Tag Archives: budget highlights

சுமாராக இருந்த பட்ஜெட், சூப்பராக மாறுமா ? – பட்ஜெட் தாக்கல் அறிக்கை 2021

சுமாராக இருந்த பட்ஜெட், சூப்பராக மாறுமா ? – பட்ஜெட் தாக்கல் அறிக்கை 2021

Budget India 2021 – Highlights & Insights

 

2021-22ம் நிதியாண்டுக்கான நாட்டின் பட்ஜெட் திங்கட்கிழமை அன்று(01-02-2021) நிதி அமைச்சர் திருமதி. நிர்மலா சீதாராமன் அவர்களால் தாக்கல் செய்யப்பட்டது. நாட்டின் முதல் காகிதமில்லா மின்னணு பட்ஜெட்டாக இது சொல்லப்பட்டது. ஒரு ரூபாய் பட்ஜெட்டாக இதனை கணக்கில் கொள்ளும் போது, மத்திய அரசின் வரவு-செலவினை எளிமையாக புரிந்து கொள்ளலாம்.

 

அரசின் வருவாய் பெரும்பாலும் வரி சார்ந்த வருவாயாக தான் இருக்கும். ஒரு ரூபாய் பட்ஜெட்(One Rupee Budget) வருவாயில் 15 பைசா சரக்கு மற்றும் சேவை வரியாகவும்(GST), வருமான வரி மூலம் 14 பைசாவும், நிறுவனங்களுக்கான வரி மூலம் 13 பைசாவும் வருமானமாக ஈட்டப்படுகிறது. கடன்கள் மற்றும் பிற பொறுப்புகள் மூலம் 36 பைசா மற்றும் தொழில் சார்ந்த கலால் வரி மூலம் 8 பைசாவும் பெறப்படுகிறது. சுங்க வரி மூலமான வருவாய் 3 பைசாவும், வரி அல்லாத வருவாய் 6 பைசாவாகவும், கடன் அல்லாத மூலதன ரசீதுகள் மூலம் கிடைக்கப்பெற்ற வருவாய் 5 பைசாவாகவும் உள்ளது.

 

செலவுகள் பிரிவில் காணும் போது அரசின் பெரும்பாலான செலவு வட்டி செலுத்துவதிலும், வரிகளை பகிர்ந்தளித்தல் மற்றும் மத்திய துறை சார்ந்த திட்டங்களுக்கு தான். வட்டி செலவுகள் 20 பைசாவாகவும், மாநிலங்களுக்கு வரிகளை பகிர்ந்தளிப்பதில் 16 பைசாவும் மற்றும் மத்திய அரசின் துறை சார்ந்த திட்டங்களுக்கு 14 பைசாவும் செலவிடப்படுகிறது. நிதி ஆணையம் மற்றும் பிற பரிமாற்றங்களுக்கு 10 பைசாவும், மானியங்களுக்கு 8 பைசாவும் சொல்லப்பட்டுள்ளது. ஓய்வூதியத்திற்கு 5 பைசாவும், பாதுகாப்பு துறைக்கு 8 பைசாவும் மற்றும் இதர செலவுகளுக்கு 10 பைசாவாக உள்ளது.

 

கடந்த ஆண்டு பட்ஜெட்டில் பாதுகாப்பு துறைக்கு 4.72 லட்சம் கோடி ரூபாய் சொல்லப்பட்ட நிலையில் இம்முறை கூடுதலாக 1.5 சதவீதம் என்ற அளவில் குறிப்பிடப்பட்டுள்ளது. 2021-22ம் நிதியாண்டுக்கான மூலதன செலவு 19 சதவீதம் அதிகரிக்கப்பட்டுள்ளது. அதே வேளையில் விவசாய நலனுக்காக சுமார் 6 சதவீதம் அதிகமாக ஒதுக்கப்பட்டுள்ளது. 

