூபாய் 

Buyback Price of Rs.3000 and Rs.12 Dividend per Share – TCS Q2FY21 Results

இந்திய தொழில்நுட்ப துறையில் முதன்மையாக விளங்கும் நிறுவனம், டாட்டா குழுமத்தை சேர்ந்த டி.சி.எஸ்.(TCS) நிறுவனம். இதன் சந்தை மதிப்பு ரூ.10 லட்சம் கோடி. பில்லியன் டாலர் வருமானத்தை கொண்டிருக்கும் இந்நிறுவனம் சுமார் நான்கு லட்சத்திற்கு மேற்பட்ட பணியாளர்களை கொண்டு 46 நாடுகளில் தனது சேவையை அளித்து வருகிறது.

சந்தை மதிப்பிலும் ரிலையன்ஸ் இண்டஸ்ட்ரீஸ் நிறுவனத்திற்கு அடுத்தபடியாக இருக்கும் மிகப்பெரிய இந்திய நிறுவனமாக டி.சி.எஸ். உள்ளது. டி.சி.எஸ். நிறுவனத்தில் அதன் தாய் நிறுவனமான டாட்டா சன்ஸ் 72 சதவீத பங்குகளை வைத்திருக்கிறது. பொதுத்துறை காப்பீடு நிறுவனமான எல்.ஐ.சி.(LIC India) நான்கு சதவீத பங்குகளை கொண்டுள்ளது.

2020-21ம் நிதியாண்டுக்கான இரண்டாம் காலாண்டு முடிவுகளை டாட்டா கன்சல்டன்சி நிறுவனம் நேற்று வெளியிட்டிருந்தது. செப்டம்பர் மாதத்துடன் முடிவடைந்த காலாண்டில் நிறுவனத்தின் வருவாய் 40,135 கோடி ரூபாயாகவும், செலவினம் 28,622 கோடி ரூபாயாகவும் இருந்துள்ளது. வரிக்கு முந்தைய லாபம் ரூ. 10,037 கோடியாகவும், இரண்டாம் காலாண்டில் நிகர லாபமாக ரூ.7,475 கோடி ரூபாயை ஈட்டியுள்ளது.

முதலாம் காலாண்டுடன் ஒப்பிடுகையில் இரண்டாம் காலாண்டின் வருவாய் 5 சதவீதமும், நிகர லாபம் 6 சதவீதமாகவும் வளர்ச்சியடைந்துள்ளது. அதே வேளையில் முந்தைய செப்டம்பர் (2019-20) காலாண்டுடன் ஒப்பிடும் போது, வருவாய் 3 சதவீதம் வளர்ச்சி பெற்றிருந்தாலும், நிகர லாப அடிப்படையில் 7 சதவீத வளர்ச்சி குறைந்துள்ளது.

நேற்றைய காலாண்டு முடிவு அறிவிப்பில் முதலீட்டாளர்களிடம் இருந்து பங்குகளை திரும்பப்பெறும் முறையில்(Buyback of Shares) 16,000 கோடி ரூபாயை டி.சி.எஸ். நிறுவனம் செலவிட உள்ளதாக கூறப்பட்டுள்ளது. 5.33 கோடி பங்குகளை, பங்கு ஒன்றுக்கு ரூ.3000 என்ற விலையில் நிறுவனம் திரும்பப்பெற உள்ளது. இதன் மதிப்பு ரூ.16,000 கோடி எனவும், மொத்த பங்குகளில் இதன் பங்களிப்பு 1.42 சதவீதம் எனவும் சொல்லப்பட்டுள்ளது.

டி.சி.எஸ். நிறுவன பங்களிப்பில், 72 சதவீத பங்குகள் நிறுவனர்களிடம் உள்ளது. 16 சதவீத பங்குகள் வெளிநாட்டு முதலீட்டாளர்களிடமும், 8 சதவீத பங்குகள் உள்நாட்டு வங்கி மற்றும் நிதி நிறுவனங்களிடமும் உள்ளது. சிறு முதலீட்டாளர்களிடம்(Resident individual and others) வெறும் 3.3 சதவீத பங்குகள் தான் கையிருப்பாக உள்ளது. அதாவது 8.98 லட்சம் சிறு முதலீட்டாளர்களிடம் 12.5 கோடி பங்குகள் உள்ளது.

மேலும் இரண்டாம் காலாண்டுக்கான டிவிடெண்ட் தொகையையும் நிறுவனம் அறிவித்துள்ளது. பங்கு ஒன்றுக்கு ரூ.12 என ஈவுத்தொகையை சொல்லியுள்ளது. அதற்கான பதிவு நாள்: அக்டோபர் 15,2020.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

சிறு சேமிப்பு திட்டங்களுக்கான வட்டி விகிதம் – அக்டோபர் 2020

Leave a comment

சிறு சேமிப்பு திட்டங்களுக்கான வட்டி விகிதம் – அக்டோபர் 2020

Small Savings Scheme interest rate for the Period – October to December 2020

சிறு சேமிப்பு திட்டங்களுக்கான வட்டி விகிதத்தை காலாண்டுக்கு ஒரு முறை மத்திய அரசு அறிவித்து வருகிறது. பரஸ்பர நிதி திட்டங்கள், பங்குகள் மற்றும் பத்திரங்கள் ஆகியவற்றின் முதலீடு அதிகரித்து வரும் நிலையில், இன்றளவும் நம் நாட்டில் சிறு சேமிப்புக்கான மதிப்பு குறையவில்லை எனலாம். ஏழை மற்றும் நடுத்தர குடும்பத்தில் இருப்பவர்களுக்கு அஞ்சலக மற்றும் வங்கி சிறு சேமிப்பு திட்டங்கள் ஒரு வரப்பிரசாதமாக உள்ளன.

சேமிப்பு கணக்குக்கான வட்டி விகிதங்கள் வங்கியில் குறைந்து வரும் நிலையில், சிறு சேமிப்பு திட்டத்தின் கீழ் அடிப்படை சேமிப்பு கணக்குக்கு 4 சதவீதம் வழங்கப்பட்டு வருவது குறிப்பிடத்தக்கது. பொதுவாக சிறு சேமிப்பு திட்டத்தில் மூத்த குடிமக்கள் மற்றும் செல்வ மகள் திட்டத்திற்கு(Sukanya Samriddhi), மற்ற திட்டங்களை காட்டிலும் வட்டி விகிதம் சற்று அதிகமாக காணப்படும்.

நடப்பு 2020-21ம் நிதியாண்டின் தொடக்கத்தில் சிறு சேமிப்பு திட்டங்களுக்கான வட்டி விகிதம் பெருமளவு குறைக்கப்பட்டிருந்தது. ஜனவரி-மார்ச் 2020 காலாண்டில் வழங்கப்பட்டிருந்த வட்டி விகிதத்தை விட குறைவான வட்டி விகிதமே ஏப்ரல்-ஜூன் காலாண்டில் காணப்பட்டது. இது கடந்த ஜூலை-செப்டம்பர் காலாண்டிலும் மாற்றமின்றி தொடர்ந்தது.

