ரெப்போ வட்டி விகிதத்தில் மாற்றமில்லை, எஸ்.பி.ஐ. வங்கி வட்டி விகிதங்கள்  எப்படி ?

No Change in REPO Rate, Deposit Interest Rates in State Bank of India

கடந்த வாரம் நடைபெற்ற மத்திய நிதிக்கொள்கை குழு கூட்டத்தில்(MPC)  வங்கிகளுக்கான ரெப்போ வட்டி விகிதத்தில் மாற்றமில்லை எனவும், முந்தைய 4 சதவீத ரெப்போ வட்டி விகிதமே தொடரும் எனவும் மத்திய ரிசர்வ் வங்கி தெரிவித்திருந்தது. ரிவர்ஸ் ரெப்போ விகிதம் 3.35 சதவீதமாகவும், விளிம்பு நிலை விகிதம் (Marginal Standing Facility Rate) 4.25 சதவீதமாகவும் சொல்லப்பட்டுள்ளது.

எதிர்பாராத நிலையில் செல்லும் சில்லரை விலை பணவீக்கம், 2020-21ம் நிதியாண்டில் நாட்டின் பொருளாதார வளர்ச்சி எதிர்மறையாக (-9.5) இருக்கும் எனவும் மத்திய வங்கி சுட்டி காட்டியுள்ளது. அதே நேரத்தில் 2021-22ம் நிதியாண்டில் நல்லதொரு வளர்ச்சியை எதிர்பார்ப்பதாக சொல்லியுள்ளது.

ரெப்போ விகிதத்தில்(REPO rate) மாற்றம் எதுவுமில்லை என சொல்லப்பட்ட நிலையில், நாட்டின் மிகப்பெரிய பொதுத்துறை வங்கியான பாரத ஸ்டேட் வங்கியில் நிலவும் வட்டி விகிதங்களை பார்ப்போம். ஏற்கனவே சேமிப்பு கணக்குக்கான வட்டி விகிதம் குறைக்கப்பட்டுள்ளது கவனிக்கத்தக்கது. சேமிப்பு கணக்கில் உள்ள தொகைக்கான வட்டி விகிதம் 2.70 சதவீதமாக (ஆண்டுக்கு) உள்ளது.

சிறு சேமிப்பு கணக்கின் கீழ் 4 வழங்கப்படும் வட்டி 4 சதவீதமாகவும், பரஸ்பர நிதிகளில் கிடைக்கப்பெறும் லிக்விட் பண்டுகளின் வட்டி விகிதம் 4 சதவீதத்திற்கு மேலாக இருக்கும் நிலையில், வங்கி சேமிப்பு கணக்கில் சொல்லப்பட்ட விகிதம் மிக குறைவே. இருப்பினும், பண பரிமாற்றத்திற்கு பெரும்பாலும் வங்கி சேமிப்பு கணக்கை சார்ந்து தான் இருக்க வேண்டியுள்ளது.

டெபாசிட் முறையில் 45 நாட்களுக்கு (7 Days to 45 Days) குறைவான காலத்திற்கு வழங்கப்படும் வட்டி விகிதம் 2.90 சதவீதமாக உள்ளது. மூத்த குடிமக்களாக இருப்பின், 3.40 சதவீதமாக இருக்கிறது. 46 நாட்கள் முதல் 180 நாட்களுக்கு குறைவான காலத்திற்கு 3.90 சதவீதமும், மூத்த குடிமக்கள் எனில் 4.40 சதவீதமாகவும் சொல்லப்பட்டுள்ளது.

ஆறு மாதம் முதல் ஒரு வருடத்திற்கு குறைவான டெபாசிட் காலத்திற்கு 4.40 சதவீதமாக உள்ளது. இது மூத்த குடிமக்களுக்கு 4.90 சதவீதமாக கூறப்பட்டுள்ளது. ஒரு வருடத்திற்கு மேலான, அதே வேளையில் இரண்டு வருடத்திற்கு குறைவான காலத்திற்கு 4.90 சதவீதமும், 2-3 வருடங்களுக்கு 5.10 சதவீதமும் மற்றும் 3 முதல் 5 வருடங்களுக்கான வட்டி விகிதம் 5.30 சதவீதமாகவும் உள்ளது.

ஸ்டேட் வங்கியில்(SBI) ஐந்து வருடம் முதல் 10 வருடங்கள்  வரையிலான காலத்திற்கு 5.40 சதவீதம் டெபாசிட் வட்டி விகிதமாக உள்ளது. மூத்த குடிமக்களுக்கு இது 6.20 சதவீதமாக உள்ளது. கடனுக்கான வட்டி விகிதம் குறைந்து வரும் நிலையில், டெபாசிட் தாரர்களுக்கு கிடைக்கப்பெறும் வட்டி போதுமானதாக இருப்பதில்லை. நடப்பில் நாட்டின் சில்லரை விலை பணவீக்கம் சராசரியாக 6 சதவீதமாக இருந்து வருகிறது. இந்நிலையில் வங்கி டெபாசிட் வட்டி விகிதம் சாதகமான அம்சமாக இல்லை. ஒரு வருடத்திற்கு மேலான டெபாசிட்களுக்கு, ரிஸ்க் தன்மையை புரிந்து கொண்டு மியூச்சுவல் பண்டுகளில் காணப்படும் கடன் சார்ந்து பண்டுகளில் முதலீடு செய்யும் போது, கணிசமான வட்டி வருவாயை பெறலாம்.

வாழ்க வளமுடன்,

நன்றி, வர்த்தக மதுரை

www.varthagamadurai.com