All posts by skatzsaravana

Value Investor, Entrepreneur and Founder of Varthaga Madurai, Rich Investing iDEAS
Think Invest

முதலீட்டாளராக தெரிந்து கொள்ள வேண்டிய ஐந்து கணித கணக்கீடுகள்

Leave a comment

முதலீட்டாளராக தெரிந்து கொள்ள வேண்டிய ஐந்து கணித கணக்கீடுகள் 

5 Basic Formulas for Investment Beginners 

பொதுவாக நம்மில் பெரும்பாலோருக்கு இருக்கும் குழப்பம் சேமிப்பும், முதலீடும் ஒன்று என எண்ணிக்கொள்வது தான். சேமிப்பு எனும் போது நாம் நம் வீட்டில் உள்ள ஒரு உண்டியலில் போட்டு வைப்பது, அருகில் உள்ள அஞ்சலகத்தில் சேமிப்பது, வங்கிக்கணக்கில் டெபாசிட் மூலம் சேமிப்பது என சொல்லலாம். இவை பெரும்பாலும் பணவீக்கத்தை தாண்டி வளராது. முதலீடு எனும் போது நீண்டகாலத்தில் முதலீட்டு பெருக்கத்தை(Capital Appreciation) ஏற்படுத்தும். அது மட்டுமில்லாமல் அவ்வப்போது தொடர் வருவாயை(Income) அளிக்கும் வாய்ப்பும் முதலீட்டில் கிட்டும்.

மேலும் பணவீக்கத்தை காட்டிலும் அதிக வருவாய் பெறுவதற்கு முதலீடு செய்தால் மட்டுமே சாத்தியம். முதலீட்டு சாதனம் எனும் போது தொழில் புரிவது(Business), பங்குகள், மியூச்சுவல் பண்டுகளில் சில திட்டங்கள், ரியல் எஸ்டேட், புதிய தொழில்நுட்பங்களை(Passive income) கற்று கொள்வதன் மூலம் சாத்தியப்படும். இவற்றில் தங்கம் ஒரு சேமிப்பாகவோ அல்லது முதலீடாகவோ கருதப்படாது. அதே வேளையில் தங்கத்தின் விலை நீண்டகாலத்தில் பணவீக்கத்தை சரிக்கட்ட உதவக்கூடும்.

நீங்கள் செய்வது சேமிப்பாக இருந்தாலும் சரி, முதலீடாக இருந்தாலும் அனைத்து வகையான நிலைகளுக்கும் சில பொதுவான கணித கணக்கீடுகள் பொருந்தும். இந்த கணக்கீடுகள் நாம் பள்ளிக்காலத்தில் கற்ற ஃபார்முலா தான். மிகவும் சலிப்பாக காணப்படும் கணித வகுப்புக்கள் தான் பின்னாளில் நாம் சம்பாதிக்கும் போது தேவைப்படுகிறது. எல்லோராலும் பணம் சம்பாதிக்க முடியும், செலவழிக்கவும் முடியும். ஆனால் முதலீடு செய்யும் போதும், கடன் வாங்க செல்லப்போகும் போது தான் நாம் கணக்கியலை எதிர்பார்க்கிறோம்.

‘ நான் செய்த முதலீட்டிற்கு எவ்வளவு வட்டி தொகை கிடைக்கும், வாங்கிய கடனுக்கு மாத இ.எம்.ஐ. எப்படி ‘ என கேள்வி கேட்க துவங்கும் போது நமக்கு பள்ளிக்கால கூட்டு வட்டி நியாபகம் வரலாம். ஒரு முதலீட்டாளராக அல்லது கடன் பெறுபவராக நீங்கள் இருப்பின், சொல்லக்கூடிய ஐந்து கணித சூத்திரங்கள் உங்களுக்கு பயனளிக்கும்.

முதலீட்டின் மீதான நிகர வருவாய்(Absolute Returns):

இதனை ஒரு முழுமையான வருவாய் என கூறலாம். நீங்கள் முதலீடு செய்த தொகைக்கு ஒரு குறிப்பிட்ட காலத்தில் கிடைக்கப்பெறும் வருவாயாகும். கூட்டு வட்டியாக சொல்லப்படாமல், ஒரு குறிப்பிட்ட காலத்தில் கிடைக்க கூடிய நிகர வருவாய்க்கு சதவீதத்தில் சொல்லப்படும். வங்கி டெபாசிட், மியூச்சுவல் பண்டுகள், பங்குகள், ரியல் எஸ்டேட் அல்லது தங்கத்தில், குறிப்பிட்ட கால அளவில் ஈட்டப்படும் வருவாய்.

உதாரணமாக, நீங்கள் ஒரு குறிப்பிட்ட மியூச்சுவல் பண்டு திட்டத்தில் 2019ம் ஆண்டின் ஜனவரி ஒன்றாம் தேதி 1 லட்ச ரூபாயை முதலீடு செய்துள்ளீர்கள் என வைத்து கொள்வோம். 2020ம் ஆண்டின் மார்ச் 5ம் தேதிப்படி உங்களது கணக்கில் ரூ.1,22,000 உள்ளது. அதாவது ரூ.1 லட்சம் முதலீட்டிற்கு 22,000 ரூபாய் லாபமாக காணப்படுகிறது. இதனை நாம் செய்த முதலீட்டிற்கான வருவாய் எனலாம். லாப அடிப்படையில் உங்களது வருவாய் 22 சதவீதமாக உள்ளது.

முதலீடு – ரூ.1,00,000 (Original Investment)

முதலீட்டுக்கான வருவாய்(ROI) – ரூ.22,000 (மார்ச் 5ம் தேதிப்படி)

Absolute Returns % = (Return on Investment / Original Investment) X 100

= (22000/100000) X 100

முதலீட்டின் மீதான நிகர வருவாய் விகிதம் – 22 %

முதலீட்டின் மீதான வருடாந்திர வருவாய் விகிதம்(Annualized Returns):

நீங்கள் செய்த முதலீட்டிற்கான வருவாய் ஆண்டு அடிப்படையில் கணக்கிடப்படுவது, வருடாந்திர வருவாய் விகிதம் எனப்படும்.

உதாரணமாக நீங்கள் ஒரு வங்கியில் ஒரு லட்ச ரூபாயை டெபாசிட் செய்துள்ளீர்கள். ஒரு வருடத்தின் முடிவில் உங்களுக்கு கிடைக்க கூடிய முதிர்வு தொகை ரூ.1,07,185 (முதலீடும் சேர்த்து) எனில், உங்களது வருடாந்திர வருவாய் விகிதம் – 7.185 %

Annualized Returns % = (ROI / OI) X 100 X (1 / Holding period of investment in years)

முதலீடு – ரூ. 1 லட்சம்

முதலீட்டுக்கான வருவாய் – ரூ.7,185

வைத்திருக்கும் காலம்(Holding Period) – 1 Year

வருடாந்திர வருவாய் விகிதம் = (7185/100000) X 100 X (1/1) = 7.185 %

இதுவே, நீங்கள் சொல்லப்பட்ட முதலீட்டை மூன்று வருடம் வைத்திருக்கும் நிலையில், உங்களுக்கு கிடைக்கக்கூடிய முதிர்வு தொகை ரூ.1,23,500 எனில், வருடாந்திர வருவாய் விகிதம் ?