அக்டோபர்-டிசம்பர் காலாண்டுக்கான சிறு சேமிப்பு திட்டங்களின் வட்டி விகித அறிக்கையை கடந்த செப்டம்பர் 30ம் தேதியன்று மத்திய அரசு அறிவித்திருந்தது. இவற்றில் எந்த மாற்றமும் இல்லாமல் ஜூலை-செப்டம்பர் காலாண்டுக்கான வட்டி விகிதம் தொடரும் எனவும் சொல்லப்பட்டுள்ளது.

சேமிப்பு கணக்குக்கு 4 சதவீதம் வட்டி எனவும், ஒரு வருட, இரண்டு வருட மற்றும் மூன்று வருட வைப்பு தொகைக்கான(Time Deposit) வட்டி விகிதம் 5.5 சதவீதத்தில் தொடரும் எனவும் அறிவிக்கப்பட்டுள்ளது. 5 வருட டெபாசிட் தொகைக்கு 6.7 சதவீதமும், ஐந்து வருட தொடர் வைப்பு (RD) தொகைக்கு 5.80 சதவீதமும் சொல்லப்பட்டுள்ளது.

small saving scheme interest rate oct 2020

மூத்த குடிமக்களுக்கான(Senior Citizen Savings Scheme) 5 வருட திட்டத்தில் எந்த மாற்றமுமின்றி 7.40 சதவீதமும், 5 வருட மாத வருவாய்(MIS) திட்டத்தில் 6.6 சதவீதமுமாக உள்ளது. வரி சலுகை அளிக்கும் தேசிய சேமிப்பு பத்திரத்திற்கான வட்டி விகிதம் 6.80 சதவீதம். இதன் முதிர்வு காலம் ஐந்து வருடமாகும்.

பொது வருங்கால வைப்பு (PPF) நிதி திட்டத்தில் வழங்கப்படும் வட்டி விகிதம் 7.10 சதவீதம் மற்றும் கிசான் விகாஸ் பத்திர(KVP) வட்டி 6.90 சதவீதம். பெண் குழந்தைகளுக்கான செல்வமகள் திட்டத்திற்கான வட்டி விகிதம் அதிகபட்சமாக 7.60 சதவீதமாக சொல்லப்பட்டுள்ளது.

சொல்லப்பட்ட வட்டி விகிதம் அக்டோபர் 1 முதல் டிசம்பர் 31 வரையுள்ள காலத்திற்கு பொருந்தும். நாட்டின் சில்லரை விலை பணவீக்கம் சராசரியாக 6 சதவீதமாக இருக்கும் நிலையில், சிறு சேமிப்பு திட்டங்களின் கீழ் கிடைக்கப்பெறும் வட்டி விகிதம் நீண்ட கால இலக்குகளுக்கு பயன் தராது. சேமிப்பு பாதுகாப்பாக இருப்பது அவசியம். எனினும் பணவீக்கத்தை தாண்டிய வருவாய் ஈட்டவில்லை எனில், பிற்காலத்தில் பெறப்படும் முதிர்வு தொகையால் தேவைக்கு பெருமளவில் பயன்தராமல் போகும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

வருமான வரி சரிபார்ப்பு தளர்வு – செப்டம்பர் 30ம் தேதியுடன் முடிவு

Leave a comment

வருமான வரி சரிபார்ப்பு தளர்வு – செப்டம்பர் 30ம் தேதியுடன் முடிவு 

One time relaxation for verification of ITR – Deadline by 30 September, 2020

கொரோனா பெருந்தொற்று காரணமாக, கடந்த 2019-20ம் நிதியாண்டுக்கான வருமானத்திற்கு வரி தாக்கல்(AY 2020-21) செய்ய வேண்டிய காலம் நீட்டிக்கப்பட்டிருந்தது. பொதுவாக இதற்கான காலக்கெடு ஜூலை 31ம் தேதி வரை இருக்கும் நிலையில், இம்முறை செப்டம்பர் 30 வரை வருமான வரி தாக்கல் செய்யலாம் என சொல்லப்பட்டுள்ளது.

தனிநபர் வருமான வரி வரம்பில் ரூ.5 லட்சத்திற்கு குறைவாக உள்ள வருமானத்திற்கு வரி பிடித்தம் செய்யப்படவில்லை என்றாலும், ஆண்டு வருவாய் (நிதியாண்டு) ரூ. 2.5 லட்சத்திற்கு அதிகமாக இருந்தால் வரி தாக்கல் செய்வது அவசியமாகும். தவறும் போது, அதற்கான அபராத கட்டணம் விதிக்கப்படும்.

மதிப்பீட்டு ஆண்டுகளுக்கான (Assessment Year) 2015-16, 2016-17, 2017-18, 2018-19 மற்றும் 2019-20 ஆகிய வருடங்களுக்கான வருமான வரி தாக்கலை ஒருவர் செய்திருந்தாலும், அதனை சரி பார்த்தல்(Verification of ITR) மூலம் நிறைவு செய்வதற்கு, வரும் செப்டம்பர் 30ம் தேதி வரை சலுகை காலம் அளிக்கப்பட்டுள்ளது. வருமான வரி தாக்கல் செய்யும் ஒருவர், அதனை Verification of ITR – EVC என சொல்லப்படும் சரிபார்ப்பு முறையை நிறைவு செய்வது அவசியம். இதனை செய்தால் மட்டுமே, அது முழுமை பெற்றதாக வருமான வரி அலுவலகத்தால் கருதப்படும்.

அதாவது 2014-15ம் நிதியாண்டு(AY 2015-16) முதல் ஒருவர் வருமான வரி தாக்கல் செய்திருந்தும், சரிபார்ப்பு செய்யாத நிலையில் தற்போது ஒரு முறை சலுகையாக செப்டம்பர் 30 வரை அளிக்கப்பட்டுள்ளது. இதற்கு எந்த கட்டணமும் செலுத்த தேவையில்லை. வரி தாக்கல் சரிபார்ப்பு செய்திருந்தால் மட்டுமே, நீங்கள் கோரிக்கை விடுத்த தொகை(Refund amount) திரும்ப கிடைக்கப்பெறும்.

சரிபார்ப்பு முறையை நிறைவு செய்ய கீழ்க்கண்ட ஏதேனும் ஒரு முறையை பயன்படுத்தலாம்:

வருமான வரி தாக்கல் செய்யும் இணையதளத்தில் உங்கள் பயனர்(Login Credentials) விவரங்களை கொண்டு உள்நுழைந்த பிறகு,

  • ஆதார் எண்ணுடன் இணைத்திருக்கும் கைபேசி எண்ணை பயன்படுத்தி OTP முறையில் சரிபார்ப்பு முறையை நிறைவு செய்யலாம். 
  • உங்களது வங்கி கணக்கு மூலம் (Net banking)
  • EVC முறை மூலம்
  • வருமான வரி அலுவலகத்திற்கு தபால் மூலம்(By Post), நீங்கள் தாக்கல் செய்த ஐ.டி.ஆர். படிவத்தை அனுப்பலாம்.