 

சாலை மற்றும் ரயில் போக்குவரத்துக்காக முறையே ரூ. 1.18 லட்சம் கோடி மற்றும் ரூ.1.10 லட்சம் கோடி ஒதுக்கீடு செய்யப்பட்டுள்ளது. பாதுகாப்பு துறைக்கு 4.78 லட்சம் கோடி ரூபாயும், உள்நாட்டு விவகாரங்களுக்கு ரூ. 1.66 லட்சம் கோடி மற்றும் கிராமப்புற வளர்ச்சிக்காக ரூ.1.33 லட்சம் கோடி என சொல்லப்பட்டுள்ளது. கல்வி வளர்ச்சிக்கு 93,224 கோடி ரூபாயும், சுகாதார துறைக்கு 73,932 கோடி ரூபாயும் ஒதுக்கப்பட்டுள்ளது.

 

வீட்டு வசதி மற்றும் நகர்ப்புற மேம்பாட்டுக்காக 54,580 கோடி ரூபாய் மற்றும் நுகர்வோர், உணவு மற்றும் பொது விநியோக தேவைகளுக்கு 2.56 லட்சம் கோடி ரூபாயும் பட்ஜெட் தாக்கலில் அறிவிக்கப்பட்டுள்ளது. சுகாதாரம் மற்றும் மருத்துவம் சார்ந்த திட்டங்களுக்கு கணிசமான தொகை சொல்லப்பட்டிருந்தாலும், வளர்ந்த மற்றும் வேகமாக வளரும் நாடுகளில் நம் நாட்டின் பங்கு மிகவும் குறைவான அளவில் தான் உள்ளது. நாட்டின் மொத்த உள்நாட்டு உற்பத்தியில் இதன் பங்களிப்பு வெறும் ஒரு சதவீதம் மட்டுமே.

 

நடப்பு நிதியாண்டில் நிதி பற்றாக்குறையாக மொத்த உள்நாட்டு உற்பத்தியில் 9.5 சதவீதமாக இருக்கும் என தெரிவிக்கப்பட்டுள்ளது. 2020-21ம் நிதியாண்டின் அடுத்த இரு மாதங்களுக்கான செலவுகளுக்காக அரசு சுமார் 80,000 கோடி ரூபாய் கடன் வாங்க உள்ளது. அடுத்த நிதியாண்டில் ரூ.12 லட்சம் கோடியை கடனாக பெற உள்ளதாக நிதியமைச்சர் கூறியுள்ளார். 2021-22ம் நிதியாண்டின் மொத்த செலவுகள் 34.83 லட்சம் கோடி ரூபாயாக இருக்கலாம் என நிர்ணயிக்கப்பட்டுள்ளது.

 

அன்னிய முதலீட்டை காப்பீடு துறையில் அதிகரிப்பது, சாலை மற்றும் ரயில் போக்குவரத்துக்கான ஒதுக்கீடு, வங்கிகளில் மறு மூலதனமாக்கல், வங்கிகளில் காணப்படும் வாராக்கடனுக்கான தீர்வு, பொதுத்துறை நிறுவனங்களின் மூலம் பங்கு விலக்கல் நடவடிக்கை ஆகியவை அரசுக்கான நிதி சுமையை குறைக்கலாம். 

 

நேரடி வரி(Direct Tax) சார்ந்த நடவடிக்கைகளில் பெரிதான மாற்றம் எதுவும் சொல்லப்படவில்லை. 75 வயதுக்கு மேற்பட்ட மூத்த குடிமக்களுக்கான வருமான வரி தாக்கலில் சலுகை அளிக்கப்பட்டுள்ளது. சொல்லப்பட்ட வயதுக்கு மேற்பட்டவர்கள் வரி தாக்கல் செய்ய தேவையில்லை. அதே வேளையில் வருமான வரி சட்டத்தின் 194பி என்ற பிரிவின் படி ஓய்வூதியதாரர்களுக்கான வரி பிடித்தம் மற்றும் வட்டி வருவாய்க்கான டி.டி.எஸ். பிடித்ததை வங்கிகள் மேற்கொள்ளுமாறு சொல்லப்பட்டுள்ளது.  