முதலீடு – ரூ. 1 லட்சம்

முதலீட்டுக்கான வருவாய் – ரூ.23,500

வைத்திருக்கும் காலம்(Holding Period) – 3 Years

வருடாந்திர வருவாய் விகிதம் = (23500/100000) X (1/3) = 7.83 %

பணவீக்கத்தை சரிக்கட்டக்கூடிய வருவாய் (Inflation adjusted returns):

முதலீட்டை பொறுத்தவரை நீங்கள் பணவீக்கத்தை தாண்டிய வருவாயை ஈட்ட முடியவில்லையெனில், அதனால் பாதிக்கப்படுவது உங்களுக்கான குறித்த நேர நிதி இலக்குகள் தான். பாதுகாப்பான சேமிப்பு என குறைந்த வருவாய் கொண்ட திட்டத்தில் நீங்கள் நீண்டகாலத்தில் முதலீடு செய்யும் போது, அது விலைவாசியை சரி செய்யாது. இதன் காரணமாக உங்களுக்கு தேவையான தொகையில் பற்றாக்குறை ஏற்படும். இதனை ஒரு முதலீட்டு இழப்பாக சொல்லலாம். எனவே, பணவீக்கத்தை சரிக்கட்ட கூடிய வருவாயாக இருப்பதை உறுதி செய்த கொள்ள வேண்டும்.

உதாரணமாக நீங்கள் 10 சதவீதம் வருமானம் தரக்கூடிய முதலீட்டு திட்டத்தில் ஒரு லட்ச ரூபாயை முதலீடு செய்வதாக வைத்து கொள்வோம். பணவீக்கம் 4 சதவீதமாக இருந்தால், உங்களுக்கான உண்மையான வருவாய் 5.76 சதவீதமே…

Inflation Adjusted Returns % = (1 + Investment returns %) / (1 + Inflation rate %) – 1

= (1 + 10 %) / (1 + 4 %) – 1

= (1.10) / (1.04) – 1

= 5.76 %

மற்றொரு உதாரணம், வங்கி டெபாசிட் மூலம் உங்களுக்கு கிடைக்கக்கூடிய வட்டி விகிதம் 6 சதவீதமாக இருந்து, பணவீக்கமும் 7 சதவீதமாக சொல்லப்பட்டால்… உங்களுக்கு முதலீட்டு இழப்பு தான்.

= (1 + 6%) / (1 + 7%) – 1

= (1.06) / (1.07) – 1

= (- 0.93) %

வரியை சரிக்கட்டக்கூடிய வருவாய் (Tax adjusted Returns):

முதலீட்டின் மூலம் கிடைக்கும் வருவாய்க்கு பணவீக்கம் ஒரு மறைமுக சுமை என்றால், நேரடி சுமையாக வரி விதிப்புகள் இருக்கும். பணவீக்கமும், வரிகளும் இருமுனை கத்தி போல. இதனை சரிக்கட்டி விட்டு, உங்களால் வருவாய் ஈட்ட முடிந்தால், அது தான் சிறந்த முதலீட்டு சாதனமாக கருதப்படும்.

சம்பாதித்த வருமானம் வரிக்கு உட்பட்டதாக இருக்கும் நிலையில், எந்தவொரு முதலீட்டிற்கும் வரித்தொகையை கணக்கிடுவது அவசியம். நீங்கள் வரி செலுத்துபவராக இருந்தால், பெரும்பாலும் வங்கி டெபாசிட் மூலம் கிடைக்க கூடிய வருவாய் வரி செலுத்துவதற்கே போதுமானதாக இருக்கும் நிலை காணப்படுகிறது.

உதாரணமாக, நீங்கள் செய்யும் முதலீட்டில் 10 சதவீத வருமான வாய்ப்பு இருந்து, அதே வேளையில் 30 சதவீத வருமான வரி செலுத்துபவராக இருப்பின், உங்களுடைய வரிக்கு பிந்தைய வருவாய் 7 சதவீதமாக தான் இருக்கும்.

Tax adjusted returns % = Earned Interest rate X (1 – Tax rate %)

வட்டி விகிதம் – 10 %

வரி விகிதம் – 30 %

= 0.10 X (1 – 0.30)

= 0.07

= 7 %

இதனை மற்றுமொரு உதாரணம் மூலம் ஒப்பிட்டு பார்க்கலாம். ஒரு வங்கி டெபாசிட் திட்டத்தில் உங்களுக்கான வட்டி ஆண்டுக்கு 8 சதவீதமாக சொல்லப்படுகிறது. இன்னுமொரு வரி சேமிப்பு பத்திரத்தில் ஆண்டுக்கு 7 சதவீதம் கிடைக்க பெறுகிறது. மேலும் குறிப்பிட்ட பங்குகளில் நீங்கள் முதலீடு செய்தால் ஆண்டுக்கு 10 சதவீத ஈவுத்தொகை(Dividend) கிடைக்கும்.

மேலே சொன்ன மூன்று சாதனங்களில், உங்களுடைய வரிக்கு பிந்தைய வருவாய் (30% வரி விதிப்பு),

வங்கி டெபாசிட் (FD) – 5.6 %

வரி சேமிப்பு பத்திரம்(Tax saving bonds) – 7% (வரி விலக்கு)

பங்குகள்(Dividend on Shares) – 10% (ஆண்டுக்கு ரூ.5,000க்கு குறைவாக இருக்கும் நிலையில், வரி இல்லை)

கூட்டு வருடாந்திர வளர்ச்சி விகிதம் (CAGR):

CAGR முறை பொதுவாக வருடாந்திர கூட்டு வட்டி அடிப்படையில் வருவாயை கணக்கிட பயன்படுகிறது. அதாவது ஒவ்வொரு காலத்திலும் கிடைக்க கூடிய வட்டி வருவாய், மறுமுதலீடு செய்யப்பட்டால் வட்டிக்கு வட்டி கிடைப்பதை இந்த முறை சொல்கிறது.

Compounded Annual Growth Rate(CAGR) = (Ending Value / Beginning Value) ^ (1 / No. of years)

2015ம் ஆண்டின் ஜனவரி மாதத்தில், நீங்கள் நல்ல நிறுவன பங்கு ஒன்றில் ஒரு லட்ச ரூபாயை முதலீடு செய்கிறீர்கள். அப்போதைய நிலையில் பங்கு ஒன்றின் விலை ரூ.100. 2020ம் ஆண்டின் ஜனவரி மாதத்தில் அந்த பங்கின் விலை ரூ.200 க்கு வர்த்தகமானது என வைத்து கொள்வோம். இப்போது ஜனவரி 2020 காலத்தின் படி, உங்களுடைய கூட்டு வருடாந்திர வளர்ச்சியை கண்டுபிடிப்போம்.

Ending Value – ரூ.200

Beginning Value – ரூ.100

வைத்திருக்கும் காலம் – 5 வருடங்கள்

= (200/100) ^ (1/5) – 1

=  (2) ^ (0.2) – 1

= 1.1486 – 1

= 0.1486

= 14.86 %

வைத்திருக்கும் காலம்: 

நீங்கள் கணக்கிடுவது வருடங்கள் அடிப்படையில் என்றால், அது 1 / No. of years ஆக இருக்க வேண்டும்.

மாதங்களாக இருந்தால், 12 / No. of months

நாட்களாக இருந்தால், 365 / No. of Days

மேலே சொல்லப்பட்ட ஐந்தும் எந்தவொரு முதலீட்டாளருக்கும், முதலீட்டு சாதனத்திற்கும் தேவையான அடிப்படை கணக்கீடுகள் ஆகும். எனவே முதலீடு செய்யும் முன், பணவீக்க விகிதம் மற்றும் உங்களது வருமான வரி விகிதத்தை கணக்கிட்டு கொள்ளுங்கள்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Stock Analysis

பினோலக்ஸ் கேபிள்ஸ் – பங்குச்சந்தை அடிப்படை பகுப்பாய்வு அலசல்

Leave a comment

பினோலக்ஸ் கேபிள்ஸ் – பங்குச்சந்தை அடிப்படை பகுப்பாய்வு அலசல் 

Finolex Cables – Fundamental Analysis – Stock Market

1958ம் ஆண்டு சாப்ரியா சகோதரர்களால் ஆரம்பிக்கப்பட்ட நிறுவனம் பினோலக்ஸ். துவக்கத்தில் மின் கேபிள்களை விற்கும் சிறிய கடையை அமைத்த இவர்கள் பின்பு தொழிற்துறை மற்றும் பாதுகாப்பு துறை சார்ந்த கேபிள்களை தயாரிக்க முடிவு செய்தனர். வாகன துறைக்கு தேவையான பி.வி.சி. காப்பிடப்பட்ட(PVC Insulated) கேபிள்களை தயாரித்து விற்பனை செய்து வந்தனர்.