நம் நாட்டில் இருவகையான வரி விதிக்கப்படுகிறது. தனிநபர் வருமானத்திற்கான வரி, நேரடி வரி பிரிவில்(Direct Tax) உள்ளது. நீங்கள் ஈட்டிய வருமானத்திற்கு நேரடியாக அரசுக்கு வரி செலுத்தும் நிலையில், அவையனைத்தும் நேரடி வரி பிரிவில் வரும். மற்றவை மறைமுக வரி பிரிவில் உள்ளவை. உதாரணமாக நீங்கள் நுகரும் பொருட்கள் மற்றும் சேவை மூலம் வருபவை மறைமுக வரிகளாகும். 

வாழ்க வளமுடன்,

நன்றி, வர்த்தக மதுரை 

www.varthagamadurai.com

   

Paisa News

பொதுத்துறை வங்கிகளில் சுமார் 20,000 கோடி ரூபாய் மோசடி

Leave a comment

பொதுத்துறை வங்கிகளில் சுமார் 20,000 கோடி ரூபாய் மோசடி 

About 20K Crore rupees Fraud in Public Sector Banks – RTI query

வங்கிகள் மற்றும் நிதி சார்ந்த நிறுவனங்களில் அவ்வப்போது மோசடிகள் நடைபெற்று வருவது கவனிக்கத்தக்கது. நடப்பு நிதியாண்டின் ஏப்ரல்-ஜூன் காலாண்டில் 19,964 கோடி ரூபாய் அளவில் மோசடி நடைபெற்றுள்ளதாக தகவல் பெறும் உரிமை சட்டத்தின் கீழ் சொல்லப்பட்டுள்ளது.

சொல்லப்பட்ட 19,964 கோடி ரூபாய் முழுவதும் பொதுத்துறை வங்கிகளில் காணப்பட்ட மோசடி எனவும், இது தனிநபர் வாயிலாக வங்கிகளில் கொடுக்கப்பட்ட புகார்களின் அடிப்படையில் கணக்கிடப்பட்டுள்ளதாக மத்திய ரிசர்வ் வங்கி சார்பில் தெரிவிக்கப்பட்டுள்ளது. எனினும் வங்கிகளில் ஏற்பட்ட அனைத்து மோசடி சார்ந்த தகவலை இது தெரிவிக்கவில்லை.

2020-21ம் நிதியாண்டின் முதல் காலாண்டில் இந்திய பொதுத்துறை வங்கிகளில் பதிவு செய்யப்பட்ட மோசடி வழக்குகளின் எண்ணிக்கை 2,867 மற்றும் அதன் மூலம் 19,964 கோடி ரூபாய் அளவில்  மோசடி நடந்துள்ளது. எஸ்.பி.ஐ.(SBI) வங்கியில் அதிகபட்சமாக பதிவு செய்யப்பட்ட மோசடிகளின் எண்ணிக்கை 2,050. அதன் மதிப்பு சுமார் 2,300 கோடி ரூபாய்.

மோசடி மதிப்பளவில், பேங்க் ஆப் இந்தியாவில் 5,124 கோடி ரூபாய் மோசடி நடந்துள்ளது. ஆனால் இந்த மதிப்பு வெறும் 47 வழக்குகளில் வந்துள்ளது. மோசடியில் சிக்கி தவித்த பஞ்சாப் தேசிய வங்கியில்(PNB) இம்முறை 240 வழக்குகளும், 270 கோடி ரூபாய் அளவில் மோசடியும் நடந்துள்ளது. இது கடந்த காலத்தை விட குறைவான மதிப்பாக சொல்லப்படுகிறது.

முதல் காலாண்டில் நடைபெற்றிருந்த மோசடியில்(Fraud in Banks) 12 பொதுத்துறை வங்கிகளின் தகவல்கள், ஆர்.டி.ஐ.(RTI act) சட்டத்தின் கீழ் பெறப்பட்டுள்ளது. இருப்பினும் இந்த தகவல் வங்கிகளில் ஏற்பட்ட மொத்த மோசடிகள் பற்றியோ அல்லது கடன் பெற்றவர்களின் நிலை பற்றியோ சொல்லவில்லை.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

அதிகரித்து வரும் தங்கத்தின் கையிருப்பு, மீண்டும் பற்றாக்குறையில் வர்த்தகம்

Leave a comment

அதிகரித்து வரும் தங்கத்தின் கையிருப்பு, மீண்டும் பற்றாக்குறையில் வர்த்தகம் 

Rising Gold Reserves, expanding Trade Deficit – Indian Economy

சமீப காலமாக தங்கத்தின் விலை அதிக ஏற்ற-இறக்கத்திற்கு உட்பட்டு இருந்தாலும், அரசு சார்பில் தங்கத்தின் கையிருப்பு அதிகரித்து வருகிறது. பொதுவாக நாட்டின் பொருளாதாரம் நல்ல நிலையில் இருக்கும் போது, பங்குச்சந்தை குறியீடுகள் ஏற்றம் பெறுவதும், அதுவே பொருளாதார மந்தநிலை காணும் போது, தங்கத்தின் மீதான கையிருப்பு அதிகரித்தும் காணப்படுகிறது.

பங்குச்சந்தைகள் தொடர்ச்சியாக ஏற்றம் பெறும் நிலையில், தங்கத்தில் முதலீடு குறையும். கடந்த 2018ம் ஆண்டின் துவக்கம் முதல் நாட்டின் பொருளாதாரம் மந்தநிலையில் உள்ளது. இதற்கு பொருத்தமாக உலகளவிலும் பொருளாதார குறியீடுகள் சாதகமான நிலையில் இல்லை.

சுமார் எட்டு ஆண்டுகளாக ஏற்றம் பெறாத தங்கத்தின் விலை, கடந்த ஒன்றரை வருடங்களில் பெருத்த ஏற்றத்தை அடைந்துள்ளது. தங்க இ.டிஎப்.(Gold ETF) திட்டத்தில் கடந்த ஒரு வருடத்தில் மட்டும் கிடைத்துள்ள வருவாய் 38 சதவீதமாக உள்ளது. அதே வேளையில் பங்குச்சந்தை சென்செக்ஸ் குறியீடு கடந்த ஒரு வருடத்தில் 6 சதவீதம் மட்டுமே வளர்ச்சியடைந்துள்ளது.

நடப்பாண்டில் இந்திய பங்குச்சந்தை இதுவரை 6 சதவீத இழப்பை சந்தித்துள்ளது. இருப்பினும், மார்ச் மாதத்திற்கு பிறகான ஆறு மாதத்தில் 50 சதவீதம் ஏற்றம் பெற்றுள்ளது குறிப்பிடத்தக்கது. அதே நேரம் பொருளாதாரம் இன்னும் சரிசெய்யப்படவில்லை என்பது கவனிக்க வேண்டிய விஷயமாக உள்ளது.

நாட்டின் வர்த்தக பற்றாக்குறை(Trade Deficit) மீண்டும் அதிகரித்து வருகிறது. கொரோனா காலத்தில் ஏற்றுமதி இல்லையென்றாலும், நாட்டின் இறக்குமதியும் குறைந்திருந்தது. இதன் காரணமாக முதன்முறையாக 790 மில்லியன் டாலர்கள் உபரியாக இருந்தது. ஆகஸ்ட் மாதத்தின் முடிவில் நாட்டின் வர்த்தக பற்றாக்குறை 6.77 பில்லியன் அமெரிக்க டாலர்கள்.