 

வெளிநாட்டு வாழ் இந்தியர்கள் உள்நாட்டிற்கு திரும்பும் போது, அவர்களின் வெளிநாட்டு ஓய்வூதிய கணக்குகளில் அவர்கள் சம்பாதித்த வருமானம் தொடர்பான சிக்கல்கள் உள்ளன. இதன் காரணமாக அவர்கள் இரட்டை வரி விதிப்பு முறைக்கு ஆளாக நேரிடுவதுண்டு. இந்த சிக்கல்களை நீக்குவதற்கான திட்டம் உள்ளதாக நிதி அமைச்சர் கூறியுள்ளார். 

 

இனி மேல் வருமான வரி தாக்கல் செய்யும் போது, வங்கிகளின் டி.டி.எஸ். பிடித்தம் மற்றும் படிவம் 16ன் கீழ் உள்ள விவரங்கள் தானியங்கியாக சொல்லப்படுவது போல, பட்டியலிடப்பட்ட பங்குகள் மற்றும் டிவிடெண்ட் வருவாய் போன்ற மூலதன ஆதாயம் சார்ந்த விவரங்கள் முன்னரே நிரப்பப்பட்டிருக்கும். இதனை பற்றி நாம் ஏற்கனவே(பட்ஜெட் தாக்கலுக்கு முன்பாக) மற்றொரு பதிவில் சொல்லியிருந்தோம்.  

 

2020-21ம் நிதியாண்டில் மத்திய அரசு நிர்ணயித்த பங்கு விலக்கல் நடவடிக்கை மூலமான இலக்கு ரூ.2.1 லட்சம் கோடியாக இருந்த நிலையில், கொரோனா பெருந்தொற்று காரணமாக சுமார் 15,000 கோடி ரூபாய் அளவில் மட்டுமே ஈர்க்கப்பட்டுள்ளது. இதனை தொடர்ந்து 2021-22ம் நிதியாண்டில் பங்கு விலக்கல் இலக்கு தொகை ரூ.1.75 லட்சம் கோடியாக சொல்லப்பட்டுள்ளது. 

 

விவசாய உட்கட்டமைப்பு மற்றும் மேம்பாட்டு செஸ்(AIDC) என்ற வரி விதிப்பு எரிபொருட்களுக்கு(Petrol & Diesel) சொல்லப்பட்டுள்ளது. காப்பர் கழிவுகளுக்கான(Copper Scrap) வரி குறைக்கப்பட்டிருந்தாலும், சோலார் இன்வெர்ட்டர்கள் மற்றும் சூரிய விளக்குகளுக்கான வரி மூன்று முதல் நான்கு மடங்கு உயர்த்தப்பட்டுள்ளது. பெரும்பாலான பொருட்கள் மற்றும் சேவைகளுக்கான வரி விதிப்பு இன்று(02-02-2021) முதல் அமலுக்கு வருகிறது.

 

மகளிர் மற்றும் குழந்தை வளர்ச்சிக்கான ஒதுக்கீட்டில் பெரிதான தொகை எதுவும் சொல்லப்படவில்லை. அவை பெரும்பாலும் ஒரு குழுவின் கீழ் இணைக்கப்பட்டுள்ளது எனலாம். பொதுவாக ஒவ்வொரு துறையின் கீழ் சொல்லப்படும் பட்ஜெட் ஒதுக்கீட்டு தொகை அந்தந்த நிதியாண்டில் பெறப்படுகிறதா என்று கேள்வி எழுப்பினால் அது சந்தேகமே. 

 

அரசுக்கான வருவாய் சரியான நிலையில் வந்தடைந்து, செலவுகள் சொல்லப்பட்ட அளவில் கட்டுப்படுத்தப்பட்டால் மட்டுமே அனைத்து துறைக்கான ஊக்கமும் சாத்தியமாகும். நாம் வீட்டில் போடும் பட்ஜெட் போலத்தான் நாட்டின் பட்ஜெட் தாக்கலும். பட்ஜெட்டில் துண்டு விழாமல் இருக்க போவதில்லை. அதே நேரத்தில், கடன் தன்மை அதிகரிப்பதை எச்சரிக்கையாக கையாள வேண்டும்.