நிறுவனத்தில் ஏற்பட்ட தொடர்ச்சியான விரிவாக்கம் மற்றும் நவீனமயமாக்கல் நிலையை வாய்ப்பாக பயன்படுத்தி பினோலக்ஸ் நல்ல வளர்ச்சியை கண்டது. 1980ம் ஆண்டுக்கு பிறகு நாட்டின் மிகப்பெரிய கேபிள் உற்பத்தியாளராக தன்னை வடிவமைத்து கொண்டது இந்த நிறுவனம். 1981ம் ஆண்டு பினோலக்ஸ் இண்டஸ்ட்ரீஸ் லிமிடெட்(FIL) நிறுவப்பட்டது. விவசாய துறைக்கு தேவையான பி.வி.சி. உயர்ரக குழாய்கள்(Pipes), பி.வி.சி. பிசின் உற்பத்தி(Resin) மையம், குறைந்த மின்னழுத்த கேபிள்கள் என தனது தயாரிப்பு நிலையை உயர்த்தி கொண்டது.

1983ம் வருடம் பினோலக்ஸ் கேபிள் நிறுவனம் பொது பட்டியலிடப்பட்ட நிறுவனமாக மாற்றப்பட்டு, பங்குச்சந்தைக்கு வந்தது. இந்த துறையில் காணப்பட்ட உலகின் பெரு நிறுவனங்களுடன் கூட்டாக இணைந்து ஜெல்லி நிரப்பப்பட்ட தொலைபேசி கேபிள்கள், ஒளியியல் இழை(Optical Fibre), செப்பு கம்பி(Copper Rod) ஆலை என தனது தொழிலை விரிவாக்கம் செய்து கொண்டது. 2000ம் ஆண்டுக்கு பிறகு ஒளியியல் இழை, கண்ணாடி இழை, விளக்குகள் மற்றும் மின் சுவிட்சுகள் தயாரிப்பில் தனக்கென முக்கிய இடத்தை பிடித்து கொண்டது பினோலக்ஸ்.

2011ம் ஆண்டில் ஜப்பானை சேர்ந்த சுமிட்டோமோ நிறுவனத்துடன் கூட்டு ஒப்பந்த அடிப்படையில் உற்பத்தி ஆலைகள், 2014ம் ஆண்டில் 5.5 மெகாவாட் திறன் சோலார் ஆலை, 2016ம் ஆண்டு வாக்கில் மின்விசிறி, நீர் சூடாக்கிகள்(Water Heaters), சுவிட்ச் கியர் என தனது உற்பத்தி ஆலைகளை பரவலாக்க செய்தது. இதன் பொருட்கள் பிரபலமான பிராண்டுகளாகவும் மாறின. மின் மற்றும் தொலைத்தொடர்பு சாதனங்கள் தயாரிப்பில் நாட்டின் தவிர்க்க முடியாத நிறுவனமாக பினோலக்ஸ் இருக்கிறது.

முதலீட்டாளர்களுக்கு செல்வத்தை அள்ளிக்கொடுத்த பங்குகளில் பினோலக்ஸ் குழுமம் உள்ளது. உலகின் மறைக்கப்பட்ட சாம்பியன்(Hidden Champion) நிறுவனங்களில் முதல் 150 இடங்களுக்குள் பினோலக்ஸ் நிறுவனம் அங்கம் வகிக்கிறது. நிறுவனத்தின் முக்கிய வாடிக்கையாளராக இந்திய ரயில்வே, பாதுகாப்பு துறை மற்றும் மெட்ரோ ரயில் நிறுவனங்கள் உள்ளது.

பினோலக்ஸ் நிறுவனத்தின் சந்தை மதிப்பு ரூ.4,200 கோடி. புத்தக மதிப்பு 178 ரூபாயாகவும், வட்டி பாதுகாப்பு விகிதம் 288 மடங்குகளிலும் உள்ளது. கடனில்லா நிறுவனமாக(Debt free) இருக்கும் பினோலக்ஸ் நிறுவனர்களின் பங்களிப்பு 36 சதவீதமாக உள்ளது. பொதுவெளியில்(Public Holding) பினோலக்ஸ் இண்டஸ்ட்ரீஸ் நிறுவனத்திடம் 15 சதவீத பங்குகள் இருப்பது குறிப்பிடத்தக்கது. நிறுவனர்கள் சார்பில் பங்குகள் அடமானம் வைக்கப்படவில்லை.

விற்பனை கடந்த ஐந்து வருடங்களில் 3 சதவீதம் மட்டுமே வளர்ந்துள்ளது. 10 வருட காலத்தில் காணும் போது இது 6 சதவீதமாக உள்ளது. லாபம், கடந்த ஐந்து வருடங்களில் 20 சதவீதமும், பத்து வருட காலத்தில் 14 சதவீதமாகவும் உள்ளது. நிறுவனத்தின் இருப்புநிலை கையிருப்பாக ரூ.2,688 கோடி சொல்லப்பட்டுள்ளது. பணவரத்தும், சொத்துக்களில் முதலீடு செய்வதும் கணிசமாக இருந்துள்ளது.

2019-20ம் நிதியாண்டு முடிவில் நிறுவனத்தின் விற்பனை ரூ.2,877 கோடியாகவும், செலவினம் 2,507 கோடி ரூபாயாகவும் இருந்துள்ளது. சொல்லப்பட்ட நிதியாண்டின் முடிவில் ரூ.402 கோடி நிகர லாபமாக உள்ளது. பங்கு மூலதனத்தின் மீதான வருவாய்(Return on Equity) கடந்த ஐந்து வருட காலத்தில் 16 சதவீதமாக இருக்கிறது.

பணப்பாய்வு முறைப்படி(DCF Valuation) இந்த பங்கின் விலை ரூ.220 – 275 (with Margin of Safety) என்ற பெறுமானத்தை அடைகிறது. நடப்பாண்டின் மார்ச் மாத சந்தை வீழ்ச்சியில் பினோலக்ஸ் நிறுவன பங்கின் விலை, பங்கு ஒன்றுக்கு 160 ரூபாய் வரை விலை இறக்கம் கண்டது. அடிப்படை பகுப்பாய்வை பூர்த்தி செய்யும் இந்த நிறுவனத்தை சந்தை வீழ்ச்சியில் கண்டு முதலீடு செய்திருந்தால், தற்போதைய விலையில் 60 சதவீத ஏற்றமாக அமைந்திருக்கும்.

சமீப காலங்களில் நிர்வாகம் மற்றும் போட்டியாளர் சார்ந்த சவால்களை பினோலக்ஸ் நிறுவனம் சந்தித்து வருகிறது. இதனை களையும் நிலையில், பினோலக்ஸ் நிறுவன பங்கு முதலீட்டாளர்களுக்கு வாய்ப்பாக அமையும். சுமார் 30,000 டீலர்கள் மற்றும் 4000க்கும் மேற்பட்ட விநியோகஸ்தர்களை கொண்டிருக்கும் இந்நிறுவனம் இந்திய சந்தையில் முக்கியத்துவம் வாய்ந்த நிறுவனமாக பார்க்கப்படுகிறது.