ஏற்றுமதி அளவு 13 சதவீதம் குறைந்து 22.7 பில்லியன் அமெரிக்க டாலர்களாக உள்ளது. ஏற்றுமதியில் கற்கள் மற்றும் நகைகள், பெட்ரோலிய பொருட்கள் மற்றும் முந்திரி ஆகியவற்றின் அளவு ஆகஸ்ட் மாதத்தில் கணிசமாக குறைந்துள்ளது. இறக்குமதி அளவு 26 சதவீதம் குறைந்து 29.47 பில்லியன் டாலர்களாக இருந்தது. இறக்குமதியில் பெட்ரோலியம் மற்றும் கச்சா எண்ணெய் பொருட்கள், எந்திரங்கள் ஆகியவற்றின் தேவை குறைந்துள்ளது.

வர்த்தக பற்றாக்குறை அதிகரித்து வரும் அதே நேரத்தில், தங்கத்தின் கையிருப்பு(Gold Reserves) பல மாதங்களாக அதிகரித்து வருகிறது. 2019ம் ஆண்டின் ஆகஸ்ட் மாதத்தில் தங்கத்தின் இறக்குமதி 1.4 பில்லியன் அமெரிக்க டாலர்களாக இருந்த நிலையில், நடப்பாண்டின் ஆகஸ்ட் மாதத்தில் 3.7 பில்லியன் டாலர்களாக அதிகரித்துள்ளது. பொதுவாக பொருளாதார மந்தநிலை காலங்களில் மத்திய வங்கி தங்கத்தின் கையிருப்பு அளவை அதிகரிப்பதுண்டு. 2020ம் ஆண்டின் முதல் காலாண்டில் தங்கத்தின் கையிருப்பு 642 டன்கள், இது இரண்டாம் காலாண்டில் 658 டன்களாக இருப்பது குறிப்பிடத்தக்கது.

கடந்த 25 வருட கால அளவில், 2008-2010 மற்றும் 2018ம் ஆண்டுக்கு பிறகான காலத்தில் தங்கத்தின் கையிருப்பு அதிகரித்து காணப்படுகிறது. இது பொருளாதார மந்தநிலை நீடித்து வருவதை மத்திய வங்கியின் அணுகுமுறை மூலம் தெரியப்படுத்துகிறது.

ஆகஸ்ட் மாதத்தில் நாட்டின் சில்லரை விலை பணவீக்கம்(Retail Inflation) 6.69 சதவீதமாகவும், நடப்பு நிதியாண்டில் இது 10 சதவீதம் வரை செல்லலாம் என்ற எதிர்பார்ப்பும் நிலவுகிறது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

இனி ஏ.டி.எம். மூலம் பணம் எடுக்க OTP அவசியம், நாளை முதல் அமல் – பாரத ஸ்டேட் வங்கி

Leave a comment

இனி ஏ.டி.எம். மூலம் பணம் எடுக்க OTP அவசியம், நாளை முதல் அமல் – பாரத ஸ்டேட் வங்கி 

OTP based cash withdrawal to all SBI ATMs from 18th September, 2020

நாடு முழுவதும் நாளை முதல் OTP முறையிலான பண பரிவர்த்தனை(Withdrawal) அமலுக்கு வருவதாக பாரத ஸ்டேட் வங்கி தெரிவித்துள்ளது. வங்கி வாடிக்கையாளர்கள் தங்கள் பணத்தை ஏ.டி.எம். வாயிலாக எடுக்கும் போது, பாதுகாப்பு சார்ந்த சில சிக்கல்களை சந்திக்க வேண்டியுள்ளது. வாடிக்கையாளர்களின் ஏ.டி.எம். கடவுச்சொல்(ATM PIN) கசிந்து விட்டால், அவரின் கணக்கில் உள்ள பணத்தை திருடுவதற்கான வாய்ப்புகள் அதிகம்.

இதனை தடுக்கும் வகையில் வாடிக்கையாளர்களின் கைபேசி எண்ணுக்கு குறுஞ்செய்தி அனுப்பும் கூடுதல் பாதுகாப்பு அம்சத்தை பாரத ஸ்டேட் வங்கி அறிமுகப்படுத்தியுள்ளது. OTP முறையிலான இந்த நடைமுறை ஏற்கனவே பெரும்பாலான வங்கிகளில் இருந்து வந்தாலும், தற்போது 24 மணிநேர சேவையாக இதனை எஸ்.பி.ஐ. மாற்றியுள்ளது.

இந்த சேவை நாடு முழுவதும் உள்ள அனைத்து பாரத ஸ்டேட் வங்கி ஏ.டி.எம். மையங்களுக்கும் பொருந்தும். எஸ்.பி.ஐ.(State Bank of India) வங்கி வாடிக்கையாளர்கள் ஏதேனும் ஸ்டேட் வங்கி ஏ.டி.எம். மையத்தில் ஒரு முறை பரிமாற்றமாக ரூ.10,000 மற்றும் அதற்கு மேற்பட்ட தொகையை எடுக்கும் நிலையில், கூடுதலாக அவருடைய கைபேசி எண்ணுக்கு வரும் OTP எண்களையும் பதிவிட(Debit Card PIN போக) வேண்டும்.

சொல்லப்பட்ட சேவையின் மூலம் ஏ.டி.எம். மோசடி மற்றும் பண பரிவர்த்தனை அட்டையை தவறாக பயன்படுத்துதல் தடுக்கப்படும் என பாரத ஸ்டேட் வங்கி தெரிவித்துள்ளது. முன்னர் காலை 8 மணி முதல் இரவு 8 மணி வரை மட்டுமே இருந்த பாதுகாப்பு சேவை, நாளை (18-09-2020) முதல் 24 மணிநேர சேவையாக அனைத்து எஸ்.பி.ஐ. ஏ.டி.எம். மையங்களுக்கு வர உள்ளது.

அதே வேளையில் எஸ்.பி.ஐ. அல்லாத மற்ற வங்கி ஏ.டி.எம். மையங்களில் பணம் எடுக்கும் போது, இந்த OTP முறை வேலை செய்யாது. புதிய சேவை, வங்கி வாடிக்கையாளர்களின் நலனை கருத்தில் கொண்டு எடுக்கப்பட்டதாக வங்கி நிர்வாகம் கூறியுள்ளது. எனவே இனி பாரத ஸ்டேட் வங்கி வாடிக்கையாளர்கள் ஏ.டி.எம். பரிவர்த்தனையின் போது, வங்கி கணக்கில் பதிவு செய்யப்பட்ட கைபேசி எண்ணை வைத்திருப்பது அவசியமாகிறது.