 

அரசு மீண்டும் அதிகப்படியான கடனை பெற போவது, உட்கட்டமைப்புக்கான நிலங்களை கையகப்படுத்துவது, அரசு பொதுத்துறை நிறுவனங்களில் பங்கு விலக்கல், வங்கிகளின் வாராக்கடனுக்கான புதிய திட்டம், தனியார் மயம் மற்றும் தனியார் முதலீடு ஆகியவை வரக்கூடிய காலங்களில் சவாலான விஷயமாக அமையக்கூடும். 

 

பட்ஜெட் தாக்கலின் போது இந்திய பங்குச்சந்தையில் காணப்பட்ட ஏற்றத்திற்கு அன்றைய உலக சந்தை குறியீடுகளும் முக்கிய காரணமாக அமைந்திருந்தன. ஹாங்காங், தைவான், தென் கொரியா மற்றும் இந்தோனேஷியா நாடுகளின் பங்குச்சந்தை குறியீடுகள் இரண்டு சதவீதத்திற்கும் மேல் ஏற்றம் பெற்றிருந்தது குறிப்பிடத்தக்கது. மதிய வேளையில் வர்த்தகமாகிய புட்சீ(FTSE) குறியீடும் ஏற்றத்தில் தான் துவங்கின. சுமாரான பட்ஜெட், வரும் நாட்களில் சூப்பரான பட்ஜெட்டாக மாறுமா ? இல்லையெனில், நடுத்தர மக்களிடையே பணவீக்கத்தை அதிகரித்து மீண்டும் ஒரு மந்தநிலையை ஏற்படுத்துமா என்பதனை பொறுத்திருந்து பார்ப்போம். 

 

வாழ்க வளமுடன்,

 

நன்றி, வர்த்தக மதுரை 

 

www.varthagamadurai.com



பொது பட்ஜெட் 2019 – அறிக்கை துளிகள்

பொது பட்ஜெட் 2019 – அறிக்கை துளிகள் 

Union Budget 2019 – Highlights

 

ஐந்து ட்ரில்லியன் டாலர்($5 Trillion Economy) பொருளாதார இலக்கு, கிராமப்புற வாழ்வை மேம்படுத்துதல், சாலை மற்றும் உட்கட்டமைப்பு சேவையை அதிகரித்தல் என பல இலக்குகள் நடப்பு மத்திய அரசினால் கூறப்பட்டுள்ளது. இதனை சார்ந்து நேற்று பட்ஜெட் தாக்கலும் முடிந்து விட்டது.

 

நேற்றைய பொது பட்ஜெட் 2019 – தாக்கலை நிதி அமைச்சர் திருமதி. நிர்மலா சீதாராமன் வழங்கினார். நடப்பு 2019ம் வருடத்தின் இரண்டாவது மற்றும் இறுதி பட்ஜெட் இதுவாகும். பட்ஜெட்டில் பல அம்சங்கள் சொல்லப்பட்டிருந்தாலும் நிறை, குறைகள் சமமாக உள்ளதாக பொருளாதார வல்லுநர்கள் கூறுகின்றனர்.

//pagead2.googlesyndication.com/pagead/js/adsbygoogle.js

(adsbygoogle = window.adsbygoogle || []).push({});

2013-14ம் நிதியாண்டில் 11வது பெரிய பொருளாதார நாடாக இருந்த இந்தியா, தற்போது உலகின் 6வது பெரிய பொருளாதார நாடாக உருவாகியுள்ளது. நடப்பு கணக்கு பற்றாக்குறை(Current Account Deficit) கடந்த வருடம் மொத்த உள்நாட்டு உற்பத்தியில்(GDP) 2.1 சதவீதமாக உள்ளது. இது 2013-14ம் நிதியாண்டில் 5.6 சதவீதமாக இருந்துள்ளது.

 

கடந்த நிதியாண்டில் பெறப்பட்ட அந்நிய நேரடி முதலீடு(FDI) சுமார் 64.4 பில்லியன் டாலர்கள். மொத்த உள்நாட்டு உற்பத்தியில் நடப்பில் நிதி பற்றாக்குறை(Fiscal Deficit) 3.3 சதவீதமாக கூறப்பட்டுள்ளது. இது கடந்த 2013-14ம் நிதியாண்டில் 4.5 சதவீதமாக இருந்தது.