கவனிக்க: முதலீட்டாளர்கள், பங்குகளை வாங்கும் முன் தகுந்த நிதி ஆலோசகர் அல்லது பங்கு ஆலோசகரின் முன்னிலையில் தங்களது முதலீட்டு முடிவை எடுக்குமாறு அறிவுறுத்தப்படுகிறது. மேலே சொன்ன தகவல்கள் பங்குச்சந்தை அடிப்படை பகுப்பாய்வுக்கான கற்றல் மட்டுமே.

வாழ்க வளமுடன்,

நன்றி, வர்த்தக மதுரை

www.varthagamadurai.com

Paisa News

டி.வி.எஸ். மோட்டார்ஸ் காலாண்டு நிகர லாபம் – ரூ.180 கோடி

Leave a comment

டி.வி.எஸ். மோட்டார்ஸ் காலாண்டு நிகர லாபம் – ரூ.180 கோடி 

TVS Motors reported a net profit of Rs.180 Crore – Q2FY21

தமிழகத்தை தலைமையிடமாக கொண்ட இந்திய பன்னாட்டு நிறுவனமான டி.வி.எஸ். மோட்டார்ஸ் கடந்த 1978ம் ஆண்டு துவங்கப்பட்டது. நாட்டின் 2வது மிகப்பெரிய வாகன ஏற்றுமதி நிறுவனமாக டி.வி.எஸ். மோட்டார்ஸ் உள்ளது. பில்லியன் டாலர் வருவாயை கொண்டிருக்கும் இந்நிறுவனம் 2019-20ம் நிதியாண்டு முடிவில் 18,849 கோடி ரூபாயை விற்பனையாகவும், 625 கோடி ரூபாயை நிகர லாபமாகவும் கொண்டிருந்தது.

சுமார் 60க்கும் மேற்பட்ட நாடுகளுக்கு வாகனங்களை ஏற்றுமதி செய்யும் இந்நிறுவனம் பல பிராண்டுகளை சந்தையில் உருவாக்கியுள்ளது. வியாழக்கிழமை(29-10-2020) அன்று நிறுவனம் தனது இரண்டாம் காலாண்டு முடிவுகளை(Quarterly results) வெளியிட்டிருந்தது. செப்டம்பர் மாதத்துடன் முடிவடைந்த காலாண்டில் நிறுவனத்தின் வருவாய் ரூ.5,254 கோடியாகவும், செலவினம் 5,010 கோடி ரூபாயாகவும் சொல்லப்பட்டுள்ளது. இதர வருமானமாக 15 கோடி ரூபாயும், நிகர லாபம் 180 கோடி ரூபாயாகவும் உள்ளது.

நிறுவனத்தின் சந்தை மதிப்பு 20,100 கோடி ரூபாய். புத்தக மதிப்பு 69 ரூபாயாகவும், கடன்-பங்கு விகிதம் 3.50 ஆகவும் உள்ளது. நிறுவனத்தின் கடன் ரூ.11,350 கோடி, அதன் கடன்-பங்கு(Debt to Equity) தன்மை மோசமாக உள்ளது கவனிக்கத்தக்கது. வட்டி பாதுகாப்பு விகிதமும் 1.5 மடங்குகளில் இருப்பது போதுமானதாக இல்லை. நிறுவனர்களின் பங்களிப்பு 57 சதவீதமாகவும், அவர்கள் சார்பில் பங்குகள் அடமானம் எதுவும் வைக்கப்படவில்லை.

விற்பனை வளர்ச்சி கடந்த ஐந்து வருடங்களில் 13 சதவீதமாகவும், 10 வருடங்களில் 15 சதவீதமாகவும் இருந்துள்ளது. லாபம், கடந்த ஐந்து வருட காலத்தில் 18 சதவீதமாகவும், 10 வருடங்களில் 34 சதவீதமாக உள்ளது குறிப்பிடத்தக்கது. பங்கு மூலதனத்தின் மீதான வருவாய்(ROE), ஐந்து வருட காலத்தில் 25 சதவீதம் வளர்ச்சி பெற்றுள்ளது.

நிறுவனத்தின் இருப்புநிலை கையிருப்பு ரூ.3,235 கோடி என சொல்லப்பட்டுள்ளது. நிறுவனத்திற்கான பணவரத்து(Free Cash Flow) எதிர்மறையாக உள்ளது. இருப்பினும் நிலையான சொத்துக்களை வாங்குவதில் கணிசமான அளவு முதலீடு செய்யப்பட்டு வருகிறது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Webinar

துறை சார்ந்த பங்குச்சந்தை அடிப்படை கற்றல்

Leave a comment

துறை சார்ந்த பங்குச்சந்தை அடிப்படை கற்றல்

வர்த்தக மதுரை சார்பாக பங்குச்சந்தை சார்ந்த தொழில் அடிப்படை கற்றலுக்கு(இணைய வழி) வரவேற்கிறோம்…

பங்குச்சந்தையில் ஈடுபட்டு வரும் முதலீட்டாளர்களுக்கும், பங்குச்சந்தையில் புதிதாக முதலீடு செய்ய உள்ளவர்களுக்கும் இந்த அடிப்படை கற்றல் உதவும்.

வார இறுதி நாட்களில் (சனிக்கிழமை அல்லது ஞாயிற்றுக்கிழமை) துறை சார்ந்த அடிப்படை வகுப்புக்கள் நடத்தப்படும். தொடர்ச்சியாக ஐந்து வாரங்களின் இறுதி நாட்கள், நான்கு துறைகள் மற்றும் அதனை சார்ந்த 10 முக்கிய பங்குகள் என அடிப்படை அலசல்கள் அமையும்.

உங்களை சுற்றியுள்ள நுகர்வு பொருட்கள் மற்றும் சேவைகளின் வாயிலாக பங்குச்சந்தையில் உள்ள ஒரு நிறுவன பங்கினை எவ்வாறு புரிந்து கொள்வது, அவை அளிக்கும் எண்ணிலடங்கா வாய்ப்புகள் மற்றும் அதன் மூலம் முதலீட்டு பெருக்கத்தை ஏற்படுத்துவது என்பதை சொல்லி கொடுக்க உள்ளோம்.

நிகழ்வில் எந்த தனிப்பட்ட பங்குகளையும் வாங்குவதற்கோ அல்லது விற்பதற்கோ பரிந்துரைப்பதில்லை. மாறாக, கற்றலின் மூலம் நீங்களே நல்ல நிறுவன பங்குகளை கணடறிவதற்கான வழிகாட்டியாக இந்த நிகழ்வு அமையும்.

Stock Insights - Meet II

பங்குகளை எந்த விலையில் வாங்க வேண்டுமென தெரியவில்லையா ?

அதிக வருவாய் தரும் துறைகள் மற்றும் பங்குகளை கண்டறிவது எப்படி ?

உங்களை சுற்றி காணப்படும் பங்குச்சந்தை நிறுவனங்களின் வாய்ப்புகள் மற்றும் லாபம் பார்ப்பது எப்படி ?

பங்குச்சந்தையில் கிடைக்கப்பெறும் தகவல்களை சரியான நிலையில் பயன்படுத்தி நஷ்டத்தை தவிர்ப்பது எவ்வாறு ?

வருகை தாருங்கள்…

பதிவு செய்ய: Stock Insights – Registration

நிகழ்வு நடைபெறுவதற்கான தேதி மற்றும் நேரம் உங்களது மின்னஞ்சல் மற்றும் கைபேசிக்கு குறுஞ்செய்தியாக அனுப்பப்படும்.

வாழ்க வளமுடன்,

நன்றி, வர்த்தக மதுரை,

www.varthagamadurai.com

Disclaimer: Not a SEBI Registered Investment Adviser (RIA), However we are engaging with the Share Broking services, Mutual Fund Distribution, Insurance and more on as a Financial Consultant in the Personal Finance.

Paisa News, Stock Analysis

கேஸ்ட்ரால் இந்தியா(Castrol India) காலாண்டு நிகர லாபம் ரூ.205 கோடி

Leave a comment

கேஸ்ட்ரால் இந்தியா(Castrol India) காலாண்டு நிகர லாபம் ரூ.205 கோடி 

Castrol India reported a net profit of Rs.205 Crore – Q3CY21

லண்டனை தலைமையிடமாக கொண்ட பிரிட்டிஷ் பெட்ரோலிய(BP) நிறுவனத்தின் துணை நிறுவனம் தான் கேஸ்ட்ரால் இந்தியா. வாகன மற்றும் தொழிற்துறைக்கு தேவையான மசகு எண்ணெய் உற்பத்தியில் ஈடுபட்டிருக்கும் இந்நிறுவனம், நாட்டின் இரண்டாவது மிகப்பெரிய உற்பத்தி நிறுவனமாக(Lubricant Industry) சொல்லப்படுகிறது. நாட்டில் 70,000க்கும் மேற்பட்ட சில்லறை விற்பனை நிலையங்களை கொண்டிருக்கும் கேஸ்ட்ரால் இந்தியா கடந்த 1982ம் ஆண்டு மும்பை பங்குச்சந்தையில் பட்டியலிடப்பட்டது.

நிறுவனத்தின் சந்தை மதிப்பு 10,800 கோடி ரூபாய். இதன் புத்தக மதிப்பு 13 ரூபாய் மற்றும் வட்டி பாதுகாப்பு விகிதம் 237 மடங்குகளில் உள்ளது. கடனில்லா நிறுவனமாக(Debt Free) வலம் வரும் கேஸ்ட்ரால் இந்தியாவின் நிறுவனர்கள் பங்களிப்பு 51 சதவீதமாக உள்ளது. நிறுவனர்கள் சார்பில் பங்குகள் அடமானம் எதுவும் வைக்கப்படவில்லை.

இதன் கடந்த கால ஈவுத்தொகை விகிதம்(Dividend yield) 5 சதவீதத்திற்கு மேலாக உள்ளது. நேற்று வெளியிடப்பட்ட காலாண்டு முடிவில் இடைக்கால ஈவுத்தொகையாக பங்கு ஒன்றுக்கு ரூ.2.50 என சொல்லப்பட்டுள்ளது. செப்டம்பர் காலாண்டு முடிவில் நிறுவனத்தின் வருவாய் 883 கோடி ரூபாயாகவும், செலவினம் 595 கோடி ரூபாயாகவும் உள்ளது. இதர வருமானமாக 12 கோடி ரூபாய் இருந்துள்ளது. சொல்லப்பட்ட காலாண்டில் நிறுவனத்தின் நிகர லாபம் ரூ. 205 கோடியாக உள்ளது.

முந்தைய காலாண்டுடன் ஒப்பிடும் போது, நிகர லாபம் 68 சதவீதம் வளர்ச்சியடைந்துள்ளது. முந்தைய வருடத்தின் செப்டம்பர் காலாண்டுடன் ஒப்பிடுகையில் தற்போதைய நிகர லாபம் 8 சதவீதம் வளர்ச்சி பெற்றுள்ளது. டிசம்பர் மாதத்துடன் முடிவடைந்த 2019ம் முழு ஆண்டில் நிறுவனத்தின் வருவாய் 3,877 கோடி ரூபாயாகவும், நிகர லாபம் 827 கோடி ரூபாயாகவும் இருந்துள்ளது.

விற்பனை வளர்ச்சி கடந்த ஐந்து வருட காலத்தில் 3 சதவீதமாகவும், பத்து வருட கால அளவில் 5 சதவீதமாகவும் உள்ளது. இது போல லாபம் கடந்த 5 வருடங்களில் 12 சதவீதமும், 10 வருட காலத்தில் 8 சதவீதமும் வளர்ச்சி பெற்றுள்ளது. நிறுவனத்தின் இருப்புநிலை கையிருப்பு(Reserves) 770 கோடியாக உள்ளது. பணவரத்தும்(Cash Flow) நிறுவனத்திற்கு சாதகமாக உள்ளது குறிப்பிடத்தக்கது.

வாழ்க வளமுடன்,

நன்றி, வர்த்தக மதுரை

www.varthagamadurai.com

Paisa News

வருமான வரி தாக்கலுக்கான காலக்கெடு மீண்டும் தள்ளிவைப்பு – 31, டிசம்பர் 2020

Leave a comment

வருமான வரி தாக்கலுக்கான காலக்கெடு மீண்டும் தள்ளிவைப்பு – 31, டிசம்பர் 2020

Income Tax Return Filing last date extended to 31st December, 2020 – AY 2020-21

கொரோனா பெருந்தொற்று காரணமாக ஏற்பட்ட ஊரடங்கின் போது, வருமான வரி தாக்கல் செய்வதில் உள்ள சிக்கலை தவிர்க்கும் பொருட்டு, வரி தாக்கல் செய்வதற்கான காலக்கெடுவை கடந்த சில மாதங்களாக மத்திய நிதி அமைச்சகத்தின் சார்பில் தள்ளி வைக்கப்பட்டது. 2013-14ம் நிதியாண்டு முதல் வருமான வரி தாக்கல் செய்திருந்தும், மின்னணு முறையில் சரிபார்ப்பை(E verification) உறுதி செய்யாதவர்களுக்காக கடந்த செப்டம்பர் மாதம் வரை மீண்டும் ஒரு முறை வாய்ப்பு அளிக்கப்பட்டிருந்தது.

கடந்த செப்டம்பர் 30ம் தேதி வெளியிடப்பட்ட மற்றொரு அறிவிப்பில் 2018-19ம் நிதியாண்டுக்கான (மதிப்பீட்டு ஆண்டு AY 2019-20) வருமானத்திற்கு வரி தாக்கல் செய்யாதவர்களுக்கும் சலுகை அறிவிக்கப்பட்டுள்ளது. அதன் படி, நவம்பர் 30, 2020 வரை வருமான வரி தாக்கல் செய்யலாம் எனவும் சொல்லப்பட்டுள்ளது.

தற்போது மேலும் ஒரு அறிவிப்பில், 2019-20ம் நிதியாண்டில் ஈட்டிய வருவாய்க்கான வரி தாக்கல் காலக்கெடு நடப்பு நவம்பர் மாதம் 30ம் தேதியாக இருந்த நிலையில் வரும் டிசம்பர் 31 வரை நீட்டித்துள்ளது. இதுவரை வருமான வரி தாக்கல் செய்யாதவர்கள் (FY 2019-20) டிசம்பர் 31, 2020 வரை உள்ள காலக்கெடுவை பயன்படுத்தி கொள்ளலாம்.

தனிநபர் ஒருவர் முந்தைய ஆண்டுக்கான வருவாய்க்கு, வருமான வரி தாக்கல் செய்திருந்தாலும் மின்னணு முறையில் சரிபார்ப்பு செய்தால் மட்டுமே, அது முழுமையாக முடிவடைந்த வரி தாக்கலாக ஏற்றுக்கொள்ளப்படும். சொல்லப்பட்ட ஒரு நிதியாண்டில் உங்களுடைய மொத்த வருமானம் ரூ. 2.50 லட்சத்திற்கு அதிகமாக இருக்கும் நிலையில், வருமான வரி தாக்கல் செய்ய வேண்டியது கட்டாயம்.

உங்கள் வருமானத்தில் வரி பிடித்தம் செய்யப்படவில்லை என்றாலும், ஆண்டு வருமானம் ரூ. 2.50 லட்சத்தை தாண்டிய நிலையில் வரி தாக்கல் செய்ய வேண்டும். இரு வகையான வருமானத்தை கொண்டிருப்பவர்களும்(Pensioner cum Employee) தங்களது வருவாய் சரிபார்த்து விட்டு, தேவைப்பட்டால் வரி தாக்கல் செய்வது அவசியமாகும்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Paisa News, Stock Analysis

ஏசியன் பெயிண்ட்ஸ் காலாண்டு நிகர லாபம் – ரூ. 830 கோடி

Leave a comment

ஏசியன் பெயிண்ட்ஸ் காலாண்டு நிகர லாபம் – ரூ. 830 கோடி 

Asian Paints reported a Net Profit of Rs. 830 Crore in Q2FY21

இந்திய பன்னாட்டு நிறுவனமான ஏசியன் பெயிண்ட்ஸ் கடந்த 1942ம் வருடம் துவங்கப்பட்டது. பெயிண்ட் துறையில் உள்ள இந்நிறுவனம் பெயிண்ட் தயாரிப்பு, விற்பனை மற்றும் விநியோகம், பூச்சு, வீட்டு அலங்காரம் போன்ற சேவைகளை அளித்து வருகிறது. நாட்டின் பெயிண்ட் சந்தையில் 50 சதவீதத்திற்கு மேல் தனது பங்காக வைத்திருக்கும் ஏசியன் பெயிண்ட்ஸ் நிறுவனம், பிரபல பெர்கர் இன்டர்நேஷனல் நிறுவனத்திலும் கணிசமான பங்குகளை வைத்துள்ளது.

நிறுவனர்கள் சார்பில் அதிக பங்குதாரர்களை வைத்திருக்கும் நிறுவனமாகவும் ஏசியன் பெயிண்ட்ஸ் காணப்படுகிறது. சுமார் 6 ஆயிரத்திற்கும் மேற்பட்ட பணியாளர்களை கொண்டு பில்லியன் டாலர் வருவாயை ஏற்படுத்தும் நிறுவனமாக ஏசியன் பெயிண்ட்ஸ் உள்ளது.

நிறுவனத்தின் சந்தை மதிப்பு ரூ. 2.03 லட்சம் கோடி. நிறுவனர்களின் பங்களிப்பு 53 சதவீதமாக உள்ளது. நிறுவனர்கள் சார்பில் 12 சதவீத பங்குகள் அடமானம் வைக்கப்பட்டுள்ளது. நிறுவனத்தின் கடன்-பங்கு விகிதம்(Debt to Equity) 0.10 ஆகவும், வட்டி பாதுகாப்பு விகிதம்(Interest Coverage Ratio) 30 மடங்குகளிலும் இருக்கிறது. 2019-20ம் நிதியாண்டு முடிவில் நிறுவனத்தின் வருவாய் 20,211 கோடி ரூபாயாகவும், நிகர லாபம் 2,705 கோடி ரூபாயாகவும் இருந்துள்ளது.

நடப்பு வாரத்தில் 2020-21ம் நிதியாண்டின் இரண்டாம் காலாண்டுக்கான முடிவுகள் வெளியிடப்பட்டது. இரண்டாம் காலாண்டில் நிறுவனத்தின் வருவாய் ரூ.5,350 கோடியாகவும், செலவினம் ரூ.4,085 கோடியாகவும் இருந்துள்ளது. இதர வருமானமாக 94 கோடி ரூபாய் சொல்லப்பட்டுள்ளது. சொல்லப்பட்ட காலாண்டு முடிவில் நிகர லாபம் 830 கோடி ரூபாயாக இருந்துள்ளது.

இரண்டாம் காலாண்டு முடிவுக்கு பிறகு, இடைக்கால ஈவுத்தொகையாக(Interim Dividend), பங்கு ஒன்றுக்கு ரூ. 3.35 ஐ அறிவித்துள்ளது. செப்டம்பர் காலாண்டு முடிவின் படி, இருப்புநிலை கையிருப்பு 10,934 கோடி ரூபாயாக இருந்துள்ளது. நிறுவனத்தின் பணவரத்து(Cash Flow) சொல்லக்கூடிய நேர்மறை மதிப்பில் உள்ளது.

நிறுவனத்தின் விற்பனை வளர்ச்சி கடந்த 5 வருடங்களில் 8 சதவீதமாகவும், 10 வருட காலத்தில் 12 சதவீதமாகவும் உள்ளது. இது போல லாபம் கடந்த ஐந்து வருடங்களில் 14 சதவீதமும், 10 வருட கால அளவில் 13 சதவீதமாகவும் வளர்ச்சி பெற்றுள்ளது. இந்த பங்கின் விலை கடந்த ஒரு வருடத்தில் 18 சதவீதம் ஏற்றமடைந்துள்ளது. பங்கு முதலீட்டின் மீதான வருவாய்(ROE) கடந்த ஐந்து வருடங்களில் 28 சதவீதம் வளர்ச்சியடைந்துள்ளது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

Stock Analysis

பங்கு முதலீட்டில் வாசிக்க வேண்டிய பத்து காரணிகள்

Leave a comment

பங்கு முதலீட்டில் வாசிக்க வேண்டிய பத்து காரணிகள் 

10 Factors to read in a Stock Market Investing

பங்குச்சந்தை முதலீட்டில் பணம் சம்பாதிக்க நீண்ட காலத்தில் பொறுமையுடன் அணுகுவது அவசியமானது. அதே வேளையில், ‘ ஏதோ ஒரு பங்கில் முதலீடு செய்து விட்டு, 10 வருடங்கள் காத்திருந்தேன். பங்கு விலை இப்போது சரிந்து விட்டதே. எனது முதலீட்டில் 70-80 சதவீத தொகையை இழந்து விட்டேன் ‘ என நம்மில் பலர் புலம்புவதை பார்த்திருப்போம். இது பொதுவாக முதலீட்டில் உள்ள அனைவருக்குமான விஷயம் தான்.

நீங்கள் 10 வெவ்வேறு நிறுவன பங்குகளை முதலீட்டில் வைத்திருந்தாலும், அனைத்து பங்குகளும் உங்களுக்கு உடனடியாக முதலீட்டு பெருக்கத்தை ஏற்படுத்தாது. 5-10 வருட சுழற்சி முறையில் ஒவ்வொரு பங்குகளும், வேறுபட்ட காலத்தில் தனது ஏற்ற-இறக்கத்தை காணும். நீண்டகாலத்தில் முதலீடு செய்து பண பெருக்கத்தை ஏற்படுத்த பெரிதாக மெனக்கெட தேவையில்லை எனலாம். இருப்பினும் சில அடிப்படை காரணிகளை நாம் வாங்கிய அல்லது வாங்க போகும் பங்கு நிறுவனத்தில் அலசி ஆராய்ந்து விட்டால், நமக்கான வேலை அவ்வளவு தான்.

நல்ல நிறுவன பங்குகளின் விலை குறுகிய காலத்தில் ஏறவில்லை என்றாலும், நீண்டகாலத்தில் முதலீட்டாளருக்கு பயன் தராமல் போகாது. நல்ல நிறுவன பங்குகள் எனும் போது கடனில்லா நிறுவனங்கள், நல்ல நிர்வாக திறமை, நிறுவனர்களின் தொழில் நாணயம், வருவாயில் சராசரி வளர்ச்சியாக இருப்பினும் நெடுங்காலமாக தொழில் செய்து வருவது ஆகியவற்றை சொல்லலாம்.

மேலே சொல்லப்பட்ட நல்ல நிறுவன பங்கின் தன்மையை மேலும் சில காரணிகளை கொண்டு நாம் அறியலாம். அது போன்ற பத்து காரணிகள் இங்கே,

  • இ.ஐ.சி. கட்டமைப்பு (EIC Framework) முறையில் ஒரு நிறுவன பங்கினை புரிந்து கொள்வது
  • நிர்வாகத்திறன் எப்படி என்பதனை அறிந்து கொள்வது அவசியம்
  • நிறுவனத்தின் நிதி அறிக்கையை அடிப்படையாக கற்று கொள்வது
  • விற்பனை மற்றும் லாப வளர்ச்சி எவ்வாறு உள்ளது ?
  • பங்கு முதலீட்டின் மீதான வருவாய் (Return on Equity)
  • மூலதனத்தின் மீதான வருமானம் (Return on Capital Employed)
  • ஒரு பங்கின் வருவாயை அதன் விலையுடன் ஒப்பிட்டு காண்பது (PE)
  • நிறுவனத்தின் கடன் எப்படி ? (கடன்-பங்கு விகிதம் – Debt to Equity)
  • நிறுவனர்களின் பங்கு பங்களிப்பு மற்றும் பங்கு அடமானம்(Holding & Pledging)
  • மதிப்பீடுகள் அவசியமானது, நீங்கள் வாங்க வேண்டிய பங்கு விலை என்ன ? (Price is what you pay, value is what you get)

இந்த பத்து காரணிகளை நாம் ஒரு நிறுவன பங்கில் தேட ஆரம்பித்தாலே நமக்கான நீண்டகால செல்வவளம் பெருக்கும் முதலீட்டை அறியலாம். தரகர் சொன்னார், நண்பர் பரிந்துரைத்தார், ஊடக செய்தியில் கண்டேன், வாட்சாப் அல்லது டெலிகிராமில் பகிரப்பட்டது என ஏதாவது ஒரு பங்கினை வாங்கி மாட்டிக்கொள்வதை விட, உங்களது முதலீட்டு சிந்தனையையும் சிறிது மெருகேற்றி கொள்ளுங்கள்.

வாழ்க வளமுடன்,

நன்றி, வர்த்தக மதுரை

www.varthagamadurai.com

Paisa News

அமெரிக்க தேர்தல் 2020 – முதலீட்டிற்கான முன்னெச்சரிக்கை நடவடிக்கைகள்

Leave a comment

அமெரிக்க தேர்தல் 2020 – முதலீட்டிற்கான முன்னெச்சரிக்கை நடவடிக்கைகள்

US Presidential Election 2020 – Precautions on Investing

அமெரிக்க அதிபர் தேர்தலுக்கு இன்னும் சில நாட்களே உள்ளன. கடந்த மார்ச் மாத வீழ்ச்சிக்கு பிறகு உலக பங்குச்சந்தை குறியீடுகள் பெருத்த ஏற்றத்தை பெற்றுள்ளன. அமெரிக்க சந்தை குறியீடுகள் வாழ்நாள் உச்சத்தில் வர்த்தகமானதும், மார்ச் மாத வீழ்ச்சிக்கு பின்பு தான். அதே வேளையில் பங்குச்சந்தை ஏற்றம், உலக பொருளாதார வளர்ச்சியில் தென்படவில்லை.

பெரும்பாலான நாடுகள் இரண்டாம் அலை(Covid-19) காரணமாக  ஊரடங்குக்கு தயாராகி கொண்டிருக்கின்றன. கொரோனா பெருந்தொற்று காரணமாக தற்போதைய நிலையில் உயிரிழப்புகள் குறைந்திருந்தாலும், பாதிக்கப்பட்டவர்களின் எண்ணிக்கை நாளுக்கு நாள் அதிகரித்து வருவது குறிப்பிடத்தக்கது. வடகிழக்கு பருவ மழை சற்று தாமதமாக வருவதால், வரும் நாட்களில் மழை மற்றும் குளிர் சார்ந்த தொற்றுக்களும் ஏற்பட வாய்ப்பு உள்ளது.

நாடுகளிடையே காணப்படும் வர்த்தக போர், எல்லை பதற்றம், கச்சா எண்ணெய் விலை மாற்றம், பொருளாதார மந்தநிலை ஆகியவற்றை கடந்து பங்குச்சந்தைகள் உயர்ந்து கொண்டிருக்கிறது. இந்நிலையில் அடுத்த மாதம் முதல் வாரத்தில் அமெரிக்க தேர்தல் நடைபெற இருப்பதால், வரும் வாரங்களில் உலக பங்குச்சந்தை குறியீடுகள் அதிக ஏற்ற-இறக்கத்துடன் காணப்படலாம்.

முதலீட்டாளராக ஒருவர் இது போன்ற ஏற்ற-இறக்க சமயங்களில் சில முன்னெச்சரிக்கை நடவடிக்கைகளை பின்பற்றலாம். இதன் மூலம் சந்தை இறக்கத்தில் கிடைக்கப்பெறும் வாய்ப்புகளை சரியாக பயன்படுத்த முடியும்.

  • பொதுவாக பங்குச்சந்தை என்பது குறுகிய காலத்தில் அதிக ஏற்ற-இறக்கத்திற்கு உட்பட்டது. ஆனால் நீண்டகாலத்தில் செல்வத்தை அளிக்கும் நல்ல ஒரு முதலீட்டு சாதனமாக அமையும். வல்லரசு நாடான அமெரிக்க அதிபர் தேர்தல் என்றால், ஏற்ற-இறக்கத்திற்கு பஞ்சமிருக்காது. இதனை சார்ந்து தான் மற்ற நாடுகளின் பங்குச்சந்தை குறியீடுகள் நகர்வு பெறும்.
  •  சமீபத்திய சந்தை ஏற்றத்தில், அடிப்படை பகுப்பாய்வை பூர்த்தி செய்யாத நிறுவன பங்குகளும் 100 சதவீதத்திற்கு மேல் ஏற்றம் கண்டுள்ளன. எனவே வரும் நாட்களில் சந்தை ஏற்ற-இறக்கம் அதிகம் தென்பட வாய்ப்புள்ளதால், நல்ல நிறுவன பங்குகளை தேர்ந்தெடுப்பது அவசியமானது. கடனில்லா நிறுவன பங்குகள், நல்ல நிர்வாக திறமை மற்றும் பொருளாதார மந்தநிலையை சமாளித்து தொழில் செய்யும் நிறுவனங்களில் கவனம் செலுத்துங்கள்.
  • ஒரு முறை முதலீடாக(Lumpsum investing) மேற்கொள்ளாமல், சந்தை இறக்கத்தில் நல்ல நிறுவன பங்குகள் இறங்கினால் மட்டும் சிறுகச்சிறுக முதலீடு செய்வது சிறந்தது. சந்தை பெருத்த வீழ்ச்சியை கண்டாலும், நீங்கள் ஏற்கனவே முதலீடு செய்த நல்ல நிறுவன பங்குகளில் மீண்டும் முதலீடு செய்வதற்கான பணத்தை கையிருப்பாக வைத்து கொள்ளுங்கள்.
  • பங்குச்சந்தை முதலீட்டில் அதிகம் சஞ்சலப்படும் காலமாக தற்போதைய நிலையை கூறலாம். தற்காலிக ஏற்றத்தை கண்டு, குறுகிய காலத்தில் லாபம் பார்க்கிறேன் என சூதாட வேண்டாம். பொருளாதார மந்தநிலை காலங்களில் போதுமான சேமிப்பும், நிம்மிதியான தூக்கமும் தான் தேவை. தூக்கத்தை இழக்கும் நிலையை தற்போதைய சந்தையில் ஏற்படுத்தி கொள்ள வேண்டாம்.
  • முதலீட்டு பரவலாக்கம் மற்றும் பல்வகைப்படுத்தல்(Asset Allocation & Diversification) எப்போதும் அவசியமான ஒன்று. பங்கு முதலீட்டில் கொஞ்சம், கடன் பத்திரங்களில் சிறிய முதலீடு, தங்கம் மற்றும் சேமிப்பு கணக்கில் என உங்கள் முதலீட்டை பரவலாக்குவது நன்று.
  • வல்லரசு நாட்டின் தேர்தல் என கூறினாலும், அமெரிக்கா… அமெரிக்கா தான் ! அதிபர் தேர்தலில் யார் வெற்றிபெற்றாலும் அந்நாட்டின் கொள்கைகள் பொதுவாக மாறுபடுவதில்லை. வல்லரசு நாட்டிற்கே உரித்தான விஷயங்களை அமெரிக்கா கொண்டிருக்கும்.
  • என்ன தான் பங்குச்சந்தைக்கும், பொருளாதாரத்திற்கும் சம்மந்தமில்லை என சிலர் கூறினாலும், உண்மையில் திருவாளர் பங்குச்சந்தையின்(Mr. Market) நெருங்கிய நண்பன் தான் பொருளாதாரம். சந்தை சில காலம் பொருளாதாரத்தை விட்டு பிரிந்து காணப்பட்டாலும், பின்னொரு நாட்களில் பொருளாதாரமும், சந்தையும் சந்தித்து கொண்டு பேசி கொள்ளும். அப்போது சந்தையின் சரியான நிலவரம் தெரிய கூடும்.

வேலைவாய்ப்பும், தொழில்களும் நன்றாக நடைபெற்று நாட்டின் பொருளாதாரமும் உயர்ந்தால் தானே நம் சந்தைக்கு மகிழ்ச்சி !

வாழ்க வளமுடன்,

நன்றி, வர்த்தக மதுரை 

www.varthagamadurai.com

Stock Analysis

ரைட்ஸ் (ரயில் இந்தியா) லிமிடெட் – பங்குச்சந்தை அலசல்

Leave a comment

ரைட்ஸ் (ரயில் இந்தியா) லிமிடெட் – பங்குச்சந்தை அலசல் 

Rites(Rail India Technical and Economic Service) Limited – Fundamental Analysis 

நாட்டின் முக்கிய பொதுத்துறை நிறுவனமாக இருப்பது, ‘ரயில் இந்தியா தொழில்நுட்ப மற்றும் பொருளாதார சேவை’ நிறுவனம். இதனை சுருக்கமாக ரைட்ஸ் லிமிடெட்(Rites) என கூறுவதுண்டு. பொறியியல் ஆலோசனை நிறுவனமாக வலம் வரும் ரைட்ஸ் நிறுவனம் போக்குவரத்து மற்றும் உட்கட்டமைப்பு துறையில் முக்கியத்துவம் பெறுகிறது.

1974ம் ஆண்டு மத்திய அரசால் துவங்கப்பட்ட இந்நிறுவனம் விமான நிலையங்கள், நெடுஞ்சாலைகள், துறைமுகங்கள் மற்றும் நகர்ப்புற திட்டமிடல் உள்ளிட்ட பிற உட்கட்டமைப்புகளுக்கான ஆலோசனை மற்றும் திட்டமிடலை செய்து வருகிறது. இந்திய ரயில்வே துறைக்கு மட்டுமில்லாமல், 60 நாடுகளுக்கும் மேலாக தனது சேவையை விரிவுபடுத்தியுள்ளது.

நிறுவனத்தின் சந்தை மதிப்பு ரூ.6000 கோடி, மத்திய அரசு தன்வசம் வைத்திருக்கும் பங்குகளின் அளவு 72 சதவீதமாகும். பொதுத்துறை காப்பீட்டு நிறுவனமான எல்.ஐ..சி. இந்தியாவிடம்(LIC) சுமார் 8 சதவீத பங்குகளும், எச்.டி.எப்.சி. டிரஸ்டி(HDFC Trustee) நிறுவனத்திடம் 3 சதவீத பங்குகளும் உள்ளது. இதன் தொழில் விரிவாக்கம் பெரும்பாலும் ரயில்வே சார்ந்த திட்டங்களாக இருந்து வருகிறது.

நிறுவனத்தின் வாடிக்கையாளர்களாக பெரும்பாலான நாடுகளின் அரசு நிறுவனங்கள் தான் உள்ளது. இதன் முக்கிய அலுவலகங்கள் செனகல், போட்ஸ்வானா, மொரிசியஸ், வங்காளதேசம், மியான்மர், நேபாளம் மற்றும் மொசாம்பிக் ஆகிய நாடுகளில் உள்ளது குறிப்பிடத்தக்கது. ஆசியா, ஆப்பிரிக்கா, லத்தீன் அமெரிக்கா, தென் அமெரிக்கா மற்றும் மத்திய கிழக்கு பகுதிகளில் ரயில்வே சார்ந்து ஏற்றுமதிகளை அதிகம் கொண்டிருக்கும் நிறுவனமாகவும் ரைட்ஸ் லிமிடெட் உள்ளது.

2019-20ம் நிதியாண்டின் முடிவில் நிறுவனத்தின் வருவாய் ரூ.2,474 கோடியாகவும், செலவினம் ரூ.1,811 கோடியாகவும் இருந்துள்ளது. நிகர லாபமாக ரூ.616 கோடி சொல்லப்பட்டுள்ளது. விற்பனை வளர்ச்சி கடந்த ஐந்து வருடங்களில் 20 சதவீதமாகவும், லாபம் கடந்த 5 வருடங்களில் 15 சதவீதமும் வளர்ச்சி பெற்றுள்ளது. இந்த பங்கின் விலை கடந்த ஒரு வருடத்தில் ஏற்றம் பெறவில்லை. எனினும் பங்கு முதலீட்டின் மீதான வருவாய்(Return on Equity) ஒரு வருடத்தில் 25 சதவீதமும், ஐந்து வருடங்களில் 20 சதவீதமும் வளர்ந்துள்ளது.

நிறுவனத்தின் இருப்புநிலை கையிருப்பு(Reserves) ரூ.2,383 கோடி மற்றும் பணவரத்து(Cashflow) சீராக வந்து கொண்டிருக்கிறது. ஜூன் 2020 காலாண்டில் நிறுவனத்தின் வருவாய் மற்றும் லாப விகிதம் குறைந்திருந்தாலும், நீண்டகாலத்தில் இந்நிறுவனத்தின் தேவை அதிகரித்து தான் காணப்படுகிறது. நாட்டின் போக்குவரத்து மற்றும் உட்கட்டமைப்பு துறையில் வாய்ப்பு அதிகமாகியிருக்கும் நிலையில், ரைட்ஸ் பங்குக்கான வாய்ப்பும் அதிகமாக உள்ளது. இதன் பாதகமாக அதன் துறை வளர்ச்சியும், அரசு சார்பில் ஏற்படும் கொள்கைகளும் தான்.

நிறுவனத்திற்கு கடன் எதுவும் பெரிதாக இல்லை. அதன் கடன்-பங்கு(Debt to Equity) விகிதம் 0.02 ஆக உள்ளது. வட்டி பாதுகாப்பு விகிதம் 117 மடங்கில் உள்ளது. அரசு நிறுவனமாக இருப்பதால், நிறுவனர்கள் சார்பில் பங்குகள் அடமானம் எதுவும் வைக்கப்படவில்லை. முகமதிப்பு 10 ரூபாயாகவும், கடந்த கால ஈவுத்தொகை விகிதம்(Dividend yield) 7 சதவீதமாகவும் இருக்கிறது. அடிப்படை பணப்பாய்வு முறைப்படி(DCF Valuation) ரைட்ஸ் லிமிடெட் பங்கு ஒன்றின் விலை 300 ரூபாய் பெறும்.

முதலீட்டாளர்கள், பங்குகளை வாங்கும் முன் தகுந்த நிதி ஆலோசகர் அல்லது பங்கு ஆலோசகரின் முன்னிலையில் தங்களது முதலீட்டு முடிவை எடுக்குமாறு அறிவுறுத்தப்படுகிறது. மேலே சொன்ன தகவல்கள் பங்குச்சந்தை அடிப்படை பகுப்பாய்வுக்கான கற்றல் மட்டுமே.

வாழ்க வளமுடன்,

நன்றி, வர்த்தக மதுரை

www.varthagamadurai.com