வாழ்க வளமுடன்,

நன்றி, வர்த்தக மதுரை

www.varthagamadurai.com

Paisa News

வரலாற்றில் தடம் பதிக்காத பொருளாதார வீழ்ச்சி – ஜூன் 2020

Leave a comment

வரலாற்றில் தடம் பதிக்காத பொருளாதார வீழ்ச்சி – ஜூன் 2020

Unprecedented Economic Downturn in the Historical Data – GDP June 2020

நேற்று மாலை தேசிய புள்ளியியல் அலுவலகம்(NSO) சார்பில் நாட்டின் ஏப்ரல்-ஜூன் 2020 காலாண்டுக்கான மொத்த உள்நாட்டு உற்பத்தி வளர்ச்சி(GDP growth) குறியீடு வெளியிடப்பட்டது. ஊரடங்கு காலத்தில் நாட்டின் பொருளாதார மந்தநிலை ஏற்படும் என்பது பொருளாதார வல்லுநர்கள் எதிர்பார்த்து வந்தது தான். ஆனால் சந்தை எதிர்பார்த்த (-18) சதவீதம் என்ற அளவை காட்டிலும் தற்போது (-23.9) சதவீதம் என சொல்லப்பட்டுள்ளது.

சுதந்திரத்திற்கு பின்னர் (அதாவது பொருளாதார குறியீடு அளவை பெற்ற) ஏற்பட்ட மிகப்பெரிய பொருளாதார வீழ்ச்சியாக தற்போது பார்க்கப்படுகிறது. நாட்டில் உள்ள அனைத்து துறைகளும் ஏப்ரல்-ஜூன் 2020 காலத்தில் உற்பத்தியை பெருக்க முடியாமல் சிரமப்பட்டுள்ளன.

ஸ்டீல் பயன்பாட்டு அளவு 57 சதவீதமும், நிலக்கரி உற்பத்தி 15 சதவீதமும் மற்றும் சிமெண்ட் உற்பத்தி 38 சதவீதமும் வீழ்ச்சி கண்டுள்ளது. அதிகபட்ச வீழ்ச்சியாக வணிக வாகன விற்பனை 85 சதவீதமும், பயணிகள் விமான சேவை 94 சதவீதமும் குறைந்துள்ளது. ரயில்வே துறையிலும் நிகர டன் கிலோமீட்டருக்கு 27 சதவீதம் குறைந்து காணப்படுகிறது.

இது போல விமான சேவையின் சரக்கு போக்குவரத்து, துறைமுக சேவை மற்றும் தொலைபேசி சந்தாதார்களின் எண்ணிக்கையிலும் தொய்வு ஏற்பட்டுள்ளது. ஊரடங்கு காலத்தில் தனிநபர் செலவினம் மற்றும் தனியார் முதலீட்டை காட்டிலும் அரசு சார்பில் அதிகம் செலவிடப்பட்டுள்ளது. நாட்டின் வர்த்தகத்தில் (ஏற்றுமதி-இறக்குமதி) எதிர்பாராத உபரி தொகையும் ஏப்ரல்-ஜூன் காலாண்டில் நடந்துள்ளது. அதன் காரணமாக மிக மோசமான நிலைக்கு செல்ல வேண்டிய பொருளாதாரம் தடைபட்டு சற்று ஆறுதலை தந்துள்ளது.

நாட்டின் மொத்த உள்நாட்டு உற்பத்தி குறியீட்டில் உள்ள கட்டுமானம்(Construction) 50 சதவீதமும், விடுதிகள் மற்றும் போக்குவரத்து(Hotels & Transportation) 47 சதவீதமும் மற்றும் உற்பத்தி துறை(Manufacturing) 39 சதவீதமும் வீழ்ச்சியடைந்துள்ளது. அரசு செலவினம் 16 சதவீதமும், விவசாய துறை 3.5 சதவீதமும் வளர்ச்சி பெற்றுள்ளது குறிப்பிடத்தக்கது.

சுரங்கம் மற்றும் குவாரி, நிதி, வீட்டுமனை மற்றும் இதர தொழில் துறைகளின் வளர்ச்சியும் குறைந்துள்ளது. 1992ம் ஆண்டுக்கு பின்பு ஏற்பட்ட புதிய பொருளாதார கொள்கைக்கு பிறகான, மிகப்பெரிய சரிவாக ஜூன் 2020 காலாண்டு வளர்ச்சி சொல்லப்படுகிறது. வேகமாக வளரும் நாடுகளில் அதிகம் காணப்பட்ட வீழ்ச்சியாகவும் இந்த குறியீட்டு எண்கள் எடுத்து கொள்ளப்பட்டுள்ளது.

ஜூன் காலாண்டுக்கு பிறகான தளர்வுகள் ஓரளவு பொருளாதார முன்னேற்றத்துக்கு வழிவகுக்கும். இருப்பினும், நடப்பு 2020-21ம் நிதியாண்டு முடிவில் அது வளர்ச்சி குறைந்ததாகவே காணப்படும் என பொருளாதார வல்லுநர்கள் கூறுகின்றனர்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

செப்டம்பர் மாதம் முதல் அமலில் வரக்கூடிய பங்குச்சந்தை ஒழுங்குமுறை மாற்றங்கள் – 2020

Leave a comment

செப்டம்பர் மாதம் முதல் அமலில் வரக்கூடிய பங்குச்சந்தை ஒழுங்குமுறை மாற்றங்கள் – 2020

Stock Market Regulatory Changes effective from September 2020

நடப்பாண்டின் மார்ச் மாத வீழ்ச்சிக்கு பிறகு மும்பை பங்குச்சந்தை குறியீடான சென்செக்ஸ்(BSE Sensex) சுமார் 13,000 புள்ளிகளுக்கு மேலாக ஏற்றமடைந்துள்ளது. அதாவது சரிவிலிருந்து தற்போது வரை 35 சதவீதம் அதிகரித்துள்ளது. அதே வேளையில், ஜனவரி 1 முதல் கணக்கிடும் போது, சென்செக்ஸ் 5 சதவீத இறக்கத்தில் உள்ளது கவனிக்கத்தக்கது.

கடந்த இரண்டு வருட காலத்தில் சென்செக்ஸ் 1.5 சதவீத ஏற்றம் மட்டுமே அடைந்துள்ளது. இருப்பினும் மூன்று வருட காலத்தில் 24 சதவீத வளர்ச்சியை பெற்றுள்ளது இந்த குறியீடு. பங்குச்சந்தை ஏற்ற-இறக்கம் இருந்து கொண்டிருந்தாலும், நாட்டில் ஏற்படும் பொருளாதார நிலை மாற்றங்கள், பங்குச்சந்தை அமைப்பு ஒழுங்குமுறையிலும் சில மாற்றங்களை கொண்டு வருகிறது.

வரும் செப்டம்பர் மாதம் முதல் பங்குச்சந்தையில் சில ஒழுங்குமுறை மாற்றங்கள் அமலில் வர உள்ளது. அவற்றில் சில முக்கிய தகவல்களை இங்கு  காண்போம்.

பங்குச்சந்தையில் எந்த பங்கு பரிவர்த்தனையும் செய்யாதவரா நீங்கள் ?

  • பங்குச்சந்தையில் தொடர்ச்சியாக 12 மாதங்கள், பங்குகள் சார்ந்த எந்த பரிமாற்றத்தையும் செய்யாமல் இருக்கும் நிலையில், உங்கள் வர்த்தக கணக்கு செயலற்ற கணக்காக(Inactive) அறிவிக்கப்படும். இந்த நடைமுறை கடந்த மாதம் ஆகஸ்ட் முதல் அமலுக்கு வந்துள்ளது.
  • செயலற்ற கணக்கை(Dormant) மீண்டும் புதுப்பிக்க மறு கே.ஐ.சி.(Re-KYC) செய்வது அவசியமாகும். இதற்கு நீங்கள் கணக்கை துவங்கும் போது என்னென்ன ஆவணங்களை கொடுத்தீர்களா, அதே போல மீண்டும் ஒரு முறை சமர்ப்பிப்பது அவசியமாகும். வீட்டு முகவரி மாறியிருந்தால் அதற்கான தகுந்த ஆவணங்களை அளிக்க வேண்டும்.
  • பொதுவாக இந்த நடைமுறைக்கு கட்டணம் ஏதும் வசூலிக்கப்படுவதில்லை. இருப்பினும், இது கால விரயம் ஏற்படுத்தும் செயலாக சொல்லப்படுகிறது.

இனி இங்கும் விளிம்பு பற்றாக்குறை அபராதம் உண்டு:

  • இதுவரை பணச்சந்தையில்(Cash Market) தரகு நிறுவனங்கள் அறிவிக்கும்  பண அளவு இருந்தாலே, நாள் வணிகர்கள் மற்றும் முதலீட்டாளர்கள் பங்குகளை வாங்கி(based on upfront margin) கொள்ளலாம். பங்குச்சந்தைக்கு தேவையான மீதி தொகையை தரகு நிறுவனங்கள் செலுத்தி விடும். பின்பு நாள் வணிகர்கள் மற்றும் முதலீட்டாளர்களிடம் செலுத்த வேண்டிய பணத்தை பெற்று கொள்ளும் (பொதுவாக மூன்று நாட்களுக்குள்).
  • எனவே இனி பணச்சந்தையில் முழுத்தொகையும் இல்லாமல் மார்ஜின் அளவில் வர்த்தகம் புரிய முடியாது. ரொக்கமாக பணத்தை செலுத்தி விட்டு தான் பங்குகளை வாங்கவோ, விற்கவோ முடியும். அதே போல, அன்றைய தினத்தில் விற்ற பங்குகளின் தொகையை கொண்டு புதிய பங்கு பரிவர்த்தனையை மேற்கொள்ள இயலாது. புதிய பரிவர்த்தனைக்கு தேவையான தொகையை சந்தைக்கு முன்னரே செலுத்த வேண்டும்.
  • இருப்பினும், ஏற்கனவே பங்குகளை டீமேட் கணக்கில் வைத்திருப்பவர்கள் அதனை அடமானமாக கணக்கில் கொண்டு, மார்ஜின் அளவுகளை பெறலாம். இதற்கு சந்தை அறிமுகப்படுத்தியிருக்கும் புதிய உறுதிமொழி இணைப்பை(New Margin Pledge Mechanism) பயன்படுத்த வேண்டும். அடமானத்தை உறுதி செய்த பின்னர், மார்ஜின் அளவு நிர்ணயிக்கப்படும்.
  • புதிய அடமான திட்டத்தால் மார்ஜின் வழங்கப்பட்டாலும்,பின் சொல்லப்பட்ட நாளில் பணத்தை முழுவதுமாக செலுத்தாத நிலையில் பற்றாக்குறை அபராதம் உண்டு.
  • குறைந்த அளவில் வர்த்தகமாகும் பங்குகள் (illiquid Securities) மற்றும் அதிக ஏற்ற-இறக்கங்களை காணும் பங்குகளுக்கு (100 % VAR) மார்ஜின் அளவு அளிக்கப்படாது.

மார்ஜின் பற்றாக்குறை அபராதம்(Margin Shortage Penalty) எவ்வளவு ?

  • பற்றாக்குறை தொகை ரூ.1 லட்சம் மற்றும் சொல்லப்பட்ட மார்ஜின் அளவு 10 சதவீதத்திற்கு குறைவாக இருக்கும் நிலையில், 0.5 சதவீதம் அபராதம் விதிக்கப்படும்.
  • பற்றாக்குறை தொகை ரூ.1 லட்சத்திற்கு அதிகமாக மற்றும் மார்ஜின் அளவும் 10 சதவீதத்திற்கு மேலாக இருக்கும் நிலையில், ஒரு சதவீதம் அபராதம் விதிக்கப்படும்.
  • மார்ஜின் பற்றாக்குறை(Margin Shortfall) மூன்று நாட்களுக்கு மேலாக செல்லும் போது, நான்காவது நாளிலிருந்து 5 சதவீதம் அபராதமாக விதிக்கப்படும். இதுவே ஒரு மாதத்தில் ஐந்து நாட்களுக்கு மேலாக (தொடர்ச்சியாக இல்லாவிட்டாலும்) மார்ஜின் பற்றாக்குறை இருக்கும் போதும் 5 சதவீத அபராதம் செலுத்த வேண்டும்.

சொல்லப்பட்ட ஒழுங்குமுறை மாற்றங்களில் சில விதிமுறைகள் நடப்பு ஆகஸ்ட் மாதத்தின் தொடக்கம் முதல் இருப்பது குறிப்பிடத்தக்கது.

கவனிக்க: சில பங்குகளுக்கு 20 சதவீத தொகை ரொக்கமாக இருந்தாலே, மார்ஜின் அளவு வழங்கப்படும் என சொல்லப்படுகிறது. மார்ஜின் அளவு மற்றும் அபராதம் சார்ந்த தகவல்களை உங்களது தரகு நிறுவனங்களிடம் கேட்டு தெரிந்து கொள்வது நன்று. தரகு நிறுவனங்கள் சார்ந்து செபியிடம்(SEBI) பேச்சு வார்த்தை நடந்து கொண்டிருப்பது கவனிக்கத்தக்கது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

முதலீட்டு நாயகன், ‘வாரன் பப்பெட்‘ – 90 வயது இளைஞனின் பிறந்தநாள் இன்று

Leave a comment

முதலீட்டு நாயகன், ‘வாரன் பப்பெட்‘ – 90 வயது இளைஞனின் பிறந்தநாள் இன்று 

The 90 years old Investing Teenager – Warren Edward Buffett

‘என்னிடம் ஆப்பிள் போன் இல்லை, ஆனால் நான் ஆப்பிள் நிறுவனத்தை வாங்க தயாராக உள்ளேன் ‘ என எளிமையான நடையில் தனது முதலீட்டு உத்தியை சொன்னவர் திரு. வாரன் பப்பெட் அவர்கள். 1930ம் ஆண்டு ஆகஸ்ட் மாதம் 30ம் தேதி அமெரிக்காவின் ஒமாகா நகரில் பிறந்த வாரன், இளம் வயது முதலே முதலீட்டில் கெட்டிக்காரர்.

தனது 11ம் வயதில் முதலீடுகளை மேற்கொண்ட இவர் பல தொழில் சார்ந்த கல்வியை கற்பதிலும் ஆர்வம் காட்டினார். வெறுமென பங்குச்சந்தையில் மட்டும் முதலீடு செய்யாமல், தொழில்முனைவில் பேரம் பேசுவதிலும் அக்கறை காட்டினார். முதலீட்டில் நிறுவனங்களை மலிவான விலையில் கையகப்படுத்துவதும் இவருடைய உத்தியில் மிகவும் முக்கியமான ஒன்று.

2008ம் ஆண்டு உலக பொருளாதார மந்தநிலை நிலவிய காலமது, அமெரிக்காவில் பங்குச்சந்தையும், பொருளாதாரமும் வீழ்ச்சியடைந்து கொண்டிருக்கும் நிலையில், பல நிறுவனங்களுக்கு தேவையான முதலீட்டை  வாரன் வழங்கினார். அந்த நேரத்தில், அவருடைய பெர்க்சையர்(Berkshire Hathaway) நிறுவனமும் மோசமான காலாண்டு முடிவுகளை அறிவித்தது. முதலீடு சார்ந்து சில விமர்சனங்களுக்கும் ஆளானார் வாரன்.

அவர் அதனை பற்றியெல்லாம் கவலைப்படும் முதலீட்டாளராகவும் அப்போது இல்லை. பொருளாதார மந்தநிலையில் பெரு நிறுவனங்களில் முதலீடு செய்ய அவர் தயக்கம் காட்டவில்லை. 2008ம் ஆண்டில் உலகின் முதல் பணக்காரராக சொல்லப்பட்டார் வாரன். ஆம், தொடர்ச்சியாக 13 வருடங்கள் முதலிடத்தில் இருந்த பில்கேட்ஸ் அவர்களை பின் தள்ளிவிட்டு முன்னேறினார்.

வாரன் பப்பெட் ஒரு கதை சொல்லியாகவும்(Story Teller) இருந்தார். தனது நிறுவனத்தின் ஆண்டு பொதுக்கூட்டத்தில் முதலீட்டாளர்களிடம் பேசுகையில் கதை மூலம் பல விஷயங்களை உரையாடுவார். அவரது முதலீட்டு கதைகளை கேட்க நம் நாட்டிலிருந்தும் பெரும் முதலீட்டாளர்கள் கூட்டம் சென்று வருவது கவனிக்கத்தக்க விஷயமாகும்.

‘வாய்ப்புகள் அரிதாகவே வருகின்றன, மழையில் கொட்டுவது தங்கமாக இருந்தால் கைவிரல்களில் வாங்க வராதீர்கள், பெரிய வாளியை கொண்டு வாருங்கள் ‘ என சொல்பவர் திரு. வாரன். பணவீக்கத்திலும், வங்கி வட்டி விகிதத்திலும் கறாராக இருப்பவர். முதலீட்டின் ஒவ்வொரு பண துளியிலும் கவனமாக இருப்பவர்.

முதலீட்டின் மூலம் பணம் சேர்த்த வாரன், மிகவும் எளிமையான மனிதராகவும் போற்றப்படுகிறார். பொருளாதார மந்தநிலை காலங்களில் இவரது அணுகுமுறை மற்றவர்களிடம் இருந்து வேறுபடுத்தும். நடப்பு காலத்திலும், இவர் மற்ற முதலீட்டாளர்களை போல சந்தையை அணுகவில்லை என்ற குற்றச்சாட்டும் உள்ளது. வயதாகி விட்டதால் இவரது முதலீட்டு தத்துவம் தற்போதைய காலத்தில் செல்லாது எனவும் சிலர் கூறுவதையும் கேட்டிருப்போம்.

சேமிப்பு மற்றும் முதலீட்டை பொறுத்தவரை நம் தந்தை சொல்லிக்கொடுத்தாலும், ஆசான் சொல்லிக்கொடுத்தாலும் இரண்டும் நல்ல விஷயமே. அணுகுமுறை மட்டுமே வித்தியாசப்படும். பணம் படைத்தவர்கள் கூட்டம் சொகுசு வாழ்க்கையை மட்டுமே அனுபவித்து கொண்டிருக்கிறது என்று நினைக்கும் பொது உலகில், இவரது முதலீட்டு வாழ்க்கையை பற்றி படிக்கும் போது பணக்கார தந்திரத்தின் விளக்கம் உங்களுக்கு புரியும்.

வாரன் பப்பெட் அவர்களை பற்றி தமிழில் படிக்க, மென்பொறியாளர் மற்றும் எழுத்தாளர் திரு. செல்லமுத்து குப்புசாமி(Chellamuthu Kuppusamy) அவர்களின், ‘பணக்கடவுள்’ புத்தகத்தை படிக்கும் போது உங்களுக்கான முதலீட்டு கேள்விகள் புலப்படும். 100 ரூபாயை 100 கோடி ரூபாயாக நேர்மையான வழியில், அதுவும் அரசாங்கத்தின் வரி கொள்கையில் மாற்ற முடிந்தால், அது தான் உங்களுக்கான புத்தகம்.

திரு.வாரன் பப்பெட் அவர்களின் பிறந்தநாளான இன்று(Birthday Wishes 2020), நான் பரிந்துரைக்கும் புத்தகமாக நீங்கள் இதனை எடுத்து கொள்ளலாம். உங்கள் முதலீட்டின் ஒரு பகுதியை நிதிக்கல்வியை கற்று கொள்வதற்கும் ஒதுக்குங்கள்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News

டாட்டா மோட்டார்ஸ் தனது கடனை குறைக்குமா ? ஒரு சிறு பார்வை

Leave a comment

டாட்டா மோட்டார்ஸ் தனது கடனை குறைக்குமா ? ஒரு சிறு பார்வை 

Will Tata Motors reduce it’s Debt ? 

நாட்டின் மிகப்பெரிய குழும நிறுவனமான டாட்டாவின் துணை நிறுவனம் தான் டாட்டா மோட்டார்ஸ்(Tata Motors). 1945ம் ஆண்டு துவங்கப்பட்ட இந்நிறுவனம் வாகன உற்பத்தியில் இந்திய பன்னாட்டு நிறுவனமாக திகழ்ந்து வருகிறது. மும்பையை தலைமையிடமாக கொண்டிருந்தாலும் உலகளவில் இதன் உற்பத்தி மற்றும் சேவை பிரபலமானது.

முக்கிய வாகன உற்பத்தியாக கார்கள், பயணிகள் பேருந்துகள், லாரிகள், வேன்கள், விளையாட்டு கார்கள்(Sports Car), கட்டுமான உபகரணங்கள் மற்றும் ராணுவ வாகனங்களை செய்து வருகிறது. ஆரம்பத்தில் ரயில் இன்ஜின்களை உற்பத்தி செய்து வந்த இந்நிறுவனம் பின்னர் அனைத்து வாகன பிரிவிலும் நுழைந்து வெற்றியும் கண்டது. 2004ம் ஆண்டில் தென்கொரியாவின் டாவோ நிறுவனத்தை கையகப்படுத்தியதும், 2008ம் ஆண்டு வாக்கில் போர்டு நிறுவனத்திடமிருந்து ஜாக்குவார் லேண்ட் ரோவர்(JLR) நிறுவனத்தை வாங்கியதும் டாட்டா மோட்டார்ஸின் சிறப்பம்சம்.

நன்றாக தொழில் செய்து கொண்டிருந்த டாட்டா நிறுவனத்திற்கு ஜாக்குவார் லேண்ட் ரோவர் சேவையின் மூலம் சிக்கல்கள் ஏற்பட்டது. துணை நிறுவனமான ஜாக்குவார் தொழிலுக்காக டாட்டா மோட்டார்ஸ் தனது செலவுகளை அதிகப்படுத்தியது. கடந்த 2019ம் ஆண்டு சீனாவில் விற்பனையில் பெருத்த சரிவை சந்தித்தது. அந்த ஆண்டில் மட்டும் ஜாக்குவார் மூலம் டாட்டா மோட்டார்ஸ் நிறுவனத்திற்கு சுமார் 3.9 பில்லியன் டாலர்கள் அளவுக்கு முதலீட்டு இழப்பு ஏற்பட்டது.

டாட்டா நிறுவனம், ஜே.எல்.ஆர். (Jaquar Land Rover) சேவையை விற்க உள்ளதாக ஊடகங்களில் சொல்லப்பட்டாலும் டாட்டா இதனை மறுத்து வந்தது. உண்மையில் டாட்டா நிறுவனம் எதிர்பார்த்தது, ஜாக்குவாருக்கான ஒரு நல்ல கூட்டாளி நிறுவனத்தை தான். இதனால் விற்பனை சரிவை கட்டுப்படுத்துவதுடன், முதலீட்டையும் பெருக்கலாம் என எதிர்பார்க்கிறது.

மின்னணு வாகன பிரிவில் டாட்டா மோட்டார்ஸ் நிறுவனத்தின் பங்கு முக்கியத்துவமானது. 2008ம் ஆண்டில் நார்வே நாட்டை சேர்ந்த எலக்ட்ரிக் வாகன தொழில்நுட்பத்தின் 50 சதவீத பங்குகளை டாட்டா மோட்டார்ஸ் வாங்கியது. 2010ம் ஆண்டில் டெல்லி போக்குவரத்து கழகத்திற்கு சி.என்.ஜி. மின்னணு ஹைபிரிட் வாகனங்களை டாட்டா வழங்கியது. நாட்டின் பொது போக்குவரத்தில் சுற்றுச்சூழலை கருத்தில் கொண்டு தயாரிக்கப்பட்ட முதல் பேருந்து(Electric Buses) என சொல்லப்பட்டது.

கடந்த 2019ம் ஆண்டின் டிசம்பர் மாதத்தில் 30 Kwh லித்தியம் அயன் பேட்டரி கொண்ட நெக்சான் வாகனங்களை சந்தையில் அறிமுகப்படுத்தியது. 60 நிமிட சார்ஜில் சுமார் 300 கிலோமீட்டர் வரை பயணம் செய்யலாம் என்ற கூடுதல் தகவலையும் டாட்டா மோட்டார்ஸ் வெளியிட்டது. கடந்த சில வருடங்களாக இந்நிறுவனம் ஆராய்ச்சி மற்றும் மேம்பாட்டுக்காக கோடிகளில் முதலீடு செய்து வருகிறது. இந்த ஆராய்ச்சி வரும் 2021ம் ஆண்டில் முடிவுக்கு வரும் எனவும், அதன் பின்னர் சந்தையில் அதன் தொழில்நுட்பம் வருவாயை ஈட்டும் எனவும் சொல்லப்படுகிறது.

டாட்டா மோட்டார்ஸ் நிறுவனத்தின் சந்தை மதிப்பு 45,200 கோடி ரூபாய். நிறுவனத்தின் கடன்-பங்கு விகிதம்(Debt to Equity) 2க்கு மேல். கடன் மட்டும் சுமார் ரூ. 1.24 லட்சம் கோடி. கடந்த மூன்று வருடங்களாக இந்நிறுவனம் நஷ்டத்தை மட்டுமே சந்தித்து வருகிறது. மூன்று வருட காலத்தில் 7 காலாண்டுகளில் நிகர நஷ்டத்தை கொண்டிருக்கிறது டாட்டா மோட்டார்ஸ். 2019-20ம் நிதியாண்டு அறிக்கையின் படி நிறுவனத்தின் நீண்ட கால கடன் மட்டும் ரூ.1.18 லட்சம் கோடி.

ஆகஸ்ட் 2016க்கு பிறகு இந்த பங்கின் விலை தற்போது வரை 80 சதவீதம் வீழ்ச்சி கண்டுள்ளது. சமீபத்தில் நடந்த கூட்டத்தில் பேசிய நிறுவனத்தின் தலைவர் திரு. சந்திரசேகரன், ‘ நிறுவனத்திற்கு நிகர வாகன கடனாக(Net Automotive Debt) 48,000 கோடி ரூபாய் உள்ளது. அடுத்த மூன்று வருடங்களில் இந்த கடன் குறைக்கப்பட்டு, நிறுவனம் கடனில்லா நிறுவனமாக (Near Zero Debt) மாறுவதற்கு இலக்கு நிர்ணயிக்கப்பட்டுள்ளது. இது போல 2022ம் நிதியாண்டு முதல் நிறுவனம் லாபத்திற்கு செல்லும்’ எனவும் கூறியுள்ளார்.

கடந்த இரண்டு ஆண்டுகளாக சுணக்கத்தில் இருந்த இந்திய வாகன துறை கொரோனா காலத்தின் ஊரடங்கு நாட்களில் அதிக விற்பனை சரிவை சந்தித்தது. முக்கிய வாகன நிறுவனங்கள் முதன்முறையாக நஷ்டத்தையும் கண்டுள்ளது குறிப்பிடத்தக்கது. டாட்டா மோட்டார்ஸ் நிறுவனம் ஜாக்குவாருக்கான முதலீட்டு அளவை குறைக்கும் முடிவை எடுத்துள்ளது. சுற்றுச்சூழல் மற்றும் வாகனங்களுக்கான புதிய கொள்கைகள் வந்திருக்கும் நிலையில் டாட்டா மோட்டார்ஸ் சொல்லப்பட்ட காலத்தில் தனது கடனை குறைக்குமா அல்லது முதலீட்டாளர்களிடையே வெறும் செய்தியாக சொல்லப்பட்டு, பங்கு விலை ஏற்றப்படுமா என்பதனை பொறுத்திருந்து தான் பார்க்க வேண்டும்.

குறிப்பு: பொதுவாக பங்குச்சந்தையில் உள்ள நிறுவனத்தின் சந்தை மதிப்பு அதிகரிப்பதன் மூலம் அதன் கடன்-பங்கு விகிதம் குறைவாக காணப்படும். மற்றுமொரு கூடுதல் தகவல், ஜியோ நிறுவனத்தில் செய்யப்பட்ட முதலீட்டு செய்தியால்ரிலையன்ஸ் இண்டஸ்ட்ரீஸ் நிறுவனத்தின் சந்தை மதிப்பு தற்போது 14 லட்சம் கோடி ரூபாயாக அதிகரித்துள்ளது கவனிக்கத்தக்கது.

வாழ்க வளமுடன்,

நன்றி, வர்த்தக மதுரை 

www.varthagamadurai.com