Tag Archives: Economic Recession 2020

நாட்டின் கடந்த 50 வருட பொருளாதார வளர்ச்சி – இந்தியா 2021

நாட்டின் கடந்த 50 வருட பொருளாதார வளர்ச்சி – இந்தியா 2021

India’s 50 years of Economic Growth – GDP India 2021

2020-21ம் நிதியாண்டின் மூன்றாம் காலாண்டில் நாட்டின் மொத்த உள்நாட்டு உற்பத்தி(GDP growth) வளர்ச்சி 0.4 சதவீதமாக சொல்லப்பட்டிருந்தது. கொரோனா ஊரடங்குக்கு பின்னர் நேர்மறையான வளர்ச்சி சொல்லப்பட்டது இந்த முறை தான். நடப்பு நிதியாண்டின் முதல் காலாண்டில் (-24.4) சதவீதமும், இரண்டாம் காலாண்டில் (-7.3) சதவீதமும் பொருளாதாரம் வீழ்ச்சி கண்டது.

2013ம் ஆண்டுக்கு பிறகான மிகப்பெரிய தொய்வு நிலை மற்றும் வீழ்ச்சியாகவும் இது கூறப்பட்டது. பொருளாதார ஊக்குவிப்பு மற்றும் தற்காலிகமாக ஏற்பட்ட பெரும் நுகர்வு தன்மையால் அக்டோபர் – டிசம்பர் காலத்தில் பொருளாதார வளர்ச்சி 0.4 சதவீதமாக நிறைவு பெற்றுள்ளது. எனினும், நடப்பு நிதியாண்டில் ஒட்டு மொத்தமாக நாட்டின் மொத்த உள்நாட்டு உற்பத்தி எதிர்மறை மதிப்பில் முடிவடையும்.

கொரோனா ஊரடங்கு தளர்வுக்கு பிறகான காலத்தில் விலைவாசி அதிகரித்து கொண்டிருந்தாலும், ஜனவரி மாத பணவீக்கம் 4.06 சதவீதம் என்ற குறைந்த அளவில் இருந்தது. இது கடந்த 16 மாதங்களில் காணப்படாத குறைவான அளவாக உள்ளது. நாட்டின் சில்லரை விலை பணவீக்கம் சராசரியாக 6-8 சதவீதம் என்ற அளவில் உள்ளது. மத்திய ரிசர்வ் வங்கியின் குறுகிய கால இலக்காக சில்லரை விலை பணவீக்கம்(Retail Inflation – CPI) 2-6 சதவீதம் என்ற அளவில் நிர்ணயிக்கப்பட்டுள்ளது கவனிக்கத்தக்கது.

பொதுவாக பொருளாதார வீழ்ச்சி(Economic Recession) என்பது ஒரு நாட்டின் மொத்த உள்நாட்டு உற்பத்தி, தொடர்ச்சியாக இரு காலாண்டுகள் எதிர்மறை வளர்ச்சியை(Negative growth) கொண்டிருந்தால் அது பொருளாதார வீழ்ச்சியாக உறுதி செய்யப்படும். அப்படி காணும் போது 2020-21ம் நிதியாண்டின் ஏப்ரல் முதல் ஜூன் வரையிலான காலாண்டும், ஜூலை முதல் செப்டம்பர் வரையிலான காலாண்டும் எதிர்மறை பொருளாதார சதவீதத்தை அடைந்தது. இதன் காரணமாக இந்திய பொருளாதாரம் வீழ்ச்சியடைந்ததாக சொல்லப்பட்டிருந்தது.

எனினும் கடந்த சில நாட்களுக்கு முன்பு அறிவிக்கப்பட்ட தகவலில் அக்டோபர் முதல் டிசம்பர் 2020 வரையிலான காலாண்டில் நாட்டின் பொருளாதாரம் நேர்மறை வளர்ச்சியை பெற்றுள்ளது குறிப்பிடத்தக்கது. அதே வேளையில் சந்தை எதிர்பார்த்த அளவை இது எட்டவில்லை. கடந்த 50 வருட காலத்தில் மிகப்பெரிய பொருளாதார வீழ்ச்சியாக கொரோனா கால ஊரடங்கு பொருளாதாரம் சொல்லப்படுகிறது. 1951-2020 வரையிலான காலத்தை கணக்கில் கொள்ளும் போது, இந்திய பொருளாதாரம் அதிகபட்சமாக 11.40 சதவீத பொருளாதார உயர்வும்(மார்ச் 2010 காலாண்டு), மிகப்பெரிய வீழ்ச்சியாக (-24.40 ஜூன் 2020) சதவீதமும் இருந்துள்ளது.

கடந்த வியாழக்கிழமை அன்று(04-03-2021) அரசு கடன் பத்திரங்களின் வருவாய்(10 Years Govt Bond yield) 6.21 சதவீதமாக உள்ளது. 2024-25ம் ஆண்டில் ஐந்து டிரில்லியன் டாலர் பொருளாதாரம் என்ற இலக்கை அடைய மத்திய அரசு ஏற்கனவே நிர்ணயித்துள்ளது. இதனை அடையக்கூடிய நிலையில், உலகின் மிகப்பெரிய மூன்றாவது பொருளாதார நாடாக இந்தியா திகழும்.

உலக பொருளாதாரத்தில் முதல் இடத்தில் அமெரிக்காவும், இரண்டாம் இடத்தில் சீனாவும் உள்ளது. மொத்த உள்நாட்டு உற்பத்தியில் இந்த இரு நாடுகளையும் அடுத்த 25 வருடங்களில் முந்த முடியவில்லை என்றாலும், நுகர்வு தன்மை அடிப்படையில் இந்தியா அடுத்த 10-20 வருடங்களில் மிகப்பெரிய அளவில் வளர்ச்சி பெற்றிருக்கும்.

நடப்பில் நமது நாடு, பெரும்பாலும் சேவை துறை சார்ந்த நாடாகவே உள்ளது. கொரோனாவுக்கு பிறகான காலத்தில், உற்பத்தியை பெருக்க அரசு திட்டம் கொண்டுள்ளது. மொத்த உள்நாட்டு உற்பத்தியில் சேவை துறை 54.77 சதவீதமும், தொழிற்துறை  27.47 சதவீதமும் மற்றும் விவசாய துறை 17.76 சதவீத பங்களிப்பையும் கொண்டுள்ளது.

சேவைத்துறையில் அரசு நிர்வாகம், ராணுவம் மற்றும் பிற துறைகள் 15.74 சதவீத பங்களிப்பை கொண்டுள்ளது. நிதி, வீட்டுமனை மற்றும் தொழில்முறை 20.95 சதவீத பங்களிப்பையும், வர்த்தகம், உணவக விடுதிகள், போக்குவரத்து, தொலைத்தொடர்பு மற்றும் ஒளிபரப்பு ஆகியவை 18.08 சதவீத பங்களிப்பையும் சேவை துறையின் கீழ் பெற்றுள்ளது.

விவசாய துறையில் விவசாயம், வனவியல் மற்றும் மீன் பிடித்தல் 17.76 சதவீத பங்களிப்பை அளித்து வருகின்றன. தொழிற்துறையில் உற்பத்தி 15.13 சதவீதமும், சுரங்கம் மற்றும் குவாரி 2.14 சதவீதமும், மின்சாரம், எரிவாயு, குடிநீர் மற்றும் இதர பயன்பாடு 2.65 சதவீதமும், கட்டுமானம் 7.55 சதவீத பங்களிப்பையும் கொண்டுள்ளது.

கடந்த 1950-51ம் ஆண்டில் இந்தியா 52 சதவீதம் விவசாயத்தை சார்ந்தும், சேவையில் 33 சதவீதத்தையும் மற்றும் தொழில்துறையில் 15 சதவீதத்தையும் கொண்டிருந்தது குறிப்பிடத்தக்கது. சுருக்கமாக சொன்னால், இந்தியா நடுத்தர வருமானத்தை அதிகமாக கொண்ட வேகமாக வளரும் சந்தை பொருளாதார நாடாகும்(Middle income Developing market economy).

வாழ்க வளமுடன்,

நன்றி, வர்த்தக மதுரை 

www.varthagamadurai.com

2020ம் ஆண்டில் நாட்டின் பொருளாதார குறியீடுகள் எவ்வாறு இருந்தது ?

2020ம் ஆண்டில் நாட்டின் பொருளாதார குறியீடுகள் எவ்வாறு இருந்தது ?

Economic Indicators in India – 2020 Review

கடந்த 2020ம் ஆண்டில் கொரோனா பெருந்தொற்று காரணமாக ஏற்பட்ட ஊரடங்கால் உலக பொருளாதாரம்  வெகுவாக பாதிக்கப்பட்டது. குறிப்பாக அத்தியாவசிய உணவு பொருட்களின் தேவை தவிர்த்து மற்ற துறைகள் அனைத்தும் பெரும்பாலும் எதிர்மறை நிலையை தான் சந்தித்தன. மார்ச் மாத(2020) ஊரடங்கு துவக்கத்தில் வீழ்ச்சியடைந்த பங்குச்சந்தை குறியீடுகள் மட்டும், வருடத்தின் முடிவில் எதிர்பாராத அளவில் ஏற்றத்தில் முடிவடைந்தன.

சமீபத்திய பங்குச்சந்தை குறியீடுகள் உயர்வு, எதிர்வரும் காலத்தில் பொருளாதாரம் மீட்டெடுக்கப்படும் என்ற நம்பிக்கையில் அதிகமாகவே உயர்ந்தது குறிப்பிடத்தக்கது. அதே வேளை உண்மையில் பொருளாதாரம் மீண்டெழுந்ததா ? இல்லையெனில் அதற்கான வாய்ப்பு எவ்வாறு உள்ளது என்பதனை அறிய கடந்த வருடத்தின் முழுமையான பொருளாதார குறியீடுகளை பார்த்தாக வேண்டும்.

நாட்டின் ஏற்றுமதி(Exports) கடந்த வருடத்தின் மார்ச் முதல் ஆகஸ்ட் வரையிலான காலத்தில் வீழ்ச்சியை மட்டுமே சந்தித்துள்ளன. ஏற்றுமதியில் அதிகபட்சமாக செப்டம்பர் மாதத்தில் 6 சதவீதமாக இருந்துள்ளது. வீழ்ச்சியின் பக்கம் காணும் பொழுது, ஏப்ரல் மாதத்தில் (-61) சதவீதமும், மே மாதத்தில் (-35.7) சதவீதமும் மற்றும் ஜூன் மாதத்தில் (-12.2) சதவீதமாகவும் உள்ளது. இது போல இறக்குமதி(Imports) அளவு 12 மாத காலத்தில் இரண்டு மாதங்கள் மட்டுமே நேர்மறையாக இருந்துள்ளது. பிப்ரவரி மற்றும் டிசம்பர் 2020 காலத்தில் மட்டுமே இறக்குமதி அளவு வீழ்ச்சியை சந்திக்கவில்லை.

வாகனத்துறை:

உள்நாட்டு டிராக்டர் விற்பனை பிரிவில் மார்ச் மற்றும் ஏப்ரல் மாதங்களில் 50 சதவீதத்திற்கு மேல் வீழ்ச்சி ஏற்பட்டுள்ளது. இருப்பினும், ஜூன் மாதத்திற்கு பிறகான தேவையின் காரணமாக இதன் விற்பனை அளவு கணிசமாக உயர்ந்துள்ளது. அதிகபட்சமாக ஆகஸ்ட் மாதம் 74 சதவீதமாக காணப்பட்டுள்ளது.

வாகனத்துறை பிரிவில் அதிகம் பாதிக்கப்பட்ட துறை என்றால், அது உள்ளூர் விமான போக்குவரத்தும், மூன்று சக்கர வாகன விற்பனையும் தான். மூன்று சக்கர வாகன விற்பனை அளவு ஜனவரி மாதம் தவிர்த்து, மற்ற அனைத்து மாதங்களிலும் எதிர்மறையாக தான் இருந்துள்ளது. விமான போக்குவரத்து ஏப்ரல் மாதத்தில் முழுமையாக இயங்கவில்லை.

Economic indicators India 2020

இரு சக்கர மற்றும் நான்கு சக்கர வாகனங்களின் விற்பனை கடந்த 2020ம் ஆண்டின் ஜனவரி மாதம் முதலே சரிந்துள்ளது குறிப்பிடத்தக்கது. 2019ம் ஆண்டில் காணப்பட்ட வாகனத்துறை மந்தநிலை தான் காரணமாக அமைந்துள்ளது. இருப்பினும், ஆகஸ்ட் 2020 பிறகான காலத்தில், பொது போக்குவரத்து செயல்படாத நிலையில் இரு சக்கர மற்றும் நான்கு சக்கர வாகனங்களின் தேவை அதிகரித்தது. நான்கு சக்கர வாகனம் அதிகபட்சமாக செப்டம்பர் மாதத்தில் 29 சதவீதமும், இரு சக்கர வாகன விற்பனை அதிகபட்சமாக அக்டோபர் மாதத்தில் 17 சதவீதமாகவும் காணப்பட்டுள்ளது.

ரயில் சரக்கு(Freight Traffic) போக்குவரத்து மார்ச் முதல் ஜூலை வரையிலான காலத்தில் வீழ்ச்சி அடைந்திருந்தாலும், பின்னர் அத்தியாவசிய தேவையின் காரணமாக உயர்ந்து வந்தது கவனிக்கத்தக்கது.

வரி வருவாய்:

ஜி.எஸ்.டி.(GST) வருவாய் மார்ச் முதல் ஆகஸ்ட் வரையிலான காலத்தில் எதிர்மறை அளவாக இருந்துள்ளது. ஏப்ரல் மாதத்தில் அதிகபட்சமாக 72 சதவீதம் இழப்பு ஏற்பட்டுள்ளது. செப்டம்பர் 2020க்கு பின்னர் இதன் வருவாய் ஓரளவு அதிகரித்து வந்துள்ளது. அக்டோபர் மற்றும் டிசம்பர் மாதங்களில் வருவாய் அளவு 10 சதவீதத்திற்கு மேல் இருந்துள்ளது.

தொழிற்துறை உற்பத்தி குறியீடு(IIP):

தொழில் துறையில் உள்ள நுகர்வோர் சாதனங்களின் விற்பனை கொரோனா ஊரடங்கு காலத்தில் வெகுவாக பாதிக்கப்பட்டுள்ளது. ஏப்ரல் மற்றும் மே மாதங்களில் 50 சதவீதத்திற்கு மேல் வீழ்ச்சியடைந்துள்ளது. அதே வேளையில் நுகர்வோர் அல்லாத சாதனங்கள் பிரிவில் பெரிய அளவில் சரிவு ஏற்படவில்லை. ஏப்ரல் மாதத்தில் மட்டுமே அதிகபட்சமாக 36 சதவீதம் குறைந்துள்ளது.

ஏப்ரல் மாதத்தில் ஸ்டீல்(எஃகு) உற்பத்தி 83 சதவீதமும், சிமெண்ட் உற்பத்தி 85 சதவீதமும் இழப்பாக சந்தித்துள்ளது. ஸ்டீல் மற்றும் சிமெண்ட் துறைகள் பெரும்பாலும் மந்தநிலையில் தான் 2020ம் ஆண்டு முழுவதும் இருந்துள்ளது.

நிலக்கரி மற்றும் உரங்கள் ஓரளவு ஏற்ற-இறக்கத்தில் தான் வர்த்தகமாகியுள்ளது. ஜூன் காலாண்டு தவிர்த்து நிலக்கரி தேவை ஓரளவு அதிகரித்து வந்துள்ளது. அதே நேரத்தில் உரங்கள் மார்ச் மற்றும் ஏப்ரல் மாதத்தில் மட்டுமே வீழ்ச்சியடைந்துள்ளது.

சொல்லப்பட்ட வருடம் முழுவதும் இயற்கை எரிவாயு துறை இறக்கத்தில் மட்டுமே இருந்துள்ளது. ஏப்ரல் மாதத்தில் அதிகபட்சமாக எரிவாயு 20 சதவீதம் இழப்பு ஏற்பட்டுள்ளது.

பணவீக்க விகிதம்:

2020ம் ஆண்டின் ஜனவரி முதல் டிசம்பர் வரையிலான காலத்தில் நாட்டின் சில்லரை விலை பணவீக்க(Retail Inflation) விகிதம் சராசரியாக 6-8 சதவீதம் என்ற அளவில் இருந்துள்ளது. அதிகபட்சமாக ஜனவரி மற்றும் அக்டோபர் மாதங்களில் 7.6 சதவீதமும், குறைந்த அளவாக டிசம்பர் மாதத்தில் 4.6 சதவீதமும் உள்ளது. உணவுப்பொருட்கள் மற்றும் குளிர்பானங்களின் விலைவாசி கணிசமாக உயர்ந்து காணப்பட்டுள்ளது. ஊரடங்கு காலத்தில் ஏற்பட்ட எதிர்பாராத தேவையால் உணவு பொருட்களின் விலை அதிகரித்துள்ளது. இதன் அளவு சராசரியாக 8 சதவீதத்திற்கு மேல் இருந்தது குறிப்பிடத்தக்கது.

வாழ்க வளமுடன்,

நன்றி, வர்த்தக மதுரை 

www.varthagamadurai.com

அடுத்த பங்குச்சந்தை வீழ்ச்சி எப்போது, முதலீட்டாளராக என்ன செய்ய வேண்டும் ?

அடுத்த பங்குச்சந்தை வீழ்ச்சி எப்போது, முதலீட்டாளராக என்ன செய்ய வேண்டும் ?

5 Precautions to do in the Market Crash – Recession 2020

நடப்பாண்டின் மார்ச் மாதத்தில் ஏற்பட்ட வீழ்ச்சிக்கு பிறகு உலக பங்குச்சந்தை குறியீடுகள் மிக வேகமாக எழுந்து வந்துள்ளது. உள்நாட்டில் இந்திய பங்குச்சந்தை குறியீடுகள் கடந்த மூன்று மாதங்களில் 20 சதவீத ஏற்றத்தை அடைந்துள்ளது. அதே வேளையில் 2020ம் ஆண்டின் துவக்கத்திலிருந்து காணும் போது இன்னும் 13 சதவீத இறக்கத்தில் உள்ளது.

அமெரிக்க பங்குச்சந்தை வரலாறு காணாத உச்சத்தை நடப்பாண்டில் இரண்டாவது முறையாக அடைந்தது. கடந்த இரண்டு வருடங்களாக காணப்பட்ட பொருளாதார மந்தநிலை என்ற செய்தி வலுவடைந்து தற்போது உலக பொருளாதாரம் வீழ்ச்சியை சந்தித்துள்ளது. வளர்ந்த நாடுகளை காட்டிலும் வளரும் நாடுகள் பொருளாதார வீழ்ச்சியிலிருந்து விரைவாக மீட்டெடுக்கப்படும் என பொருளாதார வல்லுநர்கள் கருதுகின்றனர்.

நடப்பு வருடத்தில் முக்கியமாக கருதப்படும் நிகழ்வாக கொரோனா வைரஸ் தாக்கம்(Covid-19), வர்த்தக போர்(Trade war), எண்ணெய் நாடுகளில் ஏற்பட்ட வீழ்ச்சி மற்றும் விலை மாற்றம், அமெரிக்க தேர்தல், நாடுகளிடையே காணப்படும் போர் பதற்ற சூழ்நிலை(War Panic) தான் உள்ளது. பொருளாதார மந்தநிலையால் அடுத்து வரவிருக்கும் காலாண்டுகள் குறிப்பிடத்தக்க வளர்ச்சியை கொண்டிருக்காது.

ஆனால், உலக பங்குச்சந்தை குறியீடுகள் ஏற்றத்தில் மட்டும் சென்று கொண்டிருக்கின்றன. தற்போது சந்தையில் நிலவுவது காளையா அல்லது கரடியா என்ற ஐயத்தில் வர்த்தகர்களும், முதலீட்டாளர்களும் அணுகுகின்றனர். மார்ச் மாத வீழ்ச்சி போன்று மறுபடியும் நடப்பு வருடத்தில் ஏற்பட வாய்ப்புண்டா என கேள்வி எழுப்பினால், நடப்பதற்கான சாத்திய கூறு அதிகம் தான்.

கடந்த இரண்டு வருடத்தில் பொருளாதார மந்தநிலை ஏற்பட்டதும், அதற்கு மாறாக பங்குச்சந்தை குறியீடுகள் மேலே சென்றதும் தான் மார்ச் மாத வீழ்ச்சிக்கு முக்கிய காரணமாக அமைந்துள்ளது. கொரோனா தாக்குதலுக்கு பின்னால் உள்ள பொருளாதார எண்கள் தான் உண்மை நிலவரத்தை விவரிக்கும். அமெரிக்க சந்தைகள் போல, இந்திய பங்குச்சந்தைகளும் ஏற்றமடைவதற்கான கூறுகள் உள்ளன.

இருப்பினும், இது சந்தை நிலவரம் சரியான பாதையில் செல்லவில்லை என்பதனையே காட்டுகிறது. கொரோனா தாக்கத்தின் இரண்டாம் அலையால் ஊரடங்கு ஏற்படாவிட்டாலும், இயல்பு வாழ்க்கை என்பது சாதாரண நிகழ்வாக இருக்காது. இது சந்தை சங்கிலியை(Supply Chain) பாதிக்க கூடும். எனவே மற்றொரு சந்தை வீழ்ச்சி நாம் மேலே சொன்ன சில காரணிகளால் நடப்பதற்கு வாய்ப்புகள் அதிகம்.

இங்கே யூகிப்பதற்கு எதுவுமில்லை. அதே வேளையில் பொருளாதாரம் மந்தநிலையில் உள்ளதை நாம் அனைவரும் அறிவோம். எனவே பங்குச்சந்தை வீழ்ச்சியை கணிப்பதை தவிர்த்து, அதற்கான முன்னெச்சரிக்கை விஷயங்களை நாம் பின்பற்றினால், சந்தையில் நீண்டகாலத்தில் நல்ல வருவாயை ஈட்டலாம்.

  • சரியான நிதி திட்டமிடல் எப்போதும் அவசியம்:

தற்போது உள்ள சூழ்நிலை அடிக்கடி நிகழும் நிகழ்வாக வரலாற்றில் இதுவரை இருந்ததில்லை. எனவே பங்குச்சந்தையில் முதலீடு செய்யும் முன்னர், உங்களையும், உங்கள் குடும்ப நிதி பாதுகாப்பை உறுதி செய்ய டேர்ம் பாலிசி, மருத்துவ காப்பீடு மற்றும் அவசர கால நிதி ஆகியவற்றை ஏற்படுத்துவது அவசியம்.

அதற்கு பின்னர் தான் உங்கள் உபரி தொகையை சந்தையில் முதலீடு செய்ய வேண்டும். இது போன்ற காலங்களில் சந்தையில் குறுகிய காலத்தில் விரைவாக பணம் பண்ணுகிறேன் என மொத்த பணத்தையும் இழக்க வேண்டாம். நீண்ட காலத்திற்கு நல்ல நிறுவனங்களை மட்டும் தேர்வு செய்து முதலீடு செய்க.

  • உங்கள் நிதி இலக்குகளுக்கு நேரிடையாக பங்குச்சந்தையில் முதலீடு செய்ய வேண்டாம்:

நிதி இலக்குகளுக்காக சந்தையில் முதலீடு செய்ய உள்ளவர்கள், நீண்டகால இலக்கை மட்டும் கொண்டிருத்தல் நலம். குறுகிய மற்றும் நடுத்தர கால இலக்கிற்கு தற்போதைய நிலையில் நேரடி பங்குகளை அணுக வேண்டாம். அதற்கு மாறாக பரஸ்பர நிதி திட்டங்களை(Mutual Funds Schemes) பயன்படுத்தி கொள்ளலாம்.

நல்லதொரு செல்வத்தை ஏற்படுத்த நினைப்பவர்கள் பங்குச்சந்தை முதலீட்டை நீண்டகால நோக்கில் அணுகலாம். நடப்பில் உள்ள சந்தை வீழ்ச்சிகளில் முதலீடு செய்யும் பட்சத்தில், அடுத்த சில வருடங்களில் நல்ல வருவாயினை சந்தையில் ஈட்டலாம்.

  • ஒரு  முறை  முதலீடாக மொத்த பணத்தையும் சந்தையில் முதலீடு செய்ய வேண்டாம்(Don’t invest as Lumpsum):

உங்களிடம் உள்ள மொத்த முதலீட்டு தொகையை தற்போதைய சந்தையில் ஒரே பங்கில் போட்டு விட்டு, அடுத்த சில வருடங்களில் கோடிகளை அள்ளலாம் என உங்கள் நிதி ஆதாரத்தை மீறி ரிஸ்க் எடுக்க வேண்டாம். குறுகிய காலத்தில் சந்தை மிகவும் ஆபத்தானது. பொருளாதார வீழ்ச்சி காலங்களில் உங்களிடம் உள்ள மொத்த முதலீட்டில் 10-20 சதவீதம் என்ற அளவில் ஒவ்வொரு பெரிய இறக்கத்திலும் முதலீடு செய்வது நன்று.

ஒரே ஒரு முறை மட்டும் முதலீடு செய்து விட்டு, பின்பு இறக்கத்தில் உங்களால் பங்குகளை வாங்க முடியாவிட்டால், அதற்கான வாய்ப்பு பின்னாளில் கிட்டாது.

  • பரஸ்பர நிதிகளில் பரிமாற்ற திட்டத்தை(STP) பயன்படுத்துங்கள்:

பங்கு சார்ந்த பரஸ்பர நிதிகளில் முதலீடு செய்வோர், மொத்த முதலீட்டை பங்குகளில் மேற்கொள்ளாமல், அதனை லிக்விட்(Liquid Fund) அல்லது ரிஸ்க் குறைந்த கடன் பத்திர(Debt Funds) திட்டங்களில் முதலீடு செய்து விட்டு, தொடர் பரிமாற்ற திட்டத்தை(Systematic Transfer Plan) தேர்ந்தெடுத்து பங்குகளில் முதலீடு செய்யலாம்.

வார எஸ்.டி.பி. அல்லது மாத எஸ்.டி.பி. திட்டங்களை தேர்ந்தெடுப்பதன் மூலம் சந்தை இறக்கத்தில் அமையும் வாய்ப்புகளை பயன்படுத்தி கொள்ளலாம். எஸ்.ஐ.பி.(SIP) முறையில் முதலீடு செய்வோர் தங்கள் மாதாந்திர அல்லது வார முதலீட்டு தொகையை அடுத்த ஓரிரு வருடங்களுக்கு அதிகரித்து கொள்ளலாம். வேலையை இழந்தவர்கள் தாங்கள் ஏற்கனவே செய்த மாத முதலீட்டை தொடர முடியவில்லை எனில், கணக்கை முடித்து கொள்ள வேண்டாம். அதற்கு பதிலாக தற்காலிகமாக மாத முதலீட்டை நிறுத்தி வைக்கலாம்.

  • ரொக்கமாக பணத்தை வைத்திருங்கள், மதிப்பீடுகள் மிக முக்கியம்:

சந்தை எப்போது வீழ்ச்சியடையும் என யாராலும் கணிக்க முடியாது. அதே வேளையில் பொருளாதாரம் சரியில்லாத போது , அதற்கான நகர்வுகள் சந்தையில் நிச்சயமாக நிகழும். குறுகிய காலத்தில் சந்தை வாக்கு இயந்திரமாகவும், நீண்டகாலத்தில் அது எடைபோடும் இயந்திரமாகவும் மாறக்கூடும் என்பதை நினைவில் கொள்ளுங்கள்.

சந்தை வீழ்ச்சியின் போது முதலீடு செய்ய ரொக்கமாக பணத்தை(Sitting with a Cash) கொண்டிருக்க வேண்டும். அவற்றுக்காக காத்திருக்காமல் முன்னரே திட்டமிடுங்கள். உலக பொருளாதார வீழ்ச்சியில் நல்ல நிறுவனங்களும் (கடனில்லா, பணவரத்து கொண்டிருக்கும் நிறுவனங்கள்), அதன் மதிப்பீடுகளும் தான் நிலைத்து நிற்கும். மற்றவை திவாலாகி விடும். எனவே பங்குகளை கவனமாக தேர்ந்தெடுப்பது அவசியம்.

வாழ்க வளமுடன்,

நன்றி, வர்த்தக மதுரை 

www.varthagamadurai.com

பொருளாதார மந்தநிலை 2020 – அதன் வடிவங்கள் எப்படி இருக்கும் ?

பொருளாதார மந்தநிலை 2020 – அதன் வடிவங்கள் எப்படி இருக்கும் ?

Pandemic and Economic Recession 2020 – Shapes of Recession

நாம் தற்போது கோவிட்-19 மற்றும் உலக பொருளாதார மந்தநிலையில் இருந்து வருகிறோம். இதன் தாக்கம் எவ்வளவு காலத்திற்கு இருக்கும் என யாராலும் உறுதியிட்டு சொல்ல முடியாது. இருப்பினும் சில பொருளாதார கணிப்புகள் இருக்கலாம். அடுத்த ஒரு வருடம் என சொல்லலாம், இரண்டு வருடங்கள் பிடிக்கலாம் அல்லது அடுத்த 18 மாதங்கள் என கணிக்கலாம்.

பொருளாதார மந்தநிலை(Economic Recession) என்பது வணிக ரீதியாக ஏற்படும் ஒரு சுழற்சி தான். இது ஒவ்வொரு குறிப்பிட்ட கால இடைவெளியில் நடைபெறக்கூடியதாக அமையும். அதே வேளையில், இந்த காலத்தில் தான் நடைபெறும் என ஒரு குறிப்பிட்ட வருடத்தை முன்னரே எடுத்து கொள்ள முடியாது. இந்த சுழற்சிக்கான காரணம் பலவாக இருக்கும். இருப்பினும், பொதுவாக தேவைக்கும், உற்பத்திக்குமான(Demand & Supply) இடைவெளி தான் இதனை தீர்மானிக்கிறது.

அதிகப்படியான உற்பத்தி ஏற்பட்டு, தேவை இல்லாவிடில் அதன் பாதிப்பு அதிகமாக இருக்கும். இது போல தேவையை பூர்த்தி செய்யாத உற்பத்தியும் பொருளாதார மந்தநிலை தான். “ஆசைப்படாமல் இருக்க வேண்டாம். ஆனால் அந்த ஆசைகளை ஒழுங்குமுறைப்படுத்துவது அவசியம். கட்டற்ற ஆசைகளும், அதன் நிர்வாக கோளாறுகளும் தான் நம்மை சிரமப்பட செய்கிறது. இது தான் பொருளாதாரத்திலும் “.

பொருளாதார மந்தநிலை அல்லது பொருளாதார வீழ்ச்சி என்பது சில மாதங்களிலிருந்து பல வருடங்கள் வரை ஏற்படலாம் என சொல்லிவிட்டோம். வீழ்ச்சியடைந்த பொருளாதாரம் மீண்டு வந்தடைய வேண்டுமல்லவா ? எந்தவொரு இறக்கத்தை சந்தித்த பொருளாதாரம் ஏற்றமடைந்து தான் ஆக வேண்டும். பொருளாதாரம் மந்தநிலை ஏற்பட்ட காலம் முதல் அது மீண்டது வரை உள்ள காலத்தை, பொருளாதார வல்லுநர்கள் ஒரு வடிவமாக(Shapes) மாற்றுகின்றனர்.

இதற்கான சரியான பொருளாதார கல்வி என்று எதனையும் அவர்கள் குறிப்பிடவில்லை. ஆனால் பொருளாதார மந்தநிலை காலங்களை நான்கு வடிவங்களாக பிரித்துள்ளனர். பொருளாதார வீழ்ச்சி வரலாற்றில் இதற்கு முன்பு ஆஸ்திரேலியாவில் 1930ம் ஆண்டு, ஐக்கிய ராஜ்ஜியம்(United Kingdom) மற்றும் அமெரிக்காவில் 2000ம் வருடம், கடந்த 2008ம் ஆண்டு ஏற்பட்ட உலக பொருளாதார வீழ்ச்சி என சில நினைவுகளை சொல்லலாம். வல்லரசு நாடுகளில் இது பொதுவாக ஏற்படுவதுண்டு. பின்பு உலக தாராளமயமாக்கலின் துணை கொண்டு, மற்ற நாடுகளிலும் இந்த பொருளாதார மந்தநிலை பரவி இருக்கும்.

பொருளாதார மந்தநிலை காலங்களில் தேவைக்கும், உற்பத்திக்குமான இடைவெளி அதிகமாக இருப்பது, வேலைவாய்ப்பின்மை விகிதம் அதிகரிப்பு, பணவீக்கம் கட்டுக்குள் இல்லாமல் செல்வது, நிறுவனங்கள் திவால் நிலைக்கு செல்வது என சில விளைவுகள் தென்படும்.

வடிவங்கள் என்ன ?

பொருளாதார மந்தநிலை வடிவங்கள் நான்கு.

  • V – Shaped
  • U – Shaped
  • W – Shaped
  • L – Shaped

முதல் வடிவில் (V-Shaped) பொருளாதார மந்தநிலை குறுகிய காலத்தில் மட்டுமே இருக்கும். வேலைவாய்ப்பின்மை அதிகரிப்பு அல்லது வங்கி வட்டி விகிதங்கள் அதிகமாக இருக்கும் நிலையில் இது போன்ற மந்தநிலை ஏற்படும். இதனை அரசு பொருளாதார ஊக்குவிப்பு மூலம் உடனடியாக சரிசெய்யும் நிலையில், பொருளாதாரம் விரைவாக ஏற்றம் பெறும். இதற்கான காலம் பொதுவாக சில மாதங்களாக இருக்கலாம்.

வேகமாக இறங்கிய பொருளாதாரம், அதே வேகத்தில் மேலே எழும்பும் – (V-Shaped)

இரண்டாம் வடிவில் (U-Shaped) பொருளாதார மந்தநிலை முதல்நிலை வடிவத்தை விட சற்று கூடுதல் காலங்கள் பிடிக்கும். ஒரு நாட்டின் பொருளாதார வளர்ச்சி தொடர்ச்சியாக சில காலாண்டுகள் மந்தநிலை செல்வதும், அதனை தொடர்ந்து ஏற்படும் வேலைவாய்ப்பின்மை, வட்டி விகிதம் மற்றும் பணவீக்க மாற்றங்கள் பல மாதங்கள் முதல் சில வருடங்கள் வரை நீடிக்கலாம்.

Economic Stagnation என்று சொல்லக்கூடிய நீண்டகால பொருளாதார மந்தநிலை தற்போது நம் நாட்டில் ஏற்பட்டுள்ளது எனலாம். கடந்த ஒன்றரை வருடத்திற்கு மேலாக நாட்டின் பொருளாதாரம் மந்தநிலையில் தான் உள்ளது. ஆம், தொடர்ச்சியாக ஏழு காலாண்டுகள் நாட்டின் மொத்த உள்நாட்டு உற்பத்தி(GDP growth) சரிவு. மீண்டெழுவதற்கான காலமும் இதன் அளவாக கருதப்படலாம். எனவே தான் இரண்டாம் வடிவம் U-Shaped ஆக குறிக்கப்பட்டுள்ளது.

ஒரு குளியலறைக்குள் சென்று விட்டு நீண்ட நேரம் வராவிட்டால் எப்படி இருக்கும் ? இந்த வடிவத்திற்கு பொருளாதார வல்லுநர்கள் குறிப்பிடும் வரிகள் இவை. சோம்பலாக நீண்ட நேரம் பொருளாதாரம் படுத்து கொள்ளும். பின்பு, விழித்தெழுந்து அதே வேகத்தில் மெதுவாக மீண்டு வரும்.

Recession shapes

W-Shaped வடிவம்:

இந்த வடிவத்தை இரட்டை மந்தநிலை என கூறுவதுண்டு. அமெரிக்காவில் 1980ம் கால கட்டங்களில் இது போன்ற நிலை இருந்துள்ளது. அதாவது முதல்நிலை வடிவத்தை போல பொருளாதாரம் விரைவாக ஏற்றம் பெற்றாலும், மறுபடியும் ஒரு பொருளாதார வீழ்ச்சியை சந்திக்கும். பிறகு, அதனிலிருந்து மீண்டு எழும். இந்த வடிவம் அதிக ஏற்ற-இறக்கத்தை கொண்டிருக்கும் காலமாக கணக்கிடப்படுகிறது. பங்குச்சந்தையில் ஏற்படும் ஏற்ற-இறக்கத்தை போல.

ஆனால், அடிக்கடி நிகழும் ஒரு முறையாக இந்த வடிவம் வரலாற்றில் சொல்லப்படவில்லை. விரைவாக விழுந்து மீண்டு எழுதல் மற்றும் மறுமுறையும் விழுந்து எழுதல் என்பது துணிச்சலான பொருளாதாரத்தை கொண்டிருக்கும்.

L – Shaped வடிவம்:

சொல்லப்பட்ட பொருளாதார மந்தநிலை வடிவங்களில் மோசமான வடிவம் இது தான். ஒரு பொருளாதாரம் கடுமையான வீழ்ச்சியை சந்தித்து, பின்பு மீண்டு வராமல் பல வருடங்கள் தட்டையான வளர்ச்சியை மட்டுமே கொண்டிருப்பது. ஜப்பான் நாட்டின் பொருளாதாரம் இது போன்று அமைந்துள்ளது. கடந்த 1950ம் வருடத்தில் ஏற்பட்ட பொருளாதார மந்தநிலை, சுமார் 30 வருடங்கள் எந்தவித பெரிய வளர்ச்சியையும் பெறாமல், தட்டை வடிவத்தில் சென்றுள்ளது குறிப்பிடத்தக்கது.

அமெரிக்காவிலும் இது போன்ற ஒரு நிகழ்வு சொல்லப்படுகிறது. அதாவது Dot com குமிழி 2000ம் ஆண்டு வாக்கில் உடைந்த பிறகு, 2013ம் ஆண்டு வரை அதன் பொருளாதாரம் பெரிய அளவில் ஏற்றம் பெறவில்லை. இந்த காலத்திற்கு இடையில் 2008ம் ஆண்டு பொருளாதார வீழ்ச்சியும் ஏற்பட்டுள்ளது கவனிக்கத்தக்கது. கடுமையான மந்தநிலையை கொண்டிருக்கும் இந்த வடிவம், வளரும் மற்றும் வளர்ந்த நாடுகளில் பெருத்த பயத்தை ஏற்படுத்தும்.

மேலே சொன்ன நான்கு வடிவங்கள் போக சந்தையில் சில வடிவங்கள் சொல்லப்பட்டாலும், அவை இந்த நான்கு வடிவங்களை ஒத்து தான் இருக்கிறது. தற்போது நடைமுறையில் உள்ள கொரோனா வைரஸ் தாக்கம் மற்றும் உலக பொருளாதார மந்தநிலை எந்த வடிவத்தை பெறுகிறது என சொல்லுங்கள் ?

கவனிக்க:

  • V-Shaped வடிவ மந்தநிலை 8-10 மாதங்கள் இருந்துள்ளது.
  • U-Shaped மந்தநிலை 18-24 மாதங்கள் எடுத்து கொண்டுள்ளது.
  • W-Shaped ஒரு வருடம் முதல் மூன்று வருடங்கள் வரை வரலாற்றில் பதிந்துள்ளது.
  • L – Shaped – மூன்று வருடங்கள் முதல் பல வருடங்கள் நீடிக்கும் கடுமையான பொருளாதார மந்தநிலை.

வாழ்க வளமுடன்,

நன்றி, வர்த்தக மதுரை 

www.varthagamadurai.com