 

சாலை மற்றும் கடல்வழி போக்குவரத்தை மேம்படுத்த அதற்கான திட்டங்கள் சொல்லப்பட்டுள்ளன. வான் வழி போக்குவரத்தில் சேவையை சிறப்பாக செய்யவும், ரயில் சேவையை மேம்படுத்தவும் நிதிகள் ஒதுக்கப்பட்டுள்ளன. ரயில்வே உட்கட்டமைப்புக்காக ரூ. 50 லட்சம் கோடி நிதி ஒதுக்கப்படும் என பட்ஜெட்டில் சொல்லப்பட்டுள்ளது. இது 2018ம் ஆண்டு முதல் 2030 வரையிலான காலத்திற்கு எனவும், ரயில்வே துறையில் அரசு-தனியார் கூட்டு(PPP) ஒப்பந்தம் மூலம் திட்டங்கள் நிறைவேற்றப்படும் எனவும் கூறப்பட்டுள்ளது.

 

சிறு,குறு மற்றும் நடுத்தர தொழில்களை ஊக்குவிக்க அரசு பல்வேறு திட்டங்களை வகுத்துள்ளதாகவும், இதற்காக நடப்பு நிதியாண்டில் தற்போது ரூ.350 கோடி ஒதுக்கப்பட்டுள்ளது. புதிய தொழில்முனைவை ஊக்குவிக்க தூர்தர்சன் மூலம் புதிய சேனல்(New Startup TV Channel) தொடங்கப்படும்.

 

2019-20ம் நிதியாண்டிற்கு பொதுத்துறை நிறுவனங்களின் பங்கு விலக்கல்(Disinvestment) தொகை ரூ. 1.05 லட்சம் கோடியாக இலக்கு நிர்ணயம் செய்யப்பட்டுள்ளது. ஒரு ரூபாய் பட்ஜெட்டில் கார்ப்பரேட் நிறுவனங்களின் வரி மூலம் அரசுக்கு 21 பைசா வருமானமாக கிடைத்துள்ளது. அதே வேளை செலவினங்களில் வரிகள் மூலம் 23 பைசாவை மத்திய, மாநில அரசுகள் பங்கிட்டுள்ளன.

 

ஐந்து சதவீதம் பென்ஷன் திட்டத்திற்கும், 8 சதவீதம் மானியத்திற்கும் மற்றும் 9 சதவீத தொகை பாதுகாப்பு துறைக்கும் செலவிடப்பட்டுள்ளது. கடந்த நிதியாண்டில் நேரடி வரி மூலம்(Direct Tax) அரசுக்கு 11.4 லட்சம் கோடி ரூபாய் வருமானமாக கிடைத்துள்ளது.

 

திறந்த மலம் கழித்தல் இல்லா (Open defecation free) திட்டத்தின் மூலம் 5.6 லட்சம் கிராமங்கள் பயன்பெற்றுள்ளன. இதுவரை 95 சதவீத நகரங்கள் இதன் மூலம் பயனடைந்துள்ளன. நாடு முழுவதும் உள்ள 45,000க்கும் மேற்பட்ட பொது கழிப்பிடங்களின் இடஅமைவு கூகுள் மேப்பில்(Google map) பதிவு செய்யப்பட்டுள்ளது.

 

கிராமப்புற வாழ்வை மேம்படுத்த அனைத்து வீடுகளுக்கும் மின்சாரம் மற்றும் குடிநீர் வழங்குதலை உறுதி செய்வது, சாலைகளை இணைப்பது மற்றும் விவசாயிகளுக்கு ஆதரவு தொகையை உறுதி செய்வதென பட்ஜெட்டில் கூறப்பட்டுள்ளது.

 

முத்ரா(Mudra Loan Scheme) திட்டத்தின் மூலம் பயன் அடைந்தவர்களில் 70 சதவீதம் பெண்களே. 7 கோடிக்கும் அதிகமான சமையல் எரிவாயு இணைப்புகள் இதுவரை நாடு முழுவதும் வழங்கப்பட்டுள்ளது. சிறு கடைகள் மற்றும் சில்லறை வியாபாரிகளின் ஓய்வு காலத்தை பாதுகாக்க குறைந்தபட்ச பென்ஷன் திட்டம், இளைஞர்களின் கல்வித்திறனை மேம்படுத்த திட்டங்கள் சொல்லப்பட்டுள்ளது.

 

நீர் ஆதாரத்தை பாதுகாக்கவும், டிஜிட்டல் பண பரிவர்த்தனைக்கு மாறவும், மாசில்லா நகரங்களை உருவாக்க மின்சார வாகனங்களை ஊக்குவித்தல் என பல விஷயங்கள் நேற்றைய பட்ஜெட்டில் சொல்லப்பட்டுள்ளது. பட்ஜெட் 2019க்கான நிறை மற்றும் குறைகளை அடுத்து வரும் பதிவில் காண்போம்.

 

வாழ்க வளமுடன்,

 

நன்றி, வர்த்தக மதுரை 

 

www.varthagamadurai.com

 

 

 

பட்ஜெட் 2019 அறிக்கை துளிகள்

பட்ஜெட் 2019 அறிக்கை துளிகள்

Budget 2019 Highlights (FY 2019-20)

 

பிப்ரவரி ஒன்றாம் தேதி நாட்டின் இடைக்கால பட்ஜெட்டை நிதி அமைச்சர் பியூஸ் கோயல் நாடாளுமன்றத்தில் சமர்ப்பித்தார். வருமான வரி சார்ந்த தள்ளுபடிகளும், பிரதம மந்திரியின் கிசான் திட்டத்தின் மூலம் விவசாயிகளுக்கு ஆண்டுக்கு ரூ.6000 /- வழங்க உள்ளதாகவும் கூறப்பட்டது.

//pagead2.googlesyndication.com/pagead/js/adsbygoogle.js

(adsbygoogle = window.adsbygoogle || []).push({});

பட்ஜெட்டை ஒரு ரூபாய்(One Rupee Budget) வரவு-செலவில் கணக்கிடும் போது, வரவு தொகையில் 21 பைசா ஜி.எஸ்.டி.(GST) வரி மூலமும், 21 பைசா நிறுவனங்களின் வரி மூலமும், வருமான வரியில்(Income Tax) 17 பைசாவும் கிடைத்துள்ளதாக சொல்லப்பட்டது. செலவு தொகையில் 23 பைசா வரி வருவாயில் மாநிலங்களுடன் பங்கு பிரித்தது(Shares of Taxes), அரசு செலுத்த வேண்டிய கடனுக்கான வட்டி ஒரு ரூபாயில் 18 பைசாவும், மானியங்களுக்கு 9 பைசாவும் செலவிடப்பட்டுள்ளது.

 

மத்திய நிதியுதவி திட்டத்தில் 9 பைசாவும், மத்திய துறையின்(Central Sector) திட்டங்களுக்கு 12 பைசாவும், ஓய்வூதியத்திற்கு(Pension) 5 பைசாவும், ராணுவத்திற்கு 8 பைசாவும் செலவில் உள்ளது. 2019-20ம் நிதியாண்டில் நாட்டின் நிதி பற்றாக்குறை(Fiscal Deficit) ரூ.7.03 லட்சம் கோடியாக இருக்கும் என மதிப்பிடப்பட்டுள்ளது. இது நடப்பு வருடத்தில் ரூ. 6.34 லட்சம் கோடியில் முடிவடையலாம் என மறுமதிப்பீடு செய்யப்பட்டிருந்தது.

 

இடைக்கால பட்ஜெட் 2019ல் அறிவிக்கப்பட்ட பல விஷயங்களில் சில துளிகள் இங்கே,

 

  • அமைப்புசாரா துறையில்(Unorganized) பணிபுரியும் தொழிலாளிகளுக்கு பிரதம மந்திரியின் யோகி மாந்தன்(Yogi Maandhan) திட்டத்தின் மூலம் மாதாமாதம் ரூ. 3000/- பென்ஷன் வழங்கப்படும். இந்த துறையில் மாதம் ரூ. 15,000 வரை சம்பளம் பெறும் தொழிலாளிகள் வரை பயனடைவர். இது ஒரு ஓய்வூதிய திட்டம், தொழிலாளிகளின் சார்பாக ஒவ்வொரு மாதம் குறிப்பிட்ட தொகை பிடித்தம் செய்யப்படும், அதே குறிப்பிட்ட தொகையை அரசும் பங்களிக்கும். 60 வயதின் முடிவில் அவர்களுக்கான ஓய்வூதியம், சேமிப்பிக்கப்பட்ட திட்டத்தின் மூலம் அளிக்கப்படும்.

 

  • கிசான்(Kisan) திட்டத்தின் மூலம் 2 ஹெக்டருக்கு குறைவான நிலம் உள்ள விவசாயிகளுக்கு ரூ.6000 /-(ஆண்டுக்கு) நேரடியாக ஆதரவளிக்கும் தொகை.

 

  • டிஜிட்டல் இணைப்பின் வாயிலாக ஒரு லட்சத்திற்கும் மேற்பட்ட கிராமங்களை இணைக்கும் திட்டம்.

 

  • ஒரு நிதி வருடத்தில் ரூ. 5 லட்சம் வரை வருமானம் பெறுபவர்களுக்கு வருமான வரியில் முழுமையான வரி தள்ளுபடி(Full Tax Rebate).

 

  • வருமான வரியில் நிலைக்கழிவு(Standard Deduction) ரூ. 40,000/- லிருந்து 50,000/- ரூபாயாக உயர்த்தப்பட்டுள்ளது.

 

  • வங்கி மற்றும் அஞ்சலக வைப்பு தொகைக்கான வட்டி வருமான(Interest income) வரம்பு ரூ.10,000 லிருந்து 40,000 /- ரூபாயாக அதிகரிக்கப்பட்டுள்ளது.

 

  • நேரடி வரி நடைமுறை(Direct Taxes) எளிமையாக்கப்பட்டுள்ளது. வருமான வரி செலுத்துவோர் அறிக்கை தாக்கல் செய்த 24 மணி நேரத்தில் வரவு பெறும் வசதி(Refund).

 

  • சிறு மற்றும் நடுத்தர நிறுவனங்கள் வாங்கும் கடனில் (ஒரு கோடி ரூபாய்) 2 சதவீத வட்டி சலுகை.

 

  • பாதுகாப்பு துறைக்கு ஒதுக்கப்பட்ட பட்ஜெட் தொகை முதன்முறையாக ரூ. 3 லட்சம் கோடியை தாண்டியுள்ளது.

 

  • சுங்கத்துறையில் மேற்கொள்ளும் பரிவர்த்தனைகளை டிஜிட்டல் மயமாக்கும் முடிவு.

 

  • மீன்பிடிப்புக்கு(Fisheries) தனி துறை அமைக்கப்படும். இந்திய திரைப்படங்களுக்கு ஒற்றை சாளர முறையை நடைமுறைப்படுத்தல் மற்றும் திரைப்படங்களை திருடுவதை தடுக்க புதிய ஒளிப்பதிவு சட்டம் கொண்டுவரப்படும்.

 

நாட்டின் பொருளாதாரம் அடுத்த ஐந்து வருடங்களில் 5 டிரில்லியன் அமெரிக்க டாலர்களையும், அடுத்த பத்து வருடங்களில் 10 டிரில்லியன் அமெரிக்க டாலர்களை(10 Trillion Dollar Indian Economy) கொண்ட நாடாகவும் இருக்கும் என நிதி அமைச்சர் கூறியுள்ளார். மேலும் அவர் கூறுகையில், ‘ இந்த பட்ஜெட் இடைக்கால பட்ஜெட் அல்ல, நாட்டின் வளர்ச்சிக்கு உண்டானது ‘.

 

வாழ்க வளமுடன்,

 

நன்றி, வர்த்தக மதுரை

 

www.varthagamadurai